REIREI 12
Tera ae E na Buokiko Bwa Ko na Teimatoa n Reiakina te Baibara?
Bon te kakabwaia reiakinan te Baibara, ma e bon aki bebete anne n taai nako. Ko bae n iangoia n tabetai bwa ko na teimatoa n reiakina te Baibara ke ko na aki. E aera ngkai e manena am kakorakora ni kateimatoa karaoan anne? Tera ae kona ni buokiko bwa ko na botumwaaka n reiakina te Baibara n aki ongei kangaanga?
1. E aera bwa e manena reiakinan te Baibara?
“E maiu ana taeka te Atua ao e mwaaka.” (Ebera 4:12) E manena te Baibara ibukina bwa e kaotii ana iango te Atua ao ana namakin ibukim. E aki tii buokiko ni karekea te atatai, ma bon te wanawana ni koaua naba ao te kantaninga ae raoiroi. Ao ae kakawaki riki, e buokiko te Baibara bwa ko na riki bwa raoraon Iehova. Ngkana ko reiakina te Baibara, ko a kariaia iai mwaakana bwa e na kanakoraoa riki maium.
2. E aera bwa e kakawaki bwa ti na ataa manenan te koaua man te Baibara?
Taiani koaua aika n te Baibara kaanga ai aroni baika kakawaki. Anne bukina ae e kaungaira iai te Baibara ni kangai: “Kabooa te koaua ao tai kaboonakoa.” (Taeka N Rabakau 23:23) Ngkana ti ururinga manenan te koaua man te Baibara, ti na boni kakorakoraira n teimatoa n reiakinna, e ngae naba ngkana ti aitara ma bwaai n tutuki.—Wareka Taeka N Rabakau 2:4, 5.
3. E na kangaa Iehova ni buokiko bwa ko na teimatoa n reirei?
E kani buokiko Iehova n reiakina taekana, kioina ngkai bon am tia Karikiriki ae moan te mwaaka ao Raoraom. E kona ni ‘karekea i nanom kani mwakuriana.’ (Wareka I-Biribi 2:13.) Ngaia are e kona ni buokiko ngkana ko kainnanoa kaungaam ibukin am reirei ke maiuakinan te baere ko reiakinna. E kona n anganiko te korakora ae ko kainnanoia bwa ko aonga n tokanikai i aoni bwaai n tutuki ke taiani kakaaitara. Katoatai butiia Iehova n te tataro bwa e na buokiko n teimatoa n reiakina te Baibara.—1 Tetaronike 5:17.
REIAKINA AE BATI RIKI
Reiakina arom ni kona n teimatoa n reirei n te Baibara n aki ongea ribwan am tai, ke te kakaaitara mairouia tabemwaang. Ao nora aron Iehova ni kona ni buokiko bwa ko na botumwaaka n reirei.
4. Moanibwaia am reirei n te Baibara
N tabetai ao ti rangi n tabetabe n te aro are ti a iangoia bwa e a aki tau ara tai n reiakina te Baibara. Tera ae kona n ibuobuoki? Wareka I-Biribi 1:10, ao maroroakin titiraki aikai:
N am iango, baikara “bwaai aika kakawaki riki” n te maiu aei?
Ko na kangaa ni moanibwaia am reirei n te Baibara?
Ngkana ko kanoaa moa te bwaketi n te tano ao imwina atibu, ane a na aki bane n rin atibu
Ngkana ko karin moa atibu ao imwina te tano, e na mwaiti riki te tano ae kona n rin. N aron anne, ngkana ko moanibwai moa “bwaai aika kakawaki riki” ni maium, ane ko na kona ni karaoi ni kabane ao e na reke naba am tai ibukini bwaai riki ake tabeua
A reke kainnanora n taamnei man reiakinan te Baibara, ae kainnanoan ataakin ao taromaurian te Atua. Wareka Mataio 5:3, ao maroroakina te titiraki aei:
Ti kangaa ni kakabwaiaaki mani moanibwaian ara reirei n te Baibara?
5. Botumwaaka i aan te kakaaitara
N tabetai ao a kona ni kabwaraa nanom tabemwaang man reiakinan te Baibara. Nora ana katoto Francesco. Kaota te TAAMNEI, ao maroroakin titiraki aikai.
N aron ae oti n te taamnei, tera aroia raoraon ao ana utu Francesco ngke e tuangia te baere e reiakinna?
E kangaa ni kakabwaiaaki ibukini botumwaakana?
Wareka 2 Timoteo 2:24, 25, ao maroroakin titiraki aikai:
Tera aia namakin am utu ao raoraom n te bae ko a reiakinna?
Ni kaineti ma kiibu aikai, tera arom ae riai ngkana e aki kukurei temanna ngkai ko reiakina te Baibara? Bukin tera?
6. Onimakina Iehova bwa e na buokiko
Ngkai ti a kaaniaki riki ma Iehova, ti a kani kakukureia riki. Ma e boni kona ni kangaanga naba karaoani bitaki ni maiura bwa ti aonga ni maiuakina ae boraoi ma nanona. Ngkana ko a tia n nanamakina anne, ao tai kabwaraa nanom. E na boni buokiko Iehova. Kaota te TAAMNEI, ao maroroakin titiraki aikai.
N aron ae oti n te taamnei, baikara bitaki ake e karaoi Jim ibukini kakukureian Iehova?
Tera ana katoto ae anaaki iai nanom?
Wareka Ebera 11:6, ao maroroakin titiraki aikai:
Tera ae e na karaoia Iehova nakoia naake a “ingainga n ukoukoria” ae taekaia naake a kakorakoraia ni kinaa raoi ao ni kakukureia?
Tera reireiam n aei ni kaineti ma ana namakin Iehova ngkana e nora am kakorakora n reiakina te Baibara?
E KONA NI KANGAI TEMANNA: “E aera ngkai ko reiakina te Baibara?”
Tera ngkoe am kaeka?
KAKIMOTOTOANA
E ngae ngke e aki bebete n taai nako reiakinan te Baibara, ma e kona ni buokiko bwa ko na kukurei n aki toki. Teimatoa n onimakina Iehova, ao e na boni kakabwaiako.
Kauring
E aera ngkai a rangi ni kakawaki iroum koaua man te Baibara?
Ko na kangaa “ni koaua raoi bwa baikara bwaai aika kakawaki riki”?
E aera ngkai ko riai ni butiia Iehova bwa e na buokiko n teimatoa n reiakina te Baibara?
NORI NABA AIKAI
Iangoi aanga aika aua ake a buokaki iai aomata aika bati bwa a na kamanena raoi aia tai.
“How to Invest Your Time Wisely” (Te Taratara!, Beberuare 2014)
Nora aron Iehova ni buoka te aine temanna are e aki ota buuna ngke e kataia ni kakukureia te Atua neiei.
Nora aron te mwaane temanna ni kakabwaiaaki mani botumwaakani buuna.
A bukinaki Ana Tia Kakoaua Iehova n tabetai bwa a urui utu. Ma e koaua anne?
“A Urui Utu Ana Tia Kakoaua Iehova ke A Kateimatoai?” (Te kaongora n jw.org)