REIREI 44
E Kukurei te Atua ni Bukamaru ni Kabane?
E tangirira Iehova bwa ti na kukurei ni maiura ao ni karaoi naba bukamaru n taai tabetai. Ma e kukurei ni bukamaru ao ni boong ni motirawa ni kabane? Ti na kangaa ni kaotia bwa ti tangira Iehova n aei?
1. E aera ngkai a bati bukamaru aika e aki kukurei iai Iehova?
Ko bae ni mimi n reiakinan ae a bati bukamaru aika aki boraoi ma ana reirei te Baibara ke a moan riki mairouia beekan. A bae n irekereke bukamaru akanne ma te Aro ae kewe. A bae n irekereke naba ma te tabunea ke ni boto i aon te iango are e teimatoa ni maiu taamnein te aomata. Tabeua bukamaru a boto i aoni maakakia taimonio ke te koaua ibukin te tetekeraoi. (Itaia 65:11) E kauringia Iehova taan taromauria ni kangai: “Kaokoroingkami, ao katoka ringakin te bwai ae kamwara.”—2 I-Korinto 6:17.a
2. Tera ana namakin Iehova ni kaineti ma bukamaru aika kaotaki iai karineaia aomata?
E kauringira Iehova bwa ti na aki bwaka n te bwai ni kamwane ae ‘onimakinaia aomata.’ (Wareka Ieremia 17:5.) Tabeua boong ni motirawa a karineaki iai taani kairiri ke tautia. Tabeua a bukamaruaki iai ana kainaomata te aba ke banna aika tei ibukin te aba n aron te buraeki. (1 Ioane 5:21) Ao ake tabeua a boutokaa te bwaatei ke botaki riki tabeua. Tera ana namakin Iehova ngkana ti karinea temanna ke te botaki teuana, moarara riki ae e boutokai iango aika aki boraoi ma Ana kantaninga?
3. Tera te aroaro ae kona ni karika aki butimwaean te bukamaru?
E kabuakakaa te Baibara “te moi manging n te aro ae riao, botaki aika akea te taubaang iai, [ao] te kaboo n te moi manging.” (1 Betero 4:3) E oti ni bukamaru tabeua te aki taubaang ao aroaro aika kammaira. Ngkana ti kan teimatoa n riki bwa raoraon Iehova, ti riai ni kararoaira man aeka n aroaro aika aki itiaki akanne.
REIAKINA AE BATI RIKI
Noria bwa ko na kangaa ni kakukureia Iehova ni karaoani motinnano aika raraoi ibukini boong ni motirawa ao bukamaru.
4. Rarawa nakoni bukamaru aika aki karinea Iehova
Wareka I-Ebeto 5:10, ao maroroakin titiraki aikai:
Tera ae ti riai n ataia raoi imwain ae ti motinnanoia bwa ti na bukamarua te bong ni motirawa teuana ke ti na aki?
Baikara boong ni motirawa aika taabangaki n am tabo?
N am iango, e kukurei Iehova ni boong ni motirawa akanne?
N te katoto, ko a tia n iaiangoia bwa tera ana iango te Atua ibukini bukamaruan te rekenibong? E aki taekinaki n te Baibara bwa e bukamarua te rekenibong te tia taromauria Iehova, ma e tii taekin rekenibong aika uoua aika bukamaruaki irouia aomata aika aki beku Irouna. Wareka Karikani Bwaai 40:20-22 ao Mataio 14:6-10. Ao maroroakin titiraki aikai:
Tera te bwai ae riki ni bukamaruan rekenibong akanne?
Ni kaineti ma rongorongo man te Baibara aikai, tera ana namakin Iehova ni kaineti ma rekenibong?
Ma ko bae ni kangai, ‘E tabe naba Iehova irou ngkana I ira te rekenibong ke bukamaru riki tabeua aika aki boraoi ma te Baibara?’ Wareka Te Otinako 32:1-8. Imwina kaota te TAAMNEI ao maroroakin titiraki aikai.
E aera bwa ti riai n taraa raoi te bwai teuana bwa e na kakukureia Iehova?
Ti na kangaa ni karaoa anne?
