A Kukurei n Anga Ngaiia i Mexico

E KAUNGANANO noran rikirakeni mwaitiia taani Kakoaua aika rooro n rikirake aika a kabebetei maiuia ao ni kona ni kabatiai riki aia tai n te mwakuri ni minita. (Mataio 6:22) Baikara bitaki ake a karaoi? Baikara bwaai n tutuki ake a aitara ma ngaai? Ni kaekaan titiraki aikai, ti na nori rongorongoia tabeman ake a teimatoa ni beku naba ngkai i Mexico.

“TI RIAI NI BITA MAIURA”

A mareaki Dustin ma Jassa aika kaain te United States n Tianuare 2007. Teutana te tai imwin anne, a a noria bwa e a koro bukin te bwai are a a kaman iaiangoia i nanon te tai ae rangi ni maan, bwa a a kona ni kabooa aia booti n ieie ao ni maeka i aona n taai nako. A rooa aia booti i rarikin Astoria i Oregon n te U.S.A., ae te kaawa ae rangi ni kantara bwa e otabwaniniaki n tabuki aika rangi ni bati kain aoia ao maunga aika onrake taubukia n te tino, ao e uakaan ma Marawan te Betebeke. E taku Dustin: “Ngkana ko taratara nako ao e rangi n tamaroa ma ni kamimi aona!” A namakinna te taanga aei bwa e bebete maiuia ao a onimakina Iehova. A iango ni kangai: ‘Ni koauana, ti maeka i aon te booti ae 7.9 te mita abwakina, ti mwakuri n itera n tai, ti irira te botaki n te ekaretia ae kaokoro ara taetae ma ngaiia, ao ti auxiliary bwaiania n tabetai.’ Ma imwin tabeua te tai, a ataia raoi bwa a mwamwanaiia ni karaoan anne. E taku Dustin: “N oneani mwin are ti na boutokaa te ekaretia, n angiin te tai ti rangi n tabetabe n onobwaia ara booti. Ti ataia bwa ngkana ti boni kani moanibwaia Iehova, ti riai ni bita maiura.”

E reitia Jassa ni kangai: “Imwain ae I mare, I maeka i Mexico, ao I kaaina te ekaretia ae kamanenaaki iai te taetae n Ingiriti. I rangi ni kukurei ni mwakuri iai ao, I ingainga ni kan okiria.” Ni karaoan aia taromauri n utu Dustin ma Jassa ibukini karikirakean ingaingan nanoia ni kani mwakuri n te aba ae tiaki abaia, a a moanna ni wareki rongorongoia taari ake a a tia ni mwaing nakon aono ake a a tauraoi nakon te taiaki. (Ioane 4:35) E taku Dustin: “Ti kani karekea naba te aeka ni kimwareirei anne.” Ngke a kaongoaki irouia raoraoia ake i Mexico bwa e kainnanoaki te ibuobuoki n te ekaretia ae e a tibwa tei, e a moti aia iango Dustin ma Jassa bwa a na nako iai. A butiaaina man aia mwakuri, a kaboonakoa aia booti n ieie, ao a a mwaing nako Mexico.

“TE BWAI AE TE KABANEA N TAMARAOA AE TUAI MAN RIIRIKI NAKOIRA”

A maeka Dustin ma Jassa n te kaawa ae Tecomán ae kaan ma Marawan te Betebeke bwa tao 4,345 te kiromita i maiakin Astoria. E taku Dustin: “N oneani mwin te ang ae mwaitoro ao tarataraani maunga, e rangi ni korakora te kabuebue ao e buta aona ni kaai aika remon.” Ni moan rokoia ikanne, a aki kona ni karekei aia mwakuri ni kareketianti. Ibukin aki taun aia kataumwane, a a kakang raiti ma taiani biin uatai n te bongina ni katoa wiki. E taku Jassa: “Ma ngke a a aikoa kona n rin kanara aikai, a a moanna n anganira aomata ake ti reirei ma ngaiia n te Baibara taiani mwangkoo, banana, bwabwaia, ao ai baeki n remon aika onrake!” Imwin tabeua te tai, e a reke aia mwakuri te taanga aei n te Internet ae te reirei i aon te taetae ae boto mai Taiwan. E rangi n tau ngkai booia ae reke man te mwakuri ni kareketianti anne ibukini maiuia.

