Titiraki Mairouia Taani Wareware

E koreia te abotoro Bauro bwa Iehova e “na aki kariaia bwa kam na kaririaki n ae riaon ami konaa.” (1Kor. 10:13) E nanonaki n aei bwa e a kamani bairei baika ti kona ni karaoi Iehova ao imwina e rinei kataaki aika a na riki nakoira?

Iangoa ae nanonaki n te iango anne. E titiraki te tari te mwaane temanna ae iai natina ae bakabureia: ‘E a kamani baireia Iehova bwa I kona n nanomwaaka ma buu ngkana e bakabureia natira? E riki anne ibukina bwa e motikia te Atua ae ti kona n nanomwaaka iai?’ Iai bukina ae riai ae ti na kakoauaa bwa Iehova e kaangaraoi bwaai aika riki ni maiura n aaro aika okoro?

N iaiangoan riki ana taeka Bauro n 1 I-Korinto 10:13, ti kairaki iai bwa ti na iangoa aei: E aki taekinaki n te Baibara bwa ti riai ni kakoauaa ae e a kamani bairei Iehova baika ti kona ni karaoi, ao imwina e rinei kataaki aika a na riki nakoira. Ti na maroroakini bukina aika aua ngkai ti kona n iangoa anne.

Te moan, e angania aomata Iehova te bwaintituaraoi ae te inaomata n rinea ae a na karaoia. E tangirira bwa ti na rinea kawaira ae ti na toua. (TuaKau. 30:19, 20; Iot. 24:15) Ngkana ti rinea te kawai ae eti, ti kona n onimakina Iehova bwa e na kairirira iai. (TaeRab. 16:9) Ma ngkana ti rinea te kawai ae bure, ti na taia naba uaana. (IKar. 6:7) Ngkana ngaia bwa Iehova e rinei kataaki aika a na riki nakoira, tiaki bwa e a kakeaa iai bongan te bwaintituaraoi ae inaomatara n rinea ae ti na karaoia?

Te kauoua, e aki kamanoira Iehova n “te tai are a riki iai baika aki kantaningaaki.” (TeMin. 9:11) A kona n riki kabuanibwai aika kakaiaki ma mwia aika kananokawaki ibukina bwa ti mena n te tai ao te tabo ae iai te tekebuaka iai. E taekina Iesu te kabuanibwai are e riki nakoia 18 aomata ake a mate ngke e bwakariia te taua, ao e kaotia bwa bon tiaki nanon te Atua bwa a na mate aomata akanne. (Ruka 13:1-5) E riai iangoan te Atua bwa e a kamani baireia bwa antai ae e na maiu ao ni mate imwini baika karina n riki?

Te katenua, ti bane n irekereke ma kananououaan etin arora. Uringnga bwa Tatan e kananououaa etin aroia naake a beku iroun Iehova, ngke e taekinna bwa ti na aki teimatoa ni kakaonimaki ni koaua nakon Iehova, ngkana ti kaaitara ma kataaki. (Iobi 1: 9-11; 2:4; TeKao. 12:10) Ngkana ngaia bwa e kamanoira Iehova mani kataaki tabeua ibukina bwa e kakoauaa ae a riaon ara konaa, tiaki bwa e a kakoauaaki riki iai ana bukibuki Tatan ae ti beku iroun te Atua ibukini kakabwaiaakira?

Te kaaua, e aki kani kaman atai bwaai ni kabane aika riki nakoira Iehova. E kaotaki n te iango are e a kaman rinei te Atua kataaki aika a na riki nakoira, bwa E riai n atai bwaai ni kabane ibukira n taai aika a na roko. Ma akea te aeka n iango anne n te Baibara. E boni kona te Atua n atai kanoan taai aika a na roko. (Ita. 46:10) Ma e kaotaki n te Baibara bwa e karaua n rinei baike e na kaman atai ibukin taai aika a na roko. (KBwaai 18:20, 21; 22:12) E tatangira ao n raoiroi Iehova, ngaia are e aki kan uruana inaomatara n rinea ae ti na karaoia.—TuaKau. 32:4; 2Kor. 3: 17.

