E Kona ni Buokiko te Baibara Bwa Ko na Kukurei

E NGAE ngke te Baibara bon tiaki bokin te bwai-n-aoraki, ma e taekina aron ana mwakuri te namakin ae riai ao ae aki-riai, ni kona n rota ana iango te aomata ao marurungina. E taku te Baibara: “E kamarurung te kukurei; e kaaoraki te nanokawaki.” Ti a manga wareka riki ae kangai: “Ngkana ko mamara n tain te rawawata ao e bon aki tau korakoram.” (Taeka N Rabakau 17: 22, BK; 24:10, BK) E kona ni kakerikaaka korakorara namakinan te bwarannano, n te aro are ti a namakina te mamaara ao ni kai rotaki n te nano, are ti aikoa tangira iai te bitaki ke ti aki kan ukoukora buokara.

E kona n rotaki buaka te onimaki n te bwarannano. Aomata ake a namakinna bwa akea bongaia, a aki toki n iangoia bwa a aikoa kona ni karekea te itoman ae raoiroi ma te Atua ao ni kakabwaiaki irouna. Nei Simone are e taekinaki n te kaongora ae imwain aei, e nanokokoraki n taku bwa tiaki ngaia “te aeka n aomata ae e kona ni butimwaeaki iroun te Atua.” Ma ngkana ti ukeuke n Ana Taeka te Atua ae te Baibara, ti na ataia iai bwa te Atua e tarataraa raoiroia te koraki ake a kani kakukureia nanona.

E Tabeakinia Aomata te Atua

E tuangira te Baibara bwa “E a kaan Iehova ma akana a uruaki nanoia, ao E kamaiuia akana a raraoma tamneiia.” E aki ribaa “te nano ae uruaki ae raraoma” te Atua, ma e berita bwa e na “kamaiui tamneiia akana nanorinano, ma ni kamaiui nanoia akana raraoma.”​—Taian Areru 34:18; 51:17; Itaia 57:15.

N te tai teuana, Natin te Atua are Iesu e ataia bwa e riai ni kabwarabwaraa nakoia taan rimwina, taekan te koaua are te Atua e nora raoiroia Ana toro nako. Man te kabotau are e karaoia, ao e taekina iai aron te Atua n ataa bwakan te tibaaro temanna i aontano, ae te man ae a iangoia angiia aomata bwa e karako bonganana. E katuruturua naba bwa e atai rongorongo aika uarereke te Atua ibukia aomata, ao e atai naba mwaitin iraia. E motika ana kabotau Iesu n taekinan aei: “Ma ngaia ae kam na tai maku; ba kam bongana riki nakoia tibaaro aika bati.” (Mataio 10:29-31)a E kaotia Iesu bwa n aki ongeia bwa tera aia namakin aomata i bon ibukiia, ma a kakawaki aomata aika onimaki iroun te Atua. Ni koauana, e kauringira te abotoro Betero bwa ‘e aki inanonano te Atua, ma e tangiraki irouna are e maakua ma ni karaoa ae raoiroi i buakoia botannaomata ni kabaneia.’​—Mwakuri 10:34, 35.

Kateimatoaa te Iango ae Riai

E kaumakira Ana Taeka te Atua bwa ti na karikirakea iangoan ae riai n arora ni bon iangoira. E korea ae kangai te abotoro Bauro i aan kairakina iroun te taamnei: “N te akoaki ae I anganaki, nako imi n tatabemaningkami nako, ba e na tai iango temanna i nanona ni kamoamoa i bon i rouna ni kamaitia riki nakon are e riai ba e na iangoia; ma e na iango i nanona n te aro ae e na wanawana iai, n ai aron tibangan te onimaki are E tibaia te Atua nakoia aomata nako.”​—I-Rom 12:3.

Ti aki riai n rangi ni kamoamoaira i bon iroura n te aro are ti a manga nanorieta iai. Ma n te itera teuana, ti aki naba riai ni kakeaa bongara n taku bwa akea manenara. Ma tiara boni karikirakean te iango ae riai ibukira, are ti na iangoi korakorara n ikotaki naba ma tian ara konabwai. E kabwarabwaraa ni kangai te aine ae te Kristian: “Tiaki ngai karoton te buakaka; ao tiaki naba ngai te aomata ae kororaoi. Iai raoiroiu ao iai kabwakau n aroia naba aomata n tatabemania nako.”

Ni koauana, e kona ni bebete bwainan te iango anne nakon karaoan nanona. E kona ni kainnanoaki te kakorakora ae bati ibukin kamaunan ara iango ae aki-riai i bon ibukira, ake tao ti a tia ni karikirakea i nanon ririki aika bati. Ma e ngae n anne, ti kona ni bita anuara n ana ibuobuoki te Atua n ikotaki naba ma ara kaantaninga ibukin te maiu. N etina, aei te bwai ae e kaumakira Ana Taeka te Atua bwa ti na karaoia. Ti wareka ae kangai: “Kitana te aomata nikawai are aromi ni maeka ngkoa, are nangi riki ni buakaka n tou mwin taiani kaibabaru aika mamana te aba; ao kam na oneaki n aron nanomi, ao kam na karina te aomata nabangkai, are karaoaki ba aron te Atua n te raoiroi ao n te itiaki are riki man te koaua.”​—I-Ebeto 4:22-24.

Ngkana ti kakorakoraira ni bita ‘aron nanora’ are e nanonaki iai, te namakin ae tataro i nanora, ti kona ngkanne ni bita anuara ae aki-riai nakon ae riai. Nei Lena are e taekinaki n te kaongora mai mwaina, e reke otana bwa e aki kona ni bita ana namakin ae buakaka i bon irouna, ni karokoa te tai are e a katinanikua iangoan ae akea temanna ae kona n tangiria ke ni buokia. Tera te reirei ae manena ae kuneaki n te Baibara are e a buokiia Nei Lena, Nei Simone, ao tabeman riki bwa a na bita aroia?

