Unimwaane n te Ekaretia Kam Kaungaia “Akana A Kua”?

Iai te nakonnano teutana iroun te tari te aine ae tuai n iein ae Angela,a ae e a bwakara 30 tabun ana ririki. E a tataningaia ngkai unimwaane n te ekaretia. Tera ae a na taekinna nakon neiei? E koaua bwa e a tia n aki roroko ni bobotaki tabeua n te ekaretia, ma bon ibukina bwa e a kua imwin ana mwakuri ni kabongnga n tararuaia kaara. Irarikin raraomaeakinani maiuna ni katoabong, e rangi n tabeaianga naba ibukin aorakin tinana.

Ngkana arona bwa ko na kawara Angela, tera arom ni kaungaa te aomata ae ‘e kua’ aei? (Ieremia 31:​25, BK) Te moan, tera arom ni katauraoi ibukin am kaungaunga ni kawaraia kaain te ekaretia ni mwengaia?

IANGOI MOA BAIKA RIKI NAKON TARIM N TE ONIMAKI

N tabetai, ti bane n rotaki n te kua ibukin ara mwakuri ni kareketianti ke mwiokoara n te ekaretia. N te katoto, e namakina te “mamara” te burabeti ae Taniera ngke e anganaki te miitara ae aki oota iai. (Taniera 8:​27, BK) Ma e buokaki ngke e kaoti nakoina te anera are Kabiriera. E anganaki Taniera te atatai iroun ana tia uataeka te Atua aei ni karaua nanona bwa a bon ongoraeaki ana tataro iroun Iehova, ao e tuangnga bwa boni ngaia ‘te aomata ae tatangiraki.’ (Taniera 9:​21-23, BK) N te tai teuana imwina riki, e a kakorakoraaki te burabeti are kua arei n taeka aika rineaki raoi mairoun te anera riki temanna.​—Taniera 10:19.

N aron naba anne, imwaini kawaran raom n te onimaki are e bae naba ni kua ke ni bwara nanona, karekea am tai n iangoi moa baika riki nakoina. Baikara kangaanga ake e kaaitara ma ngaai? E na kanga ni bane korakorana ni kangaanga aikai? Baikara aroarona aika raraoi ake e kaotiotii? E taku Richard ae ai 20 tabun ana ririki n unimwaane: “I kaatuua riki iaiangoani korakoran tariu.” E a manga taku riki: “N iangoan raoi baika riki nakoia imwaini kawaraia, e a bebete riki irou kamanenaan aanga ni kaungaunga ake a kaineti ma kainnanoia.” Ngkana iai unimwaanen te ekaretia riki temanna ae e na raoniko, e aera kam aki kaai ni maroroakina ana kangaanga te tari anne?

KARAU NANOIA TARIMI N TE ONIMAKI

Ko bae ni kakoauaa bwa e kona ni kamaamaa taekinan am namakin i bon iroum. Aio kabwarabwaraana: E bae ni kangaanga iroun tarim bwa e na bunrii bwaai ni kabane nakoia unimwaane n te ekaretia ake a kawaria. Tera ngkanne arom ae e na aki maamaa iai? E rangi n ibuobuoki ngkana ko moangare ma nanom ni koaua ao am taeka ni karaunano tabeua. Ni kawaraia taari ni mwengaia iroun Michael ae te unimwaane n te ekaretia n te maan ae raka i aon 40 te ririki, e aki toki ni moana ana taeka ni kangai: “Ko ataia ae te mwioko teuana ae rangi n tamaroa ibukia unimwaane n te ekaretia, boni kawaraia taari ni mwengaia ao kinaakia raoi. Ngaia are I a kamani kariariaa te bong aei bwa I aonga n roko iroum.”

Ko kona n iangoia bwa ko na tataro ma nanom ni koaua ni moan rokom irouna. E katuruturua te abotoro Bauro n ana tataro taekan aia onimaki, aia tangira ao nanomwaakaia taari. (1 I-Tetaronike 1:​2, 3) N taekinan am namakin n aroaroia tarim aika raraoi, ko a katauraoa iai nanom ao nanona ibukin te maroro ae uaana. A kona n riki naba am taeka bwa te bwai ni kabebetenano. E taku te unimwaane n te ekaretia ae mwaatai ae Ray: “N tabetai, ti bane ni mwaninga raoiroin te baere ti karaoia. Ngaia are ngkana iai ae kauringira, ti a kaungaaki riki iai.”

