Kam na Kabebeteaki ao Kabebeteia Aomata Nako

Te bwai n ibuobuoki ae rangi ni kakawaki n ara tai ni kekeiaki, bon taeka ni kabebetenano ake ti karekei mairouia ara utu, raoraora ao raora n onimaki.

E kona n riki bwa kaanga te bwaa ni kabebetenano ana taeka n akoi raoraora, ae kaotiotaki iai te tangira ae kamarurungira ao ni kaungai nanora. (Taeka N Rabakau 16:24; 18:24; 25:11) Ma a bati riki baika a tangiri Kristian ni koaua nakon ae tii karekean te kabebeteaki. A karababaa nako aia mwakuri ni ‘kabebeteia akana rawawata n aeka n rawawata nako, ni kabebeteaia are a kabebeteaki iai iroun te Atua.’ (2 I-Korinto 1:4; Ruka 6:31) E a tia n rinanon aei Antonio ae te mataniwi ae mwamwananga ibukin te aono ae bubura i Mexico.

E taonaki n te nanokawaki Antonio ngke e a ataia bwa e a reke irouna te aoraki ae te lymphoma, ae teuana mai buakon te kaentia n te rara. Ma e ngae n anne, e kakorakoraa n taona nanona bwa e na aki kabatiaa te nanokawaki. N te aro raa? E kataia n ururingi anenen te Tautaeka n Uea ao n anenei n te aro are e na ongoraei ao n iaiangoi taekaia. E rangi ni kabebeteaki nanona ngkana e wareka te Baibara ao n tataro ni kabaibati.

E ngae n anne, e a ataia ngkai Antonio bwa teuana mai buakoni buokana ake a rangi n ibuobuoki, boni mairouia raao n te onimaki. E taku: “Ngke I a rangi n taonakinako n te tabeaianga ma kaainnabau, ti a butiia ara koraki ae te unimwaane n te ekaretia bwa e na roko bwa ti na kaai n tataro ma ngaia. A kabebeteaki ao a karauaki naba nanora n aei.” E reitia ni kangai: “Ni koauana, ti kaitauia ara utu ao tarira n te onimaki ibukin aia boutoka bwa ti a kona n tokanikai i aon te nanokawaki, imwin te tai ae aki maan.” Ai kakaitaura Antonio ngkai iai raoraona aika a tatangira ma ni mwamwannano!

Te ibuobuoki riki teuana n taai ni karawawata aikai, bon te taamnei ae raoiroi are e beritanaki. E taekinna te abotoro Betero bwa bon te “bwaintituaraoi” te taamnei ae raoiroi mairoun te Atua. (Mwakuri 2:38) E kakoauaaki raoi anne ngke a a kabiraki aomata aika bati ni Bentekota 33 C.E. Ao e a riki iai bwa te bwaintituaraoi ae tauraoi ibukira ni kabane ngke e a karababaaki nako. Bon akea tian te bwaintituaraoi aei, ai ngaia are e aera bwa ko aki bubutii bwa e na kabatiaaki riki nakoim?​—Itaia 40:​28-31.

KAOTIOTA RAOI MWANNANOAKIIA AOMATA AIKA RAWAWATA

E rinanon taian rawawata aika rangi n riao te abotoro Bauro n ikotaki naba kurini matena n te tai teuana. (2 I-Korinto 1:​8-10) Ma e ngae n anne, bon akea irouna maakan te mate. E karekea kabebeteana n ataan ae e boni buokia te Atua. E korea ae kangai: “E na karaoiroaki te Atua ae Atuan ao Taman ara Uea ae Iesu Kristo, ae te Tama ae nananoanga ao te Atua ae te tia anga te kabebetenano n aekana nako, ae kabebeteira n rawawatara nako.” (2 I-Korinto 1:​3, 4) E bon aki kariaia rawawatana akekei bwa e na taonakinako iai. Ma e buokaki ni kangaanga ake e nanomwaaka i aaia bwa e na karikirakea nanoangaaia raona, n te aro are e a taubobonga riki ibukini kabebeteaia aomata n taai ake a kainnanoa buokaia.

Ngke e a marurung man aorakina Antonio ae kakaiaki, e a manga okira ana mwakuri are e mwamwananga iai. E aki toki ni kaotiota mwannanoakia raona n onimaki, ao ngkai e a kakorakoraa n te aro ae okoro ma kainnabana ni kawariia ao ni kaungaia ake a aoraki. N te katoto, imwini kawaran te Kristian temanna are kabokorakora ma aorakina ae rangi ni kakaiaki, e a kunea Antonio bwa tarina n te onimaki aio e aki tangiria ni kakaaei bobotaki n te ekaretia. E kabwarabwaraa ni kangai Antonio: “Tiaki n ae e aki tangira Iehova ke tarina n te ekaretia, ma e rotakibuaka ana iango n aorakina ae kakaiaki are e a namakinna bwa ai bon akea uaana.”

Te bwai teuana are e a kaungaaki iai te tari ae aoraki aei iroun Antonio, bon tuangakina bwa e na karaoa te tataro n aia botaki n itamwaomwao n te tai anne. E ngae ngke tao e iangoia te tari aei bwa e aki tau iai, ma e kukurei ni karaoia. E taku Antonio: “E bon tataro n te aro ae rangi n anainano, ao imwina ai titeboo ma te aomata ae boou. E a namakinna ae e boni manena maiuna.”

Eng, ti bane n tia n rinanoni karawawata n aekaia nako aika korakora ke n uarereke. Ma n aron are e taku Bauro, ti kona ni kataubobongaaki bwa ti na kabebeteia aomata n taai ake a kainnanoa iai buokaia. Ngaia are ti riai ni kai atai rawawataia raora ni Kristian ma ni kakairi iroun Atuara ae Iehova, ao n riki bwa nibwani kabebeteaia aomata.