-
Tera Ana Tautaeka n Uea te Atua?Ko Kona ni Kukurei n Aki Toki!—Te Reirei n te Baibara
-
-
REIREI 31
Tera Ana Tautaeka n Uea te Atua?
Te boto n iango n te Baibara bon taekan Ana Tautaeka n Uea te Atua. E na kamanena te Tautaeka n Uea anne Iehova ni kakororaoa iai ana moani kantaninga ibukin te aonnaba. Tera te Tautaeka n Uea? Ti kangaa n ataia ae e a kairiri ngkai? Tera ae e a tia ni kakororaoia te tautaeka aei? Ao tera ae e na karaoia n te tai ae imwaira? A na kaekaaki titiraki aikai n te reirei aei ao n reirei aika uoua ake imwina riki.
1. Tera Ana Tautaeka n Uea te Atua, ao antai te Uea iai?
Te Tautaeka n Uea bon te tautaeka ae kateaki iroun Iehova ae te Atua. E Uea iai Iesu Kristo ao e kairiri mai karawa. (Mataio 4:17; Ioane 18:36) E kangai te Baibara ibukin Iesu: “E na tautaeka bwa te Uea . . . n aki toki.” (Ruka 1:32, 33) Ngkai te Uea Iesu n Ana Tautaeka n Uea te Atua, e na boni kairiri i aoia kaain te aonnaba ni kabane.
2. Antai raon Iesu ni kairiri?
Tiaki tii Iesu ni kairiri. Iai aomata “mai buakoia baronga nako ma taetae ma natannaomata ma botannaomata . . . [aika] a na kairiri bwa ueea n tautaekana te aonnaba.” (Te Kaotioti 5:9, 10) Iraman aika a na kairiri ma Kristo? Mirion ma mirion Kristian ake a riki bwa taan rimwin Iesu, ni moa man te tai are e roko iai n te aonnaba. Ma tii 144,000 mai buakoia aika a na nako karawa ni kairiri ma Iesu. (Wareka Te Kaotioti 14:1-4.) A na bane Kristian ake nikiraia aika n te aonnaba n riki bwa kaain naba te Tautaeka n Uea anne.—Taian Areru 37:29.
3. E kangaa n rianako riki Ana Tautaeka n Uea te Atua nakon aia tautaeka aomata?
E ngae ngkana a kataia ni karaoi baika raraoi taan tautaeka aika aomata, ma a aki kona ni karaoi ni kabane baike a kani karaoi. A na manga bon oneaki mwia irouia taan tautaeka tabeman, aika a kona n aki boraoi n iango ma ngaiia. Ma e bon aki kona n oneaki mwin Iesu, ae te tia Kairiri n Ana Tautaeka n Uea te Atua. E a tia te Atua ni “katea te tautaeka n uea teuana . . . ae e na bon aki kamaunaaki.” (Taniera 2:44) E na kairiri i aoia kaain te aonnaba ni kabane Iesu ma te aki inanonano. E bwabwaina te tangira, te akoi, ao te kaetitaeka ae riai ao e na reireinia aomata bwa a na bwaina naba te tangira, te akoi, ao te kaetitaeka ae riai i marenaia.—Wareka Itaia 11:9.
REIAKINA AE BATI RIKI
Noria bwa e aera ngkai e rianako riki Ana Tautaeka n Uea te Atua nakon aia tautaeka aomata.
4. E na tautaekana te aonnaba ni kabutaa te tautaeka ae korakora
E mwaaka riki Iesu Kristo ni kairiri nakoia taan tautaeka nako. Wareka Mataio 28:18, ao maroroakina te titiraki aei:
N te aro raa ae rianako riki iai ana waaki ni kairiri Iesu nakoia taan tautaeka aika aomata?
E bibitaki te tautaeka n aomata, ao te aomata ae te tia tautaeka e tii tautaekana mwakoron te aonnaba teuana. Ma tera aron Ana Tautaeka n Uea te Atua? Wareka Taniera 7:14, ao maroroakin titiraki aikai:
E aera ngkai e raoiroi ae “e na bon aki kamaunaaki” Ana Tautaeka n Uea te Atua?
E aera ngkai e raoiroi ae e na tautaekana te aonnaba ni kabutaa?
