Bɛ ká zʋle ka gɔnnɔnlamunun e bhɔale wó jinranlɩ yɩɩ?

1. Mɛnmanle cɩsilɩ vanun lɛ a gunin wuo ji munun le vʋlɩ drɔɔ wuo ɲaan?

Wɩnɛnnɛnnun e sie jinran Bhalɩ Zoova va, e sɔ alɛ léé gɔnnɔnlamunun e klɛ jinranlɩ ji. (1 Timoté 1:11) Yɩɩ ɛ cɩ cɩsilɩ pun ɲan. Cɩsilɩ vanun lɛ a e ziman gɔnnɔnlamunun ze ɲan. Naan, ee kɔnlée kla bhele fɛnan bheli dɔlɩ le wo bhɔale wo nɛnnun pa anan a zʋ. Vanun belidɔwɩ an dɔ cɩsilɩ le wɩ yraman tɔ jɛlɩ sɛbhɛ ji le wɩ ɲan ka tɛrɛ la, e a le kretiɛnnun a lɛdɔ a man.​—Luk 2:1, 4, 5 tafɩ.

Bhalɩ e vanun lɛ cɩsilɩ ye káá? E a va le e klɛ yifaaman vʋlɩ ecɩva ɲan. E sɔ Zoova lɛ léé te lɩsi gɔnnɛn vale bhʋsi lɩ wo dabhli klɛ wo cɩ lɛ lo. (Ébrunu 13:4) Zran vale e nan kininlɩ ecɩman za a, a ji. (Malasi 2:16) E a se kla léé kretiɛnnun wo kinin ecɩman ye wo lɩ bɛ vale gɔnnɛn bɛ si te de a dʋ bhɔra min bɛ ɲan.​—Matio 19:3-6, 9 tafɩ.

2. Bɛ ká zʋle zran vale e nan e bhɔale wo wó cɩ siaa?

Zoova gɔnnɛnnun vale Lomunun klɛ léé wo cɩ le wɩ lɛsɔɔ wo cɩsilɩ ji. (Wepélisiananu 2:18) Gɔnnɛn ɛ cɩ kɔnzan ɲan.Yɩɩ ɛ kɔnlée munun manwɩ kla, ye yɩɩ ɛ Bhalɩ le wɩ paan wo ji. E a le a nan le sɔlɛlɩ e klɛ a ji plɛplɛ, ye ebo nɔn sraka ɲan bhɛ le wɩ ji. E a le zran vale e nan wo sɔ wo cɩ lɛ, ye wo cɩ bhɔ. Naan, gun ɛ cɩ an wʋ, zran vale nan faa man, bhɛ wɩ ji, cɩman wɩ vʋlɩ draanlɩ e kla ye wo jinranlɩ yɩ wole cɩsilɩ ji.​—Éfɛz munu 4:31, 32; 5:22-25, 33; 1 Piɛri 3:7 tafɩ.

3. Naan, e a le ka si ka cɩ wuo, te de jinranlɩ ká kale cɩsilɩ ji loo?

De wɩ tɔntɔnnun a kale cɩsilɩ ji, ka fienun e kwakuli, ye ka cɩ sia sɔlɛlɩ ɲan. (1 Korɛnt munu 13:4, 5) Wɩ tɔntɔnnun le woo bhɔa cɩsilɩ ji, Bhalɩ Dere ká a fe léé silɩ ecɩman ɛ cɩ yɩɩ wɩnun lɛsɔɔlɩ ɲan lo.​—1 Korɛnt munu 7:10-13 tafɩ.

4. Káa nɛnnun, Bhalɩ a mɛn wɩ ɛ va ka ze ɲaan?

E sɔ Zoova lɛ léé ka ji e nran. Bɛan zʋle ka bhɔale ka ziin yɩ ka bhʋrʋnɛn la bhleyi va, ee bhɛ yraman wɩ tɩgɩlɩ plaan ka lɛ. E sɔ a lɛ léé ka ka yaamunun le jikininlɩ vale wole tɛrɛ la wɩ ji dɔɔlɩ man trɔn bhlɩ. (Kolɔs munu 3:20) Eziin, e sɔ Zoova lɛ léé, jinranlɩ le cɩ ka klɛzan vale e bɩ le wɩ klɛlɩ ji, ka bhɛ yɩ.​—Bale Lé We Gifezan 11:9–12:1; Matio 19:13-15; 21:15, 16 tafɩ.

5. Káa nɛn yaamunun, ka nɛnnun manwɩ a mɛn fɛ ɛ ta ye wo jinranlɩ yɩɩ?

E a le ka ɲannan pa kale plɛplɛ faa ɲan, ye ka fɛbhlɩlɩ koo, yiinan koo, e vale sɔ koo, wo nɔn kale nɛnnun lɛ. (1 Timoté 5:8) Naan, kale nɛnnun le jinranlɩ yɩlɩ wɩman, e a eziin tɩgɩlɩ léé ka Bhalɩ le sɔlɛlɩ paa wo ji e vale wo wɩ draan ale wɩ ta. (Éfɛz munu 6:4) Kale Bhalɩ le sɔlɛlɩ nangɔɔnlɩ e bhɔale e manɛn wo bhli man. Wɩnun le ka paan kale nɛn ji, de a pun a e drɔalɩ Bhalɩ Dere ta, bhɛ e bhɔale e kale nɛn wuo ji bɔrɔlɩ sansi bɛ́ ziin ta.​—Bélidɔwesɛbɛ Fiézan 6:4-7; Wegɔnévɔlenu 22:6 tafɩ.

Nɛnnun e ziin ye, te de ka wo fuu dɔa wo ta, e vale te de ka wo sɛɛn vɔa. Wo manwɩ a eziin léé wó wo drɔɔ, ye wo wɩ pla wo lɛ. Wo jiwɩ paa bɛ́ kʋ́, bhɛ e wo sie dɔbɛ le bhɛ wole jinranlɩ sie wo lee bhɛ man. (Wegɔnévɔlenu 22:15) Eziin, e ká le wo jiwɩ paalɩ e klɛ plɛplɛ lo, e vale yaalɩ min ta ɲan lo.​—Kolɔs munu 3:21 tafɩ.

Zoova le Wɩnanyɩzannun sɛbhɛ pa ciɛrɩ bhɔra te bhɛ e bhɔa nɛn yaamunun vale wole nɛnnun va. Yɩɩ sɛbhɛ panun kʋ́ pun a e drɔalɩ Biblu ta.​—Lɛrɛvɔ Sɛbɛ 19:7, 11 tafɩ.