Bukin Tera Bwa A Iangoia Tabeman Bwa A Aki Kainnanoa te Atua?

“Ngkoe naba temanna ae ko aki kakoauaa bwa ko kainnanoa te Atua? A kakoauaa anne mirion ma mirion aomata.” Anne are e taekinaki n taai aika tibwa nako n te baba ni kaongora are e kabooaki irouia aomata ake a kakewea ae iai te Atua. E teretere iai bwa a namakinna ae a aki kainnanoa te Atua.

N te itera are teuana, a bati ake a taku bwa a kakoauaa ae iai te Atua ma a karaoi aia motinnano kaanga aron ae akea te Atua. E taku te akebikobo n te Aro ni Katorika ae Salvatore Fisichella ibukia kaain ana Aro: “Ngkana a matakuakinira aomata tao bon akea ae na kinaira bwa Kristian, ibukina bwa titeboo aroaroni maiura ma aomata aika tiaki taan onimaki ni boong aikai.”

A rangi n tabetabe aomata n te aro are a akea aia tai n iaiangoa te Atua. A iangoia bwa e rangi n raroa nako ke e kangaanga kakukureiana n te aro are ai akea manenani karaoan tabeia aika kakawaki ni maiuia. Ni koauana, a aki iaiangoa te Atua ma tii ngkana a reke n te kangaanga ke a kainnanoa te bwai teuana, kaanga aroni kainnanoan te toro ae riai n tatauraoi nakon te bwai ae na tuangaki.

A aki maiuakina ae reiakinaki n aia Aaro tabeman tao ibukina bwa a iangoia bwa akea kakabwaiaaia iai. E kangai te katoto teuana: A kakoauaa 76 te katebubua kaain te Aro ni Katorika i Tiaman, bwa e raoiroi te tekateka n taanga iroun te mwaane ao te aine imwaini mareia, ae te iango ae kauntaba nakon reirein aia Aaro ao te Baibara. (1 I-Korinto 6:18; I-Ebera 13:4) Ni koauana, tiaki tii kaain te Aro ni Katorika aika aki maiuakina ae a kakoauaa. A bwaebwaeti mataniwi n Aaro aika kakaokoro bwa titeboo aroaroia kaain aia ekaretia ma “aomata aika aki kakoauaa ae iai te Atua.”

A kairiri katoto aikai nakon te titiraki aei: Ti boni kainnanoa te Atua? E aki boou te titiraki aei. Bwa e boni moan tabekaki ni moanibaan te Baibara. Ngkana ti kani karekea kaekaana, ti bia neneri titiraki aika bati aika tabekaki ni bokin te Baibara ae Karikani Bwaai.