Tera te Kantaninga Ibukia Au Bakatibu?
TABEUA te tai n nako ao e a kaoti te katanoata ae kamimi n te nuutibeeba ni Korea ae The Chosun Ilbo. Iai te titiraki i nanona ae kangai: “‘Shim Cheong ae Moan te Tamaroa Aroarona,’ Are Akea te Bwai ae E Ataia Ibukin Iesu—E koaua Bwa E Nako Moone Neiei?”
E ringa te nano te katanoata anne ibukina bwa e rangi n tatangiraki te ateiaine ae Shim Cheong n taiani karaki mai Korea, are e anga maiuna ni buoka tamana ae mataki. E rangi ni kamoamoaaki neiei i nanon ririki aika bati. Ni koauana, e a tia n tataekinaki “Shim Cheong” i Korea bwa te banna ni katoto ibukin te nati te aine ae rangi ni mwamwannano.
A iangoia aomata aika bati bwa e taraa n aki eti ke n ribuaka te iango ae e na katuuaaeaki n te ai ni moone te aomata ae rangi ni kakateke aroarona tii ibukina ngkai tiaki te Kristian neiei ae e a tia ni bwabetitoaki. Ni koauana, e iangoaki te karaki anne bwa e a kaman riki imwain tataekinan te rongorongo ibukin te Kristo n ana kaawa neiei.
Iai n te nuutibeeba anne te maroro ma te mataniwi n te Aro teuana. E bon titirakinaki bwa a riai ni bane n nakon te ai ni moone naake a a tia ni mate ao a tuai n reke aia tai n reiakina taekan Iesu ke a aki. Ana kaeka iai? “Ti aki ataia. Ti bon tii katautaua bwa e na bae n iai ana babaire te Atua [ibukia aeka n aomata akanne].”
TE BWAI AE KAINNANOAKI IBUKIN TE KAMAIUAKI
E taekinaki ae kangai n The New Catholic Encyclopedia: “E rangi ni kainnanoaki te bwabetito ibukin te kamaiuaki. E bon taekinna Kristo bwa ngkana e aki manga bungiaki temanna n te ran ao n te Taamnei ae Raoiroi, e bon aki kona n rin n Ana Tautaeka n Uea te Atua (Ioane3:5).” Ibukini ngkanne aei, a a kakoauaa tabeman bwa imwini mateia ake a tuai ni bwabetitoaki, a na boni karenakoaki nakon te ai ni moone ke ni kammarakaki n aaro riki tabeua.
Ma e ngae n anne, a bati riki aika a iangoa te koaua anne bwa te iango n nanobaba. A a bon tia ni mate mirion ma mirion aomata n akea ataakin te Atua. A riai ni kammarakaki n aki toki? Tera ae taekinaki n te Baibara ni kaineti ma aei?
TE KANTANINGA AE BERITANAKI N TE BAIBARA
E kamatataaki raoi n te Baibara bwa e aki kakeai bongaia aomata aika maiu n akea ataakini baike e tangiri te Atua. A karauaki nanora ni Mwakuri 17:30 ni kangai: “E aki mutiakin taai ake a ronnano iai aomata te Atua.” Tera ngkanne te kantaninga ae n te Baibara ibukia naake a a tia ni mate ao e tuai n reke aia tai n reiakina taekan te Atua?
E kona n noraki te kaeka n ana taeka Iesu nakon te kamwarua are e mate irarikina. E taku teuaei nakon Iesu: “Uringai ngkana ko a roko n am tautaeka n uea.” Tera ana kaeka Iesu? “E koaua ae I tuangko n te bong aei, Ko na mena ma ngai n te Bwaretaiti.”—Ruka 23:39-43.
E berita Iesu bwa e na nako karawa te mwaane anne? E bon aki. E tuai n rinanon te “manga bungiaki” n te ran ao te taamnei te mwaane anne, aika bwaai aika a riai n reke ibukin te rin n te Tautaeka n Uea i karawa. (Ioane 3:3-6) Ma e boni berita Iesu bwa e na manga maiu te kamwarua anne n te Bwaretaiti. Ngkai boni kaain te baronga ae Iuta te mwaane anne, e boni bae n ataa aron te Bwaretaiti i aon te aba ae te onnaroka i Eten n aron ae taekinaki ni moani bokin te Baibara. (Karikani Bwaai 2:8) E reke iroun te mwaane anne te kantaninga ae koaua ibukin te mangauti nakon te Bwaretaiti are e na manga riki nakon te aonnaba man ana berita Iesu.