Tera aia namakin Dustin ma Jassa ni maiuia ae boou aei? A taku: “E riki mwaingira aei bwa te bwai ae te kabanea n tamaroa ae tuai man riiriki nakoira. E a rangi ni korakora riki ara iraorao ma Iehova ao i marenara naba nakon ae ti kona n iangoia. Ti kaai ni karaoi baika bati ni katoabong n aron te mwakuri ni minita, maroroakinan arora ae ti na kona ni buokiia iai aomata ake ti reirei ma ngaiia n te Baibara, ao te katauraoi nakoni bobotaki. Ti a inaomata naba man aeka ni kangaanga ake ti namakin rimoa.” A reitia riki ni kangai: “Ti a atai raoi ngkai baike ti aki rangi n ota iai rimoa, ae te koaua ibukin te berita are n Taian Areru 34:​8, (BG) ae kangai: ‘Kata Iehova ma n noria ba E raoiroi.’ ”

TERA AE KAUNGAIA TAANI MWAKURI AIKA NGA MA NGA MWAITIIA AIKA KUKUREI N ANGANANO?

E raka i aon 2,900 mwaitiia taari mwaane ao taari aine aika a a tia ni mare ke aika tuai ao a bati i buakoia aika ai tibwa 20 ao 30 aia ririki ake a a tia ni mwaing nakon aonon Mexico ake e korakora iai kainnanoaia taan uarongorongoa te Tautaeka n Uea. Bukin tera bwa a karaoa te mwakuri ae kangaanga aei taani Kakoaua aikai ni kabane? Ngke e tabekaki te titiraki anne nakoia tabeman mai buakoia ao a taekini bukina aika tenua aika kakawaki. Baikara baikanne?

Kaotan tangiran Iehova ao aomata. E bwabetitoaki Leticia ngke 18 ana ririki. E taku: “Ngke I katabua maiu nakon Iehova, I ota raoi bwa e nanonaki iai te beku ibukina ma nanou ao maiu ni kabane. Ngaia are ni kaotan tangiran Iehova ma nanou ni kabane, I a kani kamanena riki au tai ma korakorau ni beku ibukina.” (Mareko 12:30) Ai 20 ana ririki Hermilo are e a riki ngkai bwa buun Leticia ngke e a mwaing nakon te tabo ae kainnanoaki riki iai taan uarongorongoa te Tautaeka n Uea. E taku: “I ataia bwa te anga ae te kabanea n raoiroi ibukini kaotan tangiraia aomata irou, boni buokaia ni katoki kainnanoia ni bwaai n taamnei.” (Mareko 12:31) Ai ngaia are e a kitana Monterrey ae te kaawa ae rangi ni kaubwai are e mwakuri n te bangke ma ni mwengaraoi iai ao ni mwaing nakon te kaawa ae uarereke.

Karekean te kukurei ni koaua ae teimaan. E aki maan imwini bwabetitoan Leticia ao e a ira te tari te aine ae te bwaiania ae mwaatai nakon te kaawa ae kangaanga te roko iai, ao a uarongorongo i nanon teuana te namwakaina. E ururing rikaaki Leticia ao e taku: “I rangi ni mimi n norakia kaaina ake a butimwaea rongorongon te Tautaeka n Uea are ti maroroakinna nakoia ao I rangi ni kimwareirei iai. N tokin te namwakaina anne, I a taetae i bon irou ni kangai: ‘Bon aei te bwai ae I kani karaoia ni maiu!’” Tii te arona naba ma Essly ae te tari te aine ae tuai iein are ai tibwa 20 ana ririki ngkai, bwa e anaaki nanona n te kimwareirei are e noria ni karaoan te mwakuri n te tabo ae kainnanoaki riki iai taan uarongorongo. N ana tai n reirei n te kauarinan, e boni kaitiboo ma tabeman taani Kakoaua aika ingainga nanoia, ake a beku n taabo ake e kainnanoaki riki iai te ibuobuoki. E taku: “I kaungaaki bwa N na karekea te aeka ni maiu anne man norani mataia ae kimwareirei.” A bati taari aine aika a a tia ni karaoa naba are karaoia Essly. Ni koauana, e raka i aon 680 mwaitiia taari aine aika tuai iein i Mexico, ake a beku n taabo ake e kainnanoaki riki iai te ibuobuoki. Ai raoiroira te katoto ae a kateia aei nakoia ataei ao kaara!

