Ko a Tauraoi ni “Bwaibwai n te Aonnaba”?
TI BANE n ingainga nakoni kakororaoan ana berita Iesu aei: “A a kukurei akana nimamannei bwa a na bwaibwai n te aonnaba.” (Mat. 5:5) A na bwaibwai n te aonnaba taani kabiraki ngkana a a tautaeka i karawa bwa ueea ma Iesu. (TeKao. 5:10; 20:6) A ingainga angia Kristian ni koaua ni kani bwaibwai n te aonnaba ao ni maeka i aona n aki toki ma te kororaoi, te rau ao te kukurei. Ibukini karekean anne, e na iai te mwakuri ae kakawaki ae a na karaoia. Iangoi aika tenua aikai: tauan aron te aonnaba, tabeakinaia naake a kautaki ao n reireinia naba. Iangoa naba arom mangkai ni kaotia bwa ko tangiria n uataboa karaoani mwakuri baikanne.
TAURAOI N TAUA ARON TE AONNABA
Ngke e tua Iehova nakoia aomata bwa a na “kaona te aonnaba ao [n] taua arona,” e kaotia iai bwa e na bon riki te aonnaba ni kabutaa bwa te bwaretaiti. (KBwaai 1:28) A kantaningaaki naake a na bwaibwai n te aonnaba bwa a na ongeaba n te tua anne. E na bon aki moa bwaretaiti te aonnaba bwa are ai akea te onnaroka are i Eten. E na bati te bae e na karaoaki ni kaitiakan taabo ake a tia n urubekebeke. Bon te mwakuri ae e aki bebete!
Ti uringa iai te mwakuri are a karaoia tibun Iteraera ngke a oki mai Baburon. E tiku n aki kaainaki abaia i nanon 70 te ririki. Ma e a kaman taekinna Itaia ae man ana kakabwaia Iehova, a boni kona ni manga kaoka tamaroan abaia. E kangai te taetae ni burabeti: “E na karaoa rereuan neiei bwa kaanga Eten, ao rereuana ae aoraoi bwa kaanga ana onnaroka Iehova.” (Ita. 51:3) A boni karaoa anne tibun Iteraera. N aron anne, a kona naba naake a na bwaibwai n te aonnaba ni karikia bwa te bwaretaiti ae tikauarerei, man ana kakabwaia Iehova. Ao ko kona ni kaotia mangkai bwa ko kani uataboa te mwakuri anne.
Te anga teuana bon arom ni karaoa ae ko kona ni karaoia ni kateimatoa itiakini mwengam ma am tabo ao ni barongaia raoi. Ko kona ni karaoa anne e ngae naba ngkana a aki kakaitiaki kaain rarikim. Ko kona ni buoka kaitiakan ao kateimatoaan te Tabo n Taromauri ao Te Tabo ni Botaki Ibukin te Runga. Ngkana e angaraoi iroum, ko kona ni kanoaa te booma ni bubutii bwa ko na ibuobuoki n tain te kabuanibwai ae karina. Ko kaotia iai bwa ko tatauraoi ngkana e kainnanoaki te ibuobuoki. Titirakiniko aei, ‘I kona n reireinai rabakau tabeua aika I kona ni kamanenai ngkana I a anganaki te kakabwaia ae te bwaibwai n te aonnaba?’
TAURAOI N TABEAKINIA NAAKE A KAUTAKI
Imwin raoi kautakin natin Iairo, ao e tuatua Iesu bwa e na anganaki kanan te teei anne. (Mareko 5:42, 43) E boni bae n aki kangaanga tabeakinan te teinnaine ane 12 ana ririki anne. Ma iangoia ngkanne bwa e na tera baika a na karaoaki ngkana e a kakoroa nanon ana berita Iesu are “a na bane iai n ongo bwanaana aomata ake a mena i nanon taian ruanimate, ao a na otinako.” (Ioa. 5:28, 29) E ngae ngke e aki taekinaki rongorongo aika bati n te Baibara ibukin aei, ma ti kona ni kataamneia ae a na boni kainnanoa buokaia naake a kautaki ibukini karekeani kanaia, aia tabo ni maeka ao kunnikaia. Ko kona ni kaotia mangkai bwa ko tauraoi n ibuobuoki? Aikai titiraki tabeua aika ti na iangoi.