Ni koauana, e beritanaki n te Baibara ae a na “mangauti akana raoiroi ma akana aki raoiroi.” (Mwakuri 24:15) Te koraki “akana aki raoiroi” bon naake a aki atai ana kaetieti aika raraoi te Atua ibukina bwa a tuai atai ana kantaninga. E na boni kauta te kamwarua are e aki raoiroi Iesu are e taetae ma ngaia, ao ai uana naba ma aomata aika mirion ma mirion ke tao birion ma birion ake a a tia ni mate n akea ataakin te Atua irouia. Ao ngkanne, a na bon reireinaki baike e tangiri te Atua n te Bwaretaiti ao e nang reke aia tai ni kaotiia bwa a bon tangira te Atua n aroia n ongeaba nakon ana tua.
KAUTAKIA AKANA AKI RAOIROI
E na boto motikan taekaia akana aki raoiroi i aon aia mwakuri rimoa ngkana a kautaki? E na aki. Bwa e taekinaki ae kangai n I-Rom 6:7: “Ane mate ao e a bwara baena man ana bure.” A na kabwakaa boon aia bure akana aki raoiroi ngkana a mate. Ngaia are e na boto motikan taekaia i aoni baika a karaoi imwini kautakia, ma tiaki ni baike a karaoi ngke a tuai n ataa taekan te Atua imwaini mateia. A na kanga ni kakabwaiaaki?
Imwin te mangauti, e na reke aia tai akana aki raoiroi n reiakin ana tua te Atua, ake a na kaotaki ngkana a a kaukaki nira ni boki ni kaikonaki. Ao ngkanne, a nang motikaki taekaia “ni kaineti ma aia mwakuri,” ae nanona bwa a ongeaba n ana tua te Atua ke a aki. (Te Kaotioti 20:12, 13) Ibukia akana aki raoiroi aika bati, bon tiaki aei aia kauoua n tai ma bon aia moan tai ni karekea te maiu ae aki toki i aon te aba man reiakinan ao karaoan nanon te Atua.
A bati aika a a tia ni buokaki bwa a na manga onimakina te Atua man te waaki n reirei n te Baibara aei. Temanna mai buakoia bon Yeong Sug. E rangi ni kakaonimaki neiei n te Aro ni Katorika. Bon taian tama kaain ana utu. Ibukina bwa e iangoia bwa e na tina, e a rin n aia tabo tiina. E kitana te tabo aei imwina riki ibukina bwa e aki kukurei n te bwai ae waakinaki iai. Ma ae kakawaki riki, e aikoa kona ni kakoauaa te reirei ibukin te ai ni moone ibukina bwa e iangoia ae kammarakaia aomata n te ai ni moone bon akea etina ke akea te tangira iai.
Imwina, e a kaotii taeka aikai man te Baibara temanna Ana Tia Kakoaua Iehova nakon Yeong Sug: “Akana maiu a bon ataiia ba a na mate: ma a bon aki ata te bwai teuana akana mate, ao bon akea riki boon aia makuri.” (Te Minita 9:5, BG) E buokaki neiei iroun te tia Kakoaua aei bwa e na ataia ae a bon aki kammarakaki n te ai ni moone ana bakatibu. Ma a a boni matu ni mate ao ni kariariaa kautakia.
Kioina ngkai e a ataia Yeong Sug bwa a bati aomata aika a tuai n ongo te koaua man te Baibara, e a mutiakin ana taeka Iesu aika ni Mataio 24:14 aei: “E na tataekinaki te rongorongo ae raoiroi aei ae taekan te tautaeka n uea, n te aonnaba ni kabutaa bwa te bwai ni kaotioti nakoia botannaomata ni kabaneia, ao ngkanne e a roko naba te toki.” E a uataboa ngkai tataekinan te rongorongo ae raoiroi neiei ao e tibwaa nako ana kantaninga ake a boto man te Baibara aika moan raraoi ma tabemwaang.
“E AKI INANONANO TE ATUA”
Ti tuangaki n te Baibara bwa “e aki inanonano te Atua, ma a butimwaeaki irouna aomata ni kabaneia aika maakua ma ni kakaraoa ae raoiroi, mai buakoia botannaomata nako.” (Mwakuri 10:34, 35) Bon aei te motikitaeka ae kororaoi ae ti bane ni kona ni kantaningaia mairoun te Atua ae “E tatangira te raoiroi ma te kaetitaeka ae riai.”—Taian Areru 33:5, BG.