5. A riai n oneaki mwia tautaeka n aomata
E aera ngkai e riai Ana Tautaeka n Uea te Atua n onei mwia tautaeka n aomata? Kaota te TAAMNEI, ao maroroakina te titiraki aei.
Tera mwin aia tautaeka aomata?
Wareka Te Minita 8:9, ao maroroakin titiraki aikai:
N am iango, e riai Ana Tautaeka n Uea te Atua n onei mwia tautaeka n aomata? Bukin tera?
6. Iai taani kairiri n Ana Tautaeka n Uea te Atua aika a ota iroura
Ibukina bwa ara Uea ae Iesu e a tia ni maiu bwa te aomata, e kona ngkanne “n nanoangaira ni mamaarara.” (Ebera 4:15) A rineaki iroun Iehova “mai buakoia baronga nako ma taetae ma natannaomata ma botannaomata” mwaane ao aine aika kakaonimaki aika 144,000 mwaitiia, ake a na kairiri ma Iesu.—Te Kaotioti 5:9.
E rau nanom n ataakin ae Iesu ao raona ni kairiri a ataa aron te maiu n aomata? Bukin tera?
E rineiia mwaane ao aine Iehova aika kakaokoro aroia bwa a na kairiri ma Iesu
7. A rianako riki ana tua Ana Tautaeka n Uea te Atua
A katei tuua tautaeka ibukini kabwaiaia ao kamanoaia aia aomata. N aron anne, iai naba ana tua Ana Tautaeka n Uea te Atua ae a riai ni kakairi iai ana aomata. Wareka 1 I-Korinto 6:9-11, ao maroroakin titiraki aikai:
N am iango, e na tera aron te aonnaba aei ngkana a bane aomata ni kakairi n ana tua te Atua?a
N am iango, iai riain Iehova ni kantaningaiia ana aomata te Tautaeka n Uea aei, bwa a na ongeaba n tuua aikai? Bukin tera?
Tera ae oti iai bwa a boni kona ni bitaki naake a aki ongeaba n tuua aikai?—Nora kibuna 11.
A katei tuua tautaeka ibukini kamanoaia ao kakabwaiaaia aia aomata. Iai naba ana tua Ana Tautaeka n Uea te Atua aika rianako riki aika a na kamanoaki ao ni kakabwaiaaki iai ana aomata
E KONA NI KANGAI TEMANNA: “Tera Ana Tautaeka n Uea te Atua?”
Ko na kangaa ni kaeka?
KAKIMOTOTOANA
Bon te tautaeka ni koaua Ana Tautaeka n Uea te Atua ae mena i karawa ao e na kairiri i aoia kaain te aonnaba ni kabutaa.
Kauring
Antai taani kairiri n Ana Tautaeka n Uea te Atua?
N te aro raa ae rianako riki iai Ana Tautaeka n Uea te Atua nakon aia tautaeka aomata?
Baikara bwaai tabeua aika e kantaningai Iehova mairouia ana aomata te Tautaeka n Uea?
NORI NABA AIKAI
Nora ana angareirei Iesu bwa e mena ia te Tautaeka n Uea.
“E Koaua ae E Memena Ana Tautaeka n Uea te Atua i Nanom?” (Te kaongora n jw.org)
A aera Ana Tia Kakoaua Iehova ngkai a rineia bwa a na kakaonimaki ni koaua riki nakon Ana Tautaeka n Uea te Atua ao tiaki aia tautaeka aomata?
Nenera ae kaotaki n te Baibara ni kaineti ma naake 144,000 ake e rineiia Iehova bwa a kairiri ma Iesu.
-
-
E a Kairiri Ngkai Ana Tautaeka n Uea te Atua!Ko Kona ni Kukurei n Aki Toki!—Te Reirei n te Baibara
-
-
REIREI 32
E a Kairiri Ngkai Ana Tautaeka n Uea te Atua!
E moana ana kairiri Ana Tautaeka n Uea te Atua n te ririki 1914. Anne naba te tai are e a moanaki iai kabaneani bongin aia tautaeka aomata. Ti kangaa n ataia? Iangoa ana taetae ni burabeti te Baibara ma baike a riki ao aroaroia aomata man 1914.
