Bwaai n Ibuobuoki Ibukin Te Boki n Reirei ae Maiura ao Ara Mwakuri ni Minita
MARCH 7-13
BAIKA KAKAWAKI AIKA MENA N ANA TAEKA TE ATUA | 1 TAMUERA 12-13
“Te Kainikatonga E Karika te Kamaamaeaki”
w00 1/10 26-27 ¶17
Te Kainikatonga E Karika te Kamaamaeaki
17 Tao ni moan iangoakina, ao e kona n taraaki bwa e raoiroi ana mwakuri Tauro. Bwa te koaua bwa ana aomata te Atua a “reke n te kaoanikai,” a “karawawataki,” ao a ruru ni maaku ibukin aroia ae kakaiaki. (1 Tamuera 13:6, 7) E bon aki bure te biri rimoa ni karaoa ae kainnanoaki karaoana ngkana e riai. Ma uringnga ae Iehova e kona ni wareka nanoia aomata ma n ataa raoi ae bon kairiia nanoia. (1 Tamuera 16:7) Mangaia are tao e bon nori bwaai tabeua i nanon Tauro ake e aki kaotaki raoi n te rongorongo n te Baibara. N te katoto teuana, tao Iehova e noria bwa aki-taotaonakin nanon Tauro e a boto i aon te nanorieta. Tao e rangi ni maraki nanon Tauro ngke ngaia—ae uean Iteraera—e tuangaki bwa e na tataninga rokon te aomata are e taraia bwa te burabeti are e a kara are e kabaenikaia karaoan tabena! Ma e ngae n anne, Tauro e taku bwa iremwen Tamuera e kariaia boni ngaia bwa e riai ni waakina ae na waakinaki, n aki iraki raoi kaetieti ake e anganaki. Tera mwin anne? Tamuera e aki kamoamoa Tauro ibukin te mwakuri are e biri rimoa ni karaoia. Ma e boaa Tauro ni kangai: “E na aki teimatoa ueam. . . ba kioina ngkai ko aki kawakina are E tuangko Iehova.” (1 Tamuera 13:13, 14) E a manga noraki riki aron te kainikatonga ni karika te kamaamaeaki.
w07 1/7 14 ¶8
E Kakawaki Am Ongeaba Iroun Iehova
8 E katuruturuaki kakawakin te ongeaba ni karakin te Uea ae Tauro n te Baibara. Ni moani kauean Tauro ao e tautaeka ma te nanorinano, ao namakinan ae e ‘mangori i matana.’ Ma imwin te tai ae aki maan, e a moanna n tautaekana ana iango te kainikatonga ao iango aika kairua. (1 Tamuera 10:21, 22; 15:17) N te taina, ao e nang kaaitara ni buaka Tauro ma I-Biritia. E tuangnga Tamuera bwa e na taningaia bwa e na roko n angakarea nakon Iehova ao n anganna kaetieti riki tabeua. Ma e tabwara Tamuera n roko n te tai are kaantaningaki iai, ao a a moanna ni maenako aomata. Ngke e nora aei Tauro, ao e a nako naba ni “kareana te karea ni kabuokaki.” E rangi n aki kukurei n aei Iehova. Ngke e a roko Tamuera, e kabwara bure te uea ibukin ana aki ongeaba ao e tuanga Tamuera bwa e karaoa arei ibukin rimwina, ngaia are e a ‘kairoroa i bon i rouna’ bwa e na anga te karea ni kabuokaki ibukin kamarauan nanon Iehova. E iangoia te Uea ae Tauro bwa e kakawaki riki te angakarea anne nakon ongeabana n te kaetieti are e na tataningaa Tamuera bwa e na angakarea. E taku Tamuera nakoina: “Ko arona te aro ni baba: ko aki kawakina ana tua Iehova ae Atuam, are E tuangko.” E a bua uean Tauro ibukin ana aki ongeaba iroun Iehova.—1 Tamuera 10:8; 13:5-13.
Kaubwai n Taamnei Aika Kakawaki
w11 1/7 18 ¶15
Ko na kakairi n Ana Kairiri Iehova ae Boto i Aon te Tangira?