Aron Ataakini bukamaru aika e aki kukurei iai te Atua
A boto i aon reirei aika aki boraoi ma te Baibara? Ibukin ataakina, ukeria bwa e nako raoi mai ia.
E anga karineaia aomata, botaki, ke katotoni baika a tei ibukin te aba? Ti karinea Iehova nakoni bwaai ni kabane ao ti onimakinna bwa e na katoki kangaanga n te aonnaba.
A kaaitarai ana kaetieti te Baibara katei ao mwakuri ake iai? Ti riai ni kateimatoa itiakin aroaroni maiura.
5. Buokiia aomata bwa a na karinea am koaua
E kona ni kangaanga bwa ko na rawa ngkana a kairoroiko tabeman bwa ko na iri bukamaru aika aki kakukureia Iehova. Kabwarabwaraa am motinnano ma te taotaonakinnano ao te akoi. Ibukin noran te katoto ni karaoan aei, kaota te TAAMNEI.
Wareka Mataio 7:12, ao maroroakin titiraki aikai:
Ni kaineti ma te kibu aei, e riai bwa ko na tuangia am utu aika tiaki kaain te onimaki bwa a na aki bukamarua te bong ni motirawa teuana?
Tera ae ko kona ni karaoia bwa a aonga n rau nanoia am utu, bwa e ngae ngke ko na aki ira aia bukamaru ma ko bon tangiriia ao a kakawaki iroum?
6. E tangirira Iehova bwa ti na kukurei
E tangirira Iehova bwa ti na karekea ara tai ni kukurei ma ara utu ao raoraora. Wareka Te Minita 8:15, ao maroroakina te titiraki aei:
E kangaa ni kaotaki n te kibu aei bwa e tangirira Iehova bwa ti na kukurei?
E tangiriia ana aomata Iehova bwa a na bane ni kukurei. Kaota te TAAMNEI n nora koauan aei n ara bwabwaro ibukin aaba aika kakaokoro.
Wareka I-Karatia 6:10, ao maroroakin titiraki aikai:
‘Kakaraoan ae raoiroi’ nakoia aomata, e nanonaki iai bwa ti riai ni bukamarui boong ni motirawa aika taabangaki?
Tera te mwakuri n anganga ae ko kukurei riki iai, are ko anga ibukina bwa te bong ni motirawa, ke are ko anga ibukina bwa ko boni kani karaoia?
A bati taani Kakoaua aika a kakaraoi baika okoro ibukia natiia n taai tabetai ao ni kakubanakoia naba ni bwaintangira. Ngkana iai natimi, baikara bwaai aika okoro aika ko kona ni karaoi ibukia?
A TAKU TABEMAN: “E aki kakawaki moan rikin te bong ni motirawa teuana. E tii kakawaki te tai n itamwaomwao ma am utu ao raoraom.”
Tera ngkoe am kaeka?
KAKIMOTOTOANA
E tangirira Iehova bwa ti na kukurei ma ara utu ao raoraora. Ma e tangirira naba bwa ti na rarawa nakoni bukamaru aika e aki kukurei iai.
Kauring
Baikara titiraki aika ti kona n tabeki bwa ti aonga n ataia bwa e kukurei Iehova n te bukamaru teuana ke e aki?
Ti na kangaa ni buokiia ara utu ao raoraora bwa a na ota n ara motinnano ni kaineti ma boong ni motirawa?
Ko kangaa n ataia bwa e tangirira Iehova bwa ti na kukurei?
NORI NABA AIKAI
Nori boong ni motirawa tabeua aika aki bukamaruia Kristian.
Nori bukina aika aua ngkai ti kakoauaa ae e aki kukurei te Atua ni bukamaruan te rekenibong.
“Bukin Tera Bwa A Aki Bukamarua te Rekenibong Ana Tia Kakoaua Iehova?” (Te kaongora n jw.org)
Nora aron te roro n rikirake ni bwaina te akoi ngke e bwainingareaki n te reirei ibukin ana koaua i aon te Kiritimati.
a Nora Kabwarabwaraana 5 bwa tera ae ko na karaoia ngkana a bukamaruaki boong ni motirawa akanne.