AIA TITIRAKI TAANI WAREWARE . . .

E nano riki te Atua n te reeti teuana nakon are teuana?

▪ E bon aki. E kateretereaki ae kangai n te Baibara: “E aki inanonano te Atua, ma a butimwaeaki irouna aomata ni kabaneia aika maakua ma ni kakaraoa ae raoiroi, mai buakoia botannaomata nako.”​—Mwakuri 10:34, 35.

E rietata riki ana iango te Atua nakoia aomata aika aki kororaoi ni kaineti ma aei. A kakoauaa aomata aika bati bwa tii teuana te reeti (are oin aia reeti) ae kakannato riki nakon are teuana. E kuri n titeboo te iango ae tabeitera aei ma ana iango Charles Darwin are e korea ae kangai: “N taai aika a na roko, . . . ao a na kamaunaaki ao n oneaki mwia reeti n aomata aika nanoroo irouia reeti aika reireiaki.” E kananokawaki bwa a bati aika a tia ni bwainikirinaki irouia reeti tabeua ake a iangoia bwa a kakannato riki.

E kakawaki namakinan ae kakannato riki te reeti teuana nakon are teuana? N te katoto, iai te bwai ni kakoaua man te rabakau n aonnaba bwa a kakannato riki reeti tabeua ni moani karikaia ao ake tabeua a mangori? Ni kaitaraan anne, e taekina ae kangai te tia rabakau i aoni bwain te rabwata ae te gene ao te tia rabakau i Oxford ae Bryan Sykes: “Bon akea boton te koaua ae mataata ibukini kaokoroia reeti. . . . I aki toki n titirakinaki bwa iai te DNAa ae te I-Kuriiti ke te gene ae te I-Itare, ma ni koauana bon akea. . . . Bon akea okoroia.”

A boraoi raoi kukune aikai ma baike ti wareki taekaia n te Koroboki ae Tabu. E reiakinaki n te Baibara bwa e karika te mwaane ae tii temanna ao temanna te aine te Atua are a a riki aomata ni kabane mairouia. (Karikani Bwaai 3:20; Mwakuri 17:26) Ngaia are n ana taratara te Atua bon tii teuana te reeti bwa te reeti n aomata.

E bon aki kakawaki iroun Iehova karani kunin te aomata ke teina. Ma ae e rangi ni kakawaki riki irouna bon nanora. E taekina ae kangai: “A motikitaeka aomata n taraan temanna ma I motiki taekaia aomata n te baere i nanoia.” (1 Tamuera 16:7, Con­tem­porary English Version) Ti kona n rangi ni kaungaaki n ururingan te koaua anne. N te aro raa?

A a bati mai buakora aika a aki kukurei n itera nako ibukin aron teira ni kaineti ma kateira n ara reeti, ma e uarereke korakorara ni bitii baikai. Ma e ngae n anne, ti kona ni karaoiroi riki baika ti iangoi ao n namakini. (I-Korote 3:9-11) Ngkana ti kakaonimaki n tuoi raoi ara namakin, ti a kona namakinna bwa ti kani kakannato riki ke tao ni mangori nakoia aomata tabeman n aia reeti. Kioina ngkai e aki botau ana iango te Atua ma anne, ti riai ni mwakuri korakora bwa ti na aki karin aeka n namakin aikai i nanora.​—Taian Areru 139:23, 24.

Ti kona ni kakoauaa raoi bwa e na boni buokira Iehova ngkai ti kakorakoraira ni bon taraira ao aomata n aron are taraia iai Iehova. Ti kauringaki n Ana Taeka ae kangai: “A biribiri matan Iehova ni kabuta aonaba ni kabane, ba E na kaotia ba E korakora i bukiia akana a moa n eti nanoia nako Ina.” (2 Rongorongo 16:9) E boni kakoauaaki anne, n aki ongeia bwa te reeti raa ae ti nako mai iai.

[Kabwarabwara ae nano]