Kaaniko ma te Tia Ongoraei Tataro

A BATI ake a taku bwa a kakoauaa te Atua ma a aki kona ni kabwarabwaraa aan aia onimaki. A aki kona naba ni kabwarabwaraa bukin atongakia Aaro bwa a karaoi mwakuri aika buakaka n angiin te tai, ke bukin aki katokan te rawawata iroun te Atua. Ni koauana, a tii kona n tataro nakon te Atua ae a aki kinaa.

Ma ko boni kona ni kaaniaki riki ma te Atua nakon anne. Ko kona ni karikirakea am onimaki n ataakin ae e karikiko te Atua bwa ko na tangiria ao ni karinea. E boto te onimaki ni koaua mani bwaai ni kakoaua. (I-Ebera 11:1) Ngkana ko reiakina te koaua ibukin te Atua, ko a kona iai ni kinaa ao ni maroro ma ngaia bwa kaanga raoraom. Iangoi rongorongoia tabeman ake a aki toki n tatataro, e ngae ngke a nanououa bwa iai te Atua ke akea.

◼ E taku Patricia ae taekinaki n te moani kaongora: “N te bong teuana ao I mena i buakoia kaain au kurubu aika raoraou ake tao tengaun mwaitiia ngke a maroroakina te Aro. I a bon tia ni kaongoia are I kitana mwengau bwa I aki kan ongora ana mamaroro temanna Ana Tia Kakoaua Iehova ma tamau are e kakewea te Atua. E taku raoraou temanna: ‘E bae ni koaua aia rongorongo Ana Tia Kakoaua Iehova.’

E a manga taku are temanna: “‘E aera ti aki nako n ira aia taromauri ni kakoauaa?’ Ao ti bon nako n ira aia taromauri. E ngae ngke ti nanououa n aia rongorongo, ma a teimatoa n ira aia bobotaki tabeman mai buakora ibukin aroia taani Kakoaua ni kaotiota tabeakinaia.

“Ma n te Taabati teuana ao I ongoraea te bwai are I a bita iai aroarou. E kamataata raoi bukin rawawataia aomata te tia kabwarabwara. I aki butimwaea ngkoa te koaua are e karikaki ni kororaoi te aomata n te moan tai, ao moan riki te bure ma te mate iroun te aomata ae tii temanna ao imwina a a ituaki iai te botannaomata ni kabane. E kamataata naba riaini maten Iesu ibukini kaokan te bwai are e kabuaa te moan aomata ibukia botannaomata.a (I-Rom 5:​12, 18, 19) I a ota naba n te tai anne ni bwaai ni kabane. I taku i nanou: ‘Bon iai te Atua ae e tabeakinira.’ I teimatoa n reirei n te Baibara ao imwin naba anne I a tibwa ataia i nanoni maiu ae I kona n tataro nakon te aomata ni koaua.”

◼ E taku Allan are e taekinaki naba ni moan te kaongora: “N te bong teuana ao a roko n ara auti Ana Tia Kakoaua Iehova, ao e karinia kaainnabau bwa e anaaki nanona ngke a taku bwa iai te maiu n aki toki i aon te aba. E rangi ni maraki nanou, ngaia are ti kitania ara iruwa n te ruu ni katangaina ao ti nakon te umwa ni kuuka ao I taku nakoina, ‘Ko burababa. Tai kakoauai baike a taekin!’

“E kaekaai ni kangai: ‘Ngkana ngaia anne, naako rarikia ni kaota kairuaia.’

“Ni koauana, akea te bwai ae I kona ni kakeweia iai. Ma a rangi n akoi ao a katuka irou te boki ae taekan te maiu bwa iai ae karikia ke e riki i bon irouna. E kabwarabwaraaki raoi kanoana n te aro ae mataata ao ni koaua, ike I a motinnanoia bwa I riai n reiakina riki taekan te Atua. I a moana au reirei n te Baibara ma taani Kakoaua ao n te tai ae aki maan, I a ota raoi bwa e rangi ni kaokoro te bwai ae taekinaki iai ma baike I iaiangoi ngkoa ibukin te Aro. Ngke I a ataa taekan Iehova, I a kaota raoi nanou nakoina n au tataro. Bon iai aroarou tabeua aika aki rangi n raoiroi, ngaia are I a bubutii buokau. I kakoauaa raoi bwa e boni kaekai au tataro Iehova.”

◼ E taku Andrew ae maeka i Engiran: “E ngae ngke e mamate nanou ao ni korakora kakoauaan te rabakau n aonnaba ae te science, ma I kakoauaa te reirei are a riki bwaai i bon irouia tii ibukina ngkai a taku aomata bwa e boni koaua. I rawa ni kakoauaa te Atua ibukin rikini baika bubuaka ni kabane.

“Ma n tabetai, I a manga iango ni kangai: ‘Ngkana iai te Atua i karawa, I a kan ataa manenan te maiu. Bukin tera ngkai e a korakora te iowawa ao te buaka?’ N tabetai I tataro ibukini buokau ngkana iai au kangaanga, ma I aki ataia bwa antai ae I tataro nakoina.

