Iai Manenan te Maiu?
“I manenan te maiu?” A a tia n tabeka te titiraki anne aomata aika mwaitikurikuri. E kananokawaki bwa e ngae ngke a neneri maiuia, ma a bati ake a aki kona ni birinako man te baere e kabwarabwaraaki iroun te tia rabakau i aon te kaburoro ae Viktor E. Frankl ae kaain Austria bwa ‘akea manenan te maiu ao e kananokawaki.’
E aera ngkai a rangi ni bati aika namakina anne? Bukina teuana bwa mirion ma mirion aomata ni katobibia te aonnaba aika a maeka ma te kainnano ao te uruakinnano n te aro ae kamimi. A katoabong ni kaaitara ma te maiu ni kainnano, te aoraki, mwakuri n iowawa aika ribuaka, ao te karawawataaki. A bon “on n te rawawata” maiuia n aron are e taekinna Iobi ngkoa ibukin rawawataia aomata. (Iobi 14:1, BG) Te bwai ae moanibwai irouia, bon teimatoaia ni maiu n te bong teuana ma teuana.
A maiu ni kaubwai aomata riki tabeman aika mirion ma mirion mwaitiia. A taraa n reke irouia bwaai nako ake a kainnanoi ibukini karekean te raunnano ni koaua ni maiuia. Ma a boni bati naba ake a aki reke irouia anne. Bukin tera? Ibukina bwa a aki toki n ririki baika “kamamate ma te rawawata” n aroni kangaangan te karekemwane, ke kabuanibwai aika korakora n aroni maten te nati are e aki koro iai bukin aia kantaninga ma aia iango.—Taian Areru 90:10, BG.
Iai te bwai teuana riki ae e karikirakea taabangakin namakinan ae ‘akea manenan te maiu ao e kananokawaki.’ Tera te bwai anne? Bon te maiu ae rangi ni kimototo. A iangoia aomata aika bati bwa e aera ngkai e rangi kimototo maiuia te koraki ake a kona ni karaoi mwakuri aika kakawaki. A aki kona n ota n te uruakinnano ae ti bane n aitara ma ngaia. N te tai ae waekoa ke imwina riki, ao e ngae ngke ti aikoa rotaki ni kabuanibwai aika kakaiaki, ma a bon iraeaki ara bwai ni kabane n te mate.—Te Minita 3:19, 20.
E na Teimatoa n Taraa n Akea Manenan te Maiu?
E kabwarabwaraa te aro aei n te aro ae mataata Uean Iteraera rimoa are Toromon. E nora aroia aomata ni mwakuri korakora n ana tai ike a a kamanenai iai aia tarena ao aia atatai ni kaineti ma te ununiki, te ribana, te kateitei, ao tararuaaia kaain aia utu, n aron ae ti kakaraoia ni boong aikai. E titiraki ni kangai: ‘Tera ae na riki n tokina?’ E iangoia teuaei bwa bwaai ni kabane aika karaoaki irouia aomata ai ‘akea maneia ao boni kaaean te ang.’—Te Minita 2:17, BG.
Ma e kakoauaa te Uea are Toromon bwa bwaai ni kabane ake a karaoaki irouia aomata ai ‘akea maneia ao boni kaaean te ang’ n taai nako? Tiaki ngaia anne. E bon tii taekina te iango ae koaua ibukin te bwai ae e na riki n te maiu i aon te aonnaba ae aki kororaoi aei. Ma e ngae n anne, e na kairiko Ana Taeka te Atua ae e kaira koreana bwa ko na onimakina ae a na aki tiku baikai n aroia aei n taai nako!
Ko na kanga n onimakina anne? Taiaoka wareki kaongora aika uoua aika imwin aei. Ko na buokaki iai n ota raoi bwa e aera ngkai e taraa n akea manenan te maiu, e na kanga ni katokaki te iango aei, ao ko na kanga ni karekea ae manena ni maium ngkai.