Bwaai n Ibuobuoki Ibukin Te Boki n Reirei ae Maiura ao Ara Mwakuri ni Minita
MEI 2-8
BAIKA KAKAWAKI AIKA MENA N ANA TAEKA TE ATUA | 1 TAMUERA 27-29
“Ana Anga ni Buaka Tawita”
w07 1/3 24 ¶7-8
Ti Bia Bane ni Karietataa Arana
7 E birinako maeaon te aono ni Biritia Tawita, tao 40 te kiromita raroana ma Noba n ukoukora kamanoana mairoun te Uea ae Akiti n ana kaawa Koria ae Kate. Tao e iangoia Tawita bwa Kate bon te kabanea n tabo are e na kakaaeaki iai. Ma e aki maan, ao a a kinaa Tawita, ana toro uean Kate. Ngke e ataia Tawita bwa e a kinaaki ao “e bati ni maku iroun Akiti are ueani Kate.”—1 Tamuera 21:10-12.
8 Ao I-Biritia a taua Tawita. Te tai aei are e a otea te areru Tawita ngke e bunra nanona ni butiia Iehova: “Ko na kaki rannimatau i nanon am batoro.” (Taian Areru 56:8 ao atun te areru) Mangaia are e kaotia bwa e onimakina Iehova bwa e na aki mwaninga rawawatana, ao e na kakawakinna ma ni kamanoa. E iangoia naba Tawita bwa e na bakaaea te rangirang ni mwamwanaa iai uean Biritia. E boaiia ana toro te Uea ae Akiti ngke a kaira te mwaane ae “rangirang” nakoina. E teretere bwa e kakabwaiaa ana waaki Tawita anne Iehova ibukin kamanoana man rawawatana. E kanakoaki Tawita man te kaawa, imwin kamaiuana man te kangaanga are e kuri ni bua maiuna iai.—1 Tamuera 21:13-15.
w21.03 4 ¶8
Rorobuaka n Ataei—Kam na Kangaa n Onimakinaki Irouia Tabemwaang
Iangoa riki te kangaanga teuana are e rinanona Tawita. Imwini kabirakina bwa te uea, e a riai n tataninga i nanon ririki aika bati imwain ae e moana ana kairiri ngkai e a riki bwa uean Iuta. (1Ta 16:13; 2Ta 2:3, 4) Tera are e buokia i nanon te maan anne bwa e na tataninga ma te taotaonakinnano? N oneani mwin are e na taonakinako n te bwarannano, e kaatuua ana iango n te bwai ae kona ni karaoia. N te katoto, ni menana bwa te ianena i abaia I-Biritia, e a kabongana ana tai anne ni buakania aiaia tibun Iteraera. Ni karaoan anne, e a kamanoi iai tiia n aaba ake n aonon Iuta.—1Ta 27:1-12.
it-2 245 ¶6
Te Kewe
E ngae ngke e kabuakakaaki te kewe n te Baibara, ma tiaki nanon aei bwa e riai te aomata n taekina te rongorongo ae koaua nakon temanna ae aki riai n tuangaki. E anga te reirei ni kairiri Iesu Kristo ni kangai: “Tai angania kamea baika tabu, ke ni kaaki moomin te bwaeao i mataia beeki, bwa a kaawa n toubekai ao ni manga rairaki n ewakaingkami.” (Mt 7:6) Anne bukina ngkai e aki taekin rongorongo ni kabane Iesu n taai tabetai ke ni kaekai raoi titiraki, ngkana e ataia ae e kona ni karekea mwina ae karuanikai. (Mt 15:1-6; 21:23-27; Io 7:3-10) Anne naba ae riki nakon Aberaam, Itaaka, Raaba, ao Eritai ngke a aki naba taekin rongorongo ni kabane nakoia naake aki taromauria Iehova.—KB 12:10-19; mwa 20; 26:1-10; Iot 2:1-6; Iak 2:25; 2Ue 6:11-23.
Kaubwai n Taamnei Aika Kakawaki
w10 1/1 20 ¶5-6
E Kona te Mate ni Buokiia Aika A Maiu?
Iangoa aei: E taekinna te Baibara bwa ngkana e mate te aomata ‘e a okira naba te tano,’ ao “a maunanako ana iango.” (Taian Areru 146:4) A ataia Tauro ao Tamuera ae e kabuakakaa te reitaki ma taan rorokoia taimonio te Atua. Maroaka e kaira ngkoa kamaunaaia taan tabunea mai aon te aba Tauro!—Nakoaia Ibonga 19:31.
Iangoa aei: Ngke arona bwa e boni maiu Tamuera bwa te taamnei, e na kona n urua ana tua te Atua ao n reitaki ma taan rorokoia taimonio bwa e aonga ni kaitiboo ma Tauro? E rawa Iehova n taetae ma Tauro. E kona te tia rorokoia taimonio ni kairoroa te Atua ae Moan te Mwaaka bwa e na reitaki ma Tauro rinanon te mate are Tamuera? E aki kona. E oti raoi ngkanne bwa “Tamuera” aei, bon tiaki are ana burabeti te Atua ae kakaonimaki. Bon te taimonio are e karikia bwa Tamuera are e a tia ni mate.
