Aberaam Te Mwaane Ae Ninikoria

E matakuakinia ana utu ma ana toro Aberaam ngke a tabe ni katauraoiia ibukin te nako Kanaan. (Karikani Bwaai 12:1-5) Ni matakuakinaia te koraki n aomata ae bubura aei are a onimakinna ibukini maiuia, e a namakinna iai bwa bon tabena kawakinaia. E na kanga ni karekei baika a kainnanoi ibukini maiuia ngkai e aki ataa raoi aron te aba anne? Tiaki e na kona ni bebete tararuaakia i Ura ae te tabo ae abwabwaki tawaanana, e maiu tanona, ao e tauraoi te ran ae bati iai? Tera ae na riki ngkana e aoraki ke ni mate n te aba anne? Antai ae na tararuaia ana utu? E aki kariaia maakuna ibukin tabeaiangana ni baikanne Aberaam bwa e na kabuaa ana iango. E motinnanoia bwa e na karaoa anne ao n ongeaba nakon ana tua te Atua n aki ongei baika riki, ae boni kanikinaean te ninikoria ni koaua.

TERA TE NINIKORIA? Boni bwainan te aroaro ae te korakora, te nanomatoa, ao te aki mamaaku ae boni kaitaraan te bwarannano ke te mamaaku. E aki nanonaki ni bwainan te ninikoria bwa ti aki kona ni maaku. Ma e karaoi mwakuri n akea maakuna te aomata ae ninikoria mairoun te Atua.

E KANGA ABERAAM NI KAOTIOTA TE NINIKORIA? E aki kakairi irouia te koraki ae bati Aberaam. E ikawairake Aberaam n te tabo ae a taromauriaki iai atua, ao bouannanti aika rangi ni bati irouia aomata. Ma e aki kariaia maakakin te baere a iangoia aomata ibukina bwa e na totokoia mani karaoan ae e ataia bwa e eti. N oneani mwin anne, e nanomatoa ni kaokoroa maiuna ni motinnanoan taromaurian te Atua ae tii temanna ae “Moan te Rietata,” ae Iehova.—Karikani Bwaai 14:21, 22, BG.

E moanibwaia taromaurian te Atua ae koaua Aberaam nakon tangirani bwaikorakin te maiu aei. N onimakinan raoi Iehova bwa e na karekei baika e kainnanoi ibukini maiuna, e a kukurei iai ni kitana mweraoina i Ura ao n nakon te rereua. Ni koauana, ni waakinakon te tai ao e bae n iangoi mweraoina Aberaam ake e karekei i Ura. Ma e kakoauaa raoi Aberaam bwa e na katauraoi Iehova baike e kainnanoi ma ana utu n taai nako. E namakinna Aberaam bwa e ninikoria n ongeaba nakon ana tua te Atua n arona n nimta Iehova, ngkai te Aomata ae moan te kakawaki i nanoni maiuna.

BAIKARA REIREIARA MAI IAI? Ti kona ni katotonga Aberaam ni karikirakea te ninikoria n ongeaba nakon Iehova, e ngae ngkana a aki karaoa anne aomata aika i rarikira. N te katoto, e reiakinaki n te Baibara bwa a na bae ni kaitaraaki te koraki ake a tei n nene ibukin onimakinan Iehova ae te Atua, tao irouia raoraoia ke aia utu aika a taraa n ibuobuoki ma a bon aki. (Ioane 15:20) Ma ngkana ti onimakina raoi te baere ti reiakinna ibukin Iehova, ti bon tei n nene ibukin ara koaua ma te karinerine.—1 Betero 3:15.

Ti kona n onimakina ana berita te Atua are e na boni karekei baika a kainnanoi te koraki ake a onimakinna raoi. N onimakinana, ti a ninikoria iai ni kabotoi maiura ni maiuakina te onimaki ni koaua, n oneani mwini baika ti kainnanoi ni maiura. (Mataio 6:33) Iangoa te utu teuana ae karaoa anne.

E ngae ngke iai natiia mwaane Doug ao Becky aika uarereke aika uoman, ma a kan ni mwaing naba nakon te aba ae korakora iai kainnanoaia taan tataekina te rongorongo ae raoiroi man te Baibara. Imwin rinanoan ma tataroakinan raoi aia motinnano, a a iangoia bwa a nang mwaing. E taku Doug: “Ti kainnanoa te ninikoria ibukini katauraoaia natira ao te mwaing nako, ngkai ti aki atai naba baika a na riki nakoira ikekei. Ma imwaini karaoan ara motinnano, ti maroroakini moa aia katoto Aberaam ma Tara. Ibukin iaiangoan aroia n onimakina raoi Iehova, ti a rangi ni buokaki n arona ni mutiakinna.”

