Tera Kanoan Taai Aika A na Roko?
E AERA BWA E RANGI NI KAKAWAKI KAEKANA? Ana kaantaninga te aomata ibukin taai aika imwaina e na boni bae n rotaki iai arona ao ana mwakuri n te bong aei. N te katoto, a kona naba n iango ni kangai naake a karako aia kaantaninga ni kaineti ma taai aika a na roko: “Ti na amarake ma ni moi; ba ti mate ningabong.” (1 I-Korinto 15:32) A kona ni kairiko aeka n iango akanne nakon te buabeka, te koro ni manging, ao te raraoma ae irianaki n te aki raunnano.
E boni koaua bwa ngkana e a tiku bairean taai aika a na roko i nanoni baia aomata, e na bon rangi ni kabwaranano ngkanne kaantaningana. E kabarekaki te eea, te ran ao te aba n aron ae e tuai man nonoraki ma rimoa. E tabe n rikirake rikin buaka aika korakora ao aia kamangaongao taan iowawa. E a taona nako te aonnaba ni kabutaa te aoraki ma te kainnano. Ma e ngae n anne bon iai bukin kaantaningan rikin baikai aika raraoi.
A aki kona aomata n taekin raoi kanoan taai aika a na roko, ma Iehova ae te Atua e taekina arona ni kangai: “I kaota te toki mai moani bwaai, ma ni kaoti naba ma ngkoangkoa baika tuai ni karaoaki.” (Itaia 46:10) Tera ae taekinna Iehova ni kaineti ma baika a na riki n taai aika a na roko?
Ana Taeka te Baibara
E na bon aki kariaia Iehova bwa e na uruanaki te aonnaba ao te maiu. Ni koauana, e berita te Baibara bwa te Atua e na karokoa te tai are “a na tiringaki iai akana urua aon te aba.” (Te Kaotioti 11:18) E na kaitiaka te aonnaba aei man te buakaka ao ni karaoia n aron are e moan kaantaningaia, rinanon ana Tautaeka n Uea Iehova ae bwaini karawa. (Karikani Bwaai 1:26-31; 2:8, 9; Mataio 6:9, 10) A karekea nakoira te kaantaninga ni kaineti ma taai aika a na roko, kiibu aika a oti i nano, aika a kabwarabwarai naba baika a na riki aika a na rotiia aomata nako n te aonnaba.
Taian Areru 46:8, 9. “Mai, nori ana makuri Iehova, aika uruani bwaai i Rouna i aonaba. E katoki buaka, ao tokina tabon aonaba; E otea te kainikatebe, ao E koroua te kai ni buaka; E kabuoki kaa-ni-buaka n te ai.”
Itaia 35:5, 6. “A na kaureaki iai mataia akana mataki, ao a na kaukaki taningaia akana a bono taningaia. Ane e na ewewe iai te mauku n ai aron te ria, ao e na anene ni kimareirei newen ane e bae newena: ba a na koburake raan i nanon te raereke, ao karanga i nanon te rereua.”
Itaia 65:21, 22. “A na katei auti, ao a na maeka i nanoia; ao a na uniki kurebe, ao a na kang uaaia. A na aki katea ae e na maeka i nanona temanna; a na aki unika ae e na kana uaana temanna; ba ai aron ana bong te kai aia bong au aomata, ao au koraki aika rineaki a na kamaania ni bwain aia makuri baia.”
Taniera 2:44. “E na katea ueana Atuani karawa, ae na bon aki uruaki n aki toki, ao e na aki katukaki tauan taekana nakon te botanaomata teuana, ma e na ururu ma ni kamaunai uea akanne ni kabane, ao e na tei matoa n aki toki.”
Ioane 5:28, 29. “E na bon roko te aua, ae a na bane iai n ongo bwanana aomata ake a mena i nanon ruaia ni mate, ao a na oti nako.”
Te Kaotioti 21:3, 4. “Ao te Atua E na boni memena i rouia, ao E na kabane rannimataia te Atua ni kaoi mai mataia. Ao e na akea riki te mate, ao e na akea naba te nanokawaki, ma te tang ma te maraki: ba a mauna nako bwaai rimoa.”
Aron Ana Kaeka te Baibara ni Karekea te Raunnano ni Koaua
Tao n te moan tai, e boni kangaanga bwa ko na kakoauai baikana a taekinaki i eta. Ma berita aikai a karaoaki iroun te Atua, ao tiaki aomata. Ao “e aki kona ni kewe” Iehova ae te Atua. —Tito 1:2.
Ngkana ko onimakina ana berita te Atua ao ni maiuakin ana tua nako, e na kona n reke raunnanom n aki ongei kangaanga aika bati. Bon akea mai buakon baikai n aron te buaka, te maiu ni kainnano, te aoraki, ao riki kangaangan te kara ke kaantaningaan te mate, ae e na kona n teimatoa n iraea raunnanom ni koaua. Bukin tera? Ibukina bwa ko onimakina Ana Tautaeka n Uea te Atua bwa e na kona ni kamaunai mwin baikai ni bane.
E na kanga n teimatoa iroum te kaantaninga ae kaineti ma taai aika a na roko? Ko riai n ‘onikaki n onean nanom’ ao ni karekea ataakin “Nanon te Atua, are raoiroi, are kakukurei, are kororaoi.” (I-Rom 12:2) E na bae ni kainnanoaki bwaai tabeua riki aika a na kona ni kakoauaa ana berita te Baibara bwa a kona n onimakinaki. E rangi ni manena ukeran bwaai ni kakoaua, ao e materaoi karaoan aei. Tao bon akea riki bwaai aika ko kona ni karaoi ni maium aika a na kona n anganiko te raunnano ae korakora n ai aron aei.
[Taamnei n iteraniba 8]
Tera ae mwaneweia Ana Taeka te Atua ni kaineti ma taai aika a na roko?