Reirei Man te Baibara Aika Karikirakea te Kukurei

“Angani Iawe rawawatam, ao e na buokiko.” (Taian Areru 55:22, BK) Te moanibwai ae moan te kakawaki, bwa e kona ni buokira te tataro ni karekea te kukurei ni koaua. E taku Nei Simone: “Ngkana I namakina te bwarannano, ao I a tataro naba nakon Iehova ni butiia ana ibuobuoki. Bon akea te tai ae N na aki iai namakina ana kakorakora ao ana kairiri.” Ngke e kaumakira te tia areru bwa ti na angan Iehova rawawatara, ao ai aron ae e kauringira bwa e aki tii tabeakinira Iehova ma e taraira n tatabemanira nako bwa ti tau ni buokaki irouna ao ni boutokaki. N tairikin te Toa are te Riao n 33 C.E., ao a rawawata taan rimwin Iesu n te bwai are e taekinna Iesu ibukin kaanin te tai are e nang kitania iai. E kaumakiia Iesu bwa a na tataro nakon te Tama ao e reitia ni kangai: “Bubuti, ao ane kam na anganaki, ba a na koro raoi kakatongami.”​—Ioane 16:23, 24.

“E kakabaia [“kakukurei,” NW] riki te anga nakon te anganaki.” (Mwakuri 20:35) N aron ana reirei Iesu, reken te kukurei ni koaua iroum boni man te anganga. Kamanenan ana koaua te Baibara, e kairira bwa ti na kaatuua riki iangoan kainnanoia tabemwaang nakon oin kainnanora. Ngkana ti buokiia tabemwaang ao n noria bwa a kukurei imwin buokaia, ti namakina ngkanne reken te raunnano i bon iroura. E kakoauaa Nei Lena bwa e buokaki n aanga aika uoua, n te katoatai n tataekina te rongorongo ae raoiroi man te Baibara nakoia aomata. E taku: “Te moanibwai, e anganai te aeka ni kakukurei ao te raunnano are e taekinna Iesu. Te kauoua, aroia aomata ni kan ongora e a buokai ni karekea te kukurei.” Man bwainan te akoi n anganga boni ngaira, ti namakina iai koauan Taeka N Rabakau 11:25, (BK): “E na akoaki te aomata ae e akoi; e na buokaki ane e ibuobuoki.”

“A bane ni bubuaka aia bong akana rawawata: ma ane e kukurei nanona ao iai i rouna te amarake ae akea tokina.” (Taeka N Rabakau 15:15) Ti bane n inaaomata n rinea te aro are ti na iangoira iai ao n iangoa arora ni maiu. Ti kona ni katotongia te koraki ake a tarai bwaai n te aro ae aki-riai ao ni karawawataki iai, ke ti kona n rineia bwa ti na iangoa ae riai, n namakina ‘te kukurei n nano,’ ao ni kimwareirei, kaanga aron ae ti mena n te baka-n-amwarake. E taku Nei Simone: “I kataia n iaiangoa ae riai n aron au konaa. I katabetabeai ni karaoan au ukeuke n reirei i bon irou ao n te mwakuri ni minita, ao I botumwaaka n tataro. I kataia ni memena i buakoia te koraki aika raoiroi aia iango ao ni kukukurei, ao I kataia ni buokiia aomata ni karau nanoia.” Te aeka n nano anne e karekea te kukurei ni koaua, n aron naba are e kaumakira iai te Baibara ni kangai: “Kam na kukurei iroun Iehova, ma ni kimareirei, ngkami akana kam raoiroi: ao kam na takaakaa ni kakatonga, ngkami aika a eti nanomi ni kabaneingkami.”​—Taian Areru 32:11.

“E tangira te aomata raona n te bong ae koraki, ao e bungiaki te tari ba katokani kain tarina.” (Taeka N Rabakau 17:17) Onimakinan te aomata ae tatangira ke te tia ibuobuoki ae e kona n onimakinaki, e kona ni buokira ni kaaitarai namakin aika aki-riai ma ni katoki imwain ae a na taonira nako. E kona ni buokira te maroro ma tabemwaang, bwa ti na kona n tarai bwaai ma te iango ae riai. E taku Nei Simone: “E korakora buokau imwin bunran nanou nakoia tabemwaang. Ko riai n tuanga temanna am namakin. N tabetai, ko buokaki naba ngkana ko tii kabwarabwaraa te bwai ae ko rawawata iai nakon temanna.” E na buokiko karaoan anne n ataa koauan te taeka n rabakau are kangai: “E karawawata nanon te aomata te raraoma; ma e kakukureia te taeka ae raoiroi.”​—Taeka N Rabakau 12:25.

Te Bwai ae Ko Kona ni Karaoia

A bati riki booto-n-reirei n te Baibara aika kamimi ma ni manena aika kona ni buokira n tokanikai i aon namakin aika aki-riai, ma ni kairira nakon te kukurei ni koaua. Ngkana ngkoe temanna mai buakoia te koraki akana a kekeiaki ribuakon namakinan ae a aki-tau, ti kaungako bwa ko na nenera raoi Ana Taeka te Atua ae te Baibara. Reireiniko arom ni karikirakea te namakin ae riai ibukim ao ibukin am iraorao ma te Atua. Bon ara kaantaninga ni koaua bwa ko na kunea te kukurei ni koaua ni bwaai ni kabane aika ko karaoi, man ana kairiri Ana Taeka te Atua.

[Kabwarabwara ae nano]

[Taamnei n iteraniba 7]

E karekea te kukurei maiuakinan ana reirei te Baibara