Maiuakinan ae manena ao ni kakukurei. Ni banen ana reirei Essly n te kauarinan, e a reke kaniwangana bwa e na reita ana reirei n te kuura ae rietata. A kaungaa tabonrorona bwa e na butimwaea aei ao n uaiakina “te maiu ae bane n uaiakinaki” ae nanonaki iai karekean te beeba ae bubura ae te degree, te nakoa ae teimatoa, te kaa, ao n reke iai ana tai ni mwamwananga. Ma e bon aki tabe ma aia taeka n reirei. E taku Essly: “Iai raoraou aika Kristian tabeman ake a uaiakini baikai, ao I noria bwa a aikoa moanibwaia tiaia aika irekereke ma ara taromauri. I noria naba bwa a a bwara nanoia ni kangaanga ake a aitara ma ngaai, ngkai a a rangi n irekereke riki ma bwain te aonnaba aei. I kani kamanena maiu n roro n rikirake ni kabane ni beku ibukin Iehova.”

E kaei reirei tabeua aika kaineti ma te kataneiai ibukin te mwakuri Essly bwa e aonga n reke ana mwakuri ibukini boutokaana n te mwane n ana tai ni bwaiania, ao imwina e a mwaing nakon te tabo ae rangi ni kainnanoaki iai taan uarongorongoa te Tautaeka n Uea n te tai ae waekoa. E boni kaaitara naba ma te kangaanga ae reiakinan taetae aika kabonganaaki irouia kaain Otomi ao Tlapaneco. E ururing rikaaki ngkai neiei ao e iangoa ana mwakuri n uarongorongo i nanon tenua te ririki n taabo ake e kangaanga te roko iai ao e taku: “I namakinna bwa e kakukurei ao e a rangi ni manena maiu, ngkai I beku n te tabo ae korakora riki iai kainnanoan te ibuobuoki. Ma ae moamoa riki, e a boni kakorakoraaki au iraorao ma Iehova.” Titeboo aia iango ma anne Phillip ma Racquel, ae te taanga are ai tibwa 30 aia ririki aika kaain te United States. “E rangi ni waekoa bitakin te aonnaba n te aro are a a namakinna aomata aika bati bwa a a bitaki naba maiuia. Ma ti namakina manenan riki maiura n ara beku n taabo ake ti teimatoa ni kaitiboo iai ma aomata aika rangi ni bati aika a kan ongora n te rongorongo ae n te Baibara. Ai boni kakukureira anne!”

KAITARAANI KANGAANGA

Ni koauana, iai kangaanga ni kaineti ma te mwakuri n taabo ake a kainnanoaki riki iai taan tataekina rongorongon te Tautaeka n Uea. Teuana te kangaanga iai boni boutokaam n te mwane. Ni karaoan anne, ko riai ni kukurei ni kaangaraoa arom nakoni baika riiriki n te tabo anne. E kabwarabwaraa ni kangai Verónica ae te bwaiania ae mwaatai: “N te tabo teuana are I mwakuri iai, ao I katauraoi ao ni kaboonakoi amwarake aika bobete n aron taiani mwakerukeru. N te tabo riki teuana, I kaboonakoi kunnikai ao ni korei iraia aomata. N taai aikai, I kakaitiaka te auti ao ni kaira naba te reirei ibukia taanga aika a a tibwa mare ni kaineti ma aroia n itoman ma natiia.”

