“Bon Atuaia Aika Maiu”

E korakora riki te mate nakon te Atua? Ni koauana, e bon aki! E na kanga te mate ke te tia kairiribai temanna ni korakora riki nakon “te Atua ae Moan te Mwaka”? (1 I-Korinto 15:26; Te Otinako 6:​3, BG) Bon iai mwaakan te Atua ni kamauna te mate rinanon te mangauti, ao e berita bwa e na karaoa anne tii n te waaki ae boou i aon te aba.a Ko na kanga ni kakoauaa te berita anne? Ti tuangaki taeka aika a kona n anganira te kantaninga iroun Natin te Atua ae Iesu.​—Wareka Mataio 22:​31, 32.

E taku Iesu nakoia Tarukaio ake a aki kakoauaa te mangauti: “Kam aki wareka are e taekinna nakoimi te Atua, ni kaineti ma mangautiia maate ni kangai, ‘Ngai Atuan Aberaam ao Atuan Itaaka ao Atuan Iakoba’? Bon Atuaia aika maiu ao tiaki Atuaia aika mate.” E nanona ikai Iesu ana maroro te Atua ma Mote n te aroka ae urarake, tao 1514 B.C.E. (Te Otinako 3:​1-6) Ni kaineti ma ae e taekinna Iesu bwa ana taeka Iehova nakoni Mote ae kangai: “Ngai Atuan Aberaam ao Atuan Itaaka ao Atuan Iakoba,” e katereaki iai bwa e na boni kakoroaki nanon te berita ibukin te mangauti. N te aro raa?

Iangoa moa bwaninin te rongorongo. N te tai are e taetae iai Iehova ma Mote, ao e a rangi ni maan mwini mateia baatua aika Aberaam, Itaaka ma Iakoba. Ana ririki ni maiu Aberaam bon 329, Itaaka 224 ana ririki ao Iakoba 197. Ma e ngae n anne, e taku Iehova: “Ngai” ngkai Atuaia ma e aki kangai: “Ngai ngkoa” Atuaia. E taetae Iehova ibukia baatua aika teniman aikai ake a tia ni mate, kaanga aron ae a bon teimatoa naba ni maiu. Bukin tera?

E kabwarabwaraa ni kangai Iesu: “Bon Atuaia aika maiu [Iehova] ao tiaki Atuaia aika mate.” Ti buokaki n ana taeka Iesu akanne bwa ti na ota n te bwai ae kakawaki ibukin te mangauti. Ngkana arona bwa akea te mangauti, a na teimatoa n tiku ni mate Aberaam, Itaaka ao Iakoba n aki manga maiu. Ngkana ngaia anne, ngkanne bon Atuaia aika mate Iehova. E nanonaki naba n anne bwa e korakora riki te mate nakon Iehova ae ai aron ae bon akea korakorana ni kainaomataia ana toro aika kakaonimaki man te mate.

Tera ngkanne ae ti kona n iangoia ibukin Aberaam, Itaaka, Iakoba ao ana toro Iehova aika kakaonimaki ni kabane ake a a tia ni mate? E taekin taeka aika rangi n anainano aikai Iesu: ‘A bane ni maiu n ana taratara te Atua.’ (Ruka 20:38) Ni koauana, akea te nanououa bwa e na boni koro bukin ana kantaninga Iehova are e na kautia man te mate ana toro aika kakaonimaki bwa e iangoiia bwa a boni maiu. (I-Rom 4:​16, 17) E na teimatoa Iehova n uringia aomata akanne ni kabane ni karokoa te tai are e namatia bwa e na manga kaoka maiuia.

E aki anaaki nanom n te kantaninga are ko kona ni manga katiteuanaaki ma are e tangiraki iroum ae e a tia ni mate? Ngkana ngaia anne, uringnga are e boni korakora riki Iehova nakon te mate. Bon akea ae e kona n tukia mani kakororaoan ana berita ibukini kautakia aomata aika a tia ni mate. E aera bwa ko aki reiakina riki taekan te berita ibukin te mangauti ao te Atua are e na kakororaoa anne? Karaoan anne iroum, e na boni kaaniko riki iai ma Iehova ae “Atuaia aika maiu.”