I buakana te ribuaka ao te tiritiri I bon irou

AROU RIMOA:

I ikawairake n te kaawa ae Rmaysh, irarikin te tia are i marenan Iteraera ma Rebanon, n tain te boo ni buaka i marenaia kaain te aba. I rangi n ururingia aomata ake a mate aika akea aia bure man rebwetauani boom ao aika akea baia ke waeia. E a kangaanga te maiu ao e a butanako te mwakuri n iowawa ao n tiritiri.

Boni kaain te Aro ae te Maronite ara utu are teuana mai buakon te Aro ni Katorika mai Mainiku. E tabetabe Tamau n taai nako ibukini katauraoani baike ti kainnanoi ni maiura ngaira aika tengauni ma uoman ao Tinau e taraira raoi bwa ti na bane n nako n taromauri. Imwin te tai ae aki maan, I a moanna n namakinna bwa titeboo aron te Aro ao botannaomata ni kabane bwa akea aia ibuobuoki nakoia aika mamaara.

Ngke tebwi tabun au ririki, e a rikirake tangiran te karate irou. I rinanon te reirei ni kataneiai ae matoatoa ao ni karekea riki rabakau, I a mwaatai n oro ni baiu ma waeu ao ni kamanenai naba bwaai ni karate aika kakaokoro. I taku i bon irou, ‘I aki kona ni katoka te buaka, ma I tii kona ni kataia ni katokiia taan tiritiri.’ N te tai are I noriia iai uoman aomata bwa a un, I a waekoa naba ngkekei ni katokiia. I rangi ni kakaiun, e ngae ngke te bwai ae uarereke naba. A mamaakai aomata ni kabane ake i Rebanon maiaki, ngkai I buakana te ribuaka ao te tiritiri i bon irou.

N 1980, I a kaaina te kirabu ni karate i Beirut. A bwakabwaka ni katoabong boom, mitiaera ao rokete ma I bon nako naba n irira au kataneiai. Aroni maiu n taai nako bon tii te amwarake, te matu, ao te riki bwa kanga aekakini Bruce Lee, ae te abwakaati n Tiaina ao n Amerika are te aekita ao te tiambion n te karate. I katotonga tein irana, nakonakona, ao takaruana ngkana e karate. I bon aki kona n wingare.

ARONI BITAKINI MAIU MAN TE BAIBARA:

Tiau bon te riki bwa te tia karate ae rangi ni bwakuaku i aon Tiaina. N te tairiki teuana, ngke I kakorakoraai ni kataneiai ni katauraoai ibukin te mwananga nako Tiaina, ao I a ongo naba te karebwerebwe n au mataroa. E roko raoraou ma Ana Tia Kakoaua Iehova aika uoman. I boni kunnikainai n te kunnikai ni kataneiai ae roroo ma ni bwarara maonou ao I taku nakoia, “Akea au atatai n te Baibara.” I bon aki ataia are e nang bitaki maiu man te tai anne.

A kaotia taani Kakoaua nakoiu man te Baibara bukina ngkai a aki kona aomata ni kamauna te ribuaka ao te tiritiri ni kabane n oini korakoraia. A kabwarabwaraa bwa bon Tatan te Riaboro ae karikii aeka ni kangaanga akanne. (Te Kaotioti 12:12) I rangi ni mimi n aroia n rau ao n aia aki nanououa taani Kakoaua. Ao e anaaki nanou ngke a a manga kaota aran te Atua nakoiu. (Taian Areru 83:18) A kaota naba nakoiu 1 Timoteo 4:8, ae warekaki iai ae kangai: “E manena teutana te kamarurung n te rabwata, ma e manena tangiran te Atua ibukini bwaai nako, bwa e irekereke ma te berita ibukin te maiu ngkai, ao are na roko.” E korakora rotakini maiu n taeka aikai.

E kananokawaki bwa I a aikoa manga reitaki ma taani Kakoaua, e riki aei ibukina bwa a tuangaki irouia au utu bwa a na aki manga oki n roko. E ngae n anne, I a iangoia bwa N nang katoka au kataneiai n te karate ao ni moana reiakinan te Baibara. A aki kukurei n au iango tariu ma I motinnanoia bwa N na manga kakaaeia Ana Tia Kakoaua Iehova ao n reirei n te Baibara ma ngaiia.

I teimatoa ni kakaaeia taani Kakoaua ma a bon aki reke. N te tai anne, I a rangi n taonaki n te nanokawaki bwa e a karina naba ni mate tamau n ikotaki naba ma kabuanibwai riki tabeua n au utu. I a tia ni moana au mwakuri n te kambwana ni kateitei ao n te bong teuana, e kateai raou ni mwakuri ae arana Adel ma n titirakinai bwa e aera ngkai I mata n rangi n nanokawaki. E a moana ngkanne taekinan te kantaninga ibukin te mangauti man te Baibara. Imwin ruaiwa namwakaina, e a nanorinano n reirei ma ngai n te Baibara te tia Kakoaua ae tatangira ao n akoi aei.

Ngke e a waakinako ara reirei n te Baibara, I a moanna n nori baika a kainnanoaki ibukini karaoani bitaki aika korakora n aroarou. E bon aki bebete aei bwa I unun n taai nako ao ni kai urarake. I a rabakau n taotaona nanou man reiakinan te Baibara ao n aki waekoa ni karaoi mwakuri ni kabane ake I kani karaoi. N te katoto, e anga ana reirei ni kairiri Iesu ni Mataio 5:44 ni kangai: “Teimatoa n tangiriia aomata aika kairiribai nakoimi, ao tataro ibukia ake a bwainikiriningkami.” Ao ti kauringaki ni kangai n I-Rom 12:19: “Tai irantangaingkami . . . bwa e koreaki ae kangai: ‘“E taku Iehova: Au bwai te irantanga, N na kabooi mwin aia mwakuri aika bubuaka.’” I buokaki ni kiibu aikai bwa N na bwaina te rau teutana imwin teutana.

AROU NI KAKABWAIAAKI:

E ngae ngke a kaitaraa au motinnano au utu n te moantai are N na reirei n te Baibara ma Ana Tia Kakoaua Iehova, ma a a moanna ni karineia taani Kakoaua. Ni koauana, e irai n taromauria Iehova tariu temanna ae karimwiu ao e tei ibukin ara onimaki Tinara ni kaaitaraia tabemwaang ni karokoa matena.

I a tia naba ni kakabwaiaaki n rekeni kaainnabau ae kakaonimaki ni koaua ae Nei Anita are I tangiria, ae raou ni kabwanina ara tai n te mwakuri ni minita. Ni moa man 2000, I a maeka ma Anita i Eskilstuna, Sweden ao n ibuobuoki n reireinia aomata ake a taetae n Arabia man te Baibara.

I bon teimatoa naba n nanoangaia aomata ake a karawawataaki n te tiritiri. Ma n ataakin raoi bukin rikin anne ao ataakin ae e nang waekoa ni katokia te Atua, I a kimwareirei ni koaua ao n rau.​—Taian Areru 37:29.