A Tangira te Raoiroi Ana Aomata Iehova

1. Tera kataakin Ioteba, ao tera arona iai?

E KAAITARA ma te kataaki ae kangaanga natin Iakoba are Ioteba. “Weene ma ngai,” aikai ana taeka te aine temanna nakoina. Boni buun ana toka are Botiba. E aki butimwaea ana iango neiei Ioteba. E kona n iango ni kangai temanna, ‘e aera bwa e rawa Ioteba nakon te kariri aei?’ Akea Botiba bwa e mwananga nako n te tai aei. Ao Ioteba bon te toro n te auti anne. Ma ngkana e rawa nakon ana iango neiei, e kona ngkanne neiei n tia ni karikii kangaanga nakon Ioteba ibukin aki irakin nanona. Ma e teimatoa n rawa Ioteba e ngae ngke e okioki neiei ni kariria. Bukin tera? E taku Ioteba: “N na kangaa ni karaoa te buakaka ae korakora aei ao ni bure nakon te Atua?”—KBwaai 39:7-12.

2. E kangaa n ataia Ioteba ae te wene ni kimoa bon te bure nakon te Atua?

² E kangaa n ataia Ioteba ae e na iangoa te wene kimoa Atuana bwa karaoan te “buakaka ae korakora”? N te Tua Rinanoni Mote ao iai i nanona te tua ae mataata ae kangai, “Ko na tai wene ni bure.” E a bon tibwa koreaki uabubua te ririki imwin te tai aei. (TeOti. 20:14) E kinaa raoi Iehova Ioteba ao e ataa ana namakin Iehova ibukin te wene ni kimoa. N te katoto, e ataia raoi Ioteba bwa e bon tii kataua Iehova te mare i marenan te mwaane temanna ma te aine temanna. Ao e boni bae naba n tia n ongo aron Iehova ngke e kamanoa tibutoruna are Tara uoua te tai, bwa e na teimatoa ni kakaonimaki nakoni buuna, ngke e karaoaki te mwakuri n iowawa nakoina. E boni karaoa naba anne nakoni buun Itaaka are Rebeka ni kamanoa mani mwakuri n iowawa. (KBwaai 2:24; 12:14-20; 20:2-7; 26:6-11) N iaiangoani baikai iroun Ioteba, e a ataa iai te bwai ae eti ao ae kairua i matan te Atua. E bon tangira Atuana Ioteba, e tangiri naba ana kaetieti Iehova ibukin te raoiroi, ao e motinnanoia bwa e na boutokai.

3. Tera ae ti na maroroakinna n te kaongora aei?

³ Ko tangira te raoiroi? Ko boni bae n tangiria. Ma ti bane n aki kororaoi, ao ngkana ti aki taratara raoi, ti na kai rotakibuaka n ana iango te aonnaba ibukin te raoiroi. (Ita. 5:20; IRom 12:2) Ti na noria bwa tera te raoiroi, ao ti na kangaa ni kakabwaiaaki man tangirana? Imwina, ti na maroroakini mwaneka aika tenua aika a na buokira ni kakorakoraa riki tangiran ana kaetieti Iehova.

TERA TE RAOIROI?

4. Tera aia iango ae kairua aomata aika bati ibukin te raoiroi?

⁴ Ngkana a iangoa te aomata ae raoiroi tabemwaang, a bati aika kona n iangoia bwa e kainikatonga, e kakabuakaka, ke e iangoia bwa e raoiroi riki nakoia ake tabeman. E aki tangiri aroaro akanne te Atua. Ni menan Iesu i aon te aba, e kabuakakaia mataniwi n Aaro, bwa a katei oin aia kaetieti ibukin te raoiroi. (TeMin. 7:16; Ruka 16:15) Karaoan te raoiroi ni koaua, bon akea iai iangoan ae ko raoiroi riki nakoia tabemwaang.

