Aron te Tangira ni Buokira Bwa Ti na Tokanikai i Aon te Maaku

1. Taekin aeka ni maaku aika a a tia n riiriki

IANGOI baika a a tia n riki nakoia Ana Tia Kakoaua Iehova tabeman. A kani mwakuri Nestor ma buuna ae María, n te tabo ae korakora riki iai kainnanoan te ibuobuoki.b Ibukin anne, a riai ni kauarerekea aia kabanemwane. Ma a a manga maaka are a na kona ni kukurei ngkana e a karako riki aia mwane ke a na aki. Ngke e a riki Biniam bwa Ana Tia Kakoaua Iehova n te aba ae e kaitaraaki iai ara mwakuri, e a ataia ae ngkai ana aomata te Atua ngaia, e kona naba ni bwainikirinaki. E boni maaku iai. Ma e rangi ni maaku riki ngkana a ataia ana utu ae e a bitaki ana Aro. E tuangaki Valérie bwa e a kaentia, ao e a ukoukora te tia korokoro ae e na butimwaea ana koaua man te Baibara ibukin te raraa. E boni maaka te mate neiei.

2. E aera ngkai ti riai ni kakorakoraira n tokanikai i aon te maaku?

² Ko a tia n rinanon aeka ni maaku akanne? A bati i buakora aika a a tia. Ngkana ti aki ataa arora n tokanikai i aon te maaku, ti kona ni karaoi motinnano aika bubuaka aika a na kamamaraa ara iraorao ma Iehova. Bon anne ae e tangiria Tatan. E kataia naba ni kamanena te maaku bwa ti aonga n urui ana tua Iehova, n ikotaki naba ma ana tua ibukin tataekinan te rongorongo ae raoiroi. (TeKao. 12:17) E buakaka Tatan, e aki nanoanga, e iowawa ao e korakora naba. Ma ko boni kona ni kamanoko mairouna. N te aro raa?

3. Tera ae e na ni buokira n tokanikai i aon te maaku?

³ Ngkana ti kakoauaa ae e tangirira Iehova ao e na boutokaira, ti na bon tokanikai i aon Tatan. (TaiAre. 118:6) N te katoto, e aitara ma rawawata aika korakora te tia korea Taian Areru 118. A bati taani kairiribai nakoina, n ikotaki ma aomata aika rietata nakoaia (kibuna 9, 10). N tabetai, e korakora naba te kariri nakoina (kibuna 13). Ao e karekea te reirei ni kaetieti ae matoa mairoun Iehova (kibuna 18). Ma e boni kairaki naba te tia areru aei bwa e na anenea aei: “N na aki maaku.” E kangaa n namakina kamanoana raoi? E ataia bwa e anganna Tamana are i karawa te reirei ni kaetieti, ao e bon tangiria naba. E kakoauaa te tia areru aei bwa n aki ongei ana kangaanga, ma e bon tatauraoi ni buokia Atuana ae tatangira.—TaiAre. 118:29.

4. Taekin aeka ni maaku ake ti kona n tokanikai i aoia man onimakinan ana tangira te Atua nakoira.

⁴ Ti riai ni kakoauaa ae e bon tangirira Iehova. Ibukin anne, ti a kona iai n tokanikai i aon aeka ni maaku aika tenua aika riiriki, (1) maakakin ae ti a aikoa kona ni katauraoi baika kainnanoi kaain ara utu, (2) maakakia aomata, ao (3) maakakin te mate. A tokanikai i aon te maaku taari ake a mwaneweaki mai moa, bwa a kakoauaa ae e bon tangiriia te Atua.

MAAKAKIN AE TI A AIKOA KONA NI KATAURAOI BAIKA KAINNANOI KAAIN ARA UTU

5. Baikara kangaanga ake e kona n raraoma iai atun te utu? (Nora te taamnei ni moan te maekatin aei.)

⁵ Bon taben atun te utu ni Kristian katauraoani baika kainnanoi kaain ana utu. (1Tim. 5:8) Ngkana ngkoe atun te utu, ko bae n tia n raraoma bwa ko kona ni kakerikaakaki man am mwakuri ni butinakon te aoraki n taai aika nako. Tao ko raraoma naba bwa ko nang aki kona ni karekea te amwarake ao mwengaia am utu. Ko bae naba ni maaka buan am mwakuri ao e a aki kona ni manga reke teuana riki. Ke e kona n titeboo am namakin ma Nestor ao María, ae ko a raraoma bwa ko a aki kona ni maiuraoi ngkana e a karako am mwane. E a tia n tokanikai Tatan ni kairiia aomata bwa a na katoka aia beku ibukin Iehova man aeka n namakin akanne.

