REIREI 56
Kateimatoa te Katiteuanaaki n te Ekaretia
Ngkana ti mena i buakoia raao n te onimaki, ti a namakina iai ana namakin te Uea are Tawita aei: “Ai raoiroira ao ai rereira ikotakia taari ni maeka ma te katiteuanaaki!” (Taian Areru 133:1) E aki manennanti katiteuanaakira. Ti bane ni buoka kateimatoaan anne ngaira n tatabemanira nako.
1. Tera te bwai ae kamimi i buakoia ana aomata te Atua?
Ngkana ko kaea te taromauri n te ekaretia n te aba teuana, ko bae n aki ota n aia taetae, ma ko bae n namakinna n aanga aika a bati bwa ko butimwaeaki raoi. Bukin tera? Ibukina bwa ti reiakina te Baibara ni kamanenaani baika katauraoaki aika titeboo n taabo nako. Ao ti kabanea ara konaa ni kaotiota te itangitangiri i marenara. N aki ongeia bwa ti mena ia, ma ti bane n “taboa aran Iehova, ao n taromauria ma te katiteuanaaki.”—Tebania 3:9
2. Tera ae ko kona ni karaoia ni buotokaa te katiteuanaaki?
“Kam na kakorakoraingkami n itangitangiri, . . . ae nako man te nano ni koaua.” (1 Betero 1:22) Ko na kangaa ni maiuakina te reirei ni kairiri aei? N oneani mwin are ko na kaatuua iangoan aki kororaoia tabeman, tarai aroaroia aika a raraoi. Tai tii raoraonia naake titeboo baika ko tatangiria ma ngaiia, ma kataia naba ni kinaia taari ake a kaokoro aroia ma ngkoe. Ti kona naba ni kakorakoraira ni kanakoi aeka n namakin aika karekea te inanonano iroura.—Wareka 1 Betero 2:17.a
3. Tera ae ko na karaoia ngkana iai te itabarara i marenam ma temanna raom ni Kristian?
Ti katiteuanaaki, ma ti bon aki naba kororaoi. N tabetai ti a manga kauna temanna i marenara ke ni kammarakia. Ngaia are ti tuangaki ae kangai n ana Taeka te Atua: “Teimatoa . . . n ikabwarabure . . . i marenami,” ao e reitia ni kangai: “N aron Iehova ngke e tauraoi ni kabwarai ami bure, ao kam riai naba ni karaoa anne.” (Wareka I-Korote 3:13.) Ti a tia ni karawawata Iehova n taai aika bati, ao e boni kabwarai ara bure. Ngaia are e kantaningaira bwa ti na kabwarai aia bure tarira. Ngkana ko ataia bwa ko a tia ni kammaraka nanon temanna, biririmoa n raoiakina te kangaanga anne.—Wareka Mataio 5:23, 24.b
REIAKINA AE BATI RIKI
Nori aanga aika ko kona ni boutokaa iai te katiteuanaaki ao te rau n te ekaretia.
Tera ae ko na karaoia ibukini karekean te rau?
4. Tokanikai i aon te inanonano
Ti kan tangiriia tarira ni kabane n te onimaki. Ma ti bae ni kakorakoraira ni butimwaea temanna ae taraa ni kaokoro arora ma ngaia. Tera ae kona n ibuobuoki? Wareka Mwakuri 10:34, 35, ao maroroakin titiraki aikai:
E butimwaeiia aeka n aomata nako Iehova bwa taani Kakoaua ibukina. Ko na kangaa ngkanne ni kakairi irouna n arom n iangoiia naake a kaokoro aroia ma ngkoe?
Baikara aeka n inanonano aika taabangaki n am aono ae ko kan rarawa nako iai?
Wareka 2 I-Korinto 6:11-13, ao maroroakina te titiraki aei:
Ko na kangaa ni kaaniko riki ma taari n te onimaki ake a kaokoro aroia ma ngkoe?