5. Tera te raoiroi n aron ae taekinaki n te Baibara? Taekini katoto.

⁵ Te raoiroi bon te aroaro ae tamaroa. E nanonaki iai kakaraoan ae eti i matan Iehova ae te Atua. N te Baibara, te taeka ae “te raoiroi,” e kona n nanonaki iai maiuakinani kaetieti aika moan raraoi aika ana kaetieti Iehova. N te katoto, e tua Iehova nakoia taani iokinibwai bwa a riai ni kamanena “te bwai n tau rawawata ae eti raoi.” (TuaKau. 25:15) Te moan taetae n Ebera ae rairaki bwa “bwabwaina te koaua,” e kona naba n rairaki bwa “raoiroi.” Te Kristian ae tangiria bwa e na raoiroi i matan te Atua e riai ni bwabwaina te koaua n ana bitineti. Te aomata ae kani kakaraoa ae eti, e bon aki kan tataraa te aomata ae karaoaki ae iowawa nakoina. Ao ibukini “[kakukureian Iehova] ni bwaai ni kabane,” e riai te aomata ae raoiroi n rinanoi raoi ana motinnano ake e karaoi.—IKoro. 1:10.

6. E aera bwa ti kona n onimakin ana kaetieti Iehova ibukin ae eti ao ae kairua? (Itaia 55:8, 9)

⁶ E taekinaki Iehova n te Baibara bwa Nibwan te raoiroi. Ibukin anne, e a taekinaki iai bwa e “mena irouna te raoiroi.” (Ier. 50:7) Ngkai te tia Karikiriki Iehova, bon tii ngaia ae kona ni bairea te kaetieti ibukin ae eti ao ae kairua. Ti aki kororaoi ao ti bubure ngaia are ti aki kona n ataa te bwai ae eti ao ae kairua. Ma ibukina bwa e kororaoi Iehova, e bon ataa ae eti ao ae kairua. (TaeRab. 14:12; wareka Itaia 55:8, 9.) Ibukina bwa ti karikaki ni katotongan te Atua, ti a kona ni maiuakin ana kaetieti ibukin te raoiroi. (KBwaai 1:27) Ao bon anne ae ti kani kakaraoia. Ibukin tangiran Tamara, ti a kaungaaki iai bwa ti na kakairi irouna n aron ara kabanea ni konaa.—IEbe. 5:1.

7. E aera bwa ti kainnanoi kaetieti aika onimakinaki? Kabwarabwaraa.

⁷ Ti kakabwaiaaki ngkana ti nimti ana kaetieti Iehova ibukin te bwai ae eti ao ae kairua. Ko ataia bwa e aera e riki anne? Iangoia bwa tera ae na riki ngkana taiani bangke nako a karaoi oin aia kaetieti ibukini baireani kanoan te mwane ke tao taani kateitei a irii oin aia kaetieti ibukini bairean abwakini bwaai. E na boni bati te mangaongao, tiaki ngaia? Ngkana a aki ongeaba taani kuakua n tuan te bwainnaoraki, a kona ni mate aia aoraki tabeman. Boni bwaai ni kamanomano kaetieti aika kona n onimakinaki. N aron naba anne, ti boni kamanoaki raoi n ana kaetieti te Atua ibukin ae eti ao ae kairua.

8. Tera te kakabwaia ae mena imwaia akana kakaraoa ae eti?

⁸ E kakabwaiaia Iehova naake a kataia ni maiuakin ana kaetieti. Aio ana berita: “A na abana te aonnaba akana raoiroi, ao a na maeka i aona n aki toki.” (TaiAre. 37:29) Ko kona n iangoa aron te katiteuanaaki, te rau, ao kukureia aomata ngkana a a bane ni maiuakin ana kaetieti Iehova? E tangiriko Iehova bwa e na reke iroum te maiu anne. Ti riai ni bane n tangira te raoiroi! Ti na kangaa ni kakorakoraa riki tangiran te aroaro aei iroura? Ti na rinanoi ngkai mwaneka aika tenua.

KAKORAKORAAN TANGIRAN ANA KAETIETI IEHOVA

9. Tera ae e na buokira bwa ti na tangira te raoiroi?

⁹ Te moani mwaneka: Tangira Teuare karaoi kaetieti. Ngkana ti tangira te raoiroi, ti riai ni karikirakea tangiran Teuare karaoi kaetieti ibukin ae eti ao ae kairua. Ngkana e a korakora tangiran Iehova iroura, e na korakora riki iai kani maiuakinan ana kaetieti iroura. Aio kamatataana: Ngke arona bwa a tangira Iehova Atam ma Ewa, a na bon ongeaba n ana tua.—KBwaai 3:1-6, 16-19.

