REIREI 11
Arom ni Kona ni Kakabwaiaaki Mani Warekan te Baibara
Ko a tia ni kani karaoa te bwai teuana ma ko iangoia bwa e kangaanga iroum? Tao ko karaoia moa teutana imwin teutana bwa e aonga n aki taraa ni kangaanga. Ai aron naba te wareware n te Baibara. Ko kona n titirakiniko ni kangai, ‘N na kangaa ni moana karaoana?’ N te reirei aei, ti na rinanoi bwaai tabeua aika bebete aika ko kona ni karaoi, bwa ko aonga ni kukurei n am wareware n te Baibara ao n am ukeuke n reirei iai.
1. E aera ngkai ti riai ni katoatai ni wareka te Baibara?
E na kakukurei ao n nakoraoi maiun te aomata ae katoatai ni wareka te Baibara, ke “ana tua Iehova.” (Wareka Taian Areru 1:1-3.) Moanna mani warekana ni katoabong i nanon tabeua te miniti. Ngkana ko a taneiai riki ma Ana Taeka te Atua, ane ko na kani wawarekia riki.
2. Ko na kangaa ni kakabwaiaaki mani warekan te Baibara?
Ngkana ti na kakabwaiaaki mani warekan te Baibara, ti riai n toki teuana ao n iangoa te baere ti warekia. Ti riai ni warekia ao ni ‘kananoa ara iango i aona.’ (Iotua 1:8, kbn) Ngkana ko wareware, titirakiniko aei: ‘Tera reireiau ibukin Iehova ae te Atua man te rongorongo aei? N na kangaa ni maiuakinna? N na kangaa ni kabonganai kiibu aikai ni buokiia iai tabemwaang?’
3. Ko na kangaa ni kamwawaa am tai ibukini warekan te Baibara?
E kangaanga iroum reken am tai ni wareka te Baibara? A bati i buakora aika e kangaanga anne irouia. Kataia ni kabonganai “raoi [am] tai ni kabane.” (I-Ebeto 5:16) Ko kona ni karaoa aei n arom ni kaokoroa am tai teuana ibukini warekan te Baibara ni katoabong. Tabeman a wareka te Baibara n te karangaina. Tabeman a rineia bwa a na warekia imwina riki n te bong anne, tao n aia tai ni katawanou. Ao tabeman a wareka te Baibara imwaini matuia n te tairiki. N ningai te tai ae angaraoi iroum?
REIAKINA AE BATI RIKI
Reiakina arom n unga riki ni warekan te Baibara. Nora arom ni katauraoi raoi bwa ko aonga ni kakabwaiaaki n am reirei n te Baibara.
N aron ae ti kona ni karikirakea tangiran amwarake aika kaokoro, ti kona naba ni karikirakea tangiran wawarekan te Baibara
4. Reiakina arom n unga ni warekan te Baibara
E kona n aki bebete moanakin te wareware n te Baibara. Ma ti kona ni “bwarua” karaoana, n aron ae e kona temanna ni karikirakea tangiran te amwarake ae boou irouna. Wareka 1 Betero 2:2, ao maroroakina te titiraki aei:
Iroum, e kona n riki warekan te Baibara ni katoabong, bwa te bwai ae ko unga iai ao n ingainga ni karaoia?
Kaota te TAAMNEI n nora iai aroia tabeman ni moana warekan te Baibara. Imwina, maroroakin titiraki aikai.
N aron ae oti n te taamnei, baikara kangaanga aika a aitara ma ngaai rooro n rikirake?
Tera ae e buokiia bwa a na teimatoa ni wareka te Baibara?
A kangaa ni karaoa aia wareware n te Baibara bwa e na kaunga riki?
Aanga aika a na buokiko ni moana karaoana:
Rinea te Baibara ae eti kanoana ao ni kai ota te aba iai. Kataa te Te Baibara ae Tabu—te Rairai ae te Aonnaba ae Boou ngkana e tauraoi n am taetae.
Wareki moa mwakoro ake e anaaki riki iai nanom. Nora te taibora ae “Moana Warekan te Baibara.”
Korea te bae ko a tia ni warekia. Kabongana te taibora ae “Taua Mwin Am Wareware n te Baibara” ae n te boki aei.
Kamanena te JW Library® app. Ko kona ni wareka iai te Baibara ao n ongora iai man te tareboon ke bwaai riki tabeua, n aki ongeia bwa ko mena ia.
Kamanenai taiani bukinibaa ake n te Te Baibara ae Tabu—te Rairai ae te Aonnaba ae Boou. Iai naba taiani mwabe, taibora, ao nanon taeka aika kona ni kaungaa riki am wareware n te Baibara.
5. Katauraoi imwain am reirei n te Baibara
Wareka Taian Areru 119:34, ao maroroakina te titiraki aei:
E aera ngkai e raoiroi bwa ko na tataro moa imwain am wareware n te Baibara ke imwain am katauraoi ibukin am reirei n te Baibara?
Ko na kangaa ni kakabwaiaaki man am reirei? Ngkana ko katauraoa kanoan te reirei aei, kataa aei:
Wareki moani barakirabe n te reirei aei.
Nori ao wareki kiibu, ao kataia n ota bwa tera irekerekeia ma te reirei.
Mwaakeni taeka aika kakawaki ke kibuntaeka aika a na kaekai titiraki. E na buokiko aei ngkana ko a rinanon te reirei ma am tia reirei.
Ko ataia?
A kakabonganai Baibara aika kakaokoro Ana Tia Kakoaua Iehova. Ma ti rangi ni kakaitau riki n Te Baibara ae Tabu-te Rairai ae te Aonnaba ae Boou ibukina bwa e eti raoi kanoana, e mataata, ao e kamanena aran te Atua.—Nora te kaongora aei n jw.org “Iai Oin Aia Baibara Ana Tia Kakoaua Iehova?”
A TAKU TABEMAN: “E rangi ni kangaanga reiakinan te Baibara. I rangi n tabetabe ao e kakua reiakinana.”
Tera ngkoe am iango?
KAKIMOTOTOANA
Ibukini karekeani kakabwaiaam n te Baibara, bairea am tai ni warekia, tataro ibukini buokam n ota n te bae ko warekia, ao katauraoi imwain am reirei n te Baibara.
Kauring
Tera ae e na buokiko ni karekea kakabwaiaam n te Baibara?
N ningai te tai ae ko kona ni wareka iai te Baibara ao n reiakinna?
E aera ngkai e raoiroi te katauraoi imwain am reirei n te Baibara?
NORI NABA AIKAI
Kauringi baika a kona ni buokiko ni kakabwaiaaki n am wareware n te Baibara.
“Arom ni Kakabwaiaaki Riki Mani Warekan te Baibara” (Te Taua-n-Tantani Na. 1 2017)
Reiakin aanga aika tenua ibukini warekan te Baibara.
“E Kangaa te Baibara ni Buokai?—Mwakoro 1: Ukeuke n Reirei n Am Baibara” (Te kaongora n jw.org)
Reiakina arom n unga ni warekan te Baibara.
Karekea buokam irouia naake a a maan ni wawareka te Baibara.