Antai te Atua?

Ni moa mani karikaia aomata, ao a mwaiti atuaia aika a tataromauri. Ma te Baibara e taekinna bwa tii temanna te Atua ae “kakannato riki . . . nakoia atua ni kabane.” (2 Rongorongo 2:5) Antai te Atua anne? Ao tera ae karikia bwa e na kakannato riki nakoia atua nako aika tataromauriaki irouia aomata? N te reirei aei, ko na reiakina iai te bae tangiria te Atua bwa ko na ataia ibukina.

1. Antai aran te Atua, ao ti kangaa ni kakoauaa ae e tangirira bwa ti na ataa arana?

E kaotia nakoira te Atua rinanon te Baibara. E taku: “Bon Iehova ngai. Bon aei arau.” (Wareka Itaia 42:5, 8.) “Iehova” bon rairan te ara n Ebera ae nanona “E Karaoia Bwa E na Riki.” E tangirira Iehova bwa ti na ataa arana. (Te Otinako 3:15) Ti na kangaa ni kakoauaa anne? E kaota arana n te Baibara 7,000 tabun te tai!a Te ara ae Iehova bon aran “te Atua ae koaua i karawa i eta ao n te aonnaba i nano.”​—Te Tua-Kaua 4:39.

2. Tera ae kaotaki n te Baibara ibukin Iehova?

E taekinaki n te Baibara bwa a mwaiti atua aika taromauriaki irouia aomata, ma bon tii Iehova te Atua ae koaua. Bukin tera? Iai bukina tabeua. E mwaaka i aoni bwaai ni kabane, ao bon tii ngaia “Teuare Moan te Rietata n te aonnaba ni kabutaa.” (Wareka Taian Areru 83:18.) “Moan te Mwaaka” ngaia, ae nanona bwa iai mwaakana ni karaoa te bae kani karaoia. E “karikii bwaai ni kabane” n aron te iuniweeti ao baika maiu ni kabane aika n te aonnaba. (Te Kaotioti 4:​8, 11) E kaokoro Iehova bwa e a kaman iai ngaia, ao e na teimatoa n aki toki.​—Taian Areru 90:2.

3. A bati nakoan te Atua, ma tii teuana arana

Ibukin ataakin te kaokoro i marenan nakoan te aomata ma arana, kaota te TAAMNEI, ao maroroakina te titiraki aei.

TAAMNEI: A Bati Nakoana, ma Tii Teuana Arana (0:41)

• Tera kaokoron te nakoa n aron “te Uea,” ao te ara?

E taekinaki n te Baibara bwa a taromauri atua ao ueea aika bati aomata. Wareka Taian Areru 136:1-3, ao maroroakina te titiraki aei:

• Antai “te Atua ae rietata riki nakoia atua” ao “aia Uea ueea”?

4. E tangiriko Iehova bwa ko na ataa arana ao ni kamanena

TAAMNEI: Iai Aran te Atua?​—Mwakorona (3:​11)

• N am iango, e tangiria Iehova bwa e na ataaki arana? Bukin tera?

E tangiriia aomata Iehova bwa a na kamanena arana. Wareka I-Rom 10:​13, ao maroroakin titiraki aikai:

• E aera bwa e kakawaki kamanenaan aran te Atua ae Iehova?

• Tera am namakin ngkana e ururinga aram temanna, ao e kakamanena?

• N am iango, tera ana namakin Iehova ngkana ko kamanena arana?

5. E tangiriko Iehova bwa ko na kaan riki ma ngaia

TAAMNEI: I Ukoukora te Atua ae Koaua (8:​18)

• N aron ae oti n te taamnei aei, e kangaa n rotaki Soten man ataakin aran te Atua?

Imwain ae ko riki bwa raoraon temanna, ko riai moa n ataa arana. Wareka Iakobo 4:8a, ao maroroakin titiraki aikai:

• Tera ae kaungako iai Iehova bwa ko na karaoia?

• E kangaa ataakin aran te Atua ao kamanenaana ni buokiko bwa ko na kaan riki ma ngaia?

KAKIMOTOTOANA

Iehova bon aran te Atua ae tii temanna ae koaua. E tangirira bwa ti na ataa arana ao ni kamanena, bwa ti aonga ni kaaniaki riki ma ngaia.

Te Kauring

• E kangaa Iehova ni kaokoro ma atua nako aika tataromauriaki irouia aomata?

• Bukin tera ngkai ti riai ni kamanena aran te Atua?

• Ko kangaa n ataia ae e tangiriko Iehova bwa ko na kaania?

NORI NABA AIKAI

Nori bukina aika nimaua ae ti kakoauaa iai bwa bon iai te Atua.

“Iai te Atua?” (Te Kaongora n jw.org)

Noria bwa e aera ngkai ti bon riai ni kakoauaa ae bon iai te Atua.

“Antai ae Karika te Atua?” (Te Taua-n-Tantani, Aokati 1, 2014)

Noria bwa e aera ngkai ti riai ni kamanena aran te Atua, e ngae ngke ti aki ataa aroni katiribwarean arana n te moan taetae are koreaki iai.

“Antai Iehova?” (Te kaongora n jw.org)

E kakawaki wetean te Atua n arana? Noria bwa e aera ngkai ti kona n taekinna bwa bon tii teuana arana.

“Iraua aran te Atua?” (Te kaongora n jw.org)