10. E kangaa ni karikirakea otana Aberaam n ana iango Iehova?

¹⁰ Ti bon aki kani karaoa te kairua are a karaoia Atam ma Ewa. Ti kona n tuka rikin anne ngkana ti teimatoa n reiakina taekan Iehova, ti atai aroarona, ao ti kataia n ota n arona n iaiango. Ni karaoan anne, e na bon rikirake iai tangiran Iehova iroura. Iangoa Aberaam are tangira Iehova. Ngkana e aki ota raoi n ana babaire Iehova, e bon aki naba karitei. Ma e kataia ni kinaa riki Iehova. N te katoto, ngke e a ataa ana babaire Iehova ibukini kamaunaan Totom ma Komora Aberaam, e boni maaku n te moantai, ngkai E nang kamaunaia aika raoiroi i rarikia aika buakaka “te tia Motika Taekan te aonnaba ni kabutaa.” Iroun Aberaam, e aki kona ni karaoa ae buakaka Iehova. E boni kananorinanoa n tabeki ana titiraki teuana imwin teuana, ao e taotaona nanona Iehova ni kaekai. N tokina, e a ataia Aberaam bwa e neneri nanoia aomata nako Iehova ao e bon tuai katuuaaeia aika akea aia bure i rarikia taani bure.—KBwaai 18:20-32.

11. E kangaa ni kaotia Aberaam bwa e tangira Iehova ao n onimakinna?

¹¹ E korakora ringan nanon Aberaam n ana maroro ma Iehova ibukini kaawa ake Totom ma Komora. E a rikirake riki tangiran ao karinean Tamana irouna nakon are mai mwaina. N ririki ake imwina, e a roko kataakin onimakinan Iehova iroun Aberaam. E tuangnga Iehova bwa e na kareana natina ae rangi n tangiria are Itaaka. E a rangi ni kinaa ngkai Atuana Aberaam, ao akea raraomana iroun Iehova. E karaoa raoi te baere e tuangaki Aberaam. Ma iangoa korakoran rawawatana ngke e a katauraoi ibukin te baere e tuangaki! E bae ni kananoa ana iango Aberaam n te baere e ataia ibukin Iehova. E ataia ae e aki kona Iehova ni karaoa ae buakaka ke ae e aki tatangira iai. E taekinna te abotoro Bauro bwa e ataia i nanona Aberaam ae e kona Iehova ni kauta natina ae tangiraki are Itaaka. (Ebera 11:17-19) E a tia Iehova ni berita bwa e na riki Itaaka bwa tamaia natannaomata, ma n te tai anne e tuai ni kariki. E tangira Iehova Aberaam, ao e onimakina Tamana bwa e aki kona ni karaoa ae buakaka. Ibukin ana onimaki, e a ongeaba e ngae naba ngke e rawawata iai.—KBwaai 22:1-12.

12. Ti na kangaa ni katotonga Aberaam? (Taian Areru 73:28)

¹² Ti na kangaa ni katotonga Aberaam? Ti riai n teimatoa n reiakina taekan Iehova n aron Aberaam. Ni karaoan anne, ti na kaaniaki riki ma ngaia ao n tangiria riki. (Wareka Taian Areru 73:28.) E na boni kataneiaaki mataniwin nanora bwa ti aonga ni katotonga aron te Atua n iaiango. (Ebera 5:14) Ibukin anne, ngkana iai ae kataia ni karirira nakon ae kairua, ane ti na bon rawa. Ti na bon aki iangoa karaoan te bwai teuana ae e na kammaraka Tamara ao n urua ara iraorao ma ngaia. Ma tera arora riki teuana ae ti kona ni kaota iai tangiran te raoiroi?