E taekina ae kangai Doug ni kaineti ma maiuia n te aba ae a ianena iai: “Ti rangi ni kakabwaiaaki n te aro ae moan te kakukurei.” E kabwarabwaraa ni kangai: “Ti a kona ni kabatiaa riki ara tai i rarikia natira ni kaai n uarongorongo, ni kakaraki, ao n takaakaro ngkai e a rangi ni bebete aroni maiura. Ti a namakina te inaomata ni karaoi baika raoiroi ibukin ara utu ao ara taromauri.”

Ni koauana, a aki kona ni karaoi bitaki aika rangi ni korakora aomata nako. Ma ti bane ni kona ni kakairi n ana katoto Aberaam ni moanibwaian moa taromaurian te Atua, ao onimakinana bwa e na boni boutokaira. Ni karaoan anne, ti a mutiakina iai te kaungaunga n te Baibara are “ti rangi n ninikoria ao ti kangai: ‘Te tia buokai Iehova, N na aki maaku.’”—I-Ebera 13:5, 6.

[Bwaoki/​Taamnei n iteraniba 7]

Te Aine ae Mamaaka te Atua ao te Buu ae Rangi n Tangiraki

E mare Tara ma te mwaane ae rianako ana onimaki. Ma e katea te banna ni katoto ae moan te raoiroi te aine ae mamaaka te Atua aei. Ni koauana, e taekinaki tenua te tai n te Baibara aran neiei bwa temanna ae rangi n raoiroi ana katoto ngkai te aine ae mamaaka te Atua are e kona naba ni kakairi te aba iai. (Itaia 51:1, 2; I-Ebera 11:11; 1 Betero 3:3-6) E ngae ngke e karako rongorongon te aine ae rianako aei n te Baibara, ma ti kona n noria bwa te aine ae raoiroi aroarona.

N te katoto, iangoa aron Tara ngke e moa n tuangaki iroun Aberaam ana kaetieti te Atua bwa a na kitana Ura. E titiraki bwa a na mwaing nakea ao bukin tera? E tabeaianga ibukini baika a kainnanoi ni maiuia? E nanokawaki ngke e nang kitania raoraona ao ana utu ngkai e aki ataia bwa e na manga noria ke e na aki? Akea te nanououa bwa e bon iaiangoi baikanne. Ma e ngae n anne, e kukurei n nako ao e onimakina raoi Iehova bwa e na boni kakabwaiaa ibukin ongeabana.—Mwakuri 7:2, 3.

Irarikin are e riki Tara bwa ana toro te Atua ae ongeaba, bon te buu te aine naba ae moan te raoiroi. N oneani mwin are e na kaiangatoa Tara nakoni buuna n taui aroia kaain te utu, e boni karikirakea karineani buuna ma nanona ni koaua, ao e boutokaia ma te tangira ngkai e kairiri n aia utu. Ni karaoan anne, e a katamaroaa ao ni karaoiroia n aroarona aika raoiroi.—1 Betero 3:1-6.

A kona ni kakabwaiaaki buu aine n aroaro akanne ni boong aikai? E taekina ae kangai te aine ae arana Jill, are e raka i aon 30 ana ririki n tekateka n taanga imwini marena ae kakukurei: “E reke reireiau man ana katoto Tara bwa I aki riai ni maakina buu, ao N na kaotiota au iango nakoina.” E a manga reitia riki n taku: “Ngkai bon atun te utu buu, e bon riai ni karaoa te kabanea ni babaire. Ngkana e tia ni karaoa anne, bon tabeu bwa N na kabanea au kona ni boutokaa te babaire anne bwa e na nakoraoi.”

Tao aio te reirei ae rangi n ringa te nano are ti kona n reiakinna: E ngae ngke e rangi ni botonnaine Tara, ma e aki kariaia tamaroana bwa e na kainikatonga iai. (Karikani Bwaai 12:10-13) Ma e nanorinano ni boutokaa Aberaam n aia tai ni maiu n taai aika nakoraoi ao n nakobuaka. Akea te nanououa bwa bon taanga aika a kakaonimaki, a nanorinano ao a tatangira Aberaam ma Tara, aika taanga ake a karekei kakabwaiaaia.