REIREI 55
Boutokaa Am Ekaretia
Ni katobibia te aonnaba ao mirion ma mirion aomata aika a kukurei n taromauria Iehova n ekaretia aika nga ma nga. A kakaitau ibukin te kaetieti ao te kairiri ae a karekei ao a ingainga ni boutokaa te ekaretia n aanga aika bati. Anne naba ae ko namakinna ibukin am ekaretia?
1. Baikara aanga tabeua aika ko kona ni kamanena iai am tai ao korakoram ni boutokaa te ekaretia?
Ngaira ni kabane ti kona ni buoka te ekaretia. N te katoto, iai n am ekaretia aika kara ke n aoraki? Ko kona ni buokiia ni karokoia ni bobotaki? Ke ko kona ni buokiia ni bwaai riki tabeua n aron te boobwai ke karaoani mwakuri n te auti? (Wareka Iakobo 1:27.) Ti kona naba n anga nanora ni buoka kaitiakan ao kateimatoaan ara Tabo n Taromauri. Akea ae kairoroira bwa ti na karaoi baikai. Ti kairaki n tangiran te Atua ao tangiraia tarira bwa ti na “kukurei n anga [ngaira].”—Taian Areru 110:3.
A kona taani Kakoaua aika bwabetitoaki ni boutokaa te ekaretia n aanga riki tabeua. A kona taari mwaane aika tau ao n ikawai n te onimaki, ni beku bwa tabonibai ao imwina riki bwa unimwaane. A kona taari mwaane ao aine ni boutokaa te mwakuri n uarongorongo n aroia ni beku bwa bwaiania. A kona n ibuobuoki tabeman taani Kakoaua ni katean taabo n taromauri ke ni mwaing nakon te tabo ae kainnanoa iai te ibuobuoki te ekaretia teuana n aanga riki tabeua.
2. Ti na kangaa ni kamanenai kaubwaira ni boutokaa iai te ekaretia?
Ti kona ni “karinea Iehova n [ara] bwai aika kakawaki.” (Taeka N Rabakau 3:9) Ti kukurei ngkana ti anga ara mwane ke bwaai riki tabeua bwa ara bwaintangira ni boutokaa te ekaretia ao te mwakuri n uarongorongo ni katobibia te aonnaba. (Wareka 2 I-Korinto 9:7.) A kamanenaaki naba ara bwaintangira ibukini boutokaan te mwakuri n ibuobuoki n tain te kabuanibwai. A bati aika a iangoia bwa a na ‘kaokoroa aia bwai teuana’ bwa aia bwaintangira. (Wareka 1 I-Korinto 16:2.) Ti kona n anga ara bwaintangira ni bwaoki ake a katauraoaki n ara tabo n taromauri ke n nakon donate.jw.org n te intanete. E katauraoa Iehova te anga ae ti kona iai ni kaota tangirana iroura man arora ni kamanenai kaubwaira.
REIAKINA AE BATI RIKI
Rinanoi aanga tabeua aika ko kona ni boutokaa iai te ekaretia.
3. Ti kona ni kamanenai kaubwaira
E tangira ane e anga ma kukurein nanona Iehova ao Iesu. N te katoto, e tarataraa Iesu te aine ae kainnano ae e tia ni mate buuna ao e nora ana kakorakora n anga ana bwaintangira. Wareka Ruka 21:1-4, ao maroroakin titiraki aikai:
E riai bwa ti na bwaintangira n te mwane ae bati ibukini kakukureian Iehova?
Tera ana namakin Iehova ao Iesu n ara bwaintangira aika nako mai nanora?
Ibukin noran aroni kamanenaan ara bwaintangira, kaota te TAAMNEI. Ao maroroakina te titiraki aei.
A kangaa ni buokaki ekaretia ni katobibia te aonnaba n ara bwaintangira?
4. Ti kona n anga ara ibuobuoki
N taai ake a karakinaki n te Baibara ao a ingainga ni mwakuri taan taromauria Iehova ni kateimatoa aia tabo n taromauri. E bati riki ae karaoaki nakon tii te bwaintangira n te mwane. Wareka 2 Rongorongo 34:9-11, ao maroroakina te titiraki aei:
A kangaa tibun Iteraera ni buoka tararuaan ana auti Iehova ke te tabo n taromauri?
Ibukin noran aroia Ana Tia Kakoaua Iehova ni kakairi n te katoto anne, kaota te TAAMNEI. Ao maroroakin titiraki aikai.
Bukin tera bwa e kakawaki bwa ti na kateimatoa itiakin ara Tabo n Taromauri ao taraaraoina?
Baikara aanga tabeua aika ko kona n ibuobuoki iai?
5. A kona taari mwaane n ukoukori mwioko riki tabeua
A kaungaaki Kristian aika mwaane n te Koroboki ae Tabu bwa a na karaoa aia kabanea ni konaa ni boutokaa te ekaretia. Ibukin noran te katoto teuana, kaota te TAAMNEI. Ao maroroakina te titiraki aei.
N aron ae oti n te taamnei, e kangaa Ryan n ukeri aanga ni boutokaa riki iai te ekaretia?
E kabwarabwaraaki n te Baibara aroaro aika katauia taari mwaane bwa na riki bwa tabonibai ao unimwaane. Wareka 1 Timoteo 3:1-13, ao maroroakin titiraki aikai:
Tera ae kantaningaaki mairouia taari mwaane ake a ukoukora te kan riki bwa tabonibai ke unimwaane?
Tera ae kantaningaaki mairouia kaain aia utu?—Nora kibuna 4 ao 11.
Ngkana a kataia taari mwaane ni maiuakin aroaro aika katauaki ibukini mwioko aikai, a na kangaa ni kakabwaiaaki iai kaain te ekaretia ni kabane?
E KONA NI KANGAI TEMANNA: “A kangaa Ana Tia Kakoaua ni mwanena aia mwakuri?”
Ko na kangaa ni kaeka?
KAKIMOTOTOANA
E rangi ni kakaitau Iehova n ara kakorakora ni boutokaa te ekaretia ni kamanenaan ara tai, korakorara ao kaubwaira.
Kauring
Ti na kangaa ni kamanena ara tai ao korakorara ni boutokaa te ekaretia?
Ti na kangaa ni kamanenai kaubwaira ni boutokaa te ekaretia?
N aanga raa aika ko kani boutokaa iai te ekaretia?
NORI NABA AIKAI
Nora bukina ngkai e a aki tangiriia taan taromauria te Atua bwa a anga aia kabwianibwai.
“Tera Ana Taeka te Baibara Ibukin te Kabwianibwai?” (Te kaongora n jw.org)
Reiakinna bwa tera ae nanonaki n “ukoukoran te kan riki bwa te mataniwi” n te ekaretia.
“Ko ‘Ukoukora te Kan Riki Bwa te Mataniwi’?” (Te Taua-n-Tantani, Tebetembwa 15, 2014)
Noriia taani Kakoaua tabeman aika mwaane aika ninikoria ake a anga ngaiia bwa a na nikiri booki irouia raoia n te onimaki.
Tibwatibwaani Booki Aika Aanaki Man te Baibara i Congo (4:25)
Nora aroni mwanenakin ara mwakuri ae kaokoro ma botaki n Aro ake tabeua.
“E Kangaa ni Mwanenaki Aia Mwakuri Ana Tia Kakoaua Iehova?” (Te kaongora n jw.org)