15 Te koaua bwa a iangoia aomata akanne bwa a na onimakina te uea ae raoia n aomata nakon onimakinan Iehova? Ngkana ngaia anne ae a iangoia, a uaiakin iai baika akea maneia! A bon reke n te kangaanga n uaiakinan ana iango nako Tatan. A kona ni kairaki nakon taromauriani boua irouia ueea ake raoia n aomata. A kairua aia iango taan taromauri boua n iangoan ae a koaua raoi ao a onimakinaki riki atuaia ake katotongani bwaai ake a karaoaki man te kai ke te atibu, nakon onimakinan te Atua ae aki nonoraki ae Iehova are e karikii bwaai ni kabane. Ma n aron are e taekinaki iroun te abotoro Bauro, bon “akea uaan” bouannanti. (1 I-Korinto 8:4) A aki kona n noraaba, ni kakauongo, n taetae, ke ni karaoa te bwai teuana. Ko boni kona n nori ao n ringi, ma ngkana ko na taromaurii, ai aron ae ko a bon uaiakini iai baika akea maneia aika akea nanoia ma a tii kona ni karikii kangaanga.—Taian Areru 115:4-8, BG.
MAATI 14-20
BAIKA KAKAWAKI AIKA MENA N ANA TAEKA TE ATUA | 1 TAMUERA 14-15
“E Raoiroi Riki te Ongeaba Nakon te Angakarea”
w07 1/7 13-14 ¶4
E Kakawaki Am Ongeaba Iroun Iehova
4 Ngkai bon te tia Karikiriki Iehova, bon ana bwai bwaai ni kabane aika mena iroura. Ibukin anne, iai ngkanne te bwai ae ti kona n anganna? Eng, ti kona n anganna te bwai teuana ae rangi ni kakawaki. Ao tera? E kona n reke kaekaan aei n te kaungaunga aei: “Natiu, ko na wanawana, ao kakukureia nanou, ba I aonga ni kaeka ane kakanikoai.” (Taeka N Rabakau 27:11) Ti kona n ongeaba iroun te Atua. E ngae ngke a kakaokoro arora ao ara konabwai ni kaineti ma ongeabara, ma ti kona ngaira ni kabane ni kaekaa ana bukibuki Tatan te Riaboro are a aki kona n teimatoa aomata ni kakaonimaki nakon te Atua, ngkana a kaaitara ma kataaki. Ai kakabwaiaakira ngaira n aei!
it-2 521 ¶2
Ongeaba
Akea te bae kakawaki riki nakon te ongeaba, ao ko aki kona n akoaki iroun te Atua ngkana ko aki ongeaba. Bwa e kangai Tamuera nakon te Uea are Tauro: “Te koaua bwa e bati kukurein Iehova n taiani karea ni kabuekaki ma taian angakarea n ai aroni kukureina n te ongeaba [man te taeka ae sha·maʽʹ] irouna? Noria! E raoiroi riki te ongeaba [taetae n Ebera, ongo] ni bwanaan Iehova nakon te angakarea, ao te kan ongo nakoni mwaeteia tiibu mwaane.” (1Ta 15:22) Te aki ongeaba e nanonaki iai te rawa nakon ana taeka Iehova, kaotiotan ae ko aki kakoauaa ao n onimakina te taeka anne ao Teuare e nako mairouna. Ngaia ane e aki ongeaba bon akea okorona ma te tia tabunea ao te tia taromauri boua. (1Ta 15:23; kabotaua ma Ro 6:16.) Akea nanon am taeka ae eng ngkana ko aki mwakuria, bwa ngkana ko aki mwakuria ko bon aki kakoauaa ke ni karinea teuare e anga te kaetieti. (Mt 21:28-32) Naake a taku bwa a ongo ma n iangoia bwa a butimwaea ana taeka te Atua, ma aki mwakuria, a boni mwamwanaiia i bon irouia ao a na bon aki kakabwaiaaki. (Iak 1:22-25) E kamataata Natin te Atua bwa ane e kakaraoa ae boraoi ma te baere e taekinaki, ma e teretere raoi bwa e karaoia n te aro ae kairua ke i aani bukina ae kairua, e na bon aki rin n te Tautaeka n Uea ma e na boni koreakinako.—Mt 7:15-23.