MEI 9-15
BAIKA KAKAWAKI AIKA MENA N ANA TAEKA TE ATUA | 1 TAMUERA 30-31
“Kakorakorako Iroun Atuam ae Iehova”
w06 1/8 28 ¶12
Maaka Iehova—Ao Kakukureiko!
12 A bati riki baika riki nakon Tawita ibukin maakan Iehova irouna, nakon ae tii kararoaana man te bure. E kakorakoraaki bwa e na karaoa ae riai ao ni wanawana n iango i aan aaro aika kangaanga. E nako naba ni kamanoa ma ana aomata mairoun Tauro i Tikeraka i abaia I-Biritia, i nanon teuana te ririki ao aua namwakaina. (1 Tamuera 27:5-7) N te taina, ngke a kitana aia tabo mwaane aikai, ao a roko tibun Amareka ni kabueka te kaawa anne ao a uotiia nako buuia mwaane ni kabane, natiia ao aia nanai. A tang Tawita ma ana aomata n okia ibukin te baere e riki. N te tai ae waekoa, ao e a tii bitaki naba te nanokawaki nakon te un, bwa a a kani karebanaa Tawita ana aomata. E ngae ngke e rawawata iai Tawita, ma e bon aki roko naba n te bwara nanona. (Taeka N Rabakau 24:10) Ibukini maakan te Atua irouna, e a kairaki bwa e na butiia buokana, ike e “kakorakora Tawita iroun Iehova.” Man ana ibuobuoki te Atua, ao a tokanikai Tawita ma ana aomata i aoia tibun Amareka ao a a manga kaoki aia bwai ni kabane.—1 Tamuera 30:1-20.
w12 1/4 31-32 ¶14
E Tararuaira Iehova Ibukini Kamaiuara
14 E kaaitara Tawita ma karawawata aika bati ni maiuna. (1 Tamuera 30:3-6) E kaotaki n te Baibara bwa e ataaki ana namakin Tawita iroun Iehova. (Wareka Taian Areru 34:18; 56:8.) E atai naba ara namakin te Atua. E boni kaanira ngkana a ‘uruaki nanora’ ke n ‘raraoma taamneira.’ A kabebeteaki nanora n aei n aron Tawita ngke e anene ni kangai: “N na kukurei ma ni kimareirei n am atataiaomata: Ba Ko tarataraa kananoangau; ko ata marakin tamneiu.” (Taian Areru 31:7, BG) E bati riki ae karaoia Iehova nakon tii ataakin rawawatara. E kateimatoaira rinanoni kabebetean nanora ao kaungaakira. Te anga teuana are e karaoa iai aei, bon rinanoni bobotaki ni Kristian.
Kaubwai n Taamnei Aika Kakawaki
w05 1/4 18 ¶9
Reirei Aika Kakawaki Man te Boki ae Te Moan Tamuera
30:23, 24. E aanaki te motinnano aei ni Warekaia Iteraera 31:27, ike e a kaotaki iai bwa a kakawaki iroun Iehova te koraki ake iai mwiokoaia n te ekaretia. N aki ongeia bwa tera ara beku iai, ma ti riai ni “karaoia naba ma [nanora], ba kaanga i bukin [“Iehova,” NW], ao tiaki i bukia aomata.”—I-Korote 3:23.
MEI 16-22
BAIKA KAKAWAKI AIKA MENA N ANA TAEKA TE ATUA | 2 TAMUERA 1-3
“Tera Reireiara Man te Anene ae ‘te Kainikatebe’?”
w00 1/8 21-22 ¶9
Karineia Akana A Anganaki Te Mwaaka i Aom
9 E rawawata nanon Tawita ngke e karaoaki ae iowawa nakoina? “A ukoukora maiuu akana tiritiri,” e tangitang Tawita nakon Iehova. (Taian Areru 54:3) E nurakina nanona nakon Iehova: “Ko na kamaiuai mairouia taan ribaai, Atuau . . . A botaki akana korakora n ekai nako: Tiaki i bukin au bure, ao tiaki naba i bukin au buakaka Iehova. A biribiri ni katae nangia i mwaiu, ao akea naba au bure: Ko na uti ni butimwaeai, ao tarataraa arou.” (Taian Areru 59:1-4) Ko a tia naba n namakina aei—ae akea am bure ae ko a tia ni karaoia nakon te aomata ae mwiokoaki n te mwaaka, ma e ngae n anne e boni bwainikiriniko naba? Akea te tai teuana are Tawita e aki karinea raoi Tauro. E aki kakatonga ni kimwareirei Tawita ni maten Tauro, ma e otea te anene n nanokawaki: “A bati n tangiraki Tauro ma Ionatan ao a kakukureia te aba ngke a maiu, . . . A kaibuti riki nakoia ikare, a korakora riki nakoia raian. Ngkami aika aine aika natiia Iteraera, kam na tang i aon Tauro.” (2 Tamuera 1:23, 24) Ai raoiroira te katoto anne ibukin karinean ana kabiraki Iehova, e ngae ngke bon Tauro are e a bure nakon Tawita!
w12 1/4 16 ¶8
Te Aki Kakaonimaki—Bon te Kanikina ae Kakamaaku Ibukini Kabaneani Boong!
