E butimwaeaki raoi Iesu ngke e rin i Ierutarem i aon te taongki

E Kakoauaaki n Taian Taetae ni Burabeti Ibukin te Mesia, Bwa Iesu Bon te Mesia?

Ana kaeka te Baibara

Eng. Ni menan Iesu i aon te aba ao e kakororaoi taetae ni burabeti aika mwaiti ibukin “te Mesia are te tia Kairiri,” are ngaia ae e na riki bwa te “tia Kamaiuia kaain te aonnaba.” (Taniera 9:25; 1 Ioane 4:14) Ao e bon teimatoa Iesu ni kakororaoi taetae ni burabeti ibukin te Mesia, imwin naba matena.—Taian Areru 110:1; Mwakuri 2:34-36.

Tera ae nanonaki n te “Mesia”?

Te taeka n Ebera ae Ma·shiʹach (Mesia) ao rairana n te taetae ni Kuriiti ae Khri·stos (Kristo) a uaia n nanona “Teuare Kabiraki.” Ngaia are “Iesu Kristo” e nanona “Iesu Teuare Kabiraki,” ke “Iesu te Mesia.”

N taai ake a karakinaki n te Baibara ao e aki toki ni kabiraki te aomata n arona ni kabwaroaki te bwaa i aon atuna, ngkana e na anganaki te mwioko ae okoro ae te kairiri. (Nakoaia Ibonga 8:12; 1 Tamuera 16:13) E mwiokoaki Iesu iroun te Atua bwa te Mesia, ae te mwioko ae rangi n rietata. (Mwakuri 2:36) Ma e aki kabiraki Iesu n te bwaa iroun te Atua, ma e kabiria n te taamnei ae raoiroi.—Mataio 3:16.

E kona n raka i aon temanna ae e na kakororaoi taetae ni burabeti ibukin te Mesia?

E aki. N aron tanen rainin te tabonibai ae onoti nakon temanna ma temanna, ao ai aron naba kakororaoan taetae ni burabeti n te Baibara ake a kaineti nakon te Mesia ae tii temanna, ke Kristo. Ma e kauring te Baibara bwa “a na teirake Kristo ni kewe ao burabeti ni kewe ao a na karaoi kanikina aika kokorakora ma baika kamimi, bwa a aonga ni burebureiia naba ake a rineaki ngkana a kona.”—Mataio 24:24.

E kona te Mesia ni kaoti n taai aika imwaira?

E aki. E a kaman taekinna te Baibara ae te Mesia boni kanoan Uean Iteraera are Tawita. (Taian Areru 89:3, 4) Ma e a kamani bua mwin aia riki nikawai I-Iutaia are mairoun Tawita, bwa tao e bua ngke a kataenikaia Ierutarem kaain Rom n 70 C.E.a Man te tai anne ao ai akea ae kona ni kateirikia ae Iesu bon te kanoa n uea are mairoun Tawita. Ma e ngae ngke bon iai taian riki nikawai akanne n ana tai Iesu, ma a mwaiti naba i rarikia naake a kairiribai nakon Iesu, aika a aki kona ni kakewea ae Iesu boni kanoan Tawita.—Mataio 22:41-46.

Iraua taian taetae ni burabeti ibukin te Mesia n te Baibara?

E aki kona n ataaki bwa iraua raoi mwaitin taetae ni burabeti ibukin te Mesia. N te katoto, a kona ni kakaokoro aroni warekan taetae ni burabeti, ao riki ake a bon teretere bwa taekan te Mesia. Iai tabeua taekan te Mesia ae taetae ni burabetinaki n Itaia 53:2-7. Tabeman a kona ni wareka te mwakoro aei ni kabane bwa teuana te taetae ni burabeti, ao tabeman a iangoa taekana nako bwa te taetae ni burabeti ae kakaokoro.