Kaubwai n Taamnei Aika Kakawaki
it-1 493
Nanoanga
Ngkana ko kariaia kaririakim nakon te bae kauntaba ma nanon te Atua, ibukina bwa ko nanoanga, e kona ni karekea mwina ae kakaiaki. E oti aei n te baere e riki nakon te Uea are Tauro. E baireia te Atua bwa e na boni kamaunaia n te taina tibun Amareka, ake aomata ake a moani buakania I-Iteraera n otinakoia mai Aikubita. E tuangaki Tauro bwa e na aki nanoangaiia. E kariaia kaririana irouia ana aomata ao e aki toua mwin ana tua Iehova. Ngaia are e a rawa Iehova ni karikia bwa te uea. (1Ta 15:2-24) Ane e karikirakea te kakaitau n etini kawain nako Iehova ao ni kakaonimaki ni koaua Nakoina, e na bon aki karaoa ae bure n aron Tauro, ao ni kabuaa akoana iroun te Atua.
MAATI 21-27
BAIKA KAKAWAKI AIKA MENA N ANA TAEKA TE ATUA | 1 TAMUERA 16-17
“Ana Bwai Iehova te Boo ni Buaka”
wp16.5 11 ¶2-3
“Ana Bwai Iehova te Boo ni Buaka”
E karaua nanon Tauro Tawita ngke e taekina te baere e karaoia nakon te raian ma te bea. E kamoamoa? E aki. E ataa Tawita bukin tokanikaina. E taku: “Bon Iehova ae kamaiuai mairoun te raian ao mairoun te bea, ao boni ngaia naba ae e na kamaiuai mai nanoni bain te I-Biritia arei.” E a rau nanon Tauro ngaia are e a kangai: “Naako, ao ke e memena iroum Iehova.”—1 Tamuera 17:37.
E kan reke am onimaki ae ai aron Tawita? Noria bwa e aki boto ana onimaki Tawita i aon te bae e aki ataia ke ae karioa. E boto onimakinan Atuana i aon ana atatai ao te baere e riki nakoina. E ataia ae Iehova bon te tia Kamanomano ae tatangira, ao te tia Kakoroi bukin ana berita nako. Ngkana ti kani karekea te aeka n onimaki anne, ti riai n teimatoa n reiakina taekan te Atua are taekinaki n te Baibara. Ngkana ti maiuakini baike ti reiakin, ti na bon taia uaana aika raraoi ao ni kakorakoraa iai ara onimaki.—Ebera 11:1.
wp16.5 11-12
“Ana Bwai Iehova te Boo ni Buaka”
Ni karokoa ngkai, e a riki ana kaeka Tawita aei bwa te katoto ibukin te onimaki. Iangoa te ataeinimwaane ae kakaewenakoa Koria ni kangai: “Ko nakoiu ni kaitaraai ma te kabaang ao te kainiwai ao te koro, ma ngai I nakoim ni kaaitarako n aran Iehova ae Atuaia taanga ni buaka, ae Atuaia aia taanga ni buaka tibun Iteraera are ko a tia ni kakanikoa.” E ataia Tawita bwa bon akea bongani korakoraia aomata ma aia bwai ni buaka. E aki karinea Iehova ae te Atua Koria, ao e na boni kaitaraaki iroun Iehova. Bwa e kangai Tawita “ana bwai Iehova te boo ni buaka.”—1 Tamuera 17:45-47.
E bon nora buburan Koria ma ana bwai ni buaka Tawita. Ma e aki kariaia bwa e na maaku iai. E aki katotonga ana kairua Tauro ma kaain ana taanga ni buaka. E aki kabotaua ma Koria Tawita. Ma e kabotaua ma Iehova. E tei Koria ma abwakina ae ruaiwa ma te iterana te buti (2.9 m), man ananau riki nakoia mwaane ake tabeman, ma buburara ngaia ni kabotauaki ma te tia Tautaeka n te iuniweeti? N aroia aomata nako, bon titeboo ngaia ma te man ae uarereke ae e kai kamaunaaki iroun Iehova!
wp16.5 12 ¶4
“Ana Bwai Iehova te Boo ni Buaka”
A aki ira te buaka ana toro te Atua ni boong aikai. A a bwakanako boong akanne. (Mataio 26:52) Ma ti bon riai naba ni kakairi n ana onimaki Tawita. Ti riai ni kakoauaa bwa bon iai Iehova, ae te Atua n tii ngaia ae riai te toro irouna ao ni maakaki ma te karinerine. Ti bae n namakinna n tabetai bwa a buburakaei riki ara kangaanga, ma a rangi n uarereke ni kabotauaki ma mwaakan Iehova ae akea tiana. Ngkana ti rinea Iehova bwa Atuara ao n onimakinna n aron Tawita, ao e na bon akea te kabuanibwai ma te kangaanga ae ti na maakua. Bon akea te bae kona n rota mwaakan Iehova!