ANGANAKO ANA BWAINTITUARAOI TE ATUA

N aroni Bauro, ko kona n anga “te bwaintituaraoi mairoun te Atua,” man te kibu teuana n te Baibara. (I-Rom 1:11) N te katoto, e namakina ae akea uaana te tari te mwaane ae taonaki n te rawawata n aron te tia areru are e kabotaua arona ma “te batoro ae kunin te man i nanoni bubun te ai” ae maekeke. (Taian Areru 119:​83, 176, BG) Imwini kabwarabwaraan te kibu anne n te aro ae kimototo, ko kona ni kaotia nakon tarim anne bwa ko kakoauaa ae e ‘aki mwanuokin’ ana tua te Atua.

N te aro naba anne, e koaua bwa e kona te kaikonaki ibukini buan te mwane ae te turakemwa n ringaki iai nanon te tari te aine are e a tia n tiotionako man te ekaretia ke ni kekerikaaki n te onimaki? (Ruka 15:​8-10) E kona n ae te mwane ae bua anne bon teuana naba bwain naba te mwae n roroa ae kakawaki are e karaoaki man taiani mwane aika bati aika tirewa. Mani maroroakinan te kaikonaki anne, e a kona ni buokaki iai n ataakin ae boni ngaia naba kaain te ekaretia ni Kristian ae kakawaki. Imwini maroroakinan anne, katuruturua nakoina bwa e tabeakinaki raoi iroun Iehova kaanga temanna naba ana tiibu ae ataei.

A kukukurei n angiin te tai raora n te onimaki ni kaotii aia iango man te Baibara. Ngaia are tai tau booro n taian te maroro! Imwini warekan te kibu teuana, kaokoroa te taeka teuana ke te kibuntaeka ao tuangnga bwa e na kabwarabwaraa. N te katoto, imwini warekan te 2 I-Korinto 4:16 e kona unimwaanen te ekaretia n titiraki ni kangai: “Ko a tia namakina aron Iehova ni kabooua am iango?” E kona kabonganaan te anga aei ni kairiri nakon “te ikaungaunga i marenara.”​—I-Rom 1:12.

Ko kona naba ni kaungaa raom n onimaki mani maroroakinan te aomata temanna man te Baibara are e kona ni karakinna. E kona te aomata are e namakinna bwa akea uaana ni karakina tao Anna ke Ebaberorito, ake a taonaki naba n te rawawata n tabetai ma a teimatoa ni kakawaki iroun te Atua. (1 Tamuera 1:​9-11, 20; I-Biribi 2:​25-30) E aera ko aki maroroakini katoto tabeua aika raraoi man te Baibara ngkana e angaraoi ma ana kangaanga?

KAKAONIMAKI NI MANGA OKIRIIA

Ko kona ni kaota mwannanoaia ni koaua tarim ao mwaanem n te ekaretia n arom ni manga kawariia n nori aroia. (Mwakuri 15:36) N am kabanea n tai n okiriia, e uaana ngkana ko babaire bwa ko na toa ma ngaia n te mwakuri ni minita. Ngke e a manga okira te tari temanna are e a tibwa tia ni kawaria te unimwaane n te ekaretia are Bernard, e bae ni kauringnga te taeka n reirei are e anganna n titirakinna ma te akoi ni kangai: “E uara, e nakoraoi iroum?” Ngkana ko kaota te mwamwannano anne, ko a kona ngkanne n ataia bwa tao e na kainnanoa te ibuobuoki imwina riki ke e na aki.

Ma ae kakawaki riki, a kainnanoa mwannanoaia tarira ao mwaanera, a na ataaki aia kangaanga ao n tangiraki. (1 I-Tetaronike 5:11) Mangaia are imwaini kawaraia taari ni mwengaia, karekea am tai n iaiangoa aron tarim. Uringnga n am tataro. Rinei kiibu man te Baibara aika a tau ibukina. Ngkanne, ko a kona iai n taekin taeka aika raraoi ni kaungaa ‘ane e kua’!