REIREI 22
Ko na Kangaa n Tibwaa te Rongorongo ae Raoiroi?
Ngkai ko a reiakin koaua man te Baibara, ko bae n iango ni kangai, ‘A riai n ataa aei aomata nako!’ Eng, a bon riai n ataa anne aomata nako! Ma e kona n nako nanom n tibwaa te baere ko reiakinna nakoia tabemwaang. Ti na maroroakinna bwa ko na kangaa n tokanikai i aon te nakonnano ao ni moana tibwaan te rongorongo ae raoiroi man te Baibara ma te kukurei.
1. Ko na kangaa n tibwaa te baere ko reiakinna nakoia naake ko kinaia?
A taku taan rimwin Iesu: “Ti aki kona . . . ni katoka tataekinani baike ti nori ma n ongo.” (Mwakuri 4:20) E rangi ni kakawaki te koaua irouia n te aro are a kan tibwaia nakoia aomata aika bati ake a kona n reke irouia. Ko namakina naba anne? Ngkana eng, ukeri aanga ake ko kona n tuangia iai am utu ao raoraom te baere ko reiakinna.—Wareka I-Korote 4:6.
Aanga tabeua ibukini moanakina
Ngkana ko maroro ma am utu, kaota te reirei teuana man te Baibara n arom ni kangai: “I reiakina te bae rangi ni kakaongora n te wiki aei.”
Tibwaa te kibu teuana ae kaungaunga nakon raoraom ae aoraki ke ae tabeaianga.
Tuangia raom ni mwakuri ake a kan ongora bwa tera ae ko karaoia n te wiki aei, te bae ko reiakinna n am reirei n te Baibara ke n te botaki n taromauri.
Kaota ara atureti n te intanete ae jw.org nakoia raoraom.
Kaoia tabemwaang bwa a na raoniko n am reirei n te Baibara, ke kaota nakoia aroia ni bubutii reireia n te Baibara n te intanete n jw.org.
2. E aera ngkai bon te tia ae kakawaki te uarongorongo ma kaain te ekaretia?
E bati riki are a karaoia taan rimwin Iesu irarikin tibwaakin te rongorongo ae raoiroi nakoia naake a kinaia. “E kanakoia [Iesu] ni kakauomania bwa a na rimoana nakoni kaawa nako” bwa a na uarongorongo. (Ruka 10:1) Mani bairean raoi te mwakuri n uarongorongo aei, a a bati riki aomata aika karekea te rongorongo ae raoiroi. A rangi ni kimwareirei taan rimwin Iesu ngke a uaia n uarongorongo. (Ruka 10:17) Ko kona naba ni katea tiam ae te uarongorongo ma kaain te ekaretia?
REIAKINA AE BATI RIKI
Reiakina arom n tokanikai i aon te nakonnano ao karekea te kimwareirei ae reke man tibwaakin te rongorongo ae raoiroi.
3. E na bon raoniko Iehova
A kona n nako nanoia tabeman ake a kan uarongorongo, bwa e na tera aroia ni karaoia ke aroia aomata nakoia.
E nako nanom n tibwaan te baere ko a tia n reiakinna? Bukin tera?
Kaota te TAAMNEI, ao maroroakina te titiraki aei.
A kangaa rooro n rikirake aikai n tokanikai i aoni maakuia?
Wareka Itaia 41:10, ao maroroakina te titiraki aei:
Ngkana ko maaku n uarongorongo, e na kangaa ni buokiko te tataro?
Ko ataia?
A bati Ana Tia Kakoaua Iehova ake a iangoia ngkoa bwa a aki kona n tibwaa te rongorongo ae raoiroi ma tabemwaang. N te katoto, e namakinna Sergey bwa akea bongana ao e kangaanga irouna kataetaeaia aomata. Ma imwina riki ao e a reiakina te Baibara. E taku teuaei: “N aki ongea maakuu, ma I a kona ni maroroakina te bae I reiakinna ma tabemwaang. Ma I rangi ni mimi, bwa man tibwaakini kanoan te Baibara I a kona riki n onimakinai i bon irou. E a korakora naba au onimaki ni koaua aikai.”