6. Tera ae e tangiria Tatan bwa ti na kakoauaa?

⁶ E kataia Tatan ni kairira bwa ti na kakoauaa ae e aki tangirira Iehova, ao e na aki buokira ngkana ti kainnanoa buokara ibukini baika a kainnanoi ara utu. Ao ti a kona iai n iangoa karaoani bwaai ni kabane ibukini kawakinan ara mwakuri, e ngae naba ngkana e na ruanikai iai ara iraorao ma Iehova.

7. Tera ana karaunano Iesu nakoira?

⁷ Tii Iesu ae kinaa raoi Tamana, ao e karaui nanora bwa te Atua “e a kaman atai baika [ti] kainnanoi imwain ae [ti] butiia.” (Mat. 6:8) E ataia Iesu ae e tauraoi Iehova ni karekei baika ti kainnanoi. Ngkai Kristian ngaira, boni kaain ana utu te Atua ngaira. Iehova bon Atun ara utu, ao ti kakoauaa ae e na boni karaoa raoi te bwai are e tua nakoia atun utu bwa a na karaoia n 1 Timoteo 5:8.

8. (a) Tera ae e na buokira n tokanikai i aoni maakakin are ti a aikoa kona ni katauraoi baika kainnanoi ara utu? (Mataio 6:31-33) (b) N aron ae kaotaki n te taamnei, ti na kangaa ni kakairi n aroia te taanga teuana ake a kaai n amwarake ma te tari te aine temanna?

⁸ Ngkana ti kakoauaa ae e tangirira Iehova, ao ara utu naba, ti a ataia iai bwa a na bon reke baika ti kainnanoi ibukini maiura. (Wareka Mataio 6:31-33.) E kukurei Iehova ni katauraoi bwaai ibukira. Bon te tia Anganga ae tituaraoi ngaia! Ngke e karika te aonnaba, e boni karaoa ae bati riki nakon tii karikani baika ti kainnanoi ibukini maiura. E kaona te aonnaba ni bwaai aika ti na kukurei iai. (KBwaai 2:9) N tabetai, ti kona ni karekei baika aki rangi ni bati, ma ti wanawana n iaiangoan te koaua ae ti boni karekei baikai man ana tangira Iehova. Akea kabwakan Iehova ni katauraoani bwaai ibukira. (Mat. 6:11) Ti riai n ururingnga ae kaubwaira ake ti anganako ngkai, a aki kona ni kabotauaki ma baika e anganira Atuara ae tatangira ngkai, ao n te tai ae na roko. Anne te bwai ae a a moanna n ataia Nestor ao María.—Ita. 65:21, 22.

9. Tera reireiam man aia katoto Nestor ma María?

⁹ E a reke aia auti ae tamaroa ao aia mwakuri Nestor ao María i Colombia. A taku: “Ti iangoia bwa ti na kabebetea aroni maiura ao ni karababaanako ara mwakuri ni minita, ma ti a manga maaka are ti na aki kukurei ni maiura n te mwane ae karako riki.” Ma tera ae a buokaki iai? A iaiangoi ana aanga Iehova ibukini katauraoani bwaai man ana tangira. Ngkai a a kakoauaa ae e na tatabeakinia Iehova, a a kitan aia mwakuri ake a bubura booia iai. A kaboonakoa aia auti ao a a mwaing nakon te aba ae e kainnanoaki riki iai taan uarongorongoa te Tautaeka n Uea. Tera aia namakin n aia motinnano aei? E taku Nestor: “Ti a nora koauani Mataio 6:33. A a rereke baika ti kainnanoi ibukini maiura. Ao ti a kukurei riki ngkai.”

MAAKAKIA AOMATA

10. Ti kangaa n ataia bwa a maakuia aomata i boni marenaia?

¹⁰ N te tai are e karitei iai Atam ma Ewa nakon Iehova, a a riiriki naba aia kangaanga aomata i marenaia. (TeMin. 8:9) N te katoto, a kabongana buaka mwaakaia taan tautaeka, a karaoi mwakuri n iowawa taani kakeru, ataei n te reirei a bwainikirinia ao ni kakamaakuia raoia n reirei, ao iai naba aika a iowawa nakoia aia utu. Maroaka are a a boni maakuia aomata i bon i marenaia! E kangaa Tatan ni kamanena maakura ni manga kaaitaraira iai?

11-12. Tera aron Tatan ni kamanena maakakia aomata ni kaaitaraira iai?