1. Tera ae taetae ni burabetinaki n te Baibara?
E kaotaki n te boki ae Taniera bwa e na moana ana kairiri Ana Tautaeka n Uea te Atua n tokin taai ake aranaki bwa “taai aika itiua.” (Taniera 4:16, 17) Iraua te tienture imwina, ao e aran taai akanne Iesu bwa “aia tai botannaomata ae baireaki,” ao e angareirei bwa e tuai n toki taai akanne. (Ruka 21:24) N aron ae ti na noria, e toki taai aika itua n 1914.
2. Tera ae riki n te aonnaba ao tera aroaroia aomata ni moa man 1914?
A titirakina Iesu taan rimwina ni kangai: “Tera te kanikina ae e na kaotia bwa ko a oki ma n tiku, ao kanikinaean tain tokin te waaki ae ngkai i aon te aba?” (Mataio 24:3) E kaekaia Iesu n taekini baika bati aika a na riki imwini moanakin ana kairiri i karawa bwa te Uea n Ana Tautaeka n Uea te Atua. Tabeua mai iai bon te buaka, te rongo, ao mwaeiein te aba. (Wareka Mataio 24:7.) E a kaman taekinna naba te Baibara bwa e na “karuanikai” riki te maiu n aroaroia aomata ni “kabaneani boong.” (2 Timoteo 3:1-5) A riki raoi baikai ao aroaro aikai ni moa man 1914.
3. E aera ngkai e rikirake te buakaka n te aonnaba, man te tai are e moana iai ana kairiri Ana Tautaeka n Uea te Atua?
Tabeua te tai imwin rikin Iesu bwa te Uea n Ana Tautaeka n Uea te Atua, ao e a buaka naba ma Tatan ao ana taimonio. E konaaki Tatan n te buaka anne. Ao e taekinaki n te Baibara bwa “e tewenakoaki nakon te aonnaba, ao a tewenakoaki naba ana anera ma ngaia.” (Te Kaotioti 12:9, 12) E rangi n un Tatan bwa e ataia ae e na boni kamaunaaki. Ngaia are e a karekea te maraki ma te rawawata n te aonnaba ni kabutaa. Ti a ataa ngkanne bukin rikini baika rangi ni bubuaka. E na boni katoki kangaanga aikai Ana Tautaeka n Uea te Atua.
REIAKINA AE BATI RIKI
Neneria bwa ti kangaa n ataia ae e moana ana kairiri te Tautaeka man 1914, ao tera nanon anne ibukira.
4. E kairiri warekan te tai n te Baibara nakon 1914
E kamiia te Uea are Nebukaneta te Atua n te mii ae te taetae ni burabeti. E oti n te mii anne ao ni kabwaraana iroun Taniera bwa e kaineti nakon ana tautaeka Nebukaneta ao nakon naba Ana Tautaeka n Uea te Atua.—Wareka Taniera 4:17.a
Wareka Taniera 4:20-26, ao kamanena te bwaoki ni kaekai titiraki aikai:
(A) Tera are e noria Nebukaneta ni miina?—Nora kibuna 20 ao 21.
(B) Tera are e na riki nakon te kainnamwarake?—Nora kibuna 23.
(C) Tera are e na riki n tokin “taai aika itiua”?—Nora kibuna 26.
Irekereken te Kainnamwarake Are n te Mii ma Ana Tautaeka n Uea te Atua
TE TAETAE NI BURABETI (Taniera 4:20-36)
Te tautaeka
(A) Te kainnamwarake ae totoa
Tokin te tautaeka
(B) “Tataa te kainnamwarake ni kabwakaa” ao katikua “ni karokoa koron taai aika itiua”
Manga okin te tautaeka
(C) “E na manga okiriko am tautaeka n uea”
Moani kakoroan nanon te taetae ni burabeti . . .
(D) E tei ibukin antai te kainnamwarake?—Nora kibuna 22.
(E) E kangaa n toki moa ana tautaeka?—Wareka Taniera 4:29-33.
(F) Tera are e riki nakon Nebukaneta n tokin “taai aika itiua”?—Wareka Taniera 4:34-36.
MOANI KAKORORAOANA
Te tautaeka
(D) Nebukaneta are Ueani Baburon
Tokin te tautaeka
(E) Imwin 606 B.C.E., ao e a roko minon Nebukaneta ao e aki kona n tautaeka i nanon ririki aika itiua
Manga okin te tautaeka
(F) E a toki minon Nebukaneta ao e a manga tautaeka
Kauouani kakoroan nanon te taetae ni burabeti . . .