E kona n rangi ni kangaanga kaangaraoan arom nakon te koaua teuana ao katei aika kakaokoro, ngkana ko maeka i buakoia aomata aika boni kaain te aba teuana n te aono ae kangaanga te roko iai. Aio are e riki nakon Phillip ma Racquel n aia tai ni beku n te aono ae kamanenaaki iai te taetae n Nahuatl. E taku Phillip: “E rangi ni korakora kaokoron te katei.” Tera are e buokiia ni kaangaraoi aroia? E reitia ni kangai Racquel: “Ti kaatuui ara iango i aoni baika raraoi ake ti nori i buakoia kaain Nahuatl n aroia n rangi ni kaan i marenaia, aia akoi ma nanoia ni koaua ni baike a karaoi i marenaia, ao kaotiotan te nano n tituaraoi. A bati reireiara n tikura ikanne ao mwakurira i buakoia taari ake boni kaain te aono anne.”

AROM NI KATAURAOIKO

Ngkana ko kani beku n taabo ake e kangaanga te roko iai ae kainnanoaki iai te ibuobuoki, tera ae ko kona ni karaoia ngkai bwa ko aonga n tauraoi? A taku taari ake a a tia n rinanon aei: Imwaini mwaingim, moana kabebeteani maium ao reireiniko bwa ko na nanoraoi ni baika a reke iroum. (I-Biribi 4: 11, 12) Tera riki ae ko kona ni karaoia? E taku Leticia: “I rarawa nakoni mwakuri ni kareketianti ake N na tiku iai ni mwakuri n te aono teuana i nanon te tai ae rangi ni maan. I tangiria bwa N na kona ni mwaing n taai nako n te tai ao nakon taabo ake e kainnanoaki iai te ibuobuoki.” E taku Hermilo: “I a rabakau ni kuuka, n uaati ao ni katira.” E taku Verónica: “Ngke I maeka ni mwengau ma au karo, tariu ma mwaaneu, I bubuoka kaitiakan te auti ma n reireinai kuukanakin amwarake aika bobete ma a baeranti. I bon reireinai naba ni kaikomwane.”

A taekina aroni buokaia mani mwanewean aia kangaanga n aia tataro Levi ma Amelia aika kaain te United States, ake a a tia n tekateka n taanga i nanon wanua te ririki bwa a a tauraoi nakon te beku i Mexico. E taku Levi: “Ti bairea ara kataumwane i nanon teuana te ririki ngkana ti na beku n te tabo ae tiaki abara, ao imwina ti a butiia Iehova n ara tataro bwa e na buokira bwa ti aonga ni karekea te mwaiti raoi anne.” Inanon tabeua te namwakaina, a a kona ni kaikoa te mwaiti are a mwaneweia n aia tataro, ao a a waekoa ni mwaing. E taku Levi: “E a tia ni kaekaa ara tataro Iehova are ti kaota raoi iai te bwai ae ti kainnanoia, ngaia are ngkai e a boo ara tai ni karaoa nanon ara tataro.” E reitia Amelia ni kangai: “Ti iangoia bwa tao ti na kona n tiku iai teuana te ririki, ma ngkai ai itua ara ririki n tiku iai ao ti aikoa iangoa kitanakina! Ti namakina ana ibuobuoki Iehova n tikura ikai n te tai naba anne. Ti nora koauan raoiroina ni katoabong.”

A rangi ni buokaki naba n aia tataro Adam ma Jennifer, ae te taanga man te United States ake a mwakuri n aononi Mexico ae kamanenaaki iai te taetae n Ingiriti. A taku te taanga aei: “Tai tataningai rikini baika raraoi. Kaotia n am tataro bwa ko kani beku n te aba teuana, ao imwina karaoa ae boraoi ma am tataro. Kabebetea maium, kororeta nakoni mwaangan te aobiti n tararua n am tabo ao kaota te aba ae ko kani mwakuri iai, ao imwini warebwaian te kataumwane, ko a riai ni mwaing!”a Ni karaoan anne, ko na bon taia iai te maiu ae kakukurei ao ni kaubwai ni bwaai n taamnei.