Ukeran Taiani Kaeka

“E ngae ngkai ti a kona ni kareke tianti ibukin maiura ao ni karekei baika ti na kakukurei nanora iai, n aron te aitibwaoki, bwaai ni katangitang aika a tangimwaaka ao amwarake aika rangi ni kangkang mani bobuaka, ma ti bon tiku naba ma te titiraki ae ‘e aera’ ngkai ti maiu. E aera bwa ti na rinanoni kangaanga tii ibukin karekean maiura? Iai manenana?” —David G. Myers, ae te tia rabakau n te iango n te kuura n reirei ae rietata ae Hope College, i Holland, Michigan, U.S.A.

KO NA kanga ni kaekai titiraki aika tabekaki iroun te tia rabakau aei? A iangoia temwangina bwa iai uaan kabanean te tai ibukin ukeran kaekaan titiraki aikai ke akea. Ma ngkana ko kataia n tarariaoi titiraki aikai, ai aron naba ae ko kataia n nakonako ma te kirikiri i nanon am kau ao n aki tabe iai. Ko kona n reitaanako kawaim, ma ko na boni mwengabuaka.

Ngkana ko a tia n iaiangoia bwa iai manenan te maiu aei, bon tiaki tii ngkoe ngkanne n iangoa anne. Ni kaineti ma ana kakae te botaki teuana ae bubura ae te World Values Survey ae kaainaki irouia taan rabakau ni kakae i aon bibitakin aroia ma kateia te botannaomata ni katobibia te aonnaba, a kunea bwa e a birirake mwaitiia aomata n aba aika mwaiti aika a aki toki n iaiangoia bwa tera “uaan ao te kaantaninga ibukin te maiu.”

Ngkana ko kan karekea te raunnano ni koaua, e riai moa bwa ko na karekei kaekaan titiraki aika kakawaki aika tenua aikai.

Ti riki mai ia?

Tera te kaantaninga ibukin te maiu?

Tera kanoan taai aika a na roko?

Ko na kunei ia kaekan titiraki aika kakawaki aikai? N iteraniba aika imwina ao a na rinanoaki iai kaekan titiraki aikai, tiaki man aia karioiango aomata, ma man Ana Taeka te Atua ae te Baibara. Ti kaungako bwa ko na rairi baan am Baibara i bon iroum ma n taraia bwa tera ae taekinaki iai.