Kaubwai n Taamnei Aika Kakawaki
it-2 871-872
Tauro
E a nako taamnein Iehova mairoun Tauro imwin te tai aei ao imwini kabiran Tawita bwa e na riki bwa aia uea I-Iteraera. Ao e a “kakamaakaki Tauro n te taamnei ae buakaka mairoun Iehova.” Ngke e kanakoa taamneina Iehova mairoun Tauro, e a roko te taamnei ae buakaka irouna n aki karaua ana iango Tauro, ao a a ueke ana namakin ma ana iango aika bubuaka. Kabwakan Tauro n ongeaba iroun Iehova, boni kaotan ae kairiraki ni buakakan ana iango ma nanona, ao e a aki kona taamnein te Atua are e angan Tauro ni kamanoa mai iai ke n totokoia. Kioina ngke e aki tuka “te taamnei ae buakaka” Iehova bwa e na kakamaaka Tauro, e a kona n aranaki iai bwa “te taamnei ae buakaka mairoun Iehova,” ngaia are a aranna ana toro Tauro bwa “te taamnei ae buakaka mairoun te Atua.” Imwin tuangana iroun ana toro temanna, e a bubutii Tauro bwa e na riki Tawita bwa ana tia katangitang, are e na karaua ana iango ngkana e roko irouna “te taamnei ae buakaka.”—1Ta 16:14-23, kbn; 17:15.
MAATI 28–EBERI 3
BAIKA KAKAWAKI AIKA MENA N ANA TAEKA TE ATUA | 1 TAMUERA 18-19
“Teimatoa n Nanorinano E Ngae Naba Ngkana E Nanakoraoi Am Waaki”
w04 1/5 27 ¶4
Onimakina Taamnein te Atua Ngkana Ko a Kaaitara ma Bitakin te Aroaro ni Maiu
4 Imwin te tai ae aki maan, ao e a rangi ni kinaaki te ataeinimwaane ae te tia kawakin tiibu aei i aon abana. E weteaki bwa e na riki bwa ana touati te uea ao n riki naba bwa ana tia katangitang. E tiringa te tia buaka are Koria, te aintoa ae tiritiri are a maaku naba ni kaitaraa tautia aika mwaatai ni buaka i aon Iteraera. E rineaki naba Tawita bwa e na kaira buakanakia kaain Biritia ao e tokanikai iai. E tatangiraki irouia aomata, ao a otea te anene are a kamoamoaa iai. Imwain anne ao e kabwarabwaraa taekan Tawita, ana tia mwakuri te Uea are Tauro bwa e aki tii “rabakau ni katanga” te abi ma bon “te rorobuaka ae korakora ae ninikoria, ae te tia buaka, ae rabakau taetae, ae te aomata ae tamaroa.”—1 Tamuera 16:18; 17:23, 24, 45-51; 18:5-7.
w18.01 28 ¶6-7
Nora te Kaokoro i Marenaia Aomata
6 A kamoamoa tabemwaang ibukini baaraoia, tanoatan taekaia, mwaataia ni katangitang, korakoraia, ke rietatan nakoaia. A bane n reke baikanne iroun Tawita, ma e bon teimatoa naba n nanorinano ni maiuna. E taku Tawita imwin tiringani Koria irouna ao anganakina natin te Uea ae Tauro bwa buuna: “Antai ngai ao antai au koraki, ma ana utu tamau i Iteraera, ngkai N na riki bwa buun natin te uea?” (1Tam. 18:18) Tera are e buoka Tawita n teimatoa n nanorinano? A reke aroaron Tawita, ana konabwai, ao mwiokoana, ibukina bwa e “bwatiku rikaaki” te Atua ke E kananorinanoa bwa e na mutiakinna. (TaiAre. 113:5-8) E ataia ae bwaai nako aika raraoi ake irouna, boni mairoun Iehova.—Kabotaua ma 1 I-Korinto 4:7.