(G) E tei ibukin antai te kainnamwarake?—Wareka 1 Rongorongo 29:23.
(H) E kangaa ni bwaka moa te tautaeka? Ti kangaa n ataia bwa e teimatoa ni bwaka te tautaeka anne ngke e mena Iesu n te aonnaba?—Wareka Ruka 21:24.
(I) N ningai ao n te tabo raa ae e a manga kaokaki iai te tautaeka anne?
KAUOUANI KAKORORAOANA
Te tautaeka
(G) Ueea aika I-Iteraera aika tei ibukin ana tautaeka te Atua
Tokin te tautaeka
(H) E kamaunaaki Ierutarem, ao e toki ueaia I-Iteraera i nanon 2,520 te ririki
Manga okin te tautaeka
(I) E a moana ana kairiri Iesu i karawa bwa te Uea n Ana Tautaeka n Uea te Atua
Maanra taai aika itiua?
Ti buokaki ni kanoan te Baibara tabeua bwa ti na ota ni kanoana ake tabeua. N te katoto, e taekinaki n Te Kaotioti bwa tenua ma te itera te tai e boraoi ma 1,260 te bong. (Te Kaotioti 12:6, 14) Ngkanne itiua te tai e boraoi ma 2,520 te bong. N tabetai n te Baibara, e kona n tei teuana te bong ibukin teuana te ririki. (Etekiera 4:6) Anne naba aron te taetae ni burabeti ae n Taniera ibukin taai aika itiua, a tei ibukin 2,520 te ririki.
5. E a Bitaki te Waaki n te Aonnaba Man 1914
E a kaman taekini baika a na riki Iesu imwin rikina bwa te Uea. Wareka Ruka 21:9-11, ao maroroakina te titiraki aei:
Baikara mai buakoni baikai aika ko a tia n nori ao n ongo taekaia?
E kabwarabwaraa te abotoro Bauro aroaroia aomata ni kabaneani bongin aia tautaeka aomata. Wareka 2 Timoteo 3:1-5, ao maroroakina te titiraki aei:
Baikara mai buakon aroaro aikai aika ko nori irouia aomata ni boong aikai?
6. Ti riai ni kaungaaki ngkai e a kairiri Ana Tautaeka n Uea te Atua
Wareka Mataio 24:3, 14, ao maroroakin titiraki aikai:
Tera te mwakuri ae kakawaki ae kaotaki iai bwa e a kairiri ngkai Ana Tautaeka n Uea te Atua?
Ko na kangaa n uataboa te mwakuri aei?
E a kairiri ngkai Ana Tautaeka n Uea te Atua, ao e a kaan te tai are e nang tautaekana iai te aonnaba aei. Wareka Ebera 10:24, 25, ao maroroakina te titiraki aei:
Tera ae ti riai ni karaoia n tatabemanira nako “ngkai ti a nora te bong arei bwa e a kaan”?
Ngkana ko ataa te bwai teuana ae a kona ni buokaki ao ni kamaiuaki iai tabemwaang, tera ae ko kairaki bwa ko na karaoia?
E KONA NI KANGAI TEMANNA: “A aera Ana Tia Kakoaua Iehova ngkai a tataekinna bwa e kakawaki te ririki ae 1914?”
Tera ngkoe am kaeka?
KAKIMOTOTOANA
E oti n taian taetae ni burabeti ma warekan te tai n te Baibara, n ikotaki ma baika riki n te aonnaba aei, bwa e a kairiri ngkai Ana Tautaeka n Uea te Atua. Ti kaotia bwa ti kakoauaa aei n arora n tataekinna ao ni kaakaei bobotaki n te ekaretia.
Kauring
Tera ae e na riki n tokin taai aika itua are e a kaman taekinaki n Taniera?
Tera ae kairiko bwa ko na kakoauaa ae e moana ana kairiri Ana Tautaeka n Uea te Atua n 1914?
Ko na kangaa ni kaotia bwa ko kakoauaa ae e a kairiri ngkai te Tautaeka n Uea?
NORI NABA AIKAI
Wareka aron rotakini maiun te mwaane temanna n taian taetae ni burabeti aika ni Mataio 24:14.
