Ko Kona ni Karaoa ae Bati Riki Ibukini Kauringaaia Aomata?

Iai te birim ae akea bwanaaia aomata iai ae atuna A Trip Down Market Street are a rangi n anaaki nanoia taani mataku bwa e kaotaraeaki iai aroni maiuia aomata n aron are e riki i San Francisco, U.S.A., ni moan te ka-20 n tienture. A katokaa te kai n rawetaamnei ae karao birim i bon irouna taani karaobirim i moan te kaa ae okoro ae kakamanenaaki ibukin uotakia aomata nakoni maunga ao a kaineta kawain te botannaomata ake i moaia ae onrake ao n rongoaa. Kanoan naba te birim aei boni kaa aika kokokaki n te aoti ao katotongani kaa rimoa, n ikotaki naba ma taani boobwai ao taani kaboonakoi nuutibeeba ake a tabe ni karaoi tabeia ni katoabong.

Te bwai ae karika te kananokawaki n te birim aei bwa e bon raweaki n Eberi 1906, imwain raoi te mwaeiei ma te ai ae kamamate are a a mate iai aomata aika e raka i aon tenua tenga mwaitiia n Eberi 18 ike e a kuri ni mauna iai iteran te kaawa anne. Tao ai bon tii tabebong riki aia bong ni maiu tabeman ake a rangi n taraa ni marurung ake a noraki n te birim anne. E taku Scott Miles are kanoan temanna mai buakoia taani karaobirim: “I bon noriia aomata n te tai anne ake a aki ataa te bwai ae nang riki nakoia. Ao ko aki kona ni buokiia ma ko tii nanoangaiia.”

Iai naba katotongan raoi te kangaanga anne n ara bong aikai. Akea te bwai ae ti kona naba ni karaoia nakoia aomata ma ti na tii nanoangaiia. A bon tabe ni karaoi tabeia ni katoabong n akea ataakin te kabuanibwai ae e a rangi ni kaan ae imwaia, ae kamaunaan te waaki ae ngkai ao baika a kakaraoi ni maiuia . Ma e kaokoro ma te mwaeiei ae aki ataaki rokona, bwa iai nikiran te tai ibukini kauringaaia aomata nako taekan ana bong ni motikitaeka Iehova. Ko boni bae ni kamwawaa am tai teutana ni katoa wiki n tabetai bwa ko aonga n uataboa te mwakuri ni minita man te auti teuana ma teuana, ma ko kona ni karaoa ae bati riki ibukini kauringaaia aomata?

E KUKUREI IESU AO N TAURAOI N UARONGORONGO N TAAI NAKO

Moan te kakawaki ana katoto Iesu bwa e kukurei ao n tauraoi n uarongorongo n taai nako. E uarongorongo nakoia aomata nako ake e kaitiboo ma ngaiia n aron te tia rikoa te taekiti are e boo ma ngaia n te kawai ke te aine are e boo ma ngaia i taun te mwanibwa n tain te katawanou. (Ruka 19:​1-5; Ioane 4:​5-10, 21-24) E ngae naba ngkana e a tia Iesu ni kamwawaa ana tai ibukini katokani kuana, ma e kukurei n urua ana babaire anne bwa e aonga n angareirei nakoia aomata. E kaungaaki bwa e na karaoa ae bati riki ibukin nanoangaaia aomata, n oneani mwin are e na riki bwa te tia kakoaua ae akea nanona n te bwai ae karaoia. (Mareko 6:​30-34) Tera aroni katotongan nanon Iesu n umaki ni boong aikai?

A KABONGANAI AIA TAI NI KABANE

E boni maeka Melika n te auti ae bubura ae bati ruuna. A bati kaain rarikina aika ataei n te reirei ae a roko man aaba tabeua ake a kamanenai tareboon aika uouotaki aika karabaaki nambwaia ao a aki koreaki naba araia n te boki n tareboon. E kamanena raoi te tai ae okoro ni moana te maroro man te Baibara ma kaaina, ni kawain te rin nako iai ao n te elevator ae te kaintamwarake i nanon te auti. E taku: “I a bon iangoa te tabo aei bwa au aono n uarongorongo.” E uouotii booki n taetae aika kakaokoro Melika, ao a bati ake a butimwaei turaeki ao maekatin. E kaota naba taekan ara atureti ae kakawaraki n te Internet ae jw.org. E a tia neiei ni moana te reirei n te Baibara ma tabeman.

E rangi n tatauraoi naba Sonia n uarongorongo nakoia aomata nako. E mwakuri neiei n ana kiriniki te taokita, ao e katea tiana bwa e na uarongorongo nakoia raona ni mwakuri ni kabane. E moanna mani karekean ana tai n reiakini baika a kainnanoi raoraona ao aika tatangiri naba. Imwina, e a kamanena ana tai ni motirawa ibukin te katawanou ni maroro man te Baibara ma ngaiia n tatabemania nako. Ibukin anne, e a moana te reirei n te Baibara ma uoman raona ni mwakuri. E baireia naba bwa e na kamanena ana tai ni katawanou n te kawai n rin nakon te onnaoraki ni maroro iai ma te koraki ake a tataningaa tuoaia.

KAMANENAI RAOI AM TAI

E taekinna temanna are e maiu imwin te mwaeiei n 1906 bwa te bwai ae riki aei bon “te kabuanibwai ae te kabanea ni kakaiaki ae tuai man nonoraki n te kaawa ke te aba aei.” Ma a na aki rangi ni kakawaki kabuanibwai nako ngkana a kabotauaki ma te bong n irantanga ao ni karekekai ae kakamaaku ae na waekoa n roko i aoia “te koraki ake a aki ataa te Atua” ni kabane. (2 I-Tetaronike 1:8) E rangi n tangiriia aomata Iehova bwa a na bitii aia iango ao nanoia ao ni butimwaea te rongorongo ni kauring are a anganaki irouia taani Kakoaua ibukina.​—2 Betero 3:9; Te Kaotioti 14:​6, 7.

Iai mwiokoam bwa ko na kamataataia aomata ibukin ara tai aika karuanikai aikai, ao ni buokiia bwa a na tannako mani karaoan oin nanoia bwa a aonga n ukoukora Iehova. (Tebania 2:​2, 3) Ko kona ni kamanena raoi am tai ni kabane n uarongorongo iai nakoia raom ni mwakuri, kaain rarikim ao nakoia akana ko kaitiboo ma ngaiia ngkai ko tabe ni karaoi tabem ni katoabong? Ko na karaoa ae bati riki ibukini kauringaaia aomata?