7 N aron Tawita, a kekeiaki naba ana aomata Iehova ni boong aikai ni kaotiota te nanorinano. A ringaki nanora n ataakin ae e kaotiota te aroaro ae anainano ae te nanorinano Iehova ae te Aomata ae te kabanea ni kakannato n te iuniweeti. (TaiAre. 18:35) Ti mutiakina ana reirei ni kairiri te Atua aei: “Karina i aomi te atataiaomata ae nako man te nanoanga, te akoi, te nanorinano, te nimamannei, ao te taotaonakinnano.” (IKoro. 3:12) Ti ataia naba bwa “e aki taetae ni kamoamoa, ao e aki kainikatonga” te tangira. (1Kor. 13:4) Ngkana ti kaotiota te nanorinano, a na bae ni katikaki aomata nakon Iehova. N aron ae a kona n anaaki nanoia buumwaane n aroaroia buuia e ngae ngke a aki taetae, a kona naba ni katikaki aomata nakon te Atua man te nanorinano ae a kaotiotia ana toro.—1Bet. 3:1.
Kaubwai n Taamnei Aika Kakawaki
it-2 695-696
Burabeti
E ngae ngke a rineaki n taamnein Iehova, ma tiaki nanona bwa a bon tataetae naba ni kairaia n te taamnei. Ma bon iai taai ake ‘e roko iai taamnein Iehova i aoia,’ ni kaotii rongorongo aika riai ni katanoataaki. (Etk 11:4, 5; Mi 3:8) E mwamwakuri i aoia, ao ni kairaki iai bwa a na taetae. (1Ta 10:10; Ier 20:9; Am 3:8) A aki tii kairaki bwa a na karaoa te bae kamimi, ma taraakia naba ao aroia e na bon oti iai korakoran nanoia ma aia namakin ae kamimi. Tao anne bukina ae a aranaki tabeman bwa “a karaoi aroia burabeti.” (1Ta 10:6-11; 19:20-24; Ier 29:24-32; kabotaua ma Mwa 2:4, 12-17; 6:15; 7:55.) A kona n taraa ni kamanga ao ni kamimi i mataia aomata man aroia ni kaatuua aia iango ma ninikoriaia ni mwiokoaia anne, n aron taraan te burabeti irouia mataniwia taani buaka ngke e kabiraki Ieu. Ma ngke e ataaki ae bon te burabeti, a butimwaea raoi ana rongorongo mataniwi akekei. (2Ue 9:1-13; kabotaua ma Mwa 26:24, 25.) Ngke e kakiokioa Tawita Tauro, e a kairaki bwa e na ‘karaoa aroia burabeti,’ n arona ni buutii kunnikaina, ao ni “wene ikekei n aki karabaanna ni kabongnga ao ni kangainaa,” ngke e birinako Tawita. (1Ta 19:18–20:1) Tiaki nanona bwa a bubuutii karabaaia burabeti, bwa akea n te Baibara taekan anne. Ma iai uatai ae e taekinaki iai bwa e buuta karabaana te burabeti, ma e karaoia ibukini kaotan kanoan ana taetae ni burabeti tabeua. (It 20:2-4; Mi 1:8-11) Ma e aki kaotaki bwa bukin tera ngke e buuta karabaana Tauro, ma tao e karaoia ni kaotia bwa bon te aomata naba ngaia, ngkai e buutii oneana n uea, e kaitaraa ana kaetieti Iehova ni kaineti ma te kairiri ao te mwaaka, ke tao iai riki bukina.
EBERI 4-10
BAIKA KAKAWAKI AIKA MENA N ANA TAEKA TE ATUA | 1 TAMUERA 20-22
“Arom n Riki Bwa te Rao ni Koaua”
w19.11 7 ¶18
Kakorakoraa Reitakim ae Kaan Imwain Rokon te Toki
18 Ni boong aikai, a kaaitara ma kataaki aika kakaokoro taari. N te katoto, a bati aika rotakibuaka ni kabuanibwai aika karina ke aika reke mairouia aomata. Ngkana e riki anne, tabeman mai buakora a kona ni butimwaeiia taari aikai nakoni mwengaia. Ake tabeman a kona ni buokiia n te mwane. Ma ngaira ni kabane ti kona ni bubutiia Iehova bwa e na buokiia tarira aikai. Ngkana ti ongo taekan te tari ae bwara nanona, ti kona n aki ataia bwa tera ae ti na karaoia ke n taekinna. Ma e rangi ni bati te bae ti kona ni karaoia. N te katoto, ti kona ni karekea ara tai ma ngaia. Ti kona ni kakauongo ma te mwamwannano ngkana e taetae. Ao ti kona ni kaota nakoina te kibu ae kabebetenano ae ti tatangiria. (Ita. 50:4) Ma ae kakawaki riki bon tatauraoim ni buokiia raoraom n te tai are a kainnanoiko iai.—Wareka Taeka N Rabakau 17:17.