“I Tangira te Beitiboo ao Akea Riki!” (Te Taua -n-Tantani Na. 3 2017)
Ti kangaa n ataia bwa te taetae ni burabeti are n Taniera mwakoro 4 e kaineti ma Ana Tautaeka n Uea te Atua?
“E Moanaki n Ningai Ana Tautaeka n Uea te Atua? (Mwakoro 1)” (Te Taua-n-Tantani, Okitobwa 1, 2014)
Tera ae kaotia bwa “taai ake itiua” ake n Taniera mwakoro 4 a toki n 1914?
“E Moanaki n Ningai Ana Tautaeka n Uea te Atua? (Mwakoro 2)” (Te Taua-n-Tantani, Nobembwa 1, 2014)
a Nori kaongora aika uoua aika taiani kabane, akana i aan “Nori Naba Aikai” n te reirei aei.
-
-
Te Bae E na Kakororaoia te Tautaeka n UeaKo Kona ni Kukurei n Aki Toki!—Te Reirei n te Baibara
-
-
REIREI 33
Te Bae E na Kakororaoia te Tautaeka n Uea
E a kairiri ngkai Ana Tautaeka n Uea te Atua. Ao e a kaan te tai are e nang karaoa iai te bitaki ae bubura nakon te aonnaba. Ti na rinanoi ngkai tabeua baika raraoi aika ko kona n ingainga nako iai i aan ana kairiri te Tautaeka n Uea.
1. E na kangaa Ana Tautaeka n Uea te Atua ni kaoka te rau ao te kaetitaeka ae riai n te aonnaba?
N te buaka ae Aremaketon ao Iesu are te Uea n Ana Tautaeka n Uea te Atua, e nang kamaunaia aika buakaka ma tautaeka. (Te Kaotioti 16:14, 16) N te tai anne ao e nang koro raoi nanon ana berita te Baibara are kangai: “Ai tii teutana riki ao a nang akea aomata aika buakaka.” (Taian Areru 37:10) Rinanon te Tautaeka n Uea anne, e na taraia raoi Iesu bwa e na buta aonnaba n te rau ao n te kaetitaeka ae riai.—Wareka Itaia 11:4.
2. E na tera aron te maiu ngkana e a kakororaoaki nanon te Atua n te aonnaba?
“A na abana te aonnaba akana raoiroi, ao a na maeka i aona n aki toki” i aan ana kairiri Ana Tautaeka n Uea te Atua. (Taian Areru 37:29) Iangoia bwa ko a maiu n te aonnaba ae maekanaki irouia aika a raoiroi, a tangira Iehova, ao a itangitangiri i marenaia! Akea temanna ae e aoraki, ao a na bane ni maiu n aki toki.
3. Tera ae e na kakororaoia Ana Tautaeka n Uea te Atua ngkana e tia ni kamaunaia aika buakaka?
Imwini kamaunaaia aika buakaka, e nang tautaeka Iesu bwa te Uea i nanon 1,000 te ririki. N te tai anne ao ngaia ma raona n tautaeka ake 144,000, a nang buokiia aomata n te aonnaba bwa a na rikirake ni kororaoi. N tokin te tai anne, e nang riki ni bwaretaiti te aonnaba, ao ni maekanaki irouia aomata aika kakabwaiaaki man ongeabaia n ana tua Iehova. E na kaoka ngkanne te tautaeka Iesu nakon Tamana ae Iehova. Ao n te tai anne e ‘nang katabuaki aran’ Iehova, n aron ae tuai n riiriki mai mwaina. (Mataio 6:9, 10) E nang teretere raoi ae Iehova bon te tia Tautaeka ae raoiroi ao e tabeakinia ana aomata. E nang kamauna ngkanne Tatan ma ana taimonio Iehova, ao aomata ake a rineia bwa a na karitei nakon Ana tautaeka. (Te Kaotioti 20:7-10) E na teimatoa n aki toki te kororaoi are e uotia Ana Tautaeka n Uea te Atua.
REIAKINA AE BATI RIKI
Nora bukina ngkai ti kona n onimakinna ae te Atua e na boni kabongana te Tautaeka n Uea, ni kakoroi iai nanoni berita aika n te Baibara ibukin taai aika a na roko.
