Te Taamnei Ae Raoiroi Bukin Tera Bwa E Kamangaongaoaki Aia Iango Aomata Iai?

TERA te taamnei ae raoiroi? E taraa n ae e rangi ni mataata te titiraki ma e kona ni kangaanga kakaaeani kaekaana ae bebete. E taku te Bobe Benedict XVI nakoia te koraki ae uanao i Aotiteria: “E riaon ara kona bwa ti na ota raoi n te Taamnei.”

Ma ni koauana, a bati iango aika aki rangi ni mataata nakon te titiraki ae, Tera te taamnei ae raoiroi? Aikai kaeka tabeua aika taabangaki:

• Te taamnei ae raoiroi bon te aomata ni koaua ae maeka i nanoia taan rimwini Kristo.

• Te taamnei ae raoiroi bon te rabakau mairoun te Atua ni kaineti ma bwain aonnaba, are taekan ana tua ae mwamwakuri.

• Te taamnei ae raoiroi boni menan te Atua rinanon ana mwakuri n te aonnaba.

• Te taamnei ae raoiroi bon te kateniman n Atua n te Temanna n teniman.

E aera ngkai e riki te aeka ni kamangaongao aei? A a kamani mangaongao aomata man te kaaua n tienture C.E., ngke a taku tabeman taan rabakau n te Aro bwa bon te aomata te taamnei ae raoiroi ae e kuri n titeboo ma te Atua. Ma e ngae n anne, e bon aki reiakinaki te iango aei n te Baibara ke tao irouia taan rimwini Kristo ake rimoa. E kabwarabwaraaki ae kangai n te New Catholic Encyclopedia: “E teretere bwa e bon aki iangoaki n te O Tetemanti bwa bon te aomata taamnein te Atua . . . Taamnein te Atua bon tii mwaakana.” E a manga reitaki riki ni kangai: “E kaotaki n angiini kiibu aika n te Nu Tetemanti bwa taamnein te Atua bon te bwai teuana, tiaki te aomata temanna; e rangi ni kakoauaaki riki aei ni baika a titeboo i marenan te taamnei ao mwaakan te Atua.”

E a ota raoi ngkanne bukina ngkai e kangaanga irouia aomata bwa a na iangoa te mwaaka bwa te aomata. Ma e katereaki n te kakaae ae e a tibwa tia ni karaoaki n te United States bwa angia aomata a totokoa te iango ae te taamnei ae raoiroi bon te aomata ke te “bwai ae maiu.” E bon eti aia iango anne? Ke ti riai ni kakoauaia taan rabakau n te Aro ake a imanono n taku bwa “bon te Aomata te Taamnei ae Raoiroi ae rangi ni kaokoro ma te Tama ao te Nati”?

Ni karekean te kaeka ae kona n onimakinaki, ti riai n okira Ana Taeka te Atua ae te Baibara are e kabwarabwaraa raoi te taamnei ae raoiroi. E korea ae kangai te abotoro Bauro: “E anganaki te aba te Baibara ni kabanea iroun Tamnein te Atua, ao e manena nakon te reirei, ao nakoni kaotan ana buakaka te aomata nako ina.”​—2 Timoteo 3:16.

Bukin tera ngkai ko riai n ukera raoi te koaua ibukin te taamnei ae raoiroi? Ibukina bwa ataakin te koaua aei, e na kona ni kauka kawaim bwa ko na karekea buokam mairoun te Atua. Ko namakinna n taai tabetai bwa ko aki kona n uota uotam n oini korakoram? E berita Iesu nakoia taan rimwina ni kangai: Teimatoa ni “Bubuti, ao kam na anganaki; . . . Ngkai kam ata te angania natimi baika raraoi, . . . tiaki e maiti riki iroun Tamami are i karawa te kan anga te Tamnei are Raoiroi nakoia akana butiia?”​—Ruka 11:9, 13.

Ti na rinanoi aron te taamnei ae raoiroi ae kateretereaki raoi n te Baibara ni kaongora aika imwin aei. Ao ti na nora arona ni kona n ibuobuoki ni karaoan ae raoiroi ni maiura.

[Kabwarabwaraan n iteraniba 3]

E kateretereaki raoi n te Baibara aron te taamnei ae raoiroi