E KONA N TEIMATOA ARA BURANETI AEI?
TE EA
TI KAINNANOA te ea, tiaki tii ibukin te ikeike. E kamanoa ara buraneti te ea mani korakorani kabuebuen taai ae kamamate. Ngkana akea te ea, e na rangi ni mwaitorotoro te aonnaba.
Bukina Ngkai Ti Riai ni Kamanoa te ea
E kona baarekan te ea ni kamauna te maiu i aon te aonnaba. Tii teuana te katebubua mai buakoni mwaitiia kaain te aonnaba aika a ikeikena te ea ae itiaki, ni kaineti ma ae taekinna te World Health Organization.
E kona te ea ae baareka ni karekea te bono n ike, te kaentia n te maamaa, ao aorakin te buroo. Te ea ae baareka e kamateia aomata aika e raka i aon 7,000,000 ni katoa ririki.
E Karaoaki Ara Buraneti Aei Bwa E na Teimatoa
E karaoaki ara buraneti bwa e na teimatoa ni katauraoa te ea ae itiaki ae tau ibukini baika maiu ni kabane n te aonnaba. Ma e tii kona ni karaoa aei, ngkana a taraia raoi aomata bwa a na aki kakorakoraa kabarekaan te otabwanin. Iangoi katoto tabeua.
E rangi n ataaki ae te buakonikai e kona n tooma te kaeti ae te carbon dioxide man te ea. Ma e aki rangi n ataaki ae taabo aika rangi ni mwamwaimwai aika a maiu iai toongo, e kona ni karaoa ae tamaroa riki nakon anne. A kona toongo ni kanakoa te carbon dioxide man te ea, nimaua te tai okiokina nakon are a kona ni karaoi buakonikai.
E oti n taiani kakaae aika tibwa karaoaki, bwa tabeua aroka aika bubura aika maiu n te nei n aron te tiuiita a aki tii rawea te carbon dioxide man te ea, ma a boni kamauna raoi. Iai ni baan taian aroka aikai baika ai aroni katibu, ae e kawakinaki iai te ea, are a a kona ni beibeti iai nakon taabo aika raroa. E rebwetaua te bwai aei ngkana e a raroa ma mataniwin te aba, ao n iinako te aroka are e onrake n te carbon dioxide i kabini marawa. E taunaki n te tabo anne i nanon ririki aika bati.
E oti raoi bwa e kona te ea ni kaitiakia mani baika kabarekaa te ea ngke e katokaki te ririaki n tain te COVID-19. N 2020, ao e a rangi n raoiroi te ea ngke a a bane n aki buti angiin taabo ni karaobwai n te aonnaba ao bao ni mwamwananga aika kabarekaa te otabwanin. N aron ae taekinna te “World Air Quality Report n 2020,” ao 80 tabun te katebubua mwaitin aaba ake a ribootinna bwa e a itiaki te ea n aia tabo, teutana te tai imwini katokan te ririaki.
Te Bae A Karaoia Aomata
Kabonganaan te bwatika e kona ni kauarerekea baarekan te ea
A teimatoa tautaeka n tuangia taabo ni karaobwai bwa a na kauarerekea kabarekaan te ea. A teimatoa naba taan rabakau ni bwain te aonnaba n ukeri aanga aika boou ake a kona ni kaoka mwin te urubwai ni kabarekaan te ea. N te katoto, te anga teuana boni kamanenaani baika maiu aika bingingi ni bitii baika kabarekaa te ea nakoni baika aki kamamate. Irarikina, a kaungaia aomata taan rabakau bwa a na rianna ke ni bwatika, nakon are a na kabuta aia kaa, ao n aki rangi ni kabatiaa kabonganaan te iti n aia auti.
A katauraoi titoobu aika boou tautaeka tabeua ibukia aia aomata, ni kauarerekea kabarekaan te ea, ma a bati aika aki kona ni karekei titoobu aikai.
Ma e bati riki ae kainnanoaki, n aron ae oti n te ribooti n 2022 ae reke man taabo aika kakaokoro, n ikotaki ma te World Health Organization ao te World Bank.
E taekinaki n te ribooti n 2020, bwa teuana katenimwakoroia kaain te aonnaba aika a kamanenai baika kabarekaa te ea ngkana a kuuka. N taabo aika bati, ao tii tabeman aomata aika kona ni kabooi titoobu aika boou ke ni karekei bwaan riki titoobu ake tabeua.
Kakoauaan ae E na Tamaroa Taai Aika Imwaira—Te Bae E Taekinna te Baibara
“E kangai ana taeka te Atua ae koaua ae Iehova, ae te tia Karaoa karawa, ao . . . Teuare taakina te aonnaba ma ni karikii bwaai ni kabane ake iai, are Teuare anga te ikeike nakoia aomata ake iai.”—Itaia 42:5.
E karika te ea ae ti ikeikenna te Atua ao bwain te aonnaba aika kaitiaka te ea, ao iai mwaakana ae korakora ao e tangiriia aomata. Ngaia are e bon riai bwa ti na kakoauaa ae e na kanakoi baika kabarekaa te ea. Nora te kaongora ae “E Berita te Atua Bwa E na Teimatoa Ara Buraneti.”