Nakoia Taani Wareware

E moanaki boreetian te maekatin ae ko warekia ngkai n Turai 1879. A bibitaki taai mangkekei ni karokoa ngkai ao ai uana naba ma te maekatin aei. (Nori taamnei akana i eta.) Ni moa man te kaongora aei, ao ko na nori bitaki riki tabeua nakon tein Te Taua-n-Tantani. Tera te bwai ae e na kaokoro iai?

N aaba aika bati, a a rikirake ni mwaiti aomata aika a kukurei n ukeri rongorongo n te Internet. A kona ni karekei rongorongo aika tauraoi, ni kamanenaan te mouse ae bwain te kaombiuta are e a bebete iai karekeaia tii n te Internet. A bati booki, maekatin ao nuutibeeba aika a kona ni warekaki naba iai.

Ibukina bwa a rangi ni bati aomata aika a kani wareki rongorongo aikai n te Internet, ti a bita te atureti anne nakon www.pr418.com bwa e aonga ni katika riki te nano ao ni bebete kamanenaana. A kona ni wareki booki aomata aika a kawara te atureti anne n taetae aika raka i aon 430 mwaitiia. Ma ni moa man te namwakaina aei, a a kona naba ni wareki rongorongo ake a tia n rineaki aika a katoatai ni boreetiaki ngkoa n te maekatin, ma ngkai a a kona n reke n tii te atureti ane e bitaki anne.a

Kioina ngkai iai riki kaongora aika ti na katanoatai tii n te Internet, e nang kauarerekeaki baan te Maekatin Ibukia Aomata Nako ae Te Taua-n-Tantani man 32 nakon 16 ni moa man te maekatin aei. E a kaman boreetiaki Te Taua-n-Tantani nakon taetae aika 204 mwaitiia. E a kona ngkai n rairaki te maekatin aei nakon taetae aika raka mwaitiia ngkai e a uarereke riki teina.

Bon ara kantaninga bwa e na kona n reke te rongorongo ni kakamaiu man te Baibara irouia aomata aika bati riki, mani bitaki aikai. Bon nanora bwa ti na teimatoa ni katauraoi bwaai n ibuobuoki ibukini kaotaaia aomata ao rongorongo riki aika ringa te nano ni booki aika boreetiaki ao ake n te Internet, bwa a aonga ni kakabwaiaaki taani wareware aika bati, aika a karinea ao a kan ataa te reirei ni koaua man te Baibara.

Taani Boreeti