Tera ae ko kona ni karaoia mangkai ni kaotia bwa ko a tauraoi ni bwaibwai n te aonnaba?
Ngkana e katanoataaki ae e na kawara am ekaretia te mataniwi ae mwamwananga, ko anga nanom bwa ko na amwarake ma ngaia? Ngkana a kamwaingaki man te Betaera naake a kabwanina aia tai n te beku ae okoro nakon am ekaretia, ke ngkana e a toki moa ana beku te mataniwi ae mwamwananga, ko ibuobuoki ni kakaaea aia tabo ni maeka? Ngkana e na boo te bwabwaro n am tabo, ko anganano ni buoka te mwakuri imwain ke imwin te bwabwaro, ke n tatauraoi ni butimwaeia iruwa?
TAURAOI N REIREINIA NAAKE A KAUTAKI
N aron ae kaotaki ni Mwakuri 24:15, ti kantaningaia bwa a na kautaki aomata aika birion ma birion mwaitiia. E na bati mai buakoia ake a aki reke aia tai ni kinaa Iehova imwaini mateia. Ma e nang reke aia tai imwini kautakia.a A na ibuobuoki ana toro te Atua aika kakaonimaki ao ni mwaatai n reireinia naakai. (Ita. 11:9) E ingainga ni karaoa anne Charlotte are e a tia n uarongorongo i Eurobe, Amerika Maiaki, ao Aberika. E taku: “I ingainga ni kan reireinia aomata n tain te mangauti. Ngkana I wareka taekan temanna ae maiu rimoa ao I iaiango ni kangai: ‘Ngke arona bwa e kinaa Iehova te aomata aei, e na rangi ni kaokoro aroni maiuna.’ I ingainga ni kan tuangia aomata baike a aki atai.”
E na bati baika a na reiakin naba ana toro Iehova ake a kakaonimaki ake a maiu imwain rokon Iesu n te aonnaba. Iangoa aroni kimwareireira ngkana ti a kabwarabwaraa nakon Taniera kakoroani bukin taian taetae ni burabeti ake e korei ma e aki ota iai. (Tan. 12:8) Ke ko kona ni buokiia Ruta ao Naomi bwa a na ataa ae a riki kanoaia bwa ana bakatibu te Mesia. Ai boni kakimwareireira uataboan te mwakuri n reireinia aomata ni katobibia te aonnaba, n akean te kariri ma te katabetabe n te aonnaba ae buakaka ngkai!
Ko na kangaa ni kaotia ngkai bwa ko a tauraoi n uataboa te mwakuri aei? Te anga teuana boni man am kakorakora ni karikirakea rabakaum n angareirei ao ni katoatai n uataboa te mwakuri n uarongorongo ngkai ni katobibia te aonnaba. (Mat. 24:14) E ngae ngkana e a tiatianaki am mwakuri n te tai aei ibukin te kara ke bwaai riki tabeua, ma e kona n oti n am kakorakora bwa ko a tauraoi n reireinia naake a kautaki.
Ti na iangoa te titiraki ae kakawaki aei, Ko ingainga ni kani bwaibwai n te aonnaba? Ko ingainga ni kan taua aron te aonnaba, n ikotaki ma tabeakinaia ao reireinaia naake a kautaki? Ko kona ni kaotia bwa ko a tauraoi n arom n uataboi ngkai mwakuri n ibuobuoki aika titeboo ma aika ko na karaoi ngkana ko a bwaibwai n te aonnaba!
a Nora te kaongora ae “Kairiia Aika Bati Nakon te Raoiroi” n Te Taua-n-Tantani ae bwain Tebetembwa 2022.