Ti na kangaa ngkanne n ota n ana taeka Bauro aei: ‘E na aki kariaia te Atua bwa kam na kaririaki n ae riaon ami konaa’? E kabwarabwaraa ikai Bauro te bwai are e karaoia Iehova, tiaki imwaini kataakira, ma i nanon ara tai ni kataaki.a A karauaki nanora n ana taeka te abotoro bwa ngkana ti kaaitara ma kataaki, e na kateimatoaira Iehova ngkana ti onimakinna. (TaiAre. 55:22) A boto ana taeka ni kabebetenano Bauro i aoni koaua aika uoua aika kakawaki.

Te moan, kataaki aika riki nakoira a ‘rinanona naba aomata tabemwaang.’ Ngaia are a rinanon naba anne aomata. A aki riaon ara konaa kataaki akanne ngkana ti onimakina te Atua. (1Bet. 5: 8,9) N 1 I-Korinto 10:13, ao e nanoni Bauro kataaki ake a kaaitarai tibun Iteraera n te rereua. (1Kor. 10: 6-11) Akea i buakoni kataaki akanne ae riaon aia konaa aomata ke ae riaon aia konabwai tibun Iteraera ake a kakaonimaki. Aua ana tai Bauro n taekina ae a aki ongeaba “tabeman i buakoia.” E kananokawaki bwa a kariaia tabeman tibun Iteraera tangirani baika bure ibukina bwa a kabwaka n onimakina te Atua.

Te kauoua, “e kakaonimaki te Atua.” E kaotaki n rongorongon aron te Atua nakoia ana aomata bwa e tangiriia ni koaua “te koraki ake a tangiria ao a kawakin ana tua.” (TuaKau. 7:9) E kaotaki naba n te rongorongo anne bwa e kakororaoi ana berita te Atua n taai nako. (Iot. 23:14) N iangoan rongorongoni kakaonimakina rimoa, a a kona naake a tangiria ao n ongeaba irouna n onimakinna bwa e na kakororaoa ana berita ane uoua iterana anne, ni kaineti ma kataaki ake a kona ni kaaitarai: (1) E na aki kariaia rikiraken te kataaki teuana ni karokoa ae e a riaon aia konaa ao (2) ‘e na karekea te anga ae a na buutakinako iai.’

E na kangaa Iehova ni karekea te anga ae a na buutakinako iai naake a onimakinna ngkana a kaaitara ma kataaki? Ni koauana, ngkana bon nanona, e kona ni kanakoa te kataaki. Ma uringa ana taeka Bauro aei: “E na karekea naba [Iehova] te anga ae kam na buutakinako iai bwa kam aonga n nanomwaaka.” Ngaia are n angiin te tai, e karekea “te anga ae [ti] na buutakinako iai” rinanoni katauraoani baika ti kainnanoi bwa ti aonga n nanomwaaka i aani kataaki ao n tokanikai iai. Iangoi aanga tabeua ake e kona ni karekei Iehova bwa ti na buutakinako iai:

• E “kabebeteira ni kataakira nako.” (2Kor. 1:3, 4) E kona Iehova ni kabebetei ara iango, nanora, ao ara namakin, rinanon ana Taeka, taamneina ae raoiroi, ao te amwarake n taamnei mairoun te toro ae kakaonimaki.​—Mat. 24:45; Ioa. 14:16, kabwarabwara mai nano, IRom 15:4.

• E kona ni kairirira rinanon te taamnei ae raoiroi. (Ioa. 14:26) Ngkana ti kataaki, e kona ni buokira bwa ti na uringi rongorongo man te Baibara ao booto n reirei, ao imwina ti a atai kawaira aika raraoi.

• E kona ni kamanenaia ana anera ibukira.​—Ebera 1:14.

• E kona ni buokira rinanoia raora n te onimaki ‘ake taani buokira aika a kakorakoraira’ n aia taeka ma aia mwakuri.​—IKoro. 4: 11, kabwarabwara mai nano.

Tera ngkanne ae ti kona n iangoia n te baere e nanonna Bauro n 1 I-Korinto 10:13? E aki bairei Iehova ao n rinei kataaki aika a na riki nakoira. Ma ngkana ti kuba ni kataaki ni maiura, ti kakoauaa raoi aei: Ngkana ti onimakina raoi Iehova, ti bon ataia bwa e na aki kariaia bwa a na riaon nanomwaakara baika ti kataaki iai. E na boni karekea n taai nako te anga ae ti na buutakinako iai ao n nanomwaaka. Ai kabebeteakira ngaira n te iango anne!