2 Te Kaai N Ibuobuoki

AE NANONAKI IAI

Ngkana a kaai n ibuobuoki taanga n tekatekaia, ao kaanga ai aron te bwairati ao te kauoman ni bwairati ngaiia ae titeboo kawaia ae a na nako iai. Ngkana a riki naba kangaanga, ao a aki toki n tatabemania nako n iango n ae “ngaira” ao tiaki “ngai.”

TE BOTO N REIREI MAN TE BAIBARA: “Ai tiaki ngkai uoman naakai, bwa ai tii te irikona.”—Mataio 19:6.

“Nakoraoin te tekateka n taanga, tiaki tii taben te buu temanna. A riai taanga ni kaai ni mwakuria kanakoraoan tekatekaia.”—Christopher.

BUKINA NGKAI E KAKAWAKI TE KAAI N IBUOBUOKI

Ngkana e riki te kangaanga, a aki toki taanga ake a aki kaai n ibuobuoki n ibukibuki i marenaia, ma a aki kakaaea katokan aia kangaanga. A a bubura iai kangaanga aika uarereke.

“Te kaai n ibuobuoki bon te bwai ae moan te kakawaki n te tekateka. Ngke arona bwa ti aki kaai n ibuobuoki ngai ma buu, ao ti na riki iai bwa kaanga bon tii kaain te auti ae tii teuana ao tiaki taanga, ae kaanga aomata aika kaai ni maeka ma a aki boboraoi n iango ni karaoani babaire aika kakawaki.”—Alexandra.

TE BWAI AE KO KONA NI KARAOIA

TUOKO I BON IROUM

• I iaiangoa te mwane ae I karekea bwa bon “tii au mwane”?

• Ngkana I iangoa te motirawa raoi, I kani kararoaa buu?

• I aki bati ni kakawariia ana koraki buu, e ngae ngke buu e rangi ni kaan ma ngaiia?

MAROROAKINI BAIKAI MA BUUM

• Itera raa n tekatekara n taanga aika ti kaai n ibuobuoki iai?

• Itera raa aika ti na kanakoraoi riki?

• Baikara mwaneka aika ti kona ni karaoi ae ti na karikirakea iai te nano ni kaai n ibuobuoki?

TAIAN IBUOBUOKI

• Iangoa te kaboo n te teneti ae ko aiana iai buum. N oneani mwin anne, baikara mwaneka aika manena aika ko kona ni karaoi bwa kam aonga ni mena n te tiim teuana?

• N oneani mwin ae ko na iangoa aei, ‘N na kangaa ni moanna?’ iangoa aei, ‘Ti na kangaa ni kaai ni moanna?’

“Mwaninga taekan ae antai ae eti ao ae kairua. E kakawaki riki reken te rau ao te katiteuanaaki n tekatekam n taanga.”—Ethan.

TE BOTO N REIREI MAN TE BAIBARA: “Kam na aki tii tabeakin oin aromi, ma kam na tabeakin naba aroia tabemwaang.”—I-Biribi 2:3, 4.