Dhormdutancho Itihas
27 Tarvantlean provas korun amkam Italik vhoronk tharailʼlem dekhun, tannim Pauluk ani her koideank Augustusachea pongddacho soinikancho odhikari Juliusachea hatant dile. 2 Ami eka tarvacher boson amcho provas suru kelo. Hem tarum Adramitium thaun Asiantlea doria deger aslolea veg-vegllea harborancher voichem aslem. Masedoniantlea Tesalonikecho Aristarkus pasun amchea borabor aslo. 3 Dusrea disa ami Sidonant pavle tednam, Julius Paulu lagim doiallaien* vaglo ani tannem taka tachea ixttanger vochonk ani tancho adar gheunk porvangi dili.
4 Thoim thaun amchem tarum bhair sorlem ani varo porto martalo dekhun ami Siprusachea doria degechea lagsorlean fuddem sorle. 5 Uprant ami doriant Silisia ani Pamfilia koddlean Lisiantlea Maira nanvachea zagear pavle. 6 Thoim soinikanchea odhikarean Aleksandriachem ek tarum polloilem jem Itali voitalem. Tannem amkam tea tarvar choddoile. 7 Uprant zaite dis sovkas-sovkas provas korun khub trasan amchem tarum Snidus zunvear pavlem. Varo amkam nitt fuddem vochonk dinaslo dekhun ami Salmonachea mukhailean Kretachea doria dege lagsorlean fuddem gele. 8 Ani khub trasan ami doria dege koddlean Surokxit Harbor mhunnttat tea zagear pavle, zo Lasia xara lagim aslo.
9 Atam zaite dis soron gelʼle ani fuddem provas korop dhokeachem aslem. Karonn Farikponnachea Disacho upas poriant zaun gelʼlo. Tor Paulun tankam oxem mhunnttlem: 10 “Ixttamno, fuddem provas korop dhokeachem zaunk xokta ani amchem saman ani tarunch nhoi punn amcho jiv pasun ami hogddaunk xoktat oxem mhaka dista.” 11 Punn, soinikanchea odhikarean Pauluchem aikonchea bodlek tarvachea kepttonachem ani tarvachea dhoniachem aikolem. 12 To harbor thonddeche dis sarunk boro naslo dekhun, zaitea zannamnim thoim thaun fuddem vochom-ia ani koxem-i korun Finiksak pavon thoim thonddeche dis sarum-ia mhunn solʼlo dilo. Finiks Kretacho ek oso harbor asa zachea utʼtor-udente vatten ani dokxinn-udente vatten tarum ieun ravonk xokta.
13 Dokxinne thaun thondd varo marunk laglo tednam, tannim chintlolem toxench zatolem oxem tankam dislem. Tor, tannim nangor voir kaddle ani Kretachea doria degechea lagsorlean tarum fuddem vhoronk lagle. 14 Ani thoddeach vellan, utʼtor-udente vattentlean Eurokilo nanvachem ek vhoddlem vadoll Kret zunvear ailem. 15 Amchem tarum tea vadollak sampoddlem ani vareak lagon amchean fuddem vochonk zaina zalem. Taka lagon, ami proitn korpache soddun dile ani varem marta tea vatten tarvak vochonk dilem. 16 Tednam ami Kauda nanvachea eka lhan zunvea lagim pavle ani tachea kuxichean voitana amkam amchea tarvachea fattlea vatten aslolea vhoddeak* samballunk khub tras zale. 17 Tem vhoddem voir voddun kaddlea uprant tannim tarum futtot mhunn tem voir thaun sokol meren razvamnim bandlem. Ani Sirtis* nanvachea zagear renvent rombot mhunn bhieun tannim xidd sokol denvoili ani tarvak varem marta tea vatten vochonk dilem. 18 Vadollak lagon tarum hevtten-tevtten dholot aslem mhunn dusrea disa tarvachem vozon unnem korunk te tarva voilem thoddem saman doriant uddounk lagle. 19 Tisrea disa, tannim apleach hatamnim xidd voir choddoupache razu doriant uddoile.