8 A kabwarabwaraaki naba n te Baibara aomata aika bati aika kakaonimaki. Ti na maroroakin taekaia uoman mai buakoia ao ni karekea reireiara mairouia, ma ti na moanna moa mairoun te mwaane are e kakaonimaki nakon Tawita. E na bae n ruamwin te Uea are Tauro ana karimoa are Ionatan, ma e aki reke aei tii ibukin te bwai teuana. E rineaki Tawita iroun Iehova bwa e na uea imwin Tauro i aon Iteraera. E karinea ana rinerine Iehova Ionatan. E aki bakantang n te aro are e na iangoa Tawita bwa ana kairiribai. Ma “e kabaeaki taamnein Ionatan ma taamnein Tawita” n aron are e berita bwa e na kakaonimaki nakon Tawita. E angan naba Tawita kunnikaina, ana kabaang, ana kainikatebe ma kabaean nukana ao e karinea n aroni karinean te uea. (1 Tamuera 18:1-4, BG) E karaoi bwaai ni kabane ake e konai Ionatan ibukini ‘kakorakoraani bain Tawita,’ ni karokoa ae e a kuri ni bua maiuna ngke e kamaiua Tawita mairoun Tauro. E kakaonimaki Ionatan ao e taku nakon Tawita: “Ko na uea i aoia Iteraera, ao ngai N na kauoman i rarikim.” (1 Tamuera 20:30-34; 23:16, 17, BG) Maroaka are imwini maten Ionatan ao e a kaota nanokawakina Tawita, ma tangiran teuaei n ana anene ni bwaebwaeti!—2Ta 1:17, 26.
Kaubwai n Taamnei Aika Kakawaki
it-1 369 ¶2
Tariu
E kaineti naba te taeka ae “tariu” nakoia naake titeboo te bwai ae a uaiakinna ke aia kantaninga. N te katoto, e wetea te Uea are Toromon te Uea are Iram are uean Turo bwa tarina, tiaki tii ibukin ae titeboo aia karinan ke nakoaia ma tao ibukina naba bwa titeboo te bwai ae a tatangiria ae karekeani kaai ao bwaai riki tabeua ibukin te tembora. (1Ue 9:13; 5:1-12) “Noria! Ai raoiroira ao ai rereira ikotakia taari ni maeka ma te katiteuanaaki!” E oti n te bae e koreia Tawita aei, bwa e aki tii reke te rau ao te katiteuanaaki i marenam ma tarim ae raraam ni koaua. (TA 133:1) Ni koauana, e wetea Ionatan bwa tarina Tawita, tiaki ibukina bwa titeboo aia karo, ma ibukina bwa a itangitangiri ao titeboo baika a uaiakin. (2Ta 1:26) A aranaki naba bwa taari raao aika titeboo aroaroia e ngae naba ngkana e buakaka aroia.—TNR 18:9.
MEI 23-29
BAIKA KAKAWAKI AIKA MENA N ANA TAEKA TE ATUA | 2 TAMUERA 4-6
“Teimatoa ni Maaka Iehova ao ni Karinea”
w05 1/6 9 ¶7
Reirei Aika Kakawaki Man te Boki ae te Kauoua n Tamuera
6:1-7. E ngae ngke e iangoia bwa e karaoa ae raoiroi Tawita, ma e urua ana tua te Atua ni kamwaingan te Ati ni berita i aon te kaa ao n tokina e aki koro bukin ana iango. (Te Otinako 25:13, 14; Warekaia Iteraera 4:15, 19; 7:7-9) Tauan te Ati ni berita iroun Uta, e kaota ae e ngae ngke e mwakuri te aomata ma te nano ae raoiroi ma e aki kona ni bitaki iai ana kaetieti Iehova.
