Kakabwaia Aika Reke n te Taubaang

TERA TE TAUBAANG?

E nanonaki naba n te taubaang te kona

• ni kakantaninga

• n taotaonakinnano

• ni katiaa tabem are ko na karaoia e ngae ngke bon akea nanom iai

• ni moanibwaia aomata nakoim

E AERA NGKAI E KAKAWAKI TE TAUBAANG?

A kona ataei ake a bwaati riki n taubaang, n rawa nakon te bwai ae aki raoiroi ae a na kukurei iai tii teutana te tai. Ma ataei ake a kabi n taubaang a kona

• n iowawa

• n rarawawata ni maiuia

• ni moko ke ni kabongana te arekooro n te aro ae aki riai ke te drug

• ni kang amwarake aika aki kamarurung

E noraki n te kakaae teuana bwa ataei ake a bwaati riki n taubaang n uarerekeia, e karako aorakia ma aia kangaanga ma te mwane ngkana a ikawai, ao a kai irii riki tuua. Man te kakaae anne, e a kangai iai te tia Rabakau man te Reirei ae Rietata i Pennsylvania ae Angela Duckworth: “Bon akea buakakan te taubaang.”

ARON REIAKINAIA TE TAUBAANG

Reiakina atongan tiaki ao kakoroa bukina.

ANA BOTO N REIREI TE BAIBARA: “Ngkana kam atonga ‘Eng’ ao nanona eng, ao ami ‘Tiaki’ nanona tiaki.”​—Mataio 5:37.

A kona ataei ni kataiia aia karo n aroia ni kabatiai aroia n tangitang, ao tao i buakoia naba te koraki. Ngkana te karo e ira nanon natina, e a ataia ngkanne te teei bwa te tangitang bon te anga ae nakoraoi ibukini bitakin tiaki nakon eng.

Ma n iterana are teuana, ngkana e atonga tiaki te karo ao e boni kakoroa bukina, e na ataia te teei bwa ti aki kona ni karekei n taai nako baika ti tangiri ni maiura aei. E korea ae kangai Dr. David Walsh: “E ngae ngke ko kariaa bwa e na kukukurei te aomata are a rereke n taai nako baike e tangiri, ma tiaki ngaia anne. A kukukurei riki aomata ake a taubaang. Ti aki akoiia natira ngkana ti reireinia bwa e nangi bon rereke naba te bae a tangiria.”a

Ngkana ko kona n atonga tiaki nakon natim ngkai e uarereke, e na bebete riki irouna te taubaang ngkana e a ikawai​—⁠n te katoto, ngkana e a kataaki nakoni kabonganaan te drug, te wene ni bure imwain te mare, ke karaoani mwakuri tabeua riki aika karuanikai.

Buokiia natim bwa a na ataa mwini karaoan ae raoiroi ke ae buakaka.

ANA BOTO N REIREI TE BAIBARA: “Te baere e unikia te aomata, e na manga taia naba uaana.”​—I-Karatia 6:7.

E riai n ataia natim bwa iai mwini mwakuri nako, ngaia are te aki taubaang bon iai mwina aika aki raraoi. N te katoto, ngkana e kakaiun natim ao a na bon aki kani memena aomata i rarikina. Ma ngkana e reireinna n aki kakaiun ngkana e kaunaki, ke n tataninga ao n aki rebereberake, e na tatangiraki. Buoka natim bwa e na ataia ae e na nakoraoi riki maiuna ngkana e taotaonakinnano.

Reireina natim bwa e na atai baika moan te kakawaki riki.

ANA BOTO N REIREI TE BAIBARA: “Koaua raoi bwa baikara bwaai aika kakawaki riki.”​—I-Biribi 1:10.

E buokira te taubaang bwa ti na aki kakaraoi baika kairua, ao e buokira naba bwa ti na karaoi baika ti aki nano iai ma ti bon riai ni karaoi. E kakawaki bwa e na reireinna natim n atai baika kakawaki riki ao ni kakaraoi moa baikanne. N te katoto, e riai ni karaoa moa ana bwai n reirei imwain takaakarona.

Riiki bwa te banna ni katoto ae raoiroi.

ANA BOTO N REIREI TE BAIBARA: “I katea te banna ni katoto nakoimi, bwa te bwai are I karaoia nakoimi, ao kam riai naba ni karaoia.”​—Ioane 13:15.

E na bon nonora arom natim ngkana iai te bae ko un iai. Kaotia n am katoto ae a nanakoraoi bwaai ngkana iai te taubaang. N te katoto, ngkana e kataa am taotaonakinnano natim, ko a bon un naba ke ko teimatoa n rau?