“Ko Kaotii Nakoia Merimeri”

Ko kan ataa te koaua ibukin te Atua bwa antai ngaia, tera ae tangiria ma n ribaia ao tera ana kantaninga? E kaota te koaua ni kabane ibukina Iehova ae te Atua rinanon ana Taeka ae te Baibara. Ma a bon aki kona aomata nako ni wareka te Baibara ao n ota raoi n te koaua anne. Bukin tera? Ibukina bwa te ota raoi n te koaua ibukin te Atua bon te kakabwaia mairouna ae a aki kona ni karekea aomata ni kabane. Ti na rinanon te bwai ae taekinna Iesu ni kaineti ma aei.​—Wareka Mataio 11:25.

E moanaki te kibu anne n taeka aikai: “N te tai anne ao e taetae ni kangai Iesu.” Ngaia are te bwai are e nang taekinna Iesu, bon arona nakon te bwai are e a tibwa riki. E a tibwa tia ni boaia aomata ake a rawa n riki bwa taan rimwina ni kaawani Kariraia aika tenua ake e a tia ni karaoi iai kakai aika anainano. (Mataio 11:​20-24) Ko kona n iango ni kangai: ‘A kanga aomata ake a nora ana mwakuri ni kakai Iesu n aki onimakini koaua ake a reiakinaki iai ao n aki kakairi irouna?’ E irekereke rawaia aomata akanne ma aroia n imanono.​—Mataio 13:​10-15.

E ataia Iesu bwa ngkana ti kan ota n te koaua ibukin te Atua n te Baibara, ti kainnanoi baika uoua aikai: Ana ibuobuoki te Atua ao te nano ae raoiroi. E kabwarabwaraa ni kangai Iesu: “I karaoiroiko i mataia aomata Tamau ae Ueani karawa ma aonnaba, bwa ko karabai baikai mairouia aika wanawana ao aika rabakau, ma ko kaotii nakoia merimeri.” Ko nora bukina ngkai e kona n iangoaki te ota n te koaua man te Baibara bwa bon te kakabwaia? E inaomata Iehova n rineia bwa antai ae e na kaota nakoina te koaua, ngkai boni ngaia “Ueani karawa ma aonnaba.” Ma a kona ni karekei kakabwaiaaia aomata n ota n te koaua bwa e aki inanonano te Atua. E boto i aon tera kaotan ao aki kaotan te koaua n te Baibara nakoia tabeman iroun te Atua?

E akoiia aika nanorinano Iehova ao tiaki akana kainikatonga. (Iakobo 4:6) E karabai koaua mairouia akana “wanawana ao aika rabakau,” ae a nanonaki iai aomata aika rabakau ni bwain te aonnaba ao aika kamoamoa n aki butimwaea ana ibuobuoki te Atua. (1 I-Korinto 1:​19-21) Ma e kaota te koaua nakoia “merimeri” aika aomata ake a kawaria ma nanoia ae raoiroi, ao ni kaotiota te nanorinano n aroia ataei. (Mataio 18:​1-4; 1 I-Korinto 1:​26-28) E kinaia raoi aeka n aomata aika uaekaki akanne Iesu are Natin te Atua. A bati mataniwi n Aaro aika rietata aia reirei ao ni kamoamoa ake a aki ota n ana rongorongo Iesu, ma a ota iai taan akawa aika nanorinano. (Mataio 4:​18-22; 23:​1-5; Mwakuri 4:13) N te tai naba anne, a riki bwa taan rimwin Iesu tabeman aomata aika kaubwai ao n rietata aia reirei ake a kaotiota te nanorinano ni koaua.​—Ruka 19:​1, 2, 8; Mwakuri 22:​1-3.

Ti na okirikaki nakon te titiraki are e tabekaki mai moa: Ko kan ataa te koaua ibukin te Atua? Ngkana ngaia anne, ko kona ni karekea kabebetean nanom n ataakin ae e bon aki akoiia aomata te Atua aika a iangoiia bwa a rabakau ni bwain te aonnaba. Ni kaitaraan anne, e akoiia aomata aika a kakeaaki bongaia irouia aomata aika rabakau ni bwain te aonnaba. Ngkana ko reiakina Ana Taeka te Atua ma te nano ae raoiroi ao n nanorinano, ko bae ni mena i buakoia te koraki ake a anganaki te bwaintituaraoi iroun Iehova ae te ota i aon te koaua ibukina. Ibukina bwa ko a ota raoi n te koaua anne, e a kona n irianaki maium ngkai n te kukurei ao ni kairiko nakon “te maiu ni koaua” are akea tokina n te waaki ae boou ae raoiroi i aon te aba ae e a kaan rokona are e beritanna te Atua.a​—1 Timoteo 6:​12, 19; 2 Betero 3:13.