w05 1/3 20 ¶20
E Aki Toki ni Kakaraoa Ae Eti Iehova
20 Uringnga bwa e riai n ataa raoi te bwai are e karaoia Uta. E tei te Ati-ni-berita arei ibukin Iehova. E kateretereaki raoi n te Tua bwa e na aki ringaki irouia aomata aika akea kariaiakaia n ringnga, ae te kauring ae matoatoa bwa te koraki ake a urua nanon te tua anne, a na katuuaaeaki n te mate. (Warekaia Iteraera 4:18-20; 7:89) Mangaia are kamwaewean te ati ae tabu aei, bon tiaki te mwioko ae e na karaoaki n aki akaka. Uta bon tibun Rewi (tiaki te ibonga), mangaia are e riai n taneiai ma te Tua. Irarikin anne, n ririki ake a nako, e a tia ni kamwaingaki te Ati-ni-berita nakon ana auti tamana ibukin kawakinana. (1 Tamuera 6:20–7:1) E a tia n tiku iai n te maan ae 70 tabun te ririki, ni karokoa te tai are e a iangoia Tawita bwa e na kamwaingaki. Mangaia are man uarereken Uta ao e a kaman atai tuua ni kaineti ma te Ati-ni-berita.
w05 1/3 20-21 ¶21
E Aki Toki ni Kakaraoa Ae Eti Iehova
21 E kona n nori naano Iehova, n aron are e kaotaki mai mwaina. Kioina ngke e oti n Ana Taeka Iehova bwa e atong ana mwakuri Uta bwa a “bure,” e kona n ae e nora nanon Uta ni kainikatonga, ae te bwai ae e aki kaotaki n te rongorongo. Te koaua bwa Uta bon te aomata ae kainikatonga, ae kai riaon te tua? (Taeka N Rabakau 11:2) Te koaua bwa e korakora namakinan ae aongkoa e kakannato riki nakoia tabemwaang, kioina ngke e kaira uotakin te Ati-ni-berita i mataia aomata, ae te bwai ae a a tia kaain ana utu ni kakawakinna? (Taeka N Rabakau 8:13) Te koaua bwa akea ana onimaki Uta n taku i nanona bwa e aki kona n ibuobuoki Iehova ni katoka tatanakon te ati ae tabu, are e tei i Bukina arei? Ti kona ni boni kakoauaa bwa e karaoa ae eti Iehova, n aki ongea te bwai ae e riki. E bae n nora nanon Uta are e a kairia bwa e na waekoa ni motika taekana.—Taeka N Rabakau 21:2.
Kaubwai n Taamnei Aika Kakawaki
w96 1/4 29 ¶1
Kaaki Rawawatam i Aon Iehova n Taai Nako
E bon riai ni bukinaki Tawita n rikin aei, ngkai ngaia te uea. E oti man arona, bwa a boni kona aomata aika nakoraoi aia reitaki ma Iehova, ni karaoa ae e aki riai n tabetai ngkana a boo ma kangaanga. N te moantai ao e un Tawita. Ma imwina e a maaku. (2 Tamuera 6:8, 9) E korakora kataakin ana iraorao ma Iehova. Aei te tai are e aki kaaki iai rawawatana i aon Iehova, ao e a aikoa naba kakairi n ana tua. Tiaki naba anne te bwai ae riiriki nakoira n tabetai? Ti a tia ni bukina Iehova ni kangaanga aika riki ibukini katinanikuan ana kaetieti iroura?—Taeka N Rabakau 19:3.
MEI 30–TUN 5
BAIKA KAKAWAKI AIKA MENA N ANA TAEKA TE ATUA | 2 TAMUERA 7-8
“E Karaoa te Berita Iehova ma Tawita”
w10 1/4 20 ¶3
“E na Teimatoa Am Tautaeka n Uea”
E ringaki nanon Iehova ni korakoran nanon Tawita. Ibukini kakaonimakin Tawita ao kakoroan te taetae ni burabeti, e a karaoa te berita te Atua ma Tawita ae E na kateirakea temanna mani kanoana ae e na tautaeka n aki toki. E taekina ana berita te Atua nakon Tawita Natan ni kangai: “E na teimatoa n aki toki batam ao am tautaeka n uea i matam, ao e na teimatoa am kaintokanuea n aki toki.” (Kibuna 16) Antai te tia Bwaibwai n te berita aei are E na tautaeka n aki toki?—Taian Areru 89:20, 29, 34-36.
w10 1/4 20 ¶4
“E na Teimatoa Am Tautaeka n Uea”
Boni kanoan Tawita Iesu are te I-Natareta. E taekina ae kangai te anera ngke e katanoataa bungiakin Iesu: “Iehova ae te Atua e na anganna ana kaintokanuea tamana are Tawita, ao e na tautaeka bwa te Uea i aon te utu are Iakoba n aki toki, ao e na akea tokin ana Tautaeka n Uea.” (Ruka 1:32, 33) E a kakororaoaki nanon te berita ma Tawita, iroun Iesu Kristo. E tautaeka tiaki man aia rinerine aomata, ma boni man ana berita te Atua are e a anganna iai riaina bwa e na tautaeka n aki toki. Ti bia ururingnga ae a teimatoa ni kokoro bukin ana berita te Atua.—Itaia 55:10, 11.