w08 1/2 14 ¶7
Nakonako ni Kawain Nako Iehova
7 E kaantaningaira te Atua bwa ti na riki bwa raao aika a kona n onimakinaki raoi. (Taeka N Rabakau 17:17) E riki Ionatan are natin te Uea are Tauro, bwa raoraon Tawita. Ngke e ongo Ionatan taekan Tawita are e tiringa Koria, e a moanna naba ni “kabaeaki tamnein Ionatan ma tamnein Tawita, ao e tangiria Ionatan ba kanga bon oin tamneina.” (1 Tamuera 18:1, 3) E kauringa naba Tawita Ionatan ae Tauro e tangiria n tiringnga. Imwin birinakon Tawita, a manga kaitiboo ao ni karaoa aia berita. E kuri ni bua maiun Ionatan ngke e taekina Tawita nakon Tauro, ma ngke a manga kaitiboo riki ao a manga moan kamatoaa riki aia itangitangiri. (1 Tamuera 20:24-41) Ni kabanean kaitibooia, ao Ionatan e a kakorakoraa Tawita “iroun te Atua.”—1 Tamuera 23:16-18.
w09 1/10 28-29 ¶11
Kateimatoaan Ara Iraorao n te Aonnaba ae Akea Iai te Tangira
11 Bwaina te kakaonimaki ni koaua. E korea ae kangai Toromon: “E tangira te aomata raona n te bong ae koraki, Ao e bungiaki te tari ba katokani kain tarina.” (Taeka N Rabakau 17:17) Ngke e korei taeka akanne Toromon ao e bae n uringa te iraorao ngkoa are i marenan tamana are Tawita ao Ionatan. (1 Tamuera 18:1) E tangiria te Uea are Tauro bwa e na ruamwina natina are Ionatan n uea i aoia I-Iteraera. Ma Ionatan, e butimwaea te koaua are e a tia Iehova n rinea Tawita bwa e na uea. E kaokoro Ionatan ma Tauro bwa e aki bakantang iroun Tawita. E aki naba ribaa Tawita ngke e kamoamoaaki, ao e aki kakoauaa kabuakakaan Tawita are e kabutanakoa Tauro. (1 Tamuera 20:24-34) Tii te arona arora ma Ionatan? Ti kukurei ngkana a reke mwiokoaia raoraora n te ekaretia? Ti kabebeteia ao ni boutokaiia ngkana a karawawataaki? Ti waekoa ni kakoauaa winnantian raoraora? Ke tii te arona ngaira ma Ionatan ae ti kakaonimaki ni koaua n tei ibukia raoraora?
Kaubwai n Taamnei Aika Kakawaki
w05 1/4 18 ¶5
Reirei Aika Kakawaki Man te Boki ae te Moan Tamuera
21:12, 13. E kantaningaira Iehova bwa ti na kamanenai wanawanara ma ara konabwai, ngkana ti kaaitara ma waaki aika kangaanga i nanon maiura. E a tia naba n anganira Ana Taeka ae kairaki koreana iroun te taamnei, are e karekea nakoira te wanawana, te atatai ao te rabakau n iango. (Taeka N Rabakau 1:4) E kona naba n reke buokara mairouia unimwaanen te ekaretia ni Kristian.
EBERI 18-24
BAIKA KAKAWAKI AIKA MENA N ANA TAEKA TE ATUA | 1 TAMUERA 23-24
“Taningaa Iehova ma te Taotaonakinnano”
w04 1/5 28 ¶8
Onimakina Taamnein te Atua Ngkana Ko a Kaaitara Ma Bitakin te Aroaro ni Maiu
8 E rawa Tawita ni kammaraka Tauro, ma e kaotiota te onimaki ao te taotaonakinnano, ngke e a kariaia katukan bairean bwaai ni kabane i nanon bain Iehova. Ngke e a kitana te bwanga-ni-matang te uea, ao e a takarua nakoina Tawita ni kangai: “E na kaeta taekau ma taekam Iehova, ao E na ira tangau Iehova ni karekea kaim: ma e na aki mena baiu i aom.” (1 Tamuera 24:12) E ngae ngke e ataia Tawita bwa e bure aron Tauro nakoina, ma e bon aki roko naba n te ira tangana; ao e aki taetae naba n aki akaka nakon Tauro ke ni kabuakakaa nakoia aomata. N taai riki ake tabeua, ao e kerikaaki Tawita man irantangaana i bon irouna. E onimakina Iehova bwa e na kaeti bwaai ni kabane.—1 Tamuera 25:32-34; 26:10, 11.
w04 1/6 22-23
E Kairaki Maium n Arom?