20 Zaite dis meren suria disonkuch na, na mhunn noketram-i disonk na. Ani vadoll thambpachem nanvuch ghenaslem. Taka lagon, ami amcho salvar zauncho soglo bhorvonso soddun dilo. 21 Khub disam thaun konnench kainch khaunk naslem. Taka lagon, Paulun tanchea modem ubo ravon mhunnttlem: “Ixttamno, tumi mhojem aikonk zai aslem ani Kreta thaun fuddem provas korunk zainaslo. Tednam he sogle tras ani luksonn zaunchem naslem. 22 Punn atam pasun hanv tumchea lagim dhir dhorat mhunn vinoti kortam. Karonn tumchea modlo eklo-i aplo jiv hogddaunchona, fokot tarvachem luksonn zatolem. 23 Jea Devachi hanv bhokti kortam ani zachi hanv povitr seva kortam, tacho dut kal rati mhoje koddem ailʼlo. 24 Ani tannem mhaka mhunnttlem: ‘Paulu, bhieum naka. Tum Somraza* mukhar vochon ubo ravtoloch. Ani tuka lagon tujea borabor provas kortat tancho sogleancho jiv Dev vachoitolo.’ 25 Taka lagon, ixttamno, dhir dhorat, karonn devdutan mhaka jem sanglam tem Dev kortoloch mhunn mhaka purnn visvas asa. 26 Punn amchem tarum eka zunveachea deger vochon futtʼttolem.”
27 Chovdavea rati amchem tarum Adria doriacher hevtten-tevtten dholot aslem. Tednam modlea rati amchem tarum khoinchea tori doria deger pavlam oxem tarvar kam korpeank dislem. 28 Ani tannim udkachi kholai mezli tednam ti 36 metr* khol asa mhunn kollon ailem. Anik matxe mukhar vochon porot mezlem tednam tachi kholai 27 metr* khol asa mhunn kollon ailem. 29 Tarum khoddpar vochon adllot mhunn bhieun tannim tarvachea fattlea vatten char nangor soddle ani dis uzvaddpachi vatt pollounk lagle. 30 Punn tarvar kam kortale te tarva voile pollon vochpacho proitn korunk lagle. Te tarvachea fuddlea vatten nangor ghaltat oxem nimit korun vhoddem udkant devounk lagle. 31 Paulun soinikanchea odhikareak ani soinikank mhunnttlem: “He munis tarvant ravonant zalear tumi pasun salvar zaunk xokchena.” 32 Taka lagon, soinikamnim vhoddeache razu katrun uddoile ani tem vhoddem udkant poddonk dilem.
33 Dis uzvaddcho aslo tednam, Paulu tankam tannim kitem-i khaunchem mhunn somzaunk laglo. Tannem mhunnttlem: “Tumi vatt polloun-polloun aiz 14 dis zale ani itlea disam thaun tumi kainch khaunk na. 34 Taka lagon, mhojem aikat, kitem tori khaiat. Hanv tumchea boreak lagonuch sangtam, karonn tumchea modlea konnanchoch ek kens pasun sokol poddchona.” 35 Hem sanglea uprant, Paulun unddo gheun sogleam mukhar Devache upkar attoile, ani to unddo moddun khaunk laglo. 36 Hem polloun sogleank dhir mellʼllo ani te-ui jevunk lagle. 37 Tarvant ami sogle mellon 276 zann asle. 38 Pottbhor jevlea uprant, tarvachem vozon unnem korunk te gonv doriant uddounk lagle.
39 Dis uzvaddlea uprant, to zago khoincho tem tankam kollona zalem, punn tankam ek khoddpam nasloli vell ani doriachi deg disli. Taka lagon, zata zalear tea doriachea deger tem tarum launchem mhunn tannim tharailem. 40 Tor tannim nangrache razu katorle ani doriant uddoile. Toxench, tannim tarvachea vereachem* dor soddlem ani fuddlea xiddant varo bhoron tarum doria deger voichem mhunn tem ubem kelem. 41 Punn don doria mellttat oslea zagear ektthaim zalʼlea renvent tarum zoran vochon adoll’llem ani tacho fuddlo bhag renvent romblo, ani fattlo bhag lharam marun-marun futtonk laglo. 42 Tednam koideamnim penvon pollon voichem nhoi mhunn tankam jivexim marunk soinikamnim tharailem. 43 Punn soinikanchea odhikareak koxe-i bhaxen Pauluk vachounk zai aslo dekhun tannem tankam toxem korunk diunk na. Zankam penvonk ieta tannim doriant uddi marun poilim doria deger voichem mhunn tannem tankam hukum dilo. 44 Ani urlolea lokamnim moddlolea tarvachea veg-vegllea kuddkeanchea ani folleanchea adaran todder ieunchem mhunn tannem sanglem. Oxe toren sogle lok bore bhaxen doria deger pavle.