¹¹ E kakamanena maakakia aomata Tatan ni kairoroira iai bwa ti na kakeaa ara onimaki ao ni katoka ara uarongorongo. Man ana kairiri Tatan ao a a tia tautaeka ni katabuaka ara mwakuri ao ni bwainikirinira. (Ruka 21:12; TeKao 2:10) N ana waaki aika kakaokoro Tatan, a bati aika a kabutiinako rongorongo aika kairua ao keewe aika iowawa ibukia Ana Tia Kakoaua Iehova. Ao a kona naake a kakoauai keewe aikai ni bwainingareira ke n iowawa naba nakoira. (Mat. 10:36) Ti mimi n ana kamwane Tatan aikai? Ti bon aki. E kakaraoa naba aei n te moan tienture.—Mwa. 5:27, 28, 40.

¹² Tabeman, a maaka riki ae a na ataia kaain aia utu ae ai taani Kakoaua ngaiia, nakon are a na bwainikirinaki. E korakora irouia tangiraia aia utu, ao a kani kairiia bwa a na kinaa Iehova ao n tangiria naba. A rangi n nanokawaki ngkana a noriia kaain aia utu bwa a taetae ni kamatauningaa te Atua ae koaua ao taan taromauria. Ma n tabetai ao a kona ni manga butimwaea te koaua kaain aia utu akanne. Ma iangoia bwa aongkoa a a kaaki taekara kaain ara utu ibukin ara koaua ae boou. Tera arora iai?

13. E kangaa onimakinan ana tangira te Atua ni buokira n n tokanikai i aon aia riribai ara utu? (Taian Areru 27:10)

¹³ Ti kona ni kabebeteaki n te koaua ae kaungaunga n Taian Areru 27:10. (Warekia.) Ngkana ti ururingnga ae e rangi n tangirira Iehova, ti na namakina iai kamanoakira irouna n aki ongea ribaakira irouia ara utu. Ti kakoauaa bwa e na kakabwaiaira ibukin nanomwaakara. E na bon anganira Iehova baika ti kainnanoi ibukini marurungira, ti na rau ao ni kukurei ao n teimatoa ni kaanira ma ngaia! Anne te bwai ae e namakinna Biniam, are e mwaneweaki mai moa.

14. Tera reireiam man ana katoto Biniam?

¹⁴ E a riki Biniam bwa Ana Tia Kakoaua Iehova n aki ongea ataakin ae e kona n aitara ma te bwainikirinaki ae iowawa. Iangoa arona n tokanikai i aoni maakakia aomata man ataakin ae e tangiria Iehova. E taku: “E a riao bwainikirinau nakon are I iangoia. Ma I rangi ni maaka riki aia kakaaitara au utu, nakoni bwainikirinau mairouia taan tautaeka. I maaka are e na un tamau ae tiaki kaain te onimaki n au motinnano ae N nang riki bwa te tia Kakoaua, ao tao a na aki naba karineai au utu.” Ma e kakoauaa Biniam ae Iehova e na bon tabeakinia naake E tangiriia. E taku: “I bon iaiangoa aron Iehova ni buokiia tabemwaang n nanomwaaka i aani kangaangan te kataumwane, te inanonano ao mwakuri n iowawa. I ataia ae e na kakabwaiaai ngkana I teimatoa ni kakaonimaki nakoina. E bati au tai ni kabureaki, ma I namakina ana ibuobuoki Iehova n taai aika bati, ake I kainnanoa iai buokau ngke I teimatoa ni kakaonimaki nakoina.” E riki Iehova bwa te Karo ni koaua nakoni Biniam, ao a a riki Ana aomata bwa kaain ana utu.

MAAKAKIN TE MATE

15. Tera raoiroini maakakin te mate?

¹⁵ E taekinaki n te Baibara bwa bon te tia kairiribai te mate. (1Kor. 15:25, 26) Ti bae n raraoma n iangoan te mate, riki ngkana e kakaiaki aorakira ke temanna ae ti tangiria. Ma e aera ngkai ti maaka te mate? Ibukina bwa e karikira Iehova ma tangiran te maiu n aki toki. (TeMin. 3:11) Maakakin te mate iroura, e buokira bwa ti na kamanoi maiura. N te katoto, e kona ni kaungaira bwa ti na bairea raoi kanara, ti na ekitiaiti, ti na ukoukora buokara mairouia taokita, ara bwainnaoraki ngkana ti kainnanoia, ao n rarawa naba ni karuanikaia maiura.

16. E kangaa Tatan ni kamanena arora ni maaka te mate?

¹⁶ E ataia Tatan ae e kakawaki iroura maiura. Ma e taekinira bwa ti na anga bwaai ni kabane n ikotaki naba ma ara iraorao ma Iehova tii ibukini kawakinani maiura. (Iobi 2:4, 5) Ai boni kairuara Tatan! Ibukina bwa boni ngaia “teuare kona ni karekea te mate,” e a kamanena maakakin te mate iroura bwa ti na kitana iai Iehova. (Ebera 2:14, 15) N tabetai ao ana aomata Tatan a kakamaakuia taan taromauria Iehova bwa a na kamateia ngkana a aki kakeaa aia onimaki. N taai riki tabeua, e a kamanena te aoraki ae karuanikai Tatan ni katoka iai ara iraorao ma Iehova. A kona taokita ke ara utu aika tiaki kaain te onimaki, ni kairoroira bwa ti na butimwaea te karinraraa ao n urua iai ana tua te Atua. Ke e kona temanna ni kaumakira bwa ti na butimwaea te bwainnaoraki teuana ae aki boraoi ma ana boto n reirei te Baibara.

