Wɩdraanlawɩ 10

Bɛ ká zʋle i bhɔale i bhalɩban palu boin dɔɔ?

Zesu a wɩpaa nan — ‘Ka yuɛ pa ka bo va viebhalɩlayɩmunun le wɩ man.’—MATIO 7:15..

Leglizi zilɛzan dʋ a wɩfɩ nan leglizi ji, e voela e a suɲannun le wo gʋ gulidanlɛ wo drɔɔ vʋ nan. — ‘Woo wɩ fe wó lɔlu ɲan léé, wó Kazanbhalɩ dɔɔ, naan, wo sɔn vɔa a man wo klɛwɩnun ɲan.’—TITE 1:16.

Kretiɛn dʋ a Biblu jiwɩ fɩ nan. E voela e a Bhalɩ le Plalɩ min nwiin le wɩ zrandɔɔ nan. E a bhɔ nan munun le wo bhɔ min va. E a bhɔ nan munun kwakwanun va.

1. Bhalɩban palu boin a dʋ kpein?

Zesu bhalɩban palu dʋ kpein ɛ le wɩ paa e zuomunun ji, bhalɩban palu boin. E a bhele zi le ee go vʋlɩ e yuɛman le a glɛ ká lo a nan, a zʋ. Zesu a fɩ léé: ‘Min ciɛrɩ ká’ bɛ zi kʋ́ ye lo. (Matio 7:14) Bhalɩban bɛ le a pun cɩ e drɔalɩ a Dere Biblu ta, yɩɩ le Bhalɩ a ɲin sie. Bhalɩbanmunun boinnun faa a e zɛnlɩ ecɩva bhli palɩ dʋ ji.—Jan 4:23, 24; 14:6; Éfɛz munu 4:4, 5 tafɩ.

2. Mɛnwɩle Zesu a fɩ yila viekretiɛnnun le wɩ taa?

Zesu a fɩ a bhɔlɩlɛ léé, vie- bhalɩlayɩmunun e daan Zesu le wɩ ji kuulɛ. Wa wo kɔlɛ man bhele bhalɩbanmunun boin zʋ. Wole leglizi a fe léé wʋ a kretiɛn boinnun ɲan. Naan, bɛ munun kʋ́ a fɛ boin an ɲan ka bhɔale ka wo dɔɔ. Bɛ káá jii? Kretiɛnnun le wo dɔbɛ vale wo jiegannɛnnun cɩ tɩgɩlɩ, bhalɩban palu boin ɛ wo kla.—Matio 7:13-23 tafɩ.

3. Bɛ ká zʋle i bhɔale i bhalɩbanmunun boin dɔɔ?

I bhli e vʋ wo dɔɔman tɔmansɩ soru kʋ́ lɛ:

Bhalɩbanmunun boin e Biblu lɛdɔa a man bhele Bhalɩ Dere zʋ. Woo kwakulian léé wole tɛrɛla klɛ ale belidɔwɩ nɔn manwɩnun yraman. Amanle bhalɩban palu boin a e silɩ yɩɩ le e cɩ e drɔalɩ bhlaminnun jibɔrɔman wɩ ta a man. (Matio 15:7-9) Bhalɩbanmunun boin wole tɛrɛla kla wɩle wa paan munun ji, a yraman.—Jan 17:17; 2 Timoté 3:16, 17 tafɩ.
Zesu zuomunun boin e Bhalɩ tɔ Zoova bhɔa. Zesu Bhalɩ tɔ bhɔ a gɔɔnlɩ ɲan. E bhɔ munun va ye wo Bhalɩ tɔ dɔɔ, e vale e a paa wo ji léé wo bhazʋrʋ ye Bhalɩ tɔ e klɛ san-un. (Matio 6:9) Fɛan nan le i cɩ bhɛ, bhalɩban palu cɛn ɛ a tɔ gɔɔn-aan?—Jan 17:26; Rom munu 10:13, 14.
Kretiɛn boinnun e Bhalɩ le plalɩ min nwiin le wɩ fe. Bhalɩ Zesu nwunvɔ léé e plalɩ min nwiin le wɩnɛnnɛn fɩ. Bhalɩ le plalɩ min nwiin dʋ kpein ɛ cɩ bhlaminnun le bhlivʋlɛ fɛ ɲan. Zesu vʋ ale wɩ fɩnan fɔɔ ye a ga yi bhɔ a zʋ. (Luk 4:43; 8:1; 23:42, 43) Ye e le e zuomunun e daan ale wɩ fɩlɛ. De min dʋ bie i man ye kun Bhalɩ le plalɩ min nwiin le wɩ fɩlɩ man ilɛ, te bhɛ zan a bhalɩban palu cɛn ɛ jii?—Matio 24:14 tafɩ.
Zesu zuomunun ká tɛrɛ ɲannɛn kʋ́ ta munun va zannun ɲan lo. I bhɔale i wo dɔɔ, naan, woo bo sie politiki vale bɛn fie wʋrʋnan gulidanlɩ ji. (Jan 17:16; 18:36) Wo ká eziin tɛrɛlamunun klɛwɩ ɲannɛnnun e vale wo dɔbɛnun sian lo.—Jak 4:4 tafɩ.
Sɔlɛlɩ le a zʋɛlɩ ká lo, e a kretiɛn boinnun wʋrʋnan. Woo bɛn palu faa lɛdɔmanlɩ draan Bhalɩ Dere ji. Naan, viebhalɩban palunun e dɔa bhleyi cɩ va bɛntɛrɛnun le gulidanlɩ zuo, bhalɩbanmunun boinnun wo sɔn vɔa bɛ zʋɛ wɩ man. (Misé 4:1-3) Kretiɛn boinnun wole bhleyi vale wole fɛwɩzannun sie, ye wo bhɔ wó bhɔlunun va e vale ye wo bhɛnun bɛ dɔ plɛplɛ.—Jan 13:34, 35; 1 Jan 4:20 tafɩ.

4. I bhɔale i bhalɩban palu boin va sii?

Bhalɩban palu cɛn ele wɩ paalɩ min ji faa pun drɔan Bhalɩ Dere ta, te ee Bhalɩ tɔ bhɔa e vale te e a fe léé Bhalɩ le plalɩ min nwiin ɛ cɩ bhlaminnun bhlivʋlɛ fɛ dʋ kpein ɲaan? Palu káá ji le sɔlɛlɩ cɩ te wo wó sɔn vɔa gulidanlɩ maan? I bhli ji a cɛn léé?—1 Jan 3:10-12 tafɩ.

Wɩ taa yɩlɩ wɩ man, i Qu’enseigne réellement la Bible ? kulu 15 zan yɩ.