“Imwin anne, e a anganaki kaainnabau te turaeki ae boreetiaki irouia Ana Tia Kakoaua Iehova ae kangai atuna: E Na Kamaiuaki Te Aonnaba Aei? Aio raoi te titiraki ae I aki toki n iaiangoia. E kairaki au iango n te turaeki aei bwa N na iaiangoa riki te Baibara bwa, ‘E uaana rinanoani kaekaan titiraki ake iai ke e aki?’ Imwina, n au tai ni motirawa ao I anganaki te boki ae The Bible​—God’s Word or Man’s?b Ngke I a ataia ae e boraoi te Baibara ma te rabakau n aonnaba, I a kan reiakina riki taekan te Baibara. Ngaia are ngke e tuangai temanna Ana Tia Kakoaua Iehova bwa N na reirei ma ngaia, ao I a kariaia naba. Ngke I a moanna n atai ana kantaninga Iehova, I a namakina ae kaanga I a kinaa bwa bon te aomata ae I kona ni maroro ma ngaia n te tataro n akea makinana.”

◼ E taku Jan ae kaikawaaki n te Aro ni Boretetanti i London: “I buubai man te Aro ibukini mwamwanaakin te aba iai ao taabangakin te rawawata. I kitana naba te reirei ae rietata ao ni moana au karekemwane n arou n anenene ma te kitaa. Ikanne are I a kaitiboo iai ma Pat ae kaikawaaki n te Aro ni Katorika ao e a manga beekan n arou naba.

“Ti maeka n te auti ae e akea kaaina ma tabeman naba aika aki bane aia tai man te reirei ake a anaaki nanoia n Aaro mai Mainiku. Ti kabwakanakotai ni maroroakina manenan te maiu. E ngae ngke ti aki kakoauaa te Atua ma Pat, ma ti namakina ae iai te bwai ae kanga ‘te korakora ae kateimatoa te maiu.’

“Imwini mwaingira nako Engiran meang ibukini kakaaean ara mwakuri ni kareketianti n te anene ngkai taan anene ngaira, ao e a riki natira te mwaane. N te tairiki teuana, e a ituaki natira n te aoraki ao I a tataro nakon te Atua ae I aki kakoauaa. E aki maan imwina ao e a ririkirake n aki nakoraoi tekatekara, ao I a kitana Pat ao ni kairaanako natira. I a manga tataroa buokau bwa e aki ngkoa ao bon iai ae e kakauongo. I aki roko n te ataia ae e karaoa naba aei Pat.

“Rimwi riki n te bong naba anne, ao a a karebwerebwe Ana Tia Kakoaua Iehova aika uoman n ana mataroa Pat, ao ni kaotii taeka n reirei tabeua man te Baibara aika rangi n uaana. E tarebooniai Pat ao n tuangai bwa I kukurei ke I aki ngkana ti kaai n reirei n te Baibara ma taani Kakoaua. E aki maan imwin anne ao ti a ataia bwa ngkana ti na kakukureia te Atua, ti riai ni karaoa ae eti i aan te tua ibukin ara mare. Titeboo ma te bwai ae e rangi ni kangaanga aroni karaoana iroura man taraakin akean te nakoraoi n tekatekara.

“Ti kan atai riki taekani kakoroani bukin taetae ni burabeti n te Baibara, bukin rikin te rawawata ao manenan Ana Tautaeka n Uea te Atua. Ti a ota raoi teutana imwin teutana, bwa e bon tabeakinira te Atua ao ti kani karaoa nanona. Ti mare ao ti buokaki n anganaki te wanawana man Ana Taeka te Atua bwa ti na kaikawaiia iai natira aika teniman. Ti boni kakoauaa raoi bwa e kakauongo Iehova nakon ara tataro.”

Neneri Bwaai ni Kakoaua I Bon Ibukim

A a tia te koraki ake a taekinaki rongorongoia n te kaongora aio, ao tabeman riki aika mirion ma mirion mwaitiia n ataa mwamwanaakia irouia Aaro aika kewe, ao a a ota bwa e aera e aki katoka te rawawata te Atua. Ko nora bonganan te atatai ae eti man te Baibara are a a kairaki iai naakai bwa a na kakoauaa ae e bon ongoraei tataro Iehova? Ko kan neneri bwaai ni kakoaua bwa bon iai te Atua ke akea? A kukurei Ana Tia Kakoaua Iehova ni buokiko n reiakina te koaua ibukin Iehova ao arom ni kaaniaki ma te ‘tia Ongoraei tataro.’​—Taian Areru 65:2, BG.

[Kabwarabwara ae nano]

[Reirei ae kakawaki n iteraniba 10]

Ngke I a moanna n ataa ana kantaninga Iehova, I a namakina ae kaanga I a rangi ni kinaa bwa bon te aomata ae I kona ni maroro ma ngaia n te tataro n akea makinana”

[Taamnei n iteraniba 9]

E boto te onimaki ni koaua mani bwaai ni kakoaua ao kan ataakin te koaua ibukin te Atua