Te reirei ae te katenua, ti bon riai n tataninga Iehova, n oneani mwin are ti na kabonganai aanga aika aki boraoi ma te Baibara ni bita iai arora. E korea ae kangai te tia rimwini Kristo ae Iakobo: “Ke e katiaa raoi ana mwakuri te nanomwaaka, bwa kam aonga ni kororaoi, ao n raoiroi n aroaromi nako, n akea kabwakami n te bwai teuana.” (Iakobo 1:4) E ria ni ‘katiaaki raoi ana mwakuri’ te nanomwaaka n arora ni karokoa raoi n tokina kataakira ao n aki kakaaei aanga aika aki boraoi ma te Baibara ibukini katokaia. Imwina e na kataaki ara onimaki ao ni kanakoraoaki, ao e nang oti raoi teimatoan korakoran ara onimaki. Iai irouia Ioteba ao Tawita te aeka n nanomwaaka aei. A aki kataia ni kakaaea katokan aia kangaanga ae e na aki kukurei iai Iehova. Ma a mwakuri korakora ni karaoa ae a kona ni karaoia. A tataningaa Iehova ao a karekei kakabwaiaaia ni karaoan anne. E kabonganaia naakai Iehova ni kamaiuia ao ni kairiia ana aomata.—Karikani Bwaai 41:39-41; 45:5; 2 Tamuera 5:4, 5.
Ti kona naba ni kaaitara ma kangaanga aika ti a kona iai ni kaririaki bwa ti na kakaaei angani katokaia aika aki boraoi ma te Baibara. N te katoto, e bwara nanom ngkai e tuai man reke buum? Ngkana ngaia anne, rarawa nakon te kariri ae ko na aki ongeaba nakon ana tua Iehova are ko na mare “tii i nanon te uea.” (1 I-Korinto 7:39) Iai am kangaanga n am mare? N oneani mwin are ko na kakairi n aia iango kaain te aonnaba ae a boutokaa te maenako ao te buuraure, kakorakoraingkami ni kauoman n taai aika kangaanga akanne. (Maraki 2:16; I-Ebeto 5:21-33) Ko kaaitara ma kangaanga ni kaineti ma kaubwain te aba ngkai ko tabeakinia am utu? E irekereken tataningaan Iehova ma te rarawa nakoni mwakuri aika katabuakaki i aan te tua ibukini karekean te mwane. (Taian Areru 37:25; Ebera 13:18) Eng, ti riai ni bane ni mwakuri korakora ni karaoa ae ti konaa ni kaineti ma arora, ao n angan Iehova te bwai ae na kakabwaiaa. Ngkana ti karaoa anne, ti bia motinnanoia bwa ti na tatanigaa Iehova ibukini katokan ara kangaanga n te anga ae te kabanea n tamaroa.—Mika 7:7.
Kaubwai n Taamnei Aika Kakawaki
w17.11 27 ¶11
Tai Kariaia te Bwai Teuana Bwa E na Tukiko Mani Karekean te Kaniwanga
11 Ngkana ti karikirakea te tangira ao te akoi i nanora, ti na aki kai bakantang. E kangai Ana Taeka te Atua: “E taotaonakinnano te tangira ao e akoi. E aki bakantang te tangira.” (1Kor. 13:4) Ngkana ti na totokoa te bakantang bwa e na aki wakaa i nanora, ti riai n kakorakoraira n iangoi bwaai n aron iangoaia iroun te Atua, ao n iangoiia naba tarira bwa kaain te rabwata ae tii teuana ae te ekaretia ni Kristian. Ti buokaki iai bwa ti na kaota tangiraia tarira, ae boraoi ma te reirei ni kairiri ae kairaki n te taamnei aei: “Ngkana e karineaki bwain te rabwata teuana ao a bane ni kimwareirei ma ngaia bwaina ake tabeua.” (1Kor. 12:16-18, 26) Ngaia are n oneani mwin are ti na bakantang, ti na kukurei ngkana a karekei kakabwaia tabemwaang. Iangoa ana katoto natin te Uea ae Tauro are Ionatan. E aki bakantang ngke e rineaki Tawita bwa e na uea, ma e kaungaa Tawita. (1Tam. 23:16-18) Ti kona ni katotonga Ionatan ae akoi ao n tatangira?