4. E na kamaunai tautaeka n aomata Ana Tautaeka n Uea te Atua
‘A tautaeka aomata i aoia aomata, ni karekei rawawataia.’ (Te Minita 8:9) E na katoka te ribuaka Iehova rinanon ana Tautaeka n Uea.
Wareka Taniera 2:44 ao 2 I-Tetaronike 1:6-8, ao maroroakin titiraki aikai:
Tera ae e na karaoia Iehova ma Natina are Iesu, nakoia tautaeka n aomata ma aia taani boutoka?
Ngkai ko a tia n reiakina taekan Iehova ma Iesu, ko kangaa ni kakoauaa bwa e na bon eti ao n riai te bae a na karaoia?
5. Iesu bon te Uea ae tau
Ngkai te Uea Iesu n Ana Tautaeka n Uea te Atua, e na karaoi baika bati ibukini kakabwaiaaia ana aomata aika n te aonnaba. Kaota te TAAMNEI ao nora iai aron Iesu ni kaotia bwa iai nanona ni kani buokiia aomata, ao iai naba mwaakana mairoun te Atua ni karaoa anne.
Ni menan Iesu n te aonnaba, ao e kaotii baika e na kakororaoi te Tautaeka n Uea. Baikara mai buakoni kakabwaia aika karinanaki aikai, ae ko ingainga riki nako iai? Wareki kiibu aika kaotaki, aika kaineti ma kakabwaia akanne.
NI MENAN IESU N TE AONNABA AO E . . .
MAI KARAWA AO IESU E NA . . .
taua aron te ang ma te karau.—Mareko 4:36-41.
katoki kangaanga aika riiriki n ara otabwanin.—Itaia 35:1, 2.
kaamwarakeia nga ma nga n te aro ni kakai.—Mataio 14:17-21.
katoka te baki n te aonnaba.—Taian Areru 72:16.
katoki aoraki aika bati.—Ruka 18:35-43.
karekea te maiu ae kororaoi nakoia aomata nako.—Itaia 33:24.
kautiia maate.—Ruka 8:49-55.
kamauna matan te mate.—Te Kaotioti 21:3, 4.
6. E na uotii baika raraoi n taai aika a na roko Ana Tautaeka n Uea te Atua
E na kakororaoa raoi ana moani kantaninga Iehova ibukia aomata, te Tautaeka n Uea aei. A na maiu n aki toki n te aonnaba ae bwaretaiti. Kaota te TAAMNEI ao nora aron iai Iehova ni mwamwakuri rinanon Natina are Iesu, ni kakororaoa iai Ana kantaninga.
Wareka Taian Areru 145:16, ao maroroakina te titiraki aei:
Tera am namakin n ataakin ae Iehova e na boni “kabaneia aomata ma maan aika maiu, ni katoki nanoia ni baika a tangiri”?
A TAKU TABEMAN: “Ngkana ti uaia n ibuobuoki ti na boni kona ni katoki kangaanga n te aonnaba aei.”
Baikara kangaanga aika e na katoki Ana Tautaeka n Uea te Atua, ake a aki kona ni katoki tautaeka n aomata?
KAKIMOTOTOANA
E na boni koro bukin te baere e kantaningaia Ana Tautaeka n Uea te Atua. E na onika te aonnaba aei nakon te bwaretaiti ni kabutaa, ao e na maekanaki irouia aomata aika raoiroi aika a na taromauria Iehova n aki toki.
Kauring
E na kangaa Ana Tautaeka n Uea te Atua ni katabua aran Iehova?
Bukin tera bwa ti kona ni kakoauaa ae Ana Tautaeka n Uea te Atua, e na boni kakoroi bukini berita aika n te Baibara?
Mai buakoni baika e na kakororaoi te Tautaeka n Uea, tera ae ko ingainga riki nako iai?
NORI NABA AIKAI
Noria bwa tera ae nanonaki n Aremaketon.
Neneri baika a na riki n ana tai n uea Iesu ae 1000 te ririki ao n tokina.
“Tera ae na Riki n te Bongi ni Motikitaeka?” (Te Taua-n-Tantani, Okitobwa 1, 2012)
Nora aroia utu ni kona ni kananoi aia iango i aoni kakabwaia aika e na uotii te Tautaeka n Uea.
-