“E Tangira Ane Anga ma Kukurein Nanona [te Atua]”

Tera te bwaintangira ae ko na namakinna iai bwa ko rangi n tangiraki? Akea te nanououa bwa a kukurei angiina mai buakora ni karekea te bwaintangira mairoun temanna ibukin ana tangira ma tiaki ibukin te mwioko ke e kabaeaki bwa e na karaoia. E irekereke te anganga ma te nano. E boni kakawaki iroura. Ma ae manena riki, e rangi ni kakawaki iroun te Atua. Iangoi ana taeka te abotoro Bauro n 2 I-Korinto 9:7 aika kairaki koreaia rinanon te taamnei.

Bukin tera bwa e korei taeka akanne Bauro? E tangiria bwa e na kaungaia Kristian ake i Korinto bwa a na boutokaa te mwakuri ibukini kabebeteaia raao n te onimaki aika maiu ni kainnano i aon Iuta. E kataia ni kairoroia kaaini Korinto bwa a na anganga? Ni kaitaraan anne, e korea ae kangai Bauro: “Ke e karaoa ae e kataua i nanona temanna ma temanna, tiaki n aron ae akea nanona iai ke e tebonaki nako iai, bwa te Atua e tangira ane anga ma kukurein nanona.” Ti na karaua raoi n rinanon te kaungaunga anne.

“E kataua i nanona.” E ataia Bauro bwa e anganga te Kristian ni koaua ibukina bwa e a tia ni motikia bwa e na anga mai “nanona.” N te tai naba anne, e kabanea korakorana te Kristian ibukini kainnanoia raona n taromauri nakon are e na tii iaiangoia. E taku temanna te tia rabakau bwa te moan taetae ae rairaki bwa “kataua,” “e irekereke ma te iango ae e a kamani baireaki.” Mangaia are e iaiangoi baika a kainnanoi raona n te onimaki te Kristian ao e titirakinna i bon irouna bwa tera ae kona ni karaoia bwa e aonga ni karekei baikanne.​—1 Ioane 3:17.

“Tiaki n aron ae akea nanona ke e tebonaki nako iai.” E nori aanga aika uoua Bauro ni kaineti ma te anganga aika a aki riai n reke irouia Kristian ni koaua, n aron te rarawa ao te kairoroaki. Te taetae ni Kuriiti ae rairaki bwa “akea nanona” ae nanona raoi “karaoia ma te nanokawaki (ke te rawawatannano).” E kabwarabwaraaki n te boki teuana bwa ngkana e anga te aomata n akea nanona iai ke e rawa, e a anga ngkanne “ma nanona ae nanokawaki n iangoan ae nangi nako ana mwane.” E anga te aomata ae kairoroaki bwa e na anga ibukina bwa e namakina imanonoana iai. Antai raoi mai buakora ae kan anganaki te bwaintangira mairoun te aomata ae rawa n anga ke ae kairoroaki iai?

“E tangira ane anga ma kukurein nanona [te Atua].” E taekinna Bauro bwa n te tai are e iangoia iai te Kristian bwa e na anga te bwai teuana, e riai ni karaoia ma kukurein nanona ke ma te kimwareirei. Ni koauana, e reke te kukurei imwin te anganga ae iangoaki raoi. (Mwakuri 20:35) E rangi ni kai noraki kimwareirein te tia anga ae kukurei nanona. Ni koauana, e kona ni kabwarabwaraaki nanon raoi te taeka ae “kukurein” bwa kaotiotan raoi ao kukurein nanon te tia anga. A ringaki nanora iroun te tia anga ae kukurei ao ai uana naba ma te Atua. E taekinaki ae kangai n te rairai riki teuana: “E tangira te aomata ae e waerake nanona ni kan angabwai [te Atua].”​—Te Baibara.

Bon te boto n reirei ibukini kairaia Kristian ni kaineti ma te anganga ana taeka te abotoro Bauro aika kairaki koreaia rinanon te taamnei. E ngae ngkana ti anga ara tai, korakorara ke ara bwai aika iai iroura, ma ti bia karaoi ma kukurein nanora ao ibukin naba namakinan te kukurei ni koaua n akoaia aomata ai moarara riki te koraki aika maiu ni kainnano. E na aki tii karekea kukureira te anganga anne ma e karekea naba tangirara iroun te Atua ibukina bwa e “tangira ane anga ma kukurein nanona.”