Iai ae E Ongoraei Tataro?

“I aki toki n nanououa bwa iai te Atua ke akea. Ma n tabetai, I a manga bon tataro. I aki koaua raoi bwa iai ae e kakauongo ke akea, ma I kakoauaa bwa iai ae e ongora. Bon akea kukureiu ao akea naba uaani maiu. I aki kani kakoauaa ae iai te Atua bwa n au iango, tii aomata aika mamaara aika a kakoauaa ae iai te Atua.”—PATRICIA,a mai IRELAND.

KO A TIA ni karekea te namakin ae iroun Nei Patricia? Ko tataro e ngae ngkana ko nanououa bwa iai te Atua ke akea? Ngkana ngaia anne, bon tiaki tii ngkoe n iango n aron aei. Iangoa te rongorongo aei.

◼ E kaotaki mwin aia kakaae kaaini Buritan i aoia aomata aika 2,200 mwaitiia, bwa tii 22 te katebubua ake a kakoauaa ae iai te Atua ae te taamnei are karika te aonnaba ao e ongoraei tataro. E ngae n anne tii 55 te katebubua mai buakoia naake a titirakinaki aika burenibwai n tatataro.

◼ N te kakaae i aoia aomata aika 10,000 n aaba aika aua aika rangi ni bubura n te aonnaba, ao e oti n aia taeka naake a kakeaa te Atua bwa a bon tatataro naba 30 te katebubua mai buakoia.

Tera Bukin Nanououaia?

E taku Allan ae te I-Engiran: “I aki toki n taekinna bwa I aki kakoauaa te Atua, kioina ngkai irou e kateaki te Aro ibukin tauan taekaia aomata ao te bwai ni karekemwane. I iangoia naba bwa ngkana iai te Atua, e na karako te ribuaka. Ma n tabetai, I tekateka n tii ngai ao I a bon taetae ma I a aki ataia bwa nakon te aomata ke te bwai teuana. I a manga bon titirakinai ni kangai: ‘Tera bukini menau ikai?’ ”

A boni kakaokoro aia namakin aomata n tatabemania nako, ibukin nanououaia bwa a na kaekaaki aia tataro ke a na aki. A bati taai ae a nanououa iai ibukina bwa a aki kaekaaki raoi titiraki n aron aikai:

◼ Iai te tia Karikiriki?

◼ Bukin tera ngkai e aki toki te Aro ni karikii kangaanga?

◼ E aera ngkai e aki katoka te rawawata te Atua?

Ngkana ko atai kaekaan titiraki akanne, ko na nanououa naba ngkanne n tataro?

[Kabwarabawara mai nano]