Dhormdutancho Itihas
12 Teach disamnim Herod* raza sobhechea thoddea lokank dhumallo diunk laglo. 2 Tannem Juanvachea bhavak, Jakobak tolvarin marun uddoilo. 3 Hem polloun Judev lok khuxal zaleat mhunn kollʼllea uprant, tannem Pedrukui dhorlo. (Hem khomir naslolea unddeachea porbechea disamnim ghoddlem.) 4 Tannem taka dhorun bondkhonnint ghatlo ani char rakhonndaranche char pongodd pallien rakhonn korunk dovorle. Paskachea porbechea vellar to taka lokam mukhar haddunk* sodhtalo. 5 Pedru bondkhonnint aslo tednam, sobha tachea pasot kallzant thaun magnnem korit asli.
6 Jea disa Herod Pedruk lokam mukhar gheun ieuncho aslo, tachea adlea ratik Pedruk don sanklleamnim bandlolo ani to don soinikam modem nhidlolo aslo. Bondkhonnichea daracher rakhonndar rakhonn kortale. 7 Tednam okosmat Jehovacho* dut thoim ieun ubo ravlo, ani bondkhonnicho rum uzvaddan bhorlo. Devdutan Pedruchea khandar hat marun taka zago kelo, ani mhunnttlem: “Begin utth!” Ani tednam tachea hatak bandloleo sanklleo sutton sokol poddleo. 8 Devdutan Pedruk mhunnttlem: “Toiar zav ani tujim zotim ghal.” Tannem toxem kelem. Uprant tannem Pedruk mhunnttlem: “Tuje kopdde ghal ani mhojea fattlean ieo.” 9 Tednam to utthlo ani tachea fattlean gelo, punn to devdut kitem korta tem khorench ghoddtta mhunn taka disonk na. Taka apunn ek dorxon polloita oxem dislem. 10 Rakhonndaranchi poili ani dusri chouki par korun te lokhnnachea darvonttea lagim pavle zo xara vatten ugoddttalo. To darvontto tanchea pasot apxinch ugoddlo. Thoim thaun bhair sorlea uprant, te eka rostear pavle, ani rokddoch to devdut thoimsorlean gelo. 11 Tednam Pedruk kitem ghoddtta tem somzolem, ani tannem mhunnttlem: “Jehovan* aplea dutak dhaddun mhaka Herodachea hatantlo salvar kelo ani Judev mhojea thaim jem ghoddttolem mhunn axeun asle tantuntlo-i mhaka rakhlo mhunn mhaka khatri zalea.”
12 Uprant to Mariechea ghora gelo, ji Marku mhunnttlolea Juanvachi avoi asli. Thoim zaite zann ektthaim asle ani magnnem korit asle. 13 Pedrun darar marlem tednam, Rhoda nanvachi ek chakorn, konnem darar marlem kai mhunn pollounk aili. 14 Pedrucho avaz vollkhotanch, ti khuxal zaun dar ugodd nastana, bhitor geli ani Pedru darar ubo asa mhunn sogleank sangonk lagli. 15 Tannim sogleamnim tika mhunnttlem: “Tum pixi zalea.” Punn ti porot-porot Pedru khorench aila mhunn sangonk lagli. Tannim tika mhunnttlem: “To tacho devdut.” 16 Punn Pedru darar marit ravlo. Tannim dar ugoddlea uprant taka polloilo tednam, te sogle ojap zale. 17 Punn Pedrun hatan khunna korun tankam vogi ravonk sanglem ani Jehovan* taka bondkhonnintlo koso soddoilo tem bariksannem tankam sanglem, ani mhunnttlem: “Hem vochon Jakobak ani dusrea bhavank sangat.” Ani uprant to bhair sorlo ani dusrea eka zagear gelo.
18 Dis zalo tednam rakhonndaram modem Pedru khoim gelo kai mhunn bovall zalo. 19 Herodan taka sodhunk bhorpur vavr kelo, punn to mellona mhunnttoch, tannem rakhonndaram lagim choukoxi keli ani tankam xikxa diunk laili. Ani to Judeia thaun Sezaria gelo ani thoim thoddo vell ravlo.
20 Herod, Tir ani Sidon ganvchea lokancher ekdom ragar aslo.* Tor te sogle ek udʼdhexan, tache lagim aile ani tannim razachea ghoracher odhikar aslolea Blastus nanvachea munxachea adaran raza lagim xanti korunk proitn kelo. Karonn tanchea desant razachea desantleo jevnna-khannacheo vostu ietaleo. 21 Uprant eka tharailʼlea disa razache kopdde ghalun Herod neai korpachea xinvasonar boson lokank bhaxonn diunk laglo. 22 Tachim utram aikon thoim ektthaim zalʼle lok mottʼttean bob marunk lagle: “Ho avaz munxacho nhoi, to devacho avaz!” 23 Teach vellar, Jehovachea* dutan tacher ek duens dhaddlem, karonn tannem Devak mhoima diunk na. Tachea kuddik kidde poddle ani to melo.
24 Punn Jehovachem* utor posrot gelem ani khub lokamnim bhavarth dovorlo.
25 Jeruzalemant modot korpachem kam kelea uprant, Barnabas ani Saulu porot gele. Tannim aplea borabor Juanvak vhelo, zaka Markui mhunnttale.