TE AONNABA AE RANGI NI BATI IAI TE KANGAANGA

4 | Kamanoa Am Kantaninga

BUKIN TERA BWA E KAKAWAKI?

A kona n rotaki marurungia aomata ao aia iango n te raraoma ao kangaanga aika rangi ni bati n te aonnaba aei. Ao a bati aika a a tia n rotaki ni baika riki aikai ao akea irouia iangoan ae iai te tai ae a na rikirake iai n tamaroa riki. Ma tera aroia?

Tabeman a a rawa n iaiangoi taai aika a na roko.
Tabeman riki, a kataia ni kabuai raraomaia ni kamanenaan te kamanging ke taian drug.
Ao tabeman a iangoia bwa ai akea uaani maiuia ngaia are a iangoia bwa a na bakabureiia.

Tera ae Ko Riai n Ataia?

Tabeua kangaanga aika ko bae ni kaaitarai, a bon aki teimaan ao a kona ni bitaki nakon ae raoiroi riki n te aro ae aki kantaningaaki.
E ngae ngkana akea te bitaki nakon am kangaanga, ma bon iai naba baika ko kona ni karaoi bwa ko aonga n nanomwaaka i aana.
E beritana te kantaninga ni koaua te Baibara ibukini katokan aia kangaanga te botannaomata n aki toki.

Tera te Bwai ae Ko Kona ni Karaoia Ngkai?

Te Bae Taekinna te Baibara: “Tai iango n raraoma ngkanne ibukin ningabong, bwa ko na bon raraomaeakinna ningabong. E bon tannako te bong ma kangaangana.”—Mataio 6:34.

Tai raraomaeakini kanoan taai aika a na roko aika ko aki kona ni karaoi n te bong aei. Ao tai kariaia bwa e na tuka karaoan tabem n te bong aei, raraomam anne.

Raraomaeakinani baika aki raraoi, ake a kona n riki ke a aki, ko a boni kauaataoa riki iai rawawatam ao e na kamamaara am kantaninga ibukin taai aika raraoi riki aika imwaim.

AROM NI KAMANOKO—Bwaai n Ibuobuoki

KAATUUA IANGOAN TE BWAI AE RAOIROI

Te Bae Taekinna te Baibara: “A bane ni buakaka ana bong te aomata ae karawawataaki, ma e reitinako ana baka n amwarake ane e kakatonga nanona.” (Taeka N Rabakau 15:15) Ngkana ko kaatuua iaiangoan am kangaanga, ko na bae n aki ataia ae iai aroni katokana. Ma iaiangoan te bwai ae raoiroi, e kona ni buokiko bwa ko na ataa aroni katokan am kangaanga.

Tiatiana am tai n ongongora n te rongorongo.
Ni banen te bong teuana ma teuana, iaiangoi bwaai aika uoua ke tenua ake ko na kakaitau iai.
Korei baika ko riai ni karaoi, n ikotaki naba ma te bwai ae ko kona ni karaoia n te bong aei. Tibwatibwai am mwakuri akana bubura ni kauarerekei, bwa ko aonga ni kona n nora ae ko a tia ni karaoia n tokin te bong teuana ma teuana.

KAREKEA BUOKAM

Te Bae Taekinna te Baibara: “Ane e kararoaa ma aomata . . . e rarawa nakon te wanawana ni kabane.” (Taeka N Rabakau 18:1) Ko na bon aki kona ni waerake man te mwanono ae rangi n nano i bon iroum, ma tii ngkana ko buokaki.

Karekea buokam mairouia am utu ke raoraom.
Kakaaei naba aanga ake ko na buokiia iai. Karaoani bwaai tabeua ibukia tabemwaang, ko na buokaki iai n iaiangoi am kangaanga n te aro ae riai.
Ngkana arona bwa e a bua am kantaninga ao ko a namakinna bwa akea uaani maium, iangoia bwa ko na nako n tutuo n te onnaoraki. N tabetai, te nanokawaki ae korakora, boni kanikinaean te aki marurung raoi ke e rotaki am iango n te rawawata. A bati aika a a tia ni karekea buokaia n aia bwainnaorakia

a E aki taekinaki n te Taratara! aei bwa e boutokai aeka ni bwainnaoraki nako.

E Beritana te Kantaninga ni Koaua te Baibara

E tataro nakon te Atua ni kangai te tia areru rimoa: “Bon taurani waeu am taeka, ao ootani kawaiu.” (Taian Areru 119:105) Iangoa te Baibara ae Ana Taeka te Atua—bon anne raoi arona.

N te tairiki ae rotongitong ao e buokira te taura ni kaotaa kawaira ae ti na toua. N aron naba anne, iai te wanawana n te Baibara ae kona ni kairirira ibukini karaoan ara motinnano ae kangaanga.

E kaotaa kawaira te taura bwa ti aonga n nora ae raroa riki. N aron naba anne, e kona ni kaotaa ara iango te Baibara ni kaineti ma kanoan taai aika imwaira aika raraoi riki.

Te Baibara bon te boki ae tabu ae aki tii taekin rongorongoia aomata rimoa, ma e katauraoa naba te kantaninga ni koaua ibukin taai aika imwaira. E boni kaekai titiraki aikai:

Rikin te rawawata

Aroni moan rikin te rawawata: E taekinaki n te Baibara bwa “aron rokon te bure irouia kaain te aonnaba mairoun te mwaane ae tii temanna ao rokon te mate n te bure, ao e a ituia aomata ni kabane te mate ibukina bwa a bane ni bure.”—I-Rom 5:12.

Bukina ngkai e tuai toki

Bukina ngkai a kabwaka taan tautaeka aika aomata ni katoki ara kangaanga: E taekinaki n te Baibara bwa “tiaki naba ana bwai te aomata kairani maiuna.” (Ieremia 10:23) E oti koauan raoi te kibu aei ni kangaanga aika ririki n te aonnaba.

Ae e na karaoia te Atua

Te bwai ae e na karaoia te Atua ibukini katokani kangaanga aikai: E kaotaki n te Baibara bwa “e na kaoa te rannimata ni kabane mai mataia, ao e nang akea riki te mate, ke te nanokawaki ke te tang ke te maraki.”—Te Kaotioti 21:4.