Te Kabotau Ae Te Kabanea Ni Manena Ae Ko Riai Ni Karaoia
KO IANGOIA bwa te Kristian ngkoe? Ngkana eng ao ngkoe naba temanna i buakoia aomata aika raka i aon uoua te birion n te aonnaba, ae tao 1 ni katoa 3 te aomata ake a taku bwa taan rimwini Kristo ngaiia. Ni boong aikai ao iai nga ma nga Aaro aika aranaki bwa Kristian, ma a bwenaua ibukini kauntaban aia reirei ao kakaokoron aia iango. Ngaia are e na bae n rangi ni kaokoro am koaua ma Aaro ake a taku bwa Kristian naba ngaiia. E kakawaki te bwai ae ko kakoauaa? Eng, e kakawaki ngkana ko kani maiuakina te reirei ni Kristian ae reiakinaki n te Baibara.
A kinaaki taan rimwini Iesu Kristo rimoa bwa “Kristian.” (Mwakuri 11:26) A aki kainnanoaki aara riki tabeua bwa a na kinaaki iai, kioina ngke bon tii teuana te onimaki ni Kristian n te tai anne. A katiteuanaaki Kristian i aan ana reirei ma ana kaetieti Teuare Moani Katea te Aro ni Kristian, ae Iesu Kristo. Tera aron am Aro? Ko kakoauaa bwa e angareirei i aon ana reirei Kristo ao baike a kakoauai taan rimwini Kristo rimoa? Ko na kangaa n ataa raoi anne? Bon tii teuana angana, ae kabonganaan te Baibara bwa te kai ni baire.
Iangoa aei: E korakora iroun Iesu Kristo karinean te Koroboki ae Tabu bwa bon ana Taeka te Atua. E aki kukurei irouia naake a kamemeerei ana reirei te Baibara n aroia ni moanibwaia aia katei n aomata. (Mareko 7:9-13) Ti kona n taekinna ngkanne bwa a kona ni boto aia koaua taan rimwin raoi Iesu i aon te Baibara. Ngaia are a wanawana Kristian n tatabemania nako ngkana a titirakinia aei: ‘A boraoi ana reirei au Aro ma te Baibara?’ Ibukini kaekaan te titiraki anne, e aera ngkai ko aki kabotaui ana reirei am Aro ma te bwai ae taekinaki raoi n te Baibara?
E taku Iesu bwa e riai ni boto i aon te koaua taromaurian te Atua iroura, ae te koaua ae kuneaki n te Baibara. (Ioane 4:24; 17:17) Ao e taku te abotoro Bauro bwa e boto kamaiuara i aoni karekean “te atatai ae eti ibukin te koaua.” (1 Timoteo 2:4) Ngaia are e rangi ni kakawaki bwa a na boto ara koaua i aon te koaua ae eti man te Baibara. Ai kakawakira bwa e boto iai kamaiuara!
ARONI KABOTAUAN ARA KOAUA MA TE BAIBARA
Ti kaungako bwa ko na wareki titiraki aika onoua aika karinaki ikai ao n nori kaekaaia man te Baibara. Nori kibun te Baibara aika kaotaki ao iaiangoi kaekaaia. Titirakiniko ngkanne aei: ‘A na kangaa ni kabotauaki ana reirei au Aro ma ae e taekinaki n te Baibara?’
Ko kona ni buokaki n te titiraki ni kamarau iango ae uarereke aio bwa ko na karaoa te kabotau ae te kabanea ni manena ae ko riai ni karaoia. Ko tauraoi ni kabotaui ana reirei am Aro ma ae e taekinaki n te Baibara? A na kukurei Ana tia Kakoaua Iehova ni buokiko n nenera ana koaua te Baibara ae mataata. E aera ko aki butiia te tia Kakoaua temanna bwa e na reirei ma ngkoe n te Baibara n akea boona? Ke ko kona ni kawara ara atureti n te intanete ae jw.org.