REIREI 48
Rineiia Raoraom ma te Wanawana
Ti kaai ni kukurei ma raoraora ni kaan n taai aika kakukurei, ao a kakorakoraira n taai aika karawawata. Ma e kauringira te Baibara bwa a aki bane aomata n riki bwa raao ni koaua. Ngaia are ko na kangaa n rineiia raoraom ni koaua? Iangoi titiraki aikai.
1. Tera rotakim irouia raoraom aika ko rineiia?
Ti kani kakatotongia aomata aika ti kakabanea ara tai ma ngaiia. Ti kona n rotaki irouia n te aro ae raoiroi ke ae buakaka, e ngae naba ngkana ti boni memena i rarikia ke ti rereitaki ma ngaiia n taabo n reitaki n te intanete. E kangai te Baibara: “Ane e nakonako ma akana wanawana ao e na wanawana, ma e na rotakibuaka ane e irekereke ma akana nanobaba [ae taekaia aika a aki tangira Iehova].” (Taeka N Rabakau 13:20) A kona ni buokiko raoraom aika tangira ao n taromauria Iehova, bwa ko na kaan riki ma Iehova ao ni karaoi motinnano aika raraoi. Ma raoraom ni kaan aika tiaki kaain te ekaretia, a kona ni katikikonako mairoun Iehova. Maroaka ae e kaungaira te Baibara bwa ti na rineia raoraora ma te wanawana! Ngkana a reke raoraora aika tangira te Atua, ti na bon uaia ni kakabwaiaaki ma ngaiia. Ti a kona iai n ‘teimatoa ni kaungaira i marenara ao ni kateimatoaira.’—1 I-Tetaronike 5:11.
2. Tera aron rotakin Iehova n arom n rineiia raoraom?
E rineiia raoi raoraona Iehova. “E kaan Ana iraorao ma akana raoiroi.” (Taeka N Rabakau 3:32) Tera ana namakin Iehova ngkana ti rineiia raoraora aika a aki tangiria? E na bon nanokawaki! (Wareka Iakobo 4:4.) Ma e na boni kukurei Iehova ao n rineira bwa raoraona ngkana ti rarawa nakon iraorao aika bubuaka, ao ni kaanira riki ma ngaia ao naake a tangiria.—Taian Areru 15:1-4.
REIAKINA AE BATI RIKI
Neneria bwa e aera ngkai e rangi ni kakawaki bwa ti na rineiia raoi raoraora, ao noria naba bwa ko na kangaa ni karekea am iraorao ae e na kanakoraoa riki maium.
3. Taratara raoi man iraorao aika bubuaka
Aomata aika aki tangira te Atua ma ana kaetieti bon iraorao aika bubuaka. Kaota te TAAMNEI, ao maroroakina te titiraki aei.
Ti na kaanga n rekenako n te iraorao ae buakaka n akea ataakina iroura?
Wareka 1 I-Korinto 15:33, ao maroroakin titiraki aikai:
Aekakira te aomata ae e aki riai n riki bwa raoraom? Bukin tera?
Wareka Taian Areru 119:63, ao maroroakina te titiraki aei:
Tera ae ko riai n tarataraia iroun te aomata ae e na riki bwa raoraom?
A kona ni buakaka aboro aika raraoi n tii teuana te aboro ae boka. E na tera rotakim n am iraorao ae buakaka?
4. A kona n riki bwa raoraora ni koaua aomata aika a kaokoro aroia ma ngaira
E karakinaki n te Baibara taekaia mwaane aika uoman i Iteraera ngkoa ae Tawita ma Ionatan. A rangi ni kaokoro roroia ao aroaroia, ma e rangi n tamaroa aia iraorao. Wareka 1 Tamuera 18:1, ao maroroakina te titiraki aei:
E aera ngkai ti aki riai n tii karekeia raoraora aika titeboo rorora ke aroarora ma ngaiia?
Wareka I-Rom 1:11, 12, ao maroroakina te titiraki aei:
A na kangaa ni kaungaia i marenaia, aomata aika raao ni koaua aika a tangira Iehova?
N te taamnei aei, nora aron te tari te mwaane ae te roro n rikirake ni karekeia raoraona n taabo aika e aki kantaningaia. Kaota te TAAMNEI, ao maroroakin titiraki aikai.
N aron ae oti n te taamnei aei, a aera ngkai a raraoma ana karo Akil irouia raoraona ake n te reirei?
Baikara bwaai ake a anaa nanona n te moantai bwa e na raoraonia?
E kangaa n tokanikai i aon namakinan ae tiku n tii ngaia?
5. Arora ni karikirakei ara iraorao aika raraoi
Iangoia bwa ti na kangaa ni karekeia raoraora ni koaua, ao ti na kangaa n riki bwa te rao ni koaua. Kaota te TAAMNEI.
Wareka Taeka N Rabakau 18:24 ao 27:17, ao maroroakin titiraki aikai:
A kangaa n ibuobuoki i marenaia raao ni koaua?
Iai raoraom ae aekakin anne? Ngkana akea, ko na kangaa ni karekeia tabeman aika aekakin anne?
Wareka I-Biribi 2:4, ao maroroakina te titiraki aei:
Ngkana ko kani karekeia raoraom ni koaua, ko riai moa n riki bwa te rao ni koaua. Ko na kangaa ni karaoa anne?
Ngkana ko kani karekeia raoraom ni koaua, ko riai n riki moa bwa te rao ni koaua
A TAKU TABEMAN: “E raoiroi riki ae reke raoraom nakon ae bon akea.”
Tera ngkoe am kaeka?
KAKIMOTOTOANA
Ngkana ti rineia raoraora ma te wanawana, ti a kakukureia iai Iehova ao ti boni buokaki naba iai.
Kauring
E aera ngkai e rangi ni kakawaki iroun Iehova arora n rineiia raoraora?
Aekakira aomata aika ti riai n aki raoraonia?
Ko na kangaa ni kakorakoraa riki am iraorao ma aomata aika raoiroi?
NORI NABA AIKAI
Noria bwa a kangaa raoraora ni koaua ni buokira n taai ake ti kataaki iai.
“Kakorakoraa Reitakim ae Kaan Imwain Rokon te Toki” (Te Taua-n-Tantani, Nobembwa 2019)
Tera ae ko riai n ataia ni kaineti ma karekeaia raoraom n taabo n reitaki n te intanete?
N te rongorongo ae “E Kan Reke Tamau,” nora iai aron temanna te mwaane n rineiia raoi raoraona.
“E Bitii Maiuia Aomata te Baibara” (Te Taua-n-Tantani, Eberi 1, 2012)