Rabunan te Atu​—N Ningai ao Bukin Tera?

N ningai ae e riai n rabuna iai atuna te aine ae te Kristian ni kaineti ma ana taromauri, ao bukin tera? Ti na rinanoni ngkai ana maroro te abotoro Bauro i aon aei ni kairana iroun te Atua. E katauraoa te kairiri ae ti kainnanoia bwa ti aonga ni karaoi motinnano aika eti, ake e na karineaki iai te Atua. (1 I-Korinto 11:3-16) E kaotii baika tenua Bauro aika riai n iangoaki: (1) mwakuri ake e riai n rabuna iai atuna te aine, (2) taai ake e riai ni karaoa iai anne, ao (3) bukini kamanenaan te kaetieti aei irouna.

Taiani mwakuri. E taekini mwakuri aika uoua Bauro aika te tataro ao te taetae ni burabeti. (Te Kibu 4, 5) Te tataro bon te aro n taromauri ae ko taetaenikawai iai ma Iehova. Ni boong aikai, e kaineti te taetae ni burabeti ma te angareirei ae boto i aon te Baibara, ae e karaoia te minita ae te Kristian. Ma te koaua bwa e nanonna Bauro bwa e riai te aine n rabuna atuna n taai nako ngkana e tataro ke e angareirei i aon te koaua man te Baibara? E aki. A kakaokoro nako taai ake e riai n rabuna iai atuna te aine ngkana e tataro ke e angareirei.

Taai ake e riai n rabuna iai atuna. A kaotaki n ana taeka Bauro taai ke taabo aika uoua ake e na karaoaki iai aei, bwa n te utu ao n te ekaretia. E taku: “Atun te aine te mwaane . . . Te aine ae tataro ke e taetae ni burabeti na aki rabuna atuna, e kamaamaea iai atuna.” (Te kibu 3, 5) N te babaire i nanon te utu, e rinea te buu te mwaane Iehova bwa atun te aine. Ngkana e aki karinea mwaakani buuna ni kairiri neiei, e na kamaamaea buuna ngkana e karaoi neiei mwioko ake e anga Iehova nakon teuaei. N te katoto, ngkana e riai ni kaira te reirei n te Baibara neiei ao iai buuna, e na karinea mwaakani buuna ni kairiri n arona n rabuna atuna. E na karaoa aei e ngae ngke e a tia ni bwabetitoaki buuna ke e tuai, kioina ngkai atun te utu teuaei.a Ngkana e na tataro neiei ke n angareirei ao iai natina te mwaane i rarikina ae e a tia ni bwabetitoaki ma e tuai n inaomata mai aan ana kairiri ana karo, e na rabuna naba atuna, tiaki ibukina bwa atun te utu natina, ma ibukin te mwaaka ni kairiri are a anganaki mwaane ake a a tia ni bwabetitoaki, n te ekaretia ni Kristian.

E taekina te waaki n te ekaretia Bauro ni kangai: “Ngkana e kani kakairi temanna ni katei riki tabeua, ao ai bon akea riki te katei teuana mairoura, ao mairouia naba kaain ana ekaretia te Atua.” (Te kibu 16) N te ekaretia ni Kristian, a anganaki mwaane aika bwabetitoaki te nakoa ni kairiri. (1 Timoteo 2:11-14; I-Ebera 13:17) Bon tii mwaane n te ekaretia aika ririneaki bwa unimwaane ke tabonibai aika mwiokoaki iroun te Atua bwa a na tararuaa ana nanai. (Mwakuri 20:28) Ma e kona ni mwiokoaki n tabetai te aine ae te Kristian bwa e na tabeakina te mwioko teuana ae mwiokoan te mwaane ae tau ae e a tia ni bwabetitoaki. N te katoto, e kona ni kainnanoaki bwa e na kaira te botaki ibukin te mwakuri ni minita bwa akea te mwaane ae tau ae e a tia ni bwabetitoaki ke e aki kaoti. Ke e kona ni kaira te reirei n te Baibara n te mwenga ma te aomata, ae e mena te mwaane ae e a tia ni bwabetitoaki iai. Ibukina bwa mwakuri akanne boni waakin te mwakuri n te ekaretia ni Kristian, e na rabuna atuna te aine ni kaotia bwa e karaoa te mwakuri ae mwiokoan te mwaane.

Ma n te itera are teuana, a bati iteran nako te taromauri ae e aki kainnanoaki iai te tari te aine bwa e na rabuna atuna. N te katoto, e aki riai n rabuna atuna ngkana e anga ana kaeka n tain te bobotaki ni Kristian, ngkana e karaoa te mwakuri ni minita n te auti teuana ma teuana ma buuna ke te mwaane riki temanna ae e a tia ni bwabetitoaki, ke ngkana e tataro ma natina aika tuai ni bwabetitoaki. E koaua bwa a kona ni manga rio titiraki tabeua, ma ngkana e aki koaua raoi iai te tari te aine, e kona ni karaoa riki ana ukeuke i aona.b Ngkana e teimatoa na aki koaua iai, ma ngkana e kairaki ni mataniwin nanona bwa e na rabuna atuna, e aki bure karaoan anne, n aron ae oti n te taamnei ae i eta.

Bukini karaoana. N te kibu 10, ti nora bukina aika uoua ae e riai iai te aine ae te Kristian ni kan ongeaba n te kaetieti ae kangai: “E riai n toka i aon atun te aine kanikinaean te aantaeka, ibukia anera.” Te moan, nora te kibuntaeka ae “kanikinaean te aantaeka.” Ngkana e rabuna atuna te aine, e kaotia iai bwa e butimwaea te mwaaka ni kairiri are e anga Iehova nakoia mwaanen te ekaretia ake a a tia ni bwabetitoaki. Mangaia ae e kaota iai ana tangira ao ana kakaonimaki nakon Iehova ae te Atua. E noraki bukina ae te kauoua n taeka aika “ibukia anera.” E kanga te aine n rotiia anera aika mwaaka n arona n rabuna atuna?

A kukurei anera n noran ae e karineaki mwaakan te Atua ni kairiri i nanon ana botaki Iehova i karawa ao i aon te aba. A kakabwaiaaki naba n aia katoto aomata aika aki kororaoi ni kaineti ma aei. A riai naba n aantaeka nakon ana babaire Iehova, ae te kataaki ae a bati iai anera ake a bwaka rimoa. (Iuta 6) A kona naba anera n nori katoto tabeua ni kaineti ma mwaatain riki te aine ae te Kristian, ataibwaina riki, ke wanawanana riki nakon te mwaane ae e a tia ni bwabetitoaki, ma e ngae n anne e kaotiota te aantaeka neiei nakoni mwaakan teuaei ni kairiri. N tabetai ao te aine anne bon te Kristian ae kabiraki ae na riki rimwi bwa raoni Kristo n tautaeka. N te tai ae riai, e na beku te aine ae kabiraki aei n te nakoa ae rietata riki nakon nakoaia anera, ao e na kaai n tautaeka ma Kristo i karawa. Ai raoiroira te katoto aei ibukia anera! Ni koauana, ai kakabwaiaakira taari aine ni kabane ngkai a kona ni kaotiota nanorinanoia n ongeaba, n aroia ni kakaonimaki ao n aantaeka ngkai a tataraaki irouia anera aika kakaonimaki aika mirion ma mirion!