w14 15/10 10 ¶14
Kanenea Onimakinan te Tautaeka n Uea
14 Iangoa te bwai are e beritanna Iehova nakon te Uea are Tawita rimoa rinanon te berita ma Tawita. (Wareka 2 Tamuera 7:12, 16.) E karaoa te berita aei Iehova ma Tawita n ana tai n tautaeka Tawita i Ierutarem, ngke e berita nakoina bwa e na riki te Mesia mani kanoana. (Ruka 1:30-33) Ai ngaia are e anga rongorongo ake a eti aika bati riki ibukin te kariki aei Iehova ao n taekinna bwa e na onea mwin Tawita teuare “bon ana tei te baei” n ana kaintokanuea te Tautaeka n Uea iroun te Mesia. (Etekiera 21:25-27, BG) E “na kamatoaaki n aki toki” rinanon Iesu ana tautaeka Tawita. Ni koauana, “e na bon aki toki ana kariki, Ao ana kaintokanuea n ai aron taai.” (Taian Areru 89:34-37, BG) Eng, e na bon aki kamaunaaki ana tautaeka te Mesia, ao a na teimatoa n aki toki baike e kakororaoi!
Kaubwai n Taamnei Aika Kakawaki
it-2 206 ¶2
Kabaneani Boong
Ana Taetae ni Burabeti Baraam. E taekina ae kangai te burabeti ae Baraam nakoni Ueani Moaba ae Baraka imwain raoi rinia tibun Iteraera n te Aba ni Berita: “Nakomai ao kariaia bwa N na kaongoko te bwai ae e na karaoia te natannaomata aei [ae Iteraera] nakoia am aomata nakon te tai ae e na roko. . . . E na otinako te itoi mairoun Iakoba, ao e na nako okon te uea mairoun Iteraera. Ao e na boni kamanatuaa ramwani Moaba ao tabwanouia natin nako te karongoa.” (WI 24:14-17) E oti ni moani kakororaoan te taetae ni burabeti aei, bwa e tei te “itoi” ibukin te Uea ae Tawita ae te tia kataenikaiia tibuni Moaba. (2Ta 8:2) E oti raoi ngkanne, bwa mani kakoroan te taetae ni burabeti aei, e moanaki “te tai ae e na roko” ngke e riki Tawita bwa te uea. Ngkai e tei Tawita ibukin Iesu are te Uea ae te Mesia, e kaineti naba ngkanne te taetae ni burabeti aei nakon Iesu n te tai are e kataenikaiia iai taani kairiribai nakoina.—Ita 9:7; TA 2:8, 9.
TUN 6-12
BAIKA KAKAWAKI AIKA MENA N ANA TAEKA TE ATUA | 2 TAMUERA 9-10
“E Kaota te Tangira ae Koaua Tawita”
w06 15/6 14 ¶6
Eng, Ko Kona ni Karekea te Kukurei
E korea ae kangai Tawita: “E a kukurei ane e kaota tabeakinan te aomata ae mangori.” E reitia n taku: “E na kamaiua Iehova ni bongin te rawawata. E na kawakinna Iehova ao e na kateimatoa maiuna. E na atongaki bwa e kukurei.” (Taian Areru 41:1, 2) Te tangira are e kaotia Tawita nakoni Mebiboteta are e mwauku, are natin raoraona are Ionatan, bon te katoto ae raoiroi ae riai ni kaotaki nakoia naake a mangori.—2 Tamuera 9:1-13.
w05 1/6 9 ¶11
Reirei Aika Kakawaki Man te Boki ae te Kauoua n Tamuera
9:1, 6, 7. E kakoroa nanon ana berita Tawita. Ti riai naba ngaira ni kakoroi nanon ara berita.
w02 1/4 18 ¶10
A Nanomwaaka ni Bwaai ni Kateketeke n Irikoia
10 Te Uea ae Tawita e akoa Mebiboteta ibukin korakoran tangiran Ionatan irouna. Tawita e anganna aban Tauro ni kabane, ao e mwiokoa ana toro Tauro ae Tiba bwa e na tararuai aaba aikai. Ao e tuanga naba Mebiboteta Tawita ae kangai: “Ko na amwamwarake n au taibora n te bong ae koraki.” (2 Tamuera 9:6-10) Akea te nanououa bwa e kabebeteaki nanon Mebiboteta n ana akoi Tawita, ao e buokaki iai n rawawatan nanona ibukin mwaukuna. Ai raoiroira te katoto anne! Ti riai naba n akoia aomata aika a tabe ni kaaitara ma te bwai ni kateketeke n irikoia.
Kaubwai n Taamnei Aika Kakawaki
it-1 266
Te Buai
A bati aomata n taai ake rimoa i Mainiku n ikotaki naba ma tibun Iteraera aika iangoa te buai bwa kaotani karinean te mwaane. N ana tua te Atua nakoia tibun Iteraera ao e aki kariaia koreani “maninganingan” iran atuia ao buaia. (NI 19:27; 21:5) Tao e tei te tua anne ibukina bwa karaoan anne boni kanoan aia taromauri beekan.