13. Ti na kangaa n uaiakina te raoiroi? (Taeka N Rabakau 15:9)

¹³ Te kauoua: Kataia ni karikirakea tangiran te raoiroi ni katoabong. Ti kona ni karikirakea tangiran ana kaetieti Iehova ibukin te raoiroi n aron naba kakorakoraan ara mwatireti rinanon te katoatai ni kamarurung. E aki kangaanga karaoan aei ni katoabong. E atataiaomata Iehova ao e aki kantaningaira bwa ti na karaoa ae riaon ara konaa. (TaiAre. 103:14) E karau nanora bwa “e tangira ane e uaiakina te raoiroi.” (Wareka Taeka N Rabakau 15:9.) Ngkana ti uaiakina tiara n ara beku ibukin Iehova, ti na bon teimatoa ni kakorakoraira ni karokoa ae e reke. Titeboo anne ma uaiakinan te raoiroi. Ao e na taotaona nanona Iehova ni buokira bwa ti na ririkirake ao ni kanakoraoi riki aroarora i nanon te tai ae maan.—TaiAre. 84:5, 7.

14. Tera te “nangoani bwabwaa ae bwainan te raoiroi,” ao e aera bwa ti kainnanoia?

¹⁴ E tatangira Iehova ao e kauringira bwa e aki rawawata karaoan ae raoiroi. (1Ioa. 5:3) Bon te bwai ni kamanomano ae ti kainnanoia ni katoabong. Kauringa te bwai ni buaka are e kabwarabwaraa te abotoro Bauro. (IEbe. 6:14-18) Tera ae na kamanoa buroon te tautia? Bon “te nangoani bwabwaa ae bwainan te raoiroi,” ao e tei aei ibukin ana kaetieti Iehova aika raraoi. E kamanoaki te buroo n te nangoa ni bwabwaa ao ai aron naba ana kaetieti Iehova aika raraoi bwa a kona ni kamanoi nanora aika raba. Anne bukina ngkai e kakawaki bwa e na iai te nangoa ni bwabwaa ae bwainan te raoiroi i buakon am bwai ni buaka!—TaeRab. 4:23.

15. Ko na kangaa ni karina te nangoa ni bwabwaa ae bwainan te raoiroi?

¹⁵ Ko na kangaa ni karina te nangoa ni bwabwaa ae bwainan te raoiroi? Ko kona ni karaoia man iaiangoan ana kaetieti te Atua n am motinnano ni katoabong. N rinean te bwai ae ko na taekinna, te katangitang ae ko na ongora, te taamnei ae ko na kaokirii iai, ke te boki ae ko na warekia, titirakiniko moa ni kangai: ‘Tera ae N nang karinna nanou? E boraoi ma nanon Iehova? Ke e karikirakea irou te aroaro ae buakaka, te iowawa, te nanonrang, te bangaomata, ake bwaai ake e iangoi Iehova bwa a bubuaka?’ (IBir. 4:8) Ngkana a boraoi ma nanon Iehova am motinnano, ko a kariaia iai kamanoan nanom n Ana kaetieti aika raraoi.

16-17. E kangaa ni kaotaki raoi nakoira n Itaia 48:18 bwa ti kona ni maiuakin ana kaetieti Iehova n aki toki?

¹⁶ Iai te tai ae ko raraoma iai bwa tao ko na kona n teimatoa ni maiuakin ana kaetieti Iehova aika raraoi ni katoabong ke ni katoa ririki? Iangoa te kaikonaki ae kamanena Iehova n Itaia 48:18. (Warekia.) E berita Iehova bwa e kona n riki ara raoiroi “n ai aron naoni marawa.” Iangoia bwa aongkoa ko tei i mataniwin te bike ao ko matakuakin naao aika bwarobwaro teuana imwin teuana n akea tokia. N noran naao aika baireaki raoi, te koaua bwa ko na raraoma bwa n te bong teuana ao a nang akea? Ko na bon aki! Ko ataia bwa naao akanne a a kamani bwarobwaro i aon te bike i nanon ririki aika nga ma nga, ao a na bon teimatoa ni karaoa anne.

¹⁷ E kona n riki am raoiroi n ai aron naoni marawa! N te aro raa? Ngkana iai am motinnano ae ko na karaoia, iangoa moa te bwai ae e tangiria Iehova. Imwina, ao ko a karaoia. Ngkana e kangaanga, e bon tauraoi n taai nako Tamam ae tatangira ni buokiko bwa ko na teimatoa ni maiuakin Ana kaetieti aika raraoi ni katoabong.—Ita. 40:29-31.