17. E aera ngkai ti aki riai ni maaka te mate? (I-Rom 8:37-39)

¹⁷ E ngae ngke ti aki kani mate, ma ti ataia ae ngkana ti mate e na bon teimatoa Iehova n tangirira. (Wareka I-Rom 8:37-39.) Ngkana a mate raoraon Iehova, e bon ururingia n aron ae a bon maiu. (Ruka 20:37, 38) E ingainga ni kani kautiia. (Iobi 14:15) E a tia Iehova ni kabwakaa te boo ae rangi ni kakawaki bwa e “aonga n . . . reke [iroura] te maiu are aki toki.” (Ioa. 3:16) Ti ataia ae e korakora tangirara iroun Iehova ao e tabeakinira. N oneani mwin are ti na kitanna ngkana ti aoraki ke ti kakamaakaki n te mate, ti bon onimakina ana kabebetenano, wanawanana, ao korakorana. Anne ae a karaoia Valérie ma buuna.—TaiAre. 41:3.

18. Tera reireiam man ana katoto Valérie?

¹⁸ Ngke ai 35 ana ririki Valérie, e a tuangaki bwa e a reke irouna te kaentia ae kaokoro. E boni buokaki n tokanikai i aoni maakakin te mate neiei man te tangira. E taku: “I rangi n nanokawaki ma kaainnabau ngke ti ongo aei. I riai n rinanon te korokoro ae bubura bwa e aonga n toki aorakiu. I maroro ma taani korokoro aika bati ma a aki kariaia te korokoro n akea te karinraraa. I boni maaku, ma ngke I iaiangoa ana tua te Atua, I a bon ataia ae I riai n rawa ni butimwaea te karinraraa! E a tia Iehova ni kaota ana tangira ae bati nakoiu i nanoni maiuu. E a reke au tai ngkai ni kaota tangirana irou. Ngkana I ongo te rongorongo ae kananokawaki, I a ninikoria riki ni karaoa ae e na kamoamoaaki iai Iehova ao ae e na konaaki iai Tatan. Imwina riki, e a nakoraoi au korokoro n akea te karinraraa. E boni waakinako aorakiu, ma e kakatauraoi Iehova baika ti kainnanoi n taai nako. N te katoto, ngke ti botaki n ara ekaretia n te wikeen are imwain ae I kaongoaki iai aorakiu aei, ti a rinanon te kaongora ae ‘Meeting Today’s Adversities With Courage.’c Ti rangi ni kabebeteaki n te kaongora aei. Ti bon okioki ni warekia. Ti karerekea raun nanora ngai ma buu mani kaongora aikai, irirakin ara babaire ibukini bwaai n taamnei, teimatoara n uarongorongo, kakaaeani bobotaki ao karaoan motinnano aika raraoi.”

ARORA N TOKANIKAI I AON TE MAAKU

19. Tera ae e nang waekoa n riki?

¹⁹ Man ana ibuobuoki Iehova, a a tia Kristian ni kabutaa te aonnaba n tokanikai i aoni kangaanga aika kakaiaki, ao n rarawa naba nakon te Riaboro. (1Bet. 5:8, 9) Ko boni kona naba ngkoe. E na waekoa Iehova n tuanga Iesu ma raona n tautaeka bwa a na “urui ana mwakuri te Riaboro.” (1Ioa. 3:8) Ngkanne a nang “aki maaka te bwai teuana ao a na aki maakunrang” ana aomata te Atua ake a na beku ibukina n te aonnaba aei. (Ita. 54:14; Mika 4:4) Mangkai ni karokoa te tai anne, ti riai ni mwakuri korakora bwa ti aonga n tokanikai i aon te maaku.

20. Tera ae e na buokira n tokanikai i aon te maaku?

²⁰ Ti riai n teimatoa ni kakorakoraira ao ni kakoauaa ae Iehova e tangiriia ao ni kamanoia ana toro. Ti kona ni karaoa aei mani kananoan ao maroroakinan aron Iehova ni kamanoia ana toro rimoa. Ti kona n ururingi arona ni buokira ni kaaitarai karawawataara. Eng, ti boni kona n tokanikai i aon te maaku man ana ibuobuoki Iehova!—TaiAre. 34:4.