TUN 13-19
BAIKA KAKAWAKI AIKA MENA N ANA TAEKA TE ATUA | 2 TAMUERA 11-12
“Tai Kariaia Nanom ae Buakaka Bwa E na Kaiririko”
w21.06 17 ¶10
Ko Kona ni Buutakinako Man Ana Kai ni Kabwaru te Riaboro!
10 E kairaki n te nanonrang te Uea ae Tawita bwa e na mwaninga taekani baike e anganna Iehova n aroni kaubwaina, kakannatona, ao totokanikaina i aoia aiana aika bati. E kakaitau Tawita ni kaotia bwa ana bwaintangira te Atua “a aikoa kona n taekinaki bwa a rangi ni bati!” (TaiAre. 40:5) Ma n te taina ao Tawita e a mwaninga taekani baike e anganna Iehova. E a aki rauaki iai. E tangira ae bati riki. E ngae ngke tiaki tii temanna buun Tawita, ma e kariaia ana kaibwabwaru n tangira buun te mwaane temanna bwa e na rikirake i nanona. Te aine anne boni Batateba ae buun Uria ae tibun Eta. E bangaomata Tawita ni wene ni bure ma Batateba ao e a bikoukou neiei. Ma tiaki tii anne, e a manga bairea Tawita tiringakin Uria! (2Tam. 11:2-15) Tera are e iangoia Tawita? E iangoia bwa e aki noraki iroun Iehova? E boni bwaka n te nanonrang te mwaane are rangi ni kakaonimaki ngkoa nakon Iehova, ao e rotakibuaka ni mwin ana mwakuri. Ma e kakukurei bwa imwina riki ao e kaota ana bure Tawita ao n raira nanona. Ai kakaitaura ngke e a manga akoaki iroun Iehova!—2Tam. 12:7-13.
w19.09 17 ¶15
Tauraoi n Aantaeka Nakon Iehova—Bukin Tera ao n te Aro Raa?
15 E mwiokoa Tawita Iehova bwa atun oin ana utu ao te natannaomata naba ae Iteraera. Ngkai te uea Tawita, e korakora mwaakana ni kairiri. N tabetai, e kabongana buaka mwaakana ao e karaoi buure aika kakaiaki. (2Tam. 11:14, 15) Ma e kaotia bwa e aantaeka iroun Iehova man arona ni butimwaea kaetakina. E bunra nanona n ana tataro nakon Iehova, ao e kabanea ana konaa n ongeaba n ana reirei ni kairiri. (TaiAre. 51:1-4) Irarikin anne, e nanorinano ni butimwaei taeka n reirei tiaki tii mairouia mwaane ma aine naba. (1Tam. 19:11, 12; 25:32, 33) E reke reireian Tawita n ana bure ake e karaoi ao e a moanibwaia te beku iroun Iehova.
w18.06 17 ¶7
Kataneia Mataniwin Nanom n Ana Tua te Atua ao Ana Boto n Reirei
7 Ti kakaitau bwa ti aki riai n rotakibuaka moa imwin uruakan ana tua te Atua ao a a tibwa reke reireiara aika kakawaki. Ti kona ni karekei reireiara man aia kairua tabemwaang aika taekinaki n Ana Taeka te Atua. E taku Taeka N Rabakau 1:5: “E kakauongo te aomata ae wanawana ao e butimwaea te reirei ae bati riki.” Eng, ti karekea te reirei ae te kabanea n tamaroa mairoun te Atua ngkana ti wareki ao n iaiangoi rongorongoni maiuia aomata aika n te Baibara. N te katoto, iangoa te maraki are e rinanona te Uea ae Tawita ngke e aki ongeaba n ana tua Iehova ao e wene ni bure ma Batateba. (2Tam. 12:7-14) Ngkana ti wareka te rongorongo aei ao ni kananoa ara iango iai, ti kona n titirakinira ni kangai: ‘E na kangaa te Uea ae Tawita n totokoa rikin te rawawata ibukin ana mwakuri ni wene ni kimoa ma Batateba? Tera ae N na karaoia ngkana I aitara ma te kariri ae aron anne? N na wene ni bure n aron Tawita ke N na birinako n aron Ioteba?’ (KBwaai 39:11-15) Ngkana ti iaiangoi mwin te bure aika karawawata, ti a kona ni kakorakoraaki bwa ti na “ribaa te bwai ae buakaka.”