5. Tauraoi n ikabwarabure ao karekea te raoi
E tatauraoi Iehova ni kabwarai ara bure e ngae ngke e aki kainnanoia bwa ti na karaoa anne nakoina. Wareka Taian Areru 86:5, ao maroroakin titiraki aikai:
Tera ae ti reiakinna man te kibu aei ni kaineti ma aron Iehova ni kabwarai buure?
E aera ngkai ko kakaitau ibukin arona ni kabwarai buure?
Baikara bwaai aika e kona ni kangaanga iai katiteuanaakira ma tabemwaang?
Ti na kangaa ni kakairi iroun Iehova ao ni kateimatoa katiteuanaakira ma tarira n te onimaki? Wareka Taeka N Rabakau 19:11, ao maroroakina te titiraki aei:
Tera ae ko kona ni karaoia ni kanakoraoa te kangaanga ngkana iai ae kammaraka nanom ke ni kauniko?
N tabetai ti a manga kaunia tabemwaang. Ngkana e riki anne, tera ae ti riai ni karaoia? Kaota te TAAMNEI, ao maroroakina te titiraki aei.
Tera ae e karaoia te tari te aine are n te taamnei ibukini karekean te rau?
6. Tarai raoiroia taari n te onimaki
Ngkana ti a kinaia riki taari n te onimaki, ti a ataa iai aroaroia aika raraoi ao mamaaraia. Ti na kangaa ni kaatuua ara iango i aon aroaroia aika raraoi? Kaota te TAAMNEI, ao maroroakina te titiraki aei.
Tera ae e kona ni buokiko n nori aroaroia aika raraoi taari n te onimaki?
E kaatuua ana iango Iehova i aon aroarora aika raraoi. Wareka 2 Rongorongo 16:9a, ao maroroakina te titiraki aei:
Tera am namakin n ataakin ae e kaatuua ana iango Iehova i aon aroarom aika raraoi?
E ngae ngkana e kinakina te mwamwa ae karaoaki mani bwaai aika bobuaka ma e bon teimatoa naba ni kakawaki. N aron naba anne, a bane n aki kororaoi tarira n te onimaki, ma a boni kakawaki naba iroun Iehova
A TAKU TABEMAN: “Ngkana I kabwaraa ana bure, e na aki ataa kammarakin te bae e karaoia nakoiu.”
E aera bwa ti riai n tatauraoi ni kabwarai aia bure aomata?
KAKIMOTOTOANA
Ko kona ni buoka kateimatoaan te katiteuanaaki n te ekaretia ngkana ko kabwarai buure ao ni kaotiota tangiraia taari ni kabane n te onimaki.
Kauring
Ko na kangaa n tokanikai i aon te inanonano?
Tera ae ko na karaoia ngkana iai te itabarara ma raom ni Kristian?
E aera ngkai ko kani kakairi n ana katoto Iehova ni kaineti ma kabwaraan aia bure aomata?
NORI NABA AIKAI
Nora teuana ana kaikonaki Iesu ae e kona ni buokira n rarawa nakoni kabuakakaaia tabemwaang.
Ti riai ni kabwaraa ara bure ngkana ti namakinna bwa ti bon aki karaoa ae kairua?
“Te Kabwarabure Boni Kiingini Karekean te Raoi” (Te Taua-n-Tantani, Ritembwa 1, 2002)
Nora aron ikawairakeia mwaane aika uoman n te aba ae korakora iai te kakaokoroaki n te reeti ao manga katiteuanaakia.
Johny ao Gideon: A Kairiribai Ngkoa, Ai Taari Ngkai n te Onimaki (6:42)
Nora arom ni kanakoraoa am kangaanga ma temanna imwain ae e urua te rau n te ekaretia.
“Raoiakin Itabarara ma te Nano n Tangira” (Te Taua-n-Tantani, Mei 2016)
a Ni Kabwarabwaraana 6 e maroroakinaki iai aron te tangira ni kairiia Kristian bwa a na rarawa nakoni kabutanakoan te aoraki ae ewewe.
b Ni Kabwarabwaraana 7 e maroroakinaki iai aroni kanakoraoani kangaanga ni waaki ni bitineti ao baika irekereke ma te Tua.