A kakororaoaki tabeua taetae ni burabeti ibukin te Mesia iroun Iesu

Te Taetae ni Burabeti	E Kuneaki n	Kakoroani Bukina
Kanoan Aberaam	Karikani Bwaai 22:17, 18	Mataio 1:1
Kanoan natin Aberaam are Itaaka	Karikani Bwaai 17:19	Mataio 1:2
E bungiaki man aia baronga I-Iteraera ae Iuta	Karikani Bwaai 49:10	Mataio 1:1, 3
Man te kanoa n uea are te Uea are Tawita	Itaia 9:7	Mataio 1:1
E bungiaki iroun te aine ae tuai ni boo ma te mwaane	Itaia 7:14	Mataio 1:18, 22, 23
E bungiaki i Betereem	Mika 5:2	Mataio 2:1, 5, 6
E na aranaki bwa Emanuerab	Itaia 7:14	Mataio 1:21-23
Moan rikina ae mangori	Itaia 53:2	Ruka 2:7
A tiringaki ataei aika uarereke imwini bungiakina	Ieremia 31:15	Mataio 2:16-18
E weteaki mai Aikubita	Otea 11:1	Mataio 2:13-15
E aranaki bwa te I-Nataretac	Itaia 11:1	Mataio 2:23
E rimoana te tia uataeka	Maraki 3:1	Mataio 11:7-10
E kabiraki bwa te Mesia n 29 C.E.d	Taniera 9:25	Mataio 3:13-17
E taekinna te Atua bwa Natina	Taian Areru 2:7	Mwakuri 13:33, 34
E ingainga ibukin ana auti te Atua	Taian Areru 69:9	Ioane 2:13-17
Te tia tataekina te rongorongo ae raoiroi	Itaia 61:1	Ruka 4:16-21
Te mwakuri ni minita nakoia aomata i Kariraia bon te oota ae abwabwaki	Itaia 9:1, 2	Mataio 4:13-16
Te tia karaoi kakai n aroni Mote	Te Tua-Kaua 18:15	Mwakuri 2:22
E tataekin ana iango te Atua n aroni Mote	Te Tua-Kaua 18:18, 19	Ioane 12:49
E katoki aorakia aomata aika bati	Itaia 53:4	Mataio 8:16, 17
E aki kani karekea atongana	Itaia 42:2	Mataio 12:17, 19
E kaota nanoangaaia aika a karawawataaki	Itaia 42:3	Mataio 12:9-20; Mareko 6:34
E kaotiota ana kaetitaeka ae riai te Atua	Itaia 42:1, 4	Mataio 12:17-20
Te tia Anga Reirei ni Kairiri ae Wanawana	Itaia 9:6, 7	Ioane 6:68
E tataekina aran Iehova	Taian Areru 22:22	Ioane 17:6
E taetae n taian taetae ni kaikonaki	Taian Areru 78:2	Mataio 13:34, 35
Te tia Kairiri	Taniera 9:25	Mataio 23:10
A bati ake a aki onimakinna	Itaia 53:1	Ioane 12:37, 38
Te atibu ni kabwakabwaka	Itaia 8:14, 15	Mataio 21:42-44
E aki butimwaeaki irouia aomata	Taian Areru 118:22, 23	Mwakuri 4:10, 11
E ribaaki n akea bukina	Taian Areru 69:4	Ioane 15:24, 25
E butimwaeaki raoi ngke e rin i Ierutarem i aon te taongki	Tekaria 9:9	Mataio 21:4-9
E kamoamoaaki ni wia ataei	Taian Areru 8:2	Mataio 21:15, 16
E roko n aran Iehova	Taian Areru 118:26	Ioane 12:12, 13
E kamwaneaki iroun raoraona ni kaan	Taian Areru 41:9	Ioane 13:18
E kamwaneaki ibukin 30 te mwakoro n tirewae	Tekaria 11:12, 13	Mataio 26:14-16; 27:3-10
A kitanna raoraona	Tekaria 13:7	Mataio 26:31, 56
E bukinaki n ae kewe	Taian Areru 35:11	Mataio 26:59-61
E kainabwabu i mataia taani bukinna	Itaia 53:7	Mataio 27:12-14
E bawareaki	Itaia 50:6	Mataio 26:67; 27:27, 30
E oreaki atuna	Mika 5:1	Mareko 15:19
E batiboaki	Itaia 50:6	Ioane 19:1
E aki kaaitaraia taan oreia	Itaia 50:6	Ioane 18:22, 23
A boraraoi ni kaitaraa taani kairiri n te tautaeka	Taian Areru 2:2	Ruka 23:10-12
A bobitiaki baina ma waena i aon te kai	Taian Areru 22:16	Mataio 27:35; Ioane 20:25
A karaoa te ananga ni katekeraoi (kemboro) aomata ibukini kunnikaina	Taian Areru 22:18	Ioane 19:23, 24
E warekaki i buakoia taani bure	Itaia 53:12	Mataio 27:38
E ribaaki ao e bwainikirinaki	Taian Areru 22:7, 8	Mataio 27:39-43
E kammarakaki ibukia taani bure	Itaia 53:5, 6	1 Betero 2:23-25
E a taraa n ae e a kitanaki iroun te Atua	Taian Areru 22:1	Mareko 15:34
E anganaki te beneka ao te wain ae renganaki ma te ran bwa e na nimma	Taian Areru 69:21	Mataio 27:34
E bora n taka imwain raoi matena	Taian Areru 22:15	Ioane 19:28, 29
E anga taamneina nakon te Atua	Taian Areru 31:5	Ruka 23:46
E anga maiuna	Itaia 53:12	Mareko 15:37
E katauraoa te kaboomwi ibukini kabwaraan te bure	Itaia 53:12	Mataio 20:28
Akea riina ae mwaoto	Taian Areru 34:20	Ioane 19:31-33, 36
E ewaraki	Tekaria 12:10	Ioane 19:33-35, 37
E kaiiaki i buakoia kaubwai	Itaia 53:9	Mataio 27:57-60
E kautaki man te mate	Taian Areru 16:10	Mwakuri 2:29-31
E oneaki mwin te tia kamwarua	Taian Areru 109:8	Mwakuri 1:15-20
E tekateka i angaatain te Atua	Taian Areru 110:1	Mwakuri 2:34-36

a E taekinaki ae kangai n te McClintock and Strong’s Cyclopedia: “E kona naba n iangoaki bwa e a bon tibwa mauna araia te baronga ake Iutaia ake a koreaki ma aia utu, ni kamaunaan Ierutarem.”

b Te ara n Ebera ae Emanuera, nanona “E Memena Iroura te Atua,” ae kabwarabwaraa raoi taben Iesu ae te Mesia. E oti raoi ni menana n te aonnaba ao n ana mwakuri bwa e boni memena te Atua i buakoia taan taromauria.—Ruka 2:27-32; 7:12-16.

c Tao e reke te taeka ae “Natareta” man te taeka n Ebera ae neʹtser, ae nanona “bwebwerake.”

d Ibukin rongorongon riki baike a riki ake a kotea 29 C.E. bwa te ririki ae kaoti iai te Mesia, nora te kaongora ae “E a Kamani Kaota Rokon te Mesia Ana Taetae ni Burabeti Taniera.”

e E mena te taetae ni burabeti aei n te boki ae Tekaria, ma e taekinna te tia korea te Baibara ae Mataio bwa e “taekinaki rinanon Ieremia are te burabeti.” (Mataio 27:9) N taraana ao te boki ae Ieremia e riki bwa te moani boki ni mwakoron te Baibara ae aranaki bwa “aia koroboki Burabeti.” (Ruka 24:44) E bae Mataio n taekina “Ieremia” n nanona iai te mwakoro anne ni kabane, ae kanoana naba te boki are Tekaria.