EBERI 25–MEI 1
BAIKA KAKAWAKI AIKA MENA N ANA TAEKA TE ATUA | 1 TAMUERA 25-26
“Ko Kakaraoi Bwaai n Aki Iango Moa?”
ia 78 ¶10-12
E Nanowanawana n Ana Mwakuri
10 Tera aroia tautia akekei nakoia taani kawakintiibu? A kai anaa temanna te tiibu bwa kanaia n taai ake a bon taku, ma a aki karaoa anne. Ni kaitaraan anne, a riki bwa kaanga te oo ni kamanomano n otabwaninia ana nanai Nabara ma ana toro. (Wareka 1 Tamuera 25:15, 16.) A kaaitara ma kabuanibwai n taai aika bati tiibu ao taani kawakintiibu. A bati taani kamwarua, ao aonon Iteraera are mai maiaki e rangi ni kaan, n te aro are a kai riirin mai iai taani kamwarua ma taani kimoa man aaba ake tabeua.
11 E bae ni kainnanoa te mwakuri ae bati kakaamwarakeaia mwaane ake n te rereua. Ngaia are n te taina ao e a kanakoia ana taan uataeka aika tengaun Tawita nakon Nabara ni butiia buokaia. E rinea naba ana tai ae angaraoi Tawita. Bon te bong are a koreaki iai buraeia tiibu, ae e kakaraoaki iai te tituaraoi ma te baka n amwarake. E rinei raoi naba ana taeka Tawita, ni kamanenai taeka aika tangiraoi ao ni karinerine. E atongnga naba bwa “natim ae Tawita,” ae tao kaotani karinean Nabara ngkai e ikawai riki. Ma tera aron Nabara?—1 Tam. 25:5-8.
12 E urarake unna! “E tatakarua n un nakoia” n aron are e karakinna te rorobuaka nakon Abikaira, are oti ni moan te kaongora. E takakaa Nabara ni ngureakina ana kariki, ana ran, ma irikoia ana man. E kakanikoa Tawita ni kakeaa bongana ao ni kabotaua ma te toro ae birinako mairoun ana toka. E bae n titeboo ana taratara Nabara ma Tauro are e ribaa Tawita. A aki taratara mwaane aikai n aron Iehova. E tangira Tawita te Atua ao e taraia bwa te mwaane ae e na uea i Iteraera, ao tiaki te toro ae karitei.—1 Tam. 25:10, 11, 14.
ia 80 ¶18
E Nanowanawana n Ana Mwakuri
18 E ruamwin te kangaanga aei neiei ao e bubutiia Tawita bwa e na kabwaraa ana bure. E taekinna ae bon te mwaane ae nanobaba buuna bwa e toua mwin arana, bwa tao e kauringa iai Tawita ae e aki botau ma te aeka n aomata aei ao e na aki katabea irouna. E kakoauaa neiei ae e rineaki Tawita iroun Iehova, ngke e taekinna bwa e nanako Tawita ni buaka n “ana buaka nako Iehova.” E kaotia naba ae e ataa ana berita Iehova ibukin Tawita ma te nakoa n uea, bwa e kangai: “Ngkana e a tia Iehova . . . ni mwiokoiko bwa te tia kairiri.” E kaungaa naba Tawita bwa e na aki karaoa te bae e na katuturaraa iai, ke ae e na “nanokawaki iai” imwina, ae n taraana e nanona rotakini mataniwin nanon Tawita. (Wareka 1 Tamuera 25:24-31.) Ai tangiraoira taeka aikai!
Kaubwai n Taamnei Aika Kakawaki
ia 80 ¶16
E Nanowanawana n Ana Mwakuri
16 E nanonaki n aei bwa e kaitaraa ana kairiri buuna? E aki, bwa uringnga are Nabara e karaoa ae buakaka nakon ana toro Iehova ae kabiraki, ae te mwakuri ae e kona ni kamateaki iai ma kaaini batana ake akea aia bure. Ngke e aki karaoa te bwai teuana Abikaira, e na rotaki naba n ana bure buuna? N te tai aei, e a riai neiei ni moanibwaia te aantaeka iroun Atuana nakoni buuna.