Te Titiraki Nakon

Iesu

A iangoia aomata aika bati aika taua te Aro, bwa e riai n reitaki te Aro ma te waaki n tautaeka. A kakoauaa bwa e kona te Aro ni katoki aia kangaanga botannaomata. Ma e ngae n anne, a iangoia aomata riki tabeman aika taua te Aro bwa e aki riai n reitaki te Aro ma te waaki n tautaeka. Tera am iango ni mwiokoaia Aaro n te waaki n tautaeka? A riai tautaeka aika mwaakaroiroi akanne n ikarekebai n aia mwakuri?

EA TIA n taekinaki Iesu Kristo bwa e “korakora riki rotakia kaain Aaro irouna nakon rotakia irouia tabeman.” Ngaia are iangoia bwa aongkoa ti a titirakinna ni kangai: E riai n reitaki te Aro ma te waaki n tautaeka? Tera ae e na taekinna? Ni menana i aon te aba, ao e kaekaa te titiraki anne n ana taeka ao ana mwakuri. N te katoto, e anga taiani kaetieti Iesu n ana Kabwarabwara i aon te Maunga are e rangi n ataaki, ake a buokaki iai taan rimwina n ataa tabeia ae a riai ni karaoia n aia kaawa. Ti na rinanon reirei tabeua man te kabwarabwara ane rangi n ataaki anne.

A Rotaki Nanoia Aomata

E kabwarabwaraa aroaroia taan rimwina Iesu ae a riai ni kaotiotia nakoia kaain te aonnaba. E taku: “Taoron te aonnaba ngkami, ma ngkana e bua korakoran te taoro, e na kanga ni manga kaokaki? Ai bon akea bonganana ma e tii tau n tewenakoaki i tinaniku ike e na toutouaki iai irouia aomata. Te oota ibukia kaain te aonnaba ngkami. . . . Kam na kaotiota naba ami oota i mataia aomata, bwa a na nori ami mwakuri aika raraoi ao a na neboa iai Tamami are i karawa.” (Mataio 5:​13-​16) E aera Iesu ngke e kabotauia taan rimwina ma te taoro ao te oota?

E nanonna Iesu n ana taeka are e kabotauia iai taan rimwina bwa kaanga te taoro, tiaki tii nakon te kurubu ae uarereke ma bon nakoia botannaomata nako. A riki naba bwa kaanga te ota tiaki tii nakoia tabeman, ma nakoia aomata nako ake a kan atatai. Ni kamanenaani kaikonaki akanne iroun Iesu, e a kamataataa iai bwa e aki tangiriia taan rimwina bwa a na kaokoroia ma botannaomata. Bukin tera?

Nora aei: E aki kona n teimatoa raoiroin te amwarake ngkana e aki taoronaki. E aki kona n ota naba te ruu ngkana akea te taura iai. Ngaia are, e a kai oota ngkanne bwa e aera Iesu ngke e aki roko n te tuangia taan rimwina bwa a na kaokoroia n te tabo teuana, ao ni katei aia botaki ibukia taan onimaki. E aki kaungaia naba taan rimwina bwa a na maeka ni kaokoroia ma botaki n Aro nako. Ma n aron ae e riai n taoronaki te amwarake ao te taura bwa e na kaotaa te ruu, ao ai aroia naba Kristian bwa a riai n reitaki ma kaain aia kaawa bwa a aonga n rotaki maiuia aomata nako.

“A Aki Arona Aroia Kaain te Aonnaba”

Ngaia are n ana kaetieti Iesu are a riai n reitaki taan rimwina ma aomata nako, e a rio iai te titiraki ae kakawaki ibukin aroaroia Kristian ni kaineti ma te waaki n tautaeka. Bukin tera? Teutana te tai imwaini maten Iesu, ao e tataro nakon te Atua ibukia taan rimwina ni kangai: “I aki bubutiiko bwa ko na anaiia mai buakoia kaain te aonnaba, ma I butiiko bwa ko na kawakinia mairoun teuare buakaka. A aki arona aroia kaain te aonnaba, n arou naba ngai ae I aki arona aroia kaain te aonnaba.” (Ioane 17:​15, 16) Ngaia are a na kanga Kristian n aki arona aroia kaain te aonnaba, ao n reitaki ma kaain aia kaawa n te tai naba anne? Ibukini kaekaan aei, ti na rinanon titiraki aika uoua riki.

• Tera ana iango Iesu ni kaineti ma te waaki n tautaeka?

• A riai n irekereke Kristian ma te waaki n tautaeka ni boong aikai?