REIREI 36
Bwabwaina te Koaua ni Bwaai ni Kabane
A bane aomata n tangira raoraoia aika bwabwaina te koaua. E kantaningaia raoraona Iehova bwa a na bwabwaina naba te koaua. Ma e kangaanga reken aei n te aonnaba ae a bati aomata iai aika babakanikawai. Baikara kakabwaia ni bwabwainan te koaua ni bwaai ni kabane?
1. Tera bukina ae rangi ni kakawaki ae ti riai iai ni bwabwaina te koaua?
Ngkana ti bwabwaina te koaua nakoia aomata, ti kaotia nakon Iehova bwa ti tangiria ao ni karinea. Iangoa aei: E atai Iehova baika ti iaiangoi ao ti karaoi. (Ebera 4:13) E norira ngkana ti rineia bwa ti na bwabwaina te koaua, ao e kukurei iai. E kangai Ana Taeka: “E riribaa te aomata ae mwamwanaa te aba Iehova, ma e kaan Ana iraorao ma akana raoiroi.”—Taeka N Rabakau 3:32.
2. Baikara aanga tabeua aika ti kona ni bwabwaina iai te koaua ni katoabong?
E tangirira Iehova bwa ti na “tataekina te koaua i [marenara].” (Tekaria 8:16, 17) Tera nanon aei? Ti na aki kewe ke n taekina te rongorongo ae kewe nakoia ara utu, raora ni mwakuri, taari n te onimaki, ke mataniwi n te tautaeka. A aki iraei aia bwai tabemwaang aomata aika bwabwaina te koaua, ao a aki naba babakanikawaiia. (Wareka Taeka N Rabakau 24:28 ao I-Ebeto 4:28.) Ao a kakabwakai naba aia taekiti ni kabane. (I-Rom 13:5-7) Ti “bwabwaina te koaua ni bwaai ni kabane.”—Ebera 13:18.
3. Baikara kakabwaia ni bwabwainan te koaua?
A onimakinira tabemwaang ngkana ti ataaki ae ti bwabwaina te koaua. Ti boutokaa iai namakinan te mano raoi n te ekaretia, n aron te utu ae a tatangira kaaina. E itiaki naba mataniwin nanora iai. Bwabwainan naba te koaua iroura e “karekea kamoamoaan ana reirei ara tia Kamaiu ae te Atua,” ao ni katikiia naake tiaki kaain te ekaretia nakon te taromauri ae koaua.—Tito 2:10.
REIAKINA AE BATI RIKI
Nora ana namakin Iehova ngkana ti bwabwaina te koaua, arora ni kakabwaiaaki mai iai, ao reiakina arom ni bwabwaina te koaua n iterani maium aika kakaokoro.
4. E kakukureia Iehova bwabwainan te koaua
Wareka Taian Areru 44:21 ao Maraki 3:16, ao maroroakin titiraki aikai:
E aera ngkai ti aki riai n iangoia bwa ti kona ni karabaa te bwai teuana mairoun Iehova?
N am iango, tera ana namakin Iehova ngkana ti rineia bwa ti na taekina te koaua e ngae ngkana e kangaanga karaoana?
Ngkana a taekina te koaua ataei, a kakukureia aia karo. Ngkana ti taekina te koaua, ti kakukureia Iehova
5. Bwabwaina te koaua n taai nako
A bati aika kakoauaa bwa e aki manena n taai nako bwabwainan te koaua. Ma nora bukina ngkai ti riai ni bwabwaina te koaua n taai nako. Kaota te TAAMNEI.
Wareka Ebera 13:18, ao maroroakinna bwa ti na kangaa ni bwabwaina te koaua . . .
nakoia ara utu.
n te tabo ni mwakuri ke n te reirei.
n taai riki tabeua.
6. Ti kakabwaiaaki ni bwabwainan te koaua
E kona ni karekei kangaanga tabeua bwabwainan te koaua. Ma n tokin te tai, bon te bwai ae te kabanea n tamaroa ae ko kona ni karaoia. Wareka Taian Areru 34:12-16, ao maroroakina te titiraki aei:
E kangaa bwabwainan te koaua ni kanakoraoa riki maium?
Buumwaane ao buuaine aika bwabwaina te koaua a kakorakoraa riki aia mare
Taani mwakuri aika bwabwaina te koaua a karekea onimakinaia irouia aia tia kammwakuri
Kaain te aba aika bwabwaina te koaua a karekei taekaia ae raoiroi irouia kaain te tautaeka
A TAKU TABEMAN: “Akea buren te kewe ae uarereke.”
E aera ngkai ko kakoauaa bwa e bon ribai keewe ni kabane Iehova?
KAKIMOTOTOANA
E tangiriia raoraona Iehova bwa a na bwabwaina te koaua ni bwaai nako ake a taekin ao ni karaoi.
Kauring
Baikara aanga tabeua aika ti kona ni bwabwaina iai te koaua?
E aera ngkai ti aki riai n iangoia bwa ti kona ni karabaa te koaua?
E aera ngkai ko kani bwabwaina te koaua n taai nako?
NORI NABA AIKAI
A na kangaa kaaro n reireinia natiia bwa a na bwabwaina te koaua?
Baikara kakabwaia ngkana ti kakakoroi nanon ara berita?
Tera ae kaira te mwaane ae te tia babakanikawai bwa e na bita maiuna ao ni karaoi mwakuri ma te kakaonimaki?
“I a Ataia ae E Nanoanga Iehova ao ni Kabwarai Buure” (Te Taua-n-Tantani, Mei 1, 2015)