4. Bwaina te karinerine
Ngkana ko tibwaa te rongorongo ae raoiroi, tai tii iangoa te bae ko na taekinna, ma iangoa naba arom n taekinna. Wareka 2 Timoteo 2:24 ao 1 Betero 3:15, ao maroroakin titiraki aikai:
Ko na kangaa ni maiuakini kiibu aikai ngkana ko maroroakina taekan te Baibara nakoia tabemwaang?
A na bae n aki boraoi n iango ma ngkoe am utu tabeman ke raoraom. Tera ae ko na karaoia? Tera te bae ko aki riai ni karaoia?
E aera ngkai e raoiroi riki tabekan titiraki aika a na kammwakura te iango, nakon tuangakia aomata te bae a riai ni kakoauaa?
5. E karekea te kimwareirei tibwaakin te rongorongo ae raoiroi
E mwiokoa Iesu Iehova n te mwakuri ae tibwaakin te rongorongo ae raoiroi. Tera aron Iesu n iangoa te mwakuri aei? Wareka Ioane 4:34, ao maroroakin titiraki aikai:
Kanakin amwarake aika raoiroi a kateimatoa maiura ao a kakukureira. E aera Iesu ngke e kabotaua karaoan nanon te Atua, ae nanonaki naba iai tibwaakin te rongorongo ae raoiroi, ma kanakin te amwarake?
N am iango, e na tera aron te kimwareirei ae reke man tibwaakin te rongorongo ae raoiroi?
Aanga n ibuobuoki
N tain te botaki n taromauri i nanon te wiki, nori aanga aika ko kona ni moana iai te maroro.
Tuanga am tia reirei bwa ko na kangaa n riki bwa kaain te kuura n te taromauri i nanon te wiki. E kona ni buokiko mwiokoam n te kuura, ni katauraoiko nakon tibwaakin te bae ko reiakinna nakoia tabemwaang.
Kamanenai itera aika “A Taku Tabeman” ke “E Kona ni Kangai Temanna” n te boki aei, ni kataneiako iai ni kaekai titiraki aika kabuta ao totoko.
E KONA NI KANGAI TEMANNA: “Tera ae ko a kakaraoia ngkai?”
E na tera am kaeka ae e na reke iai angam ni kaota te bae ko reiakinna n am reirei n te Baibara?
KAKIMOTOTOANA
E karekea te kimwareirei tibwaakin te rongorongo ae raoiroi ma tabemwaang, ao e boni bebete aroni karaoana.
Kauring
E aera bwa ko na tibwaa te rongorongo ae raoiroi nakoia tabemwaang?
Ko na kangaa ni karaoa anne n te aro ae karinerine?
Ko na kangaa n tokanikai i aon te nakonnano ae kona n riki man te uarongorongo?
NORI NABA AIKAI
Iangoi aanga aika aua aika ko kona iai n tibwaa te rongorongo ae raoiroi ni kamanenaani beeban ara atureti ae jw.org.
Reiakin aanga aika aua aika kona ni buokiko n tibwaa te rongorongo ae raoiroi.
“Ko a Tauraoi n Riki Bwa te Tia Akawa ae Konam Aomata?” (Te Taua-n-Tantani, Tebetembwa 2020)
Nora aron te katoto man te Baibara ae kona ni kakorakoraira n tibwaa te rongorongo ae raoiroi, e ngae ngke ti uarereke.
Nora arom ni kona ni maroroakina taekan te Baibara ma kaain am utu tabeman aika a tuai n reiakina taekan Iehova.
“Arora n Rotii Nanoia Ara Koraki Aika Tiaki kaain te Onimaki” (Te Taua-n-Tantani, Maati 15, 2014)