18. E aera bwa ti na rarawa ni motiki taekaia aomata n oin ara kaetieti?

¹⁸ Te katenua: Bon ana bwai Iehova te motikitaeka. Ngkai ti kakorakoraira ni maiuakin ana kaetieti Iehova aika raraoi, ti riai n rarawa ni motiki taekaia tabemwaang ao n iangoira bwa ti raoiroi riki nakoia. Ti na aki kamangoria tabemwaang bwa aongkoa iai riaira ni motiki taekaia ni kaineti ma oin ara kaetieti, ma ti riai n uringnga ae Iehova bon “te tia motika taekan te aonnaba ni kabutaa.” (KBwaai 18:25) E aki mwiokoira Iehova bwa taani kabuakaka. Bwa e kangai Iesu: “Katoka ami kabuakaka bwa kam kaawa ni manga kabuakakaaki.”—Mat. 7:1.b

19. E kangaa ni kaotia Ioteba bwa e onimakina ana motikitaeka Iehova?

¹⁹ Ti na manga iangoa ana katoto Ioteba are kakaraoa ae raoiroi. E rarawa ni motiki taekaia tabemwaang, e ngae naba ngke a a tia ni karaoa ae iowawa nakoina. E oreaki irouia tarina, a kaboonakoa bwa te toro, ao a tuanga tamaia bwa e a mate Ioteba. N ririki ake imwina riki, e a manga katiteuanaaki Ioteba ma ana utu. Ai bon te tia tautaeka ngkai n te aba aei ae mwaaka Ioteba ao e kona ni motiki taekaia tarina n te aro ae iowawa ao n irantangaia naba. A maaku tarin Ioteba ngkana arona bwa e karaoa anne, e ngae naba ngke a nanokawaki n te baere a karaoia. Ma e karau nanoia Ioteba ao e taku: “Tai maaku. I onea mwini ngkai te Atua?” (KBwaai 37:18-20, 27, 28, 31-35; 50:15-21) E nanorinano Ioteba ao e katuka motikan taekaia nakon Iehova.

20-21. Ti na kangaa n rarawa n iangoira bwa ti raoiroi riki nakoia tabemwaang?

²⁰ N aron Ioteba, ti katuka naba te motikitaeka nakon Iehova. N te katoto, ti na aki katautaua bukini karaoan te bwai teuana irouia tarira ke aroia teuana. Ti aki kona n nori naano, ma bon tii “Iehova ae neneri bukini karaoani bwaai.” (TaeRab. 16:2) E tangiriia aeka n aomata nako, man aaba ao katei aika kakaokoro Iehova. Ao e kaungaira bwa ti na “kamwaawawai naba [nanora].” (2Kor. 6:13) Ti tangiriia tarira ni kabane ma ti na aki motiki taekaia.

²¹ Nanon naba aei bwa ti na aki motiki taekaia ake i tinanikun te ekaretia. (1Tim. 2:3, 4) Ko kona ni motika taekan am koraki ae kaokoro ana koaua ma ngkoe ao ko kangai, “E aki kona ni butimwaea te koaua teuanne”? Ko bon aki, bwa karaoan anne boni kaotan ae ko kan rarabakau, ao ko iangoiko bwa ko raoiroi riki nakoina. Ma e teimatoa Iehova n angania “aomata ni kabane n taabo nako” aia tai n rairi nanoia. (Mwa. 17:30) Uringnga ae e iangoiia Iehova akana iangoia bwa a raoiroi riki nakoia tabemwaang, bwa a buakaka.

22. E aera ngkai ko motinnanoia bwa ko na tangira te raoiroi?

²² E bia rikirake kimwareireira man tangiran ana kaetieti Iehova aika raraoi, ao ni buokira naba n riki bwa banna ni katoto aika raraoi nakoia tabemwaang, bwa a aonga n tangirira ao n tangira riki Atuara. Eng, ti bia teimatoa ni “bwarua kakaraoan ae raoiroi.” (Mat. 5:6) Kakoauaa raoi bwa e nora am kekeiaki Iehova ao e kimwareirei n taai nako ngkai ko kakorakorako ni kakaraoa ae raoiroi. A a ririkirake riki ni buakaka aomata n te aonnaba aei, ma kabebetea nanom! Uringnga ae “e tangiriia akana raoiroi Iehova.”—TaiAre. 146:8.