Kaubwai n Taamnei Aika Kakawaki
it-1 590 ¶1
Tawita
E bon tarataraira Iehova, ao e kona ni kaotii bwaai ni kabane aika buakaka. Ngke arona bwa e anga taekan aroia Tawita ao Batateba nakoia taani motikitaeka i aan ana Tua Mote, a na boni bae ni kamani mate taani bure aikai, ao e na boni mate naba te teei are e riki n aia wene ni kimoa ma tinana. (TTK 5:18; 22:22) Ma bon Iehova ae motika taekaia, ao e nanoangaa Tawita ibukin te berita ibukin te Tautaeka n Uea (2Ta 7:11-16), ibukina naba bwa e kaotiota te nanoanga Tawita, (1Ta 24:4-7; kabotaua ma Iak 2:13) ao e noria naba te Atua bwa a rairi nanoia. (TA 51:1-4) Ma a boni katuuaaeaki. E taetae Iehova rinanon Natan ni kangai: “Akea bwa N nang karokoa te kabuanibwai i aom boni mairouia kaaini batam.”—2Ta 12:1-12.
TUN 20-26
BAIKA KAKAWAKI AIKA MENA N ANA TAEKA TE ATUA | 2 TAMUERA 13-14
“E Riki te Bae Kananokawaki Ibukini Bangaomatan Amnon”
it-1 32
Abetarom
Kamatean Amnon. E a moanna n reke nanon Amnon ni botonnainen Tama ae mwanen tarina ae Abetarom ae titeboo tamana ma ngaia. E bakaaea te aoraki Amnon ao e ukera angan rokon Tama n ana auti bwa e na kuuka ibukina, ma imwina e a taumatoa naba neiei n taua. E bitaki tangiran Tama iroun Amnon nakon ribaakina ae korakora ao ni kaotinakoa neiei nako tinaniku. E raeuaaka kunnikaina neiei ae a bwabwainna natin te uea aika aine aika tuai ni boo ma mwaane, e kaaki te mannang i aon atuna, ike e a noria Abetarom. E kanamakinna bwa e buakaka nanon Amnon, are e oti iai bwa e a kaman ataa taekan ana kaitaataan ai tarina aei. E tuanga mwanena Abetarom bwa e na kainabwabu, ao e kairia nakon ana auti.—2Ta 13:1-20.
w17.09 5 ¶11
Karikirakea te Taubaang
11 E kaotaki n te Baibara aia katoto naake a aki taubaang ni kaineti ma te wene ni bure. E kaotaki naba iai mwina aika kananokawaki, ngkana ti aki taubaang. Ngkana ko kaaitara ma te baere e rinanona Kim, ko karaoa ae raoiroi ngkana ko iaiangoa te rorobuaka n ataei are nanobaba are taekinaki n Taeka N Rabakau mwakoro 7. Iangoa naba te baere e karaoia Amnon ao mwina ae kakaiaki are e a reke irouna. (2Tam. 13:1, 2, 10-15, 28-32) A kona kaaro ni buokiia natiia ni karikirakea te taubaang ao te wanawana ni kaineti ma te iraorao ni karekenano, n aroia ni maroroakin rongorongo man te Baibara aika tibwa taekinaki aikai, n aia taromauri n utu.
it-1 33 ¶1
Abetarom
Imwin uoua te ririki ngke e a roko taini koreani buraeia tiibu, ao Abetarom e a bairea karaoan te bukamaru i Baaraatiora ae tao 22 te kiromita (14 maire) mai Ierutarem, e kaoiia natin te Uea ao bon Tawita naba. Ngke e karautaeka tamana, ao e a kaumakia naba bwa e na kariaia kanakoan Amnon are natina are te karimoa ibukina. (TNR 10:18) Ngke e a ‘kukurei nanon Amnon man te wain’ n tain te bukamaru, ao Abetarom e a tua naba nakoia ana toro kamatean Amnon. A oki rikaaki naati mwaane ake tabeman nako Ierutarem, ao Abetarom e a riki bwa te taenikai ma tibuna te unimwaane ae te I-Turia n ana tautaeka Keturi i mainikun Namani Kariraia. (2Ta 13:23-38) E a rin ngkai te “kabaang” are e a kaman taekinna te burabeti are Natan n ana “auti” Tawita ao e na bon teimatoa ni mena ikanne ni kabane bongini maiuna.—2Ta 12:10.
Kaubwai n Taamnei Aika Kakawaki
ypq 7 bar.2-5
E Aera Bwa I Tabeaianga n Aron Taraakiu?
Ni koauana, bon te aomata ae raba are n te nano ae kona n oti iai bwa e tamaroa te aomata ke e aki. Iangoa natin te Uea ae Tawita ae Abetarom. E taekinaki aei n te Baibara: ‘Akea te mwaane temanna ae kamoamoaaki riki nakoina ibukini botonimwaanena. Bon akea naba waewaeana teutana.’—2 Tamuera 14:25.
E ngae n anne, bon te rorobuaka n ataei ae rangi n nanorieta, e kainikatonga, ao te tia kamwane! Ngaia are e aki kaotaki n te Baibara aron Abetarom ae raoiroi; e kaotaki iai bwa te mwaane ae aki bwerengaki n aki kakaonimaki ni koaua ao e tiritiri kairiribaina. Anne bukina ae e anga taeka n reirei aikai te Baibara: “Karina i aomi te aroaro ae boou.”—I-Korote 3:10.
“Katamaroaami ae riai, tiaki katamaroaan tinanikumi . . . , ma katamaroaami ae riai bon te aomata ae raba are n te nano.”—1 Betero 3:3, 4.
E ngae ngkai akea buren te kani baaraoi, ma e kakawaki riki aroarom nakon aron taraakim. N tokina, ane ko na ririkirake ni baaraoi irouia tabemwaang ibukin aroarom aika tamaroa, ao tiaki ibukini korakoran ke teiraoin rabwatam! E taku te teinnaine ae Phylicia: “Ko kai taraaki ni baaraoim, ma anuam raoi ao aroarom aika raraoi boni ngaia ake a na ururingko riki iai aomata.”
TUN 27–TURAI 3
BAIKA KAKAWAKI AIKA MENA N ANA TAEKA TE ATUA | 2 TAMUERA 15-17
“E Karitei Abetarom Ibukina Bwa E Kainikatonga”
it-1 860
Te Tia Rimoana
Boni katein te aono ni mainiku ae a riai ni biribiri imwain ana kaa ni buaka te uea, taan rimoana bwa a aonga ni katauraoa ao ni katanoataa rokon te uea ao ni buokia. (1Ta 8:11) A tangira naba karineaia anne Abetarom ao Atoniia, ao a karekeia taani biri rimoaia aia kaa ni buaka aika 50.—2Ta 15:1; 1Ue 1:5; nora TAANI BIRI.
w12 1/7 18 ¶5
Tooro Iroun te Atua ae Anga te Inaomata
5 A bati banna ni katoto n te Baibara ibukia aika a aki raraoi aroaroia ake a rotaki iai tabemwaang. Teuana mai buakoni katoto aikai, bon Abetarom ae natin te Uea are Tawita. Bon te mwaane ae bakitoutou Abetarom. Titeboo arona ma Tatan bwa imwin tabeua te tai, e a kariaia reken te nanonrang ibukin te kani kakannato ni mataaiakina ana kaintokanuea tamana, are e aki katauaki iai. Ibukini kani karekean te nakoa n uea irouna, e uaraoa tamana ma te nanowanawana nakoia raona ake tibun Iteraera, bwa a na kakoauaa ae a aki tabeakinaki iroun te uea. Eng, n aron are e karaoia te Riaboro n te onnaroka i Eten, ai aron naba Abetarom are e kaotia nakoia aomata bwa aongkoa te tia ibuobuoki ao e taekina te kewe ae tiritiri ibukin tamana n te tai naba anne.—2Tam. 15:1-5.
it-1 1083-1084
Eberon
Tabeua te ririki imwin okin Abetarom are natin Tawita nako Eberon, ao e a moana naba kan tauan ana tautaeka tamana. (2Ta 15:7-10) Tao ibukina bwa e a tia n riki Eberon n te taina bwa kautun Iuta ae kinaaki n rongorongona, ao ibukina naba ngkai bon te kaawa ae bungiaki iai, e a rinea te kaawa aei Abetarom bwa e na moana iai anaakin te kaintokanuea. Imwina, e a manga kateaki Eberon iroun te Uea ae Reoboam are tibun Tawita. (2Ro 11:5-10) A maeka tabeman I-Iutaia i Eberon (Kiriataareba) imwini kamaroaean Iuta irouia kaaini Baburon ao manga okia I-Iutaia ake taenikai.—Ne 11:25.
Kaubwai n Taamnei Aika Kakawaki
w18.08 6 ¶11
E Tabwanin Raoi te Rongorongo Iroum?
11 Ti kona naba ngaira n tatabemanira nako n aitara ma te ribuaka ibukin te rongorongo ae koaua teutana ke ae aki tabwanin raoi, ae kabutakinako bwa taekara. Iangoa ana katoto te Uea ae Tawita ao Mebiboteta. E tituaraoi Tawita ao e akoa Mebiboteta ngke e a kaoki aban tibuna ae Tauro nakoina. (2Tam. 9:6, 7) Ma imwina riki, e a roko te rongorongo ae kairua iroun Tawita ibukini Mebiboteta. E aki kakaaea bwaninin te rongorongo Tawita ao e a baireia naba bwa e na kakeai ana bwai nako Mebiboteta. (2Tam. 16:1-4) Ma ngke e a taetae Tawita ma Mebiboteta, e a ataia Tawita ae e bure ao e a manga kaoki ana bwai tabeua. (2Tam. 19:24-29) Ma e kona n totokoaki te ribuaka aei ngke arona bwa e karekea ana tai Tawita ni kabwanina raoi te rongorongo, nakon are e a waekoa naba ni karaoa te bwai teuana.