6 Te Reirei Ni Kaetieti

AE NANONAKI IAI

Te reirei ni kaetieti e kona n nanona te kairiri ke te angareirei. N tabetai e nanona naba kaetan aron te ataei ae aki riai. Ma n angiin te tai e irekereke ma kataneiaakina n te aroaro ni maiu ae riai, ae e na buokia ni karaoi motinnano aika raraoi ake a na tukia mani karaoan ae aki raoiroi.

BUKINA NGKAI E KAKAWAKI TE REIREI NI KAETIETI

Tatabebwi te ririki n nako ao e rangi ni karako te reirei ni kaetieti n taian utu, bwa a iangoia kaaro bwa kaetan te ataei e na kawaeremwea ana konabwai. Ma a katei tuua aika riai kaaro aika wanawana ao a kataneiaia natiia bwa a na kona n irii.

“A kainnanoi ataei tuua bwa tera ae a riai ni karaoia ao ae a aki, bwa a aonga n ikawairake n ataan ae riai. Ngkana akea te reirei ni kaetieti nakoia ataei, a na riki bwa kaanga te booti ae akea bweena, ae e na boni bure kawaina ke ni bon ranga i marawa.”—Pamela.

TE BWAI AE KO KONA NI KARAOIA

Kakoroa raoi am taeka. Ngkana e aki irii am tua natim, taraia raoi bwa e na katuuaaeaki. N te itera are teuana, tauraoi ni kamoamoaa natim ngkana e irii nanon am tua.

“I kakamoamoaia natiu n ongeabaia n te aonnaba aei ae e a rangi ni karako iai te ongeaba. A na buokaki ni kamoamoaaia bwa a na kakai butimwaea kaetakia.”—Christine.

TE BOTO N REIREI MAN TE BAIBARA: “Te baere e unikia te aomata, e na manga taia naba uaana.”—I-Karatia 6:7.

Bwaina te iangoraoi. Ngkana e anganaki te ataei te reirei ni kaetieti, iangoia bwa rorora, tera aron ana konabwai, ao kakaiakin te kairua are karaoaki. E rangi n ibuobuoki n taai nako te katuuaa ngkana a karaoa ae kairua. N te katoto, ngkana a aki ongeaba n tuua ni kaineti ma kabonganaan te tareboon, e kona n anaaki mairouia ke e na tiatianaki kabonganaana. Taraia naba bwa ko na aki rangi n un n te bwai ae aki rangi ni kakawaki tii ibukina bwa e maraki nanom iai.

“I kataia n iangoia raoi bwa e bon aki kan ongeaba natiu ke tao e bure ana babaire. Bon iai te kaokoro i marenani kakaraoan ae aki raoiroi ae kainnanoa katokana, ma te kairua ae tii teuana ae tii kainnanoa kaotakina nakoina.”—Wendell.

TE BOTO N REIREI MAN TE BAIBARA: “Kam na tai kaunia natimi bwa e kaawa ni bwara nanoia.”—I-Korote 3:21; kabwarabwara mai nano.

Bwaina te tatangira. E bebete riki irouia ataei butimwaean te reirei ni kaetieti ao maiuakinana, ngkana a ataia bwa e rangi n tatangira te karo.

“Ngkana e karaoa ae kairua natira, ti karaua nanona bwa ti kakatonga n ana motinnano nako aika raraoi ake e a tia ni karaoi. Ti kabwarabwaraa bwa ana kairua are e karaoia, e na bon aki taekanabuaka iai ngkana e kaeta arona, ao ti tauraoi ni buokia.”—Daniel.

TE BOTO N REIREI MAN TE BAIBARA: “E taotaonakinnano te tangira ao e akoi.”—1 I-Korinto 13:4.