Ko Ataia?

Tera aroni maiuia tooro n ana tai n tautaeka Rom?

A mwaitikurikuri ake a a riki bwa tooro imwini buakanakia ke iraeakia n te Embwaea n Rom. A kaboonakoaki naake a taenikai ao a aki roko n te manga nori mwengaia ke aia utu.

A bati tooro ake a kammwakuraki n uaa mateia n taabo ni keni koora ao taani mwakuri n taabo n ununiki ao taani kaitiaki, a anganaki te mwakuri ae raoiroi riki. E kona ni kairoroaki te toro bwa e na mwaena te biti ae kaotaki iai te kaniwanga ae na reke nakon ane e kaoka te toro anne nakon ana toka ngkana e rabanako. Ao tooro ake a kataia n okioki n rabanako, a na kanikinaeaki n angiin te tai i aon ramwaia ni manin te taeka ae F ibukin te taeka ae fugitivus (ae te tia rabanako).

E maroroakinaki ni bokin te Baibara ae Biremon aron te abotoro Bauro ni kaoka te toro are rabanako ae Onetimo nakon ana toka are Biremon. E ngae ngke e eti i aan te tua bwa e na katuuaaeaki n te aro ae kakaiaki Onetimo irouni Biremon, ma e tuangaki teuaei irouni Bauro bwa e na “butimwaea raoi teuaei ma te akoi” ae boto i aon te tangira ma ana iraorao ae kaan.—Biremon 10, 11, 15-18.

Bukin tera bwa e rangi n tanoata taekani Boinike rimoa ibukin ana bwai ni kataa ae te beboo?

E kuri n titeboo Boinike ma te aba ae ataaki ni boong aikai bwa Rebanon man ana bwai ni kataa ae ingoanaki ni kaawana ae Turo bwa te kataa ae te beboo mai Turo. E katamaroaa ana tembora Toromon are aia Uea tibun Iteraera rimoa ma “te karai ae beboo, ae uraroo” are e karaoaki iroun te tia karaobwai mai Turo.​—2 Rongorongo 2:13, 14, NW.

E rangi ni bobuaka te kataa ae te beboo mai Turo n taai akekei ibukina bwa e kainnanoaki iai te mwakuri korakora ni karaoana n aaro aika bati. Te moanibwai, a rangi ni karawatai n rikorikoi buuroo taan akawa.a E kainnanoaki mwaitini buuroo aika 12,000 mwaitiia ake a na kabonganaaki ni karaoan te kataa ibukin teuana te kunnikai. Imwina, a a manga kanakoaki kanoani buuroo aikai bwa a aonga ni kona n anaaki bwain nanoia ibukin te kataa. A renganaki baikai ma te taoro irouia taani karao kataa ao n taawai i tinaniku nakon te ang ma te riringa i nanon tenibong. Imwina, a katukaki i nanon te turam ao ni kabuaneaki ma taari i nanon tabebong riki.

A a tia kaaini Boinike ni kateimatoa aia waaki ni bitineti ao aia konabwai ni karaoa te kataa ae beboo mai Turo ibukin iokinibwaiana i nanoni bubua ma bubua te ririki. A a tia ni kuneaki mwaeran aia kataa n taabo nako n Taari ae te Meriteranian ao n